LUKA 20

Riborio igoro y’okobua kwa Yeso

(Mat 21:23–27; Mar 11:27–33)

1Rituko erimo ekero Yeso arenge kworokereria abanto Hekalu ime, na korandia enchili, abakuani abanene na aborokia b’amariko amo nabagaaka bakamoorokera, 2bakamotebia, “Totebie nase okobua ki ogokora aya? Ning’o okoete okobua oko?”

3Akabatebia, “Nainche nkobaboria nde inwe ring’ana erimo, montebie: 4Ebatiso ya Yohana, nigoro yarwete, gose nase mwanyabanto?”

5Bagatebania barabwo ase barabwo, bakobora, “Toise goteba: Nigoro yarwete, nigo aratoborie: Naki motamwegenete rende? 6Korende toise goteba: Nase mwanyabanto yarwete, abanto bonsi nabatoake amagena; ekiagera banchire ng’a Yohana nomobani orenge.” 7Bakairaneria, “Titomanyeti aase yarwete.”

8Yeso akabatebia, “Nonya ninche tinkobatebia inwe nase okobua ki ngokorera aya.”

Omoreng’anio bw’omogondo bw’emesabibu

(Mat 21:33–46; Mar 12:1–12)

9Agachaka gotebia abanto omoreng’anio oyo: “Omonto akarema omogondo, agasimeka emesabibu imeo, akaywatananera abaremi, akagenda orogendo ase engaki entambe. 10Ekero kie rigesa agatoma omosomba ase abaremi baria, erinde bamoe ensemo yaye y’amatunda ’emesabibu. Abaremi bakamoaka, bakamoseria atari na gento. 11Naende agatoma omosomba onde; bakamoaka oyio boigo, bakamokora bobe, bakamoseria atari na gento. 12Agatoma naende oyo o gatato, bakamoaka chingoma, bakamotuguta isiko. 13Oria omonyene omogondo bw’emesabibu akabora: Inki ndakore? Nintome omwana one, omwanchwa one, aande ere inabamosike. 14Korende abaremi baria bagachia komorora, bagatebania barabwo ase barabwo: Oyo nere omonyamwando, tomoite gaki, omwando onyare koba oyoito. 15Bakamotuguta isiko korwa ase omogondo bw’emesabibu, bakamoita. Naki rende oria omonyene omogondo bw’emesabibu arabakore? 16Nachiche asirie abaremi baria, na omogondo oria bw’emesabibu nayoe abande.” Bagachia koigwa aya, bakabora, “Taba bo.” 17Akabarigereria, akabora, “Engencho yaye ninki, ring’ana eri ririkeire:

“Rigena abaagachi bangete

riabeire rigena rinene ri’ekoona?”

18“Kera omonto oragwe igoro ase rigena erio nabunanekane, na ere oyo riragwere narimosenyente.”

19Aborokia b’amariko na abakuani abanene bakarigia komobwata ensa eyio eyio, ekiagera bamanyete ng’a omoreng’anio oria nabwo agoteba, korende bakairoka abanto.

Riborio igoro y’okoa Kaisari ebango

(Mat 22:15–22; Mar 12:13–17)

20Erio bakamoboera Yeso, bagatoma chirooti, na barabwo bagekora buna nabanyene oboronge, erinde bamobwate ase ogokwana kwaye, bamobeke ase okobua kwa gavuna na obogambi bwaye. 21Bakamoboria, “Omworokia, twamanyire ng’a nigo ogokwana na kworokereria ayare boronge, gose tori koyiera monto, korende ase ekeene nigo okworokereria enchera ya Nyasae. 22Inee! Mboronge koa Kaisari ebango, gose taibo?”

23Korende akamanya obong’ainereria bwabo, akabatebia, 24“Inyorokia ebesa! Ekieni eke na amariko aya nebiang’o?”

Bakabora, “Nebia Kaisari.”

25Akabatebia, “Nabo, ebia Kaisari moe Kaisari, na ebia Nyasae moe Nyasae.”

26Tibanyara komobwata ase ring’ana riaye ase obosio bw’abanto; bagakumia ase okoiraneria kwaye, bagakira.

Riborio igoro y’okobokigwa

(Mat 22:23–33; Mar 12:18–27)

27Erio abande ase Abasadukai bakamochiera, baria bakobora ng’a okobokigwa tikori, 28bakamoboria, “Omworokia, Musa natorikerete ng’a momura omwabo omonto karakwe, na ere nare nomokungu, korende tari nabana, nagwenerete momura omwabo atware omokungu oria, atenenerie momura omwabo egesaku. 29Bono mbarenge abamura ba ise omo batano na babere. Oyo bwe ritang’ani akanyuoma omokungu, agakwa, tatiga abana; 30na oyio o kabere akamotwara, na ere agakwa, tatiga bana; 31nonya noyo o gatato akamotwara. Naboigo bonsi batano na babere bagakwa, tibatiga abana. 32Nyuma y’ayio omokungu oria nere agakwa. 33Inee! Ase okobokigwa mokang’o arabe? Ekiagera bonsi batano na babere mbamotwarete.”

34Yeso akabatebia, “Abana b’ense eye nigo bakonyuoma na konyuomwa; 35korende barabwo ababarirwe bagwenerete konyora ense eria, na kobokigwa korwa ase abakure, tibakonyuoma, gose tibakonyuomwa. 36Naende tibagokwa, ekiagera nigo barabe koreng’ana buna abamalaika, na abana ba Nyasae bare, ekiagera nabana b’okobokigwa. 37Nonya Musa norokereretie ng’a abakure nkobokigwa bare. Ayio nabo atebete agwo ase ring’ana ri’egetutu, ekero agwatora Omonene ng’a nere Nyasae o Ibrahimu, na Nyasae o Isaka, na Nyasae o Yakobo. 38Nabo ere tari Nyasae bw’abakure, korende Nyasae bw’abare moyo, ekiagera bonsi nigo bare moyo asare.”

39Abande ase aborokia b’amariko bakairaneria, “Omworokia, gwakwanire buya.” 40Naki monto onde taba okomoboria ring’ana nyuma ase aya.

Riborio igoro ya Masihi

(Mat 22:41–46; Mar 12:35–37)

41Akabatebia, “Naki abanto bagoteba ng’a Kristo nomwana o Daudi? 42Naki Daudi nigo agoteba ase ebuku ya Zaburi,

“Omonene agatebia Omonene one,

Ikaransa ensemo y’okoboko kwane gw’okorio,

43goika mbeke ababisa bao babe inse y’amagoro ao.

44“Daudi nigo akomoroka Omonene, naki rende aba omwana oye?”

Ogokurerwa igoro y’aborokia b’amariko

(Mat 23:1–36; Mar 12:38–40; Luk 11:37–54)

45Ekero abanto bonsi bamotegererete agatebia aborokigwa baye, 46“Mwerende korwa ase aborokia b’amariko, abanchete gotaara beboyetie chianga chintambe, na gokwanigwa ase chichiiro, na goikaransa aase e ritang’ani ase chisinagogi, na aase e ritang’ani ase emeyega, 47abakourereria chinyomba chi’ababoraka, na ase obong’ainereria basaba ogosaba ogotambe. Abwo nabanyore ekina kere ekenene kobua.”

Currently Selected:

LUKA 20: EKEGUSIIBBLE

Highlight

Copy