LUKA 16

Omorendi otarenge omwegenwa

1Naende agatebia aborokigwa baye, “Narenge omonto omonda, orenge nomorendi. Oyio agasoerwa asare ng’a osiareire enibo yaye. 2Akamorangeria, akamotebia: Ninki eke naigure asore? Orokia amang’ana ay’oborendi bwao, ekiagera tokonyara kogenderera koba omorendi. 3Omorendi oria akabora ase omoyo oye: Ninki ndakore, ekiagera omonene one ondusirie ase oborendi bwane? Tindi ne chinguru chi’okorema; ogosaba nobosooku asende. 4Namanyire eke ndakore, erinde abanto bandoisie ase chinyomba chiabo, ekero nkorusigwa ase oborendi. 5Erio akarangeria abasira b’omonene oye, oyomo ase oyomo, akaboria oyo bwe ritang’ani: Ninki oriete ki’omonene one? 6Akairaneria: Ebirengo rigana erimo bi’amaguta. Akamotebia: Bogoria ekaratasi yao, ikaransa bwango, orike emerongo etano. 7Naende akaboria oyonde: Naye ninki oriete? Akairaneria: Ebirengo rigana erimo bi’engano. Akamotebia: Bogoria ekaratasi yao, orike emerongo etano na etato. 8Omonene oria agatogia omorendi otarenge omoronge, ekiagera akorete ase obong’aini. Naki abana b’ense eye nabang’aini kobua abana b’omobaso, ase ekegori kiabo abanyene.

Enchera engiya y’ogokorera enibo emeremo

9“Nkobatebia nde inwe: Ekorere abasani nenibo y’ense eye etari boronge, erinde ekero egochia gokea, babaroisie inwe ase obomenyo bwa kare na kare.

10“Oyore omwegenwa ase ekere egeke, nabo are omwegenwa ase ekere ekenene; na oyotari omoronge ase ekere egeke, naboigo tari omoronge ase ekere ekenene. 11Onye timobeti abegenwa ase enibo y’ense eye etari boronge, ning’o oranyare kobegena koba nenibo y’ekeene? 12Onye timobeti abegenwa ase ekio ki’omonto onde, ning’o oranyare kobaa ekio ekere kiaino abanyene? 13Mosomba onde tari oranyare gokorera abanene babere, ekiagera nageche oyomo, na anche oyonde, gose nabwatane noyomo, na achaye oyonde. Timokonyara gokorera Nyasae na enibo.”

Ogotogonyerwa kw’Abafarisai

14Abafarisai abarenge abanchi enibo bakaigwa amang’ana aya onsi, bakamosekereria. 15Akabatebia, “Inwe nabanto mogwetogia ng’a nigo more abanyene oboronge ase obosio bwa mwanyabanto, korende Nyasae omanyire chinkoro chiaino, ekiagera ekeimokererete igoro ase mwanyabanto, Nyasae nigo akegechete.

16“Amachiko narengeo, na ababani boigo, goika ekero kia Yohana. Korwa ekero keria amang’ana amaya ay’oboruoti bwa Nyasae nkorandigwa are, na kera omonto nigo akobosoa ne chinguru. 17Korende naango kobua igoro na ense goeta, kobua enuguta eyemo y’amachiko korua aroro.

18“Kera oyogotiga mokaye na konyuoma oyonde otomanire, nere oyokonyuoma oyotigirwe nomosacha oye, noyio otomanire.

Omonto omonda na omosabi Lazaro

19“Narenge omonto gete omonda, orenge kweboyia chianga chimonyinga na echi’egatani engiya, na kwegokia kera rituko ase okoria. 20Na ase egesieri kiaye narengeo omonto oyomo omotaka, erieta riaye Lazaro, orenge namaote amange. 21Ere nigo arenge kogania kweigotia namatori are kogwa korwa ase emesa y’omonda oria, ne chisese nachirochio chicha chiamomena amaote aye. 22Omotaka oria agakwa, akabogorigwa nabamalaika, akabekwa ase egekuba kia Ibrahimu. Na oria omonda agakwa boigo, agatindekwa, 23na ekero aare agwo aase abakure akaimokia amaiso aye, akarora Ibrahimu okare aare, na Lazaro ore ase egekuba kiaye. 24Akarera, akabora: Tata Ibrahimu, indorera amabera, toma Lazaro atobeke ekiara kiaye mesia ase amache, akendie oromeme rwane, ekiagera nachandekire ase omorero oyo. 25Ibrahimu akabora: Omwana one, inyora buna kwanyorete amaya ao ase obogima bwao, na Lazaro boigo akanyora amabe, korende ere bono aiga oremigwe, na aye ngochandeka ore. 26Na kobua aya onsi, egati yaito na inwe eoromomo nereo yabekirwe, erinde abanto abarigetie korua aiga bamboke gocha asore tibanyara, gose baria bare agwo tibanyara kwamboka gocha asetore. 27Akabora: Nagosabire tata, omotome ase enyomba ya tata, 28ekiagera ninkare nabamura baminto batano; tiga agende abakurere, erinde barabwo tibacha aa ase emechando. 29Ibrahimu akabora: Mbare na Musa na ababani; tiga baigwere barabwo. 30Akabora: Yaya, tata Ibrahimu, korende oyomo korwa ase abakure aise kobachiera, inabaonchoke. 31Akamotebia: Bataigwereti Musa na ababani, naisa koboka omonto korwa ase abakure, tibakoebererigwa banche.”

Currently Selected:

LUKA 16: EKEGUSIIBBLE

Highlight

Copy