YOHANA 7

Yeso na bamura bamwabo

1Nyuma ase aya Yeso akaba ogotaara ase Galili; naki tarigetie gotaara ase Boyahudi, ekiagera Abayahudi nigo barenge korigia komoita. 2Naende rituko rinene ri’Ebigutu ri’Abayahudi nigo riarenge ang’e. 3Bamura bamwabo bakamotebia, “Imoka korwa aiga, ogende Boyahudi, erinde aborokigwa bao banyare korora emeremo yao ogokora. 4Naki monto onde tari ogokora ring’ana bobisi onye ere omonyene origetie komanyekana. Kogokora aya eorokie ase ense.” 5Naki nonya mbamura bamwabo tibamwegenete.

6Yeso akabatebia, “Ekero kiane tikeraika, korende ekero kiaino botambe nkereo. 7Ense tekonyara kobagecha inwe, korende nigo engechete inche, ekiagera inche nkoyeorokia ng’a emeremo yaye nemebe. 8Genda inwe abanyene ase rituko rinene; tindi gotiira gochia ase Rituko Rinene, ekiagera ekero kiane tikeraika.”

9Agachia gokoora kobatebia aya, agatigara Galili.

10Goika ekero abamwabo bachia gotiira, nere boigo agatiira gochia ase Rituko Rinene, tari maiso marore, korende ase bobisi. 11Nabo Abayahudi bakamorigia ase rituko erio bakobora, “Ng’ai are oyio?” 12Okwemurungania okonene gokaba ase egati y’omoganda ase engencho yaye. Abande bakabora, “Nigo are omonto omuya,” na abande bakabora, “Taibo, korende nigo agotantania omoganda.” 13Korende omonto tari omwatorete maiso marore ase engencho y’okoiroka Abayahudi.

Yeso okworokereria agwo Yerusalemu ng’a ere nigo arwete ase Nyasae

14Goika egachia koba gati‐gati ye Rituko Rinene Yeso agatiira, agasoa Hekalu ime akorokereria. 15Abayahudi bagakumia ase aya, bakabora, “Naki amanyete chisemi, na ere tasometigwe?”

16Yeso akabairaneria, “Okworokereria kwane tari okwane, korende nokwaye ere oyontomete. 17Omonto karanche gokora ogwancha kwaye, namanye gose okworokereria oko nigo gokorwa ase Nyasae, gose nigo ngokwana ase okobua kwane omonyene. 18Ere oyogokwana ase okobua kwaye omonyene nigo akorigia obonene bwaye omonyene; korende ere oyokorigia obonene bw’oria omotomete, nigo are oyo bw’ekeene, na asare obong’ainereria tiboiyo. 19Inee! Musa tabaete amachiko? Korende onde oino tari oyobwatete amachiko. Nase ki mokorigia kong’ita?”

20Omoganda okairaneria, “Nore nekerecha! Ning’o okorigia kogoita?”

21Yeso akabairaneria, “Nakorete ogokora okomo, na inwe mwensi nigo mogokumetie. 22Musa akabaa okwaroka (tari ng’a nigo korwete ase Musa, korende ase chisokoro chiaino), na inwe nigo mogosara omonto ase rituko ri’Esabato. 23Gaki onye omonto ogosarwa rituko ri’Esabato, erinde amachiko a Musa tasareka; naki mokombea ekiagera nakora omobere bwonsi bw’omonto koba omogima kegima rituko ri’Esabato? 24Timogamba ekina ase engencho y’ekieni, korende nacha ekina ase oboronge.”

25Abande ase abanto ba Yerusalemu bakabora, “Oyo tari ere omonto oria bakorigia goita? 26Nao are aa gokwana maiso marore gose tibari komotebia ing’ana? Aande gose abanene bamanyire bori ng’a nere Kristo? 27Na oyo twamomanyire aase arure, korende Kristo karache, onde tari oramanye aase akorwa.”

28Erio Yeso agaaka eriogi riaye ase Hekalu ime, okworokereria, okobora, “Inche momanyete, na aase narure mwaamanyire, naende tinyerenteti inche omonyene, korende ere oyontomete noyo bw’ekeene, oyio motamanyeti inwe. 29Korende inche nimomanyete, ekiagera naruete asare, nere ontomire.”

30Igo bakarigia komobwata, korende onde tari oramborete okoboko kwaye, erinde amobwate, ekiagera ensa yaye konya teraika. 31Abanto abange ase omoganda bakamwegena, bakabora, “Inee! Kristo ekero arachiche nakore ebikone ebinge mono kobua ebi iga oyo akorire?”

32Abafarisai bakaigwa omoganda okwemurungania igoro yaye. Erio abakuani abanene na Abafarisai bagatoma abarendi erinde bamobwate. 33Erio Yeso akabora, “Nkere ekero egeke inde amo nainwe, erio ningende asare ere oyontomete. 34Namondigie, korende timokoonyara; na aase ndabe inche, timokonyara gochao.”

35Nabo Abayahudi bagatebania barabwo ase barabwo, “Oyo ng’ai aragende goika intwe titomonyora? Nigo aragende ase Abagiriki abwo abaatananekire na kworokereria Abagiriki abwo? 36Ing’ana ki erio akwana: Namondigie, korende timokoonyora, na aase ndabe inche, timokonyara gochao?”

Amache are moyo

37Nase rituko ri’omoerio, Rituko riria Rinene, Yeso agatenena, agakwana neriogi rinene akabora, “Onye omonto ore nerang’o, tiga ache asende anywe! 38Oyonyegenire inche, buna amariko agoteba, chindooche chi’amache are moyo nachirue ase enkoro yaye.”

39Ring’ana eri nigo arikwanete igoro y’Omoika, ekiagera baria bamwegenire nabayonyore nyuma, ekiagera Omoika Omochenu konya toraruegwa, ekiagera Yeso konya taraegwa obonene.

40Nabo abanto bande ase omoganda bagachia koigwa amang’ana ayio, bakabora, “Oyo ase ekeene nomobani oria.” 41Abande bakabora, “Oyo nere Kristo.” Korende abande bakabora, “Inee! Kristo nigo ararwe Galili? 42Ririko tiriri goteba ng’a Kristo nigo ararwe ase oroiboro rwa Daudi, naende ase Bethlehemu, agachie karia Daudi amenyete?” 43Erio ogwatananekana kogasoa ase omoganda ase engencho yaye. 44Abande ase barabwo bakarigia komobwata; korende monto onde taramborete okoboko kwaye erinde amobwate.

45Abarendi baria bakairana ase abakuani abanene na Abafarisai, na barabwo bakababoria, “Naki motamorenta?”

46Abarendi baria bakairaneria, “Tana gokwana monto onde bwensi buna oyo agokwana!”

47Erio Abafarisai bakabairaneria, “Inee! Nainwe boigo mwatantanigwe?

48“Ning’o ase abanene baito omwegenire, gose ase Abafarisai? 49Korende omoganda oyio, otamanyeti amachiko, oragererigwe.”

50Nikodemo, oria omochierete botuko, oyorenge oyomo asebare, akababoria, 51“Inee! Ogochika gwaito nkonachera kore omonto ekina ritang’ani totaramoigwa na komanya egiakora?”

52Bakairaneria, “Inee! Naye boigo n’Galili kwarwa? Rigia, orore ng’a mobani takorwa Galili.”

[Bakagenda kera omonto bwoye.

Currently Selected:

YOHANA 7: EKEGUSIIBBLE

Highlight

Copy