OMOCHANKO 7
7
Etoigo
1Erio Omonene agatebia Nuhu, “Soa ase obwato ime amo nabanto bao, ekiagera nakororire ng’a aye bweka ase ekegori eke nigo ore omonto omoronge ase obosio bwane. 2Oirane amo naye ching’iti chichenegete chirabe ekeng’wanso, isano na ibere isano na ibere, chinsacha ne chinkungu; na ase kera eng’iti etachenegeti, ibere ibere, ensacha na enkungu. 3Naende oirane ne chinyoni chikoiruruka, isano na ibere isano na ibere, chinsacha ne chinkungu. Okore ayio ase engencho y’okorenda kera egesaku kegenderere koba moyo ase ense. 4Nyuma y’amatuko atano na abere nindete embura ase ense etwe amatuko emerongo ene, omobaso na obotuko, na kende gionsi nakorete kere moyo ase ense ningesirie.” 5Na Nuhu agakora ayio onsi buna Omonene amochigete.
6Nuhu nigo arenge nemiaka amagana atano na rimo (600) engaki etoigo yachete ase ense. 7Nuhu agasoa ase obwato ime amo nabana baye abamura, na mokaye, na baka bamura baye, ase ogwetooria korwa ase etoigo eria. 8Na ase ching’iti chichenegete chirabe ekeng’wanso, ne ching’iti chitachenegeti, ne chinyoni, na echi chionsi chikwagura igoro ase ense, 9chigasoa ase obwato amo na Nuhu ibere ibere, chinsacha ne chinkungu, buna Nyasae achigete Nuhu. 10Ekaba nyuma y’amatuko atano na abere, etoigo egacha ase ense.
11Ase omwaka oria ekero Nuhu akoorire emiaka amagana atano na rimo (600), ase rituko ria ikomi, na gatano na kabere ri’omotienyi o kabere, chinsoko chionsi chi’amache chikabera ne chinguru korwa inse, na ebibao bia igoro bikaigoka, 12na embura egatwa igoro ase ense ase engaki y’amatuko emerongo ene, omobaso na obotuko. 13Ase rituko erio erio Nuhu agasoa ase obwato ime amo na Shemu, na Hamu, na Yafeti, bamura baye, na mokaye, na baka bamura baye batato. 14Amo nabarabwo chigasoa ching’iti chi’orosana echia kera egesaku, ne ching’iti chigotugwa echia kera egesaku, na echikwagura echia kera egesaku, na kera enyoni y’egesaku kende gionsi. 15Na chirochio chionsi echiare moyo chigasoa ase obwato amo na Nuhu, ibere ibere. 16Echi chionsi chiasoete, chinsacha ne chinkungu chire moyo chia kera egesaku, chigasoa buna Nyasae achigete Nuhu, na Omonene akamosiekera egesieri.
17Etoigo eria ekagenderera igoro y’ense ase engaki y’amatuko emerongo ene, naro amache akamentekana, agacheng’enenia obwato na koboimokereria igoro mono korwa ase ense. 18Amache agaichora, akamenteka mono igoro y’ense, na obwato boria bogacheng’enena ase amache igoro. 19Amache akagenderera komenteka goichora igoro ase ense goika ebitunwa bionsi ebitambe, ebiare ande onsi inse y’erioba, bigatubwa. 20Amache akamenteka goichora, agatiira goika ebirengo bi’amaboko ikomi na atano igoro y’ebitunwa bionsi. 21Na chionsi echiare moyo, chiare gotaara ase ense, chigakwa; chinyoni, ne ching’iti chiatugire, ne ching’iti chi’orosana, na echikwagura, amo na mwanyabanto bonsi. 22Bionsi ebiarenge ase ense enyomo bigasirigwa, ebi bionsi biare koeyanera chimioro bire moyo. 23Nyasae agasiria ebinto bionsi biare moyo, ebiarenge igoro ase ense, mwanyabanto ne ching’iti, na echikwagura, ne chinyoni chia igoro; bionsi bigasirigwa korwa ase ense engima; Nuhu bweka agatoorigwa amo nabwo barenge amo nere ase obwato ime. 24Amache akagenderera goichora igoro ase ense ase engaki y’amatuko rigana erimo, na emerongo etano (150).
Currently Selected:
OMOCHANKO 7: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
