OMOCHANKO 49

Yakobo ogosesenia abana baye ikomi na babere

1Erio Yakobo akarangeria abamura baye, akabatebia, “Sangererekana asende aa, mbatebie amang’ana arabanyore ase amatuko agochi‐gocha.”

2“Inchuo montegerere, inwe abana ba Yakobo; montegerere inche Israeli iso.

3“Reuben, aye nomwana one omotangi,

aye nokobua kwane, na ogotongora gwe chinguru chiane.

Noetanetie abamino ase okobua,

nobaetanetie ase chinguru.

4Aye nkwaberete buna amache;

korende togoetania abande,

ekiagera nkwararete na moga iso, ase igo okarenta obosooku.

5“Simeoni na Lawi naba ng’ina omo,

ebirwanero biabo nebi’obotindi.

6Omoyo one tosoa ase obobisi bwabo,

gose enkoro yane tesanga ase omosangererekano obo;

naki ase endamwamu yabo mbaitete abanto,

na ase obomwenu bwabo bakanacha chinteng’e chie chintang’ana.

7Endamwamu yabo eragererigwe, ekiagera nigo yarenge entindi,

na ekeririanda kiabo, ekiagera tikiarenge namabera.

Nimbaatanane ase abana ba Yakobo,

nimbasiarere ase abana ba Israeli.

8“Aye Yuda, abamino inabagotogie;

okoboko kwao inakobwate ebigoti bi’ababisa bao;

abamura ba iso inabagosike.

9Yuda, aye nendo ensae.

Omwana one, gokorwa gotwara, nigo oratiire,

na korara, na gotimoka buna endo,

buna endo eaberi—ning’o orabe noboremu kogotura?

10Enyimbo y’obogambi tekorua o Yuda,

gose omobeki amachiko ase ororereria rwaye,

goika achiche oyo orabogorie obogambi,

oyo abanto b’ebisaku bionsi baraigwere.

11Nigo arasibe etigere yaye ase omote bw’omosabibu,

na emori y’etigere yaye ase chinsagia chi’omosabibu omuya.

Nigo arasibie egetambaa kiaye akwambara nedivai,

ne chianga chiaye namache amonyinga ’amasabibu.

12Amaiso aye nigo arabe amabariri ase okonywa edivai,

na amaino aye abe amarabu ase okonywa amabeere.

13“Sabuloni nigo aramenye ase enyancha mbarabare,

agwo ase chimeeri chigotenenigwa,

orobebe rwaye rosinyane norw’Abasidoni.

14“Isakaru netigere ere ne chinguru, ekorara obweri bwe chitugo.

15Akarora ng’a aase agotimokera naagiya,

na ense eria nero ekomogwenera.

Ase igo agekumba abogorie egurube,

akerua kogenderera nemeremo emekong’u.

16“Dani nagambere abanto baye,

buna egesaku ekemo ki’Abaisraeli.

17Dani nabe eng’iti ekweriba inchera,

ring’ere ase oboeto,

rikoroma egetingiro ki’ebarasi,

goika oyoyeriinete agwe masogota.

18Omonene, ninganyete ogotooreka kwao nogosemeria!

19“Gadi namigwe nemeganda y’esegi,

korende nere nabamige korwa nyuma.

20“Aseri natware endagera y’obonoru,

narue endagera engiya eragwenere abaruoti.

21“Nafutali nengabi esiboire ekominyoka mono,

nigo agosokia amang’ana amaya.

22“Yusufu nomote omorere okwama ang’e nensoko;

chinsagia chiaye nigo chikoranda orobago igoro.

23Abaruti emegwe bakomoimokera ase okomochanda bororo,

bakomoruta emegwe na komorosia,

24korende obota bwaye tibogosukigwa.

Amaboko aye nigo are ne chinguru, naende namaango,

goetera ase amaboko ’Omonyene Chinguru o Yakobo,

oyore Omorisia na Egetare gia Israeli.

25Nyasae o iso, nere oragokonye,

Nyasae Omonguru, nere oragosesenie

nogosesenigwa gokorwa igoro,

na ogosesenigwa gokorwa chindiba inse,

na ogosesenigwa gokorwa inda na ase chimbeere.

26Ogosesenigwa gwa iso nkore ne chinguru

ngoetanetie okw’ebitunwa bia kare,

na obonene bw’ebigoro bia kare na kare.

Ogosesenigwa okwo kobe egutwa y’omotwe o Yusufu,

igoro y’egiototeri ki’oyore omogambi ase egati y’abamwabo.

27“Benjamin nesese y’orosana ekoria mono,

engaki ya mambia yaria ebi’obotwari bwaye,

na engaki ya mogoroba bwatanana ebiasakoire.”

28Ebi nabio ebisaku bia Israeli ikomi na bibere; naya naro ise abatebetie ekero are kobasesenia na koa kera oyomo ogosesenigwa kwaye.

Ogokwa kwa Yakobo

29Erio Israeli akabachika, akabora, “Inche nkoirwa inde gosangererekana amo nabanto baane. Montindeke ase chisokoro chiane chiatindegetwe ase rikuruma ri’oboremo bware bw’Efuroni Omohiti, 30rikuruma eri rire ase oboremo agwo Makipela, moocha ya Mamure, ase ense ya Kanani. Oboremo boria Ibrahimu agorete korwa ase Efuroni Omohiti bobe aase ogotindeka. 31Agwo nao Ibrahimu atindegetwe ase Sara mokaye ensemo; agwo nao Isaka na Rebeka mokaye batindegetwe, na agwo inche omonyene natindegete Lea. 32Oboremo obwo amo ne rikuruma riria nigo biagoretwe korwa ase Abahiti.” 33Ekero Yakobo akoorete gochika abamura baye amang’ana aya, akaimokia amagoro aye, akayabeka borere igoro; erio agakwa agasangererekana amo nabanto baye.

Currently Selected:

OMOCHANKO 49: EKEGUSIIBBLE

Highlight

Copy