OMOCHANKO 47
47
Isiraeli na abana baye bakomenya Goseni
1Erio Yusufu akagenda agatebia Farao, “Tata na bamura baminto bachire korwa ase ense ya Kanani, amo ne chitugo chiabo, ching’ondi ne chiombe, na binde bionsi bare nabio; barabwo nao bare ase ensemo ya Goseni.” 2Agachora abamwambo batano, akabaira ase obosio bwa Farao. 3Farao akababoria, “Emeremo yaino nereri?”
Bakamoiraneria, “Intwe abasomba bao nigo tore abarisia be chitugo, buna nechisokoro chiaito chiarenge.” 4Naende bakamotebia, “Nigo twachire tobe abamenyi b’ense eye, ekiagera intwe, abasomba bao, titori naase tokorisia amaicho aito, ekiagera enchara nenene mono ase ense ya Kanani. Ase igo koranche otoe intwe, abasomba bao, ribaga tomenye ase ensemo ya Goseni.” 5Erio Farao agakwana na Yusufu, akamotebia, “Narorire ng’a iso na abamino bagocheire. 6Bono ense ya Misiri nigo ere ase obosio bwao; bae iso na bamura bamino ribaga bamenye aase are aagiya. Tiga bamenye ase ensemo ya Goseni, naende onye komanyete bande ase egati yabo abamanyete mono emeremo y’obotugi, obabeke babe abateneneri ase chitugo chiane.”
Yakobo ase obosio bwa Farao
7Erio Yusufu akarenta Yakobo ise, akamoira ase obosio bwa Farao; na Yakobo agasesenia Farao. 8Farao akaboria Yakobo, “Inee! Emiaka yao nerenga?”
9Yakobo akamoiraneria, “Emiaka yane nakoorire ase ense eye nerigana erimo, na emerongo etato (130). Ase obogima bwane nigo nabeire nobokong’u, naende emiaka yane nemeke, teikereti eye chisokoro chiane bakoorete ase obogima bwabo.” 10Yakobo agasesenia Farao naende, akarua ase obosio bwaye. 11Yusufu akaa ise amo na bamura bamwabo aase bakomenya, akabaa Ramesesi, orogongo oruya, ensemo engiya mono y’ense eria, buna Farao achigete. 12Nere Yusufu akaba okorenda ise amo nabamwabo bonsi, akabaa endagera buna kera omonto abwate abanto baye bang’ana.
Enchara ekomentekana, na ense yonsi y’Abamisiri ekoonigwa ase Farao
13Bono ase ense yonsi endagera tiyarengeo; na enchara nigo yarenge endito mono, konya yanyarire abanto ba Misiri na aba Kanani. 14Yusufu agasangereria chibesa chionsi echianyorekanete korwa ase ense ya Misiri na eya Kanani ase okooneria abanto endagera, agachibeka ase ekungo ya Farao. 15Ekero chibesa chionsi chiaerire ase ense ya Misiri na ase ense ya Kanani, Abamisiri bagachiera Yusufu, bakamosaba, “Toe endagera, titobaisa gokwera ase obosio bwao, ekiagera chibesa chiaito chiaerire.”
16Yusufu akabairaneria, “Onye chibesa chiaino chiaerire, ndetera chitugo chiaino, na inche mbae endagera morie.” 17Erio bakarentera Yusufu chitugo chiabo, na Yusufu akabaa endagera. Bakarentera Yusufu chibarasi chiabo, ne ching’ondi, ne chiombe, ne chitigere. Igo akaba okobarenda na kobaa endagera ase omwaka oyio oyomo, na barabwo bakamoa chitugo chiabo.
18Omwaka oria oyomo okaera. Naende omwaka o kabere bakamochiera, bakamotebia, “Titokonyara gokobisa, omonene oito, ng’a chibesa chiaito chiaerire, ne chitugo chiaito chiabeire echiao. Titotigareti gento kende togokoa, omonene oito, otatiga emebere yaito na amaremo aito. 19Nase ki torakwere ase obosio bwao, na amaremo aito asareke? Togore intwe, ogore na amaremo aito, na intwe tobe abasomba ba Farao, na amaremo aito abe ayaye. Toe chimbusuro tosimeke, titokwa, na amaremo aito abe bosa.”
20Erio Yusufu akagorera Farao amaremo onsi arenge Misiri, naki Abamisiri nigo baoonetie kera omonto oboremo bwaye, ekiagera enchara yarenge endito mono. Naboigo ense ekaba eya Farao. 21Farao akang’anyia abanto abwo bamenye ase emechie, babe abasomba baye, bakore emeremo korwa ensemo eyemo ya Misiri goika eyende. 22Korende Yusufu tagorete amaremo ’abakuani, ekiagera abwo konya bachikeirwe endagera baare konyora korwa ase Farao, nero baare koria. Ase igo tibagwenerete koonia amaremo abo.
23Yusufu agatebia abanto, “Igwa! Rero nabagorire inwe amo namaremo aino, mobe enibo ya Farao. Bwata chimbusuro chiaino echi, chiire mochisimeke ase emegondo. 24Engaki ye rigesa moruserie Farao ensemo ya isano. Chinsemo inye chintigari inachibe echiaino ase chimbusuro na endagera yaino inwe abanyene, na ey’abare ase chinka chiaino, na ey’abana baino.”
25Abanto abwo bakamoiraneria, “Gwatooririe obogima bwaito. Onye twanyorire ogwancherwa ase obosio bwao, omonene oito, tiga tobe abasomba ba Farao.” 26Yusufu akabeka ogochika ase ense ya Misiri, ng’a ensemo ya isano ebe eya Farao; na ogochika okwo ngokora kore emeremo nonya ngoika bono. Korende amaremo ’abakuani oka naro atabete aya Farao.
Okogania kw’omoerio kwa Yakobo
27Israeli na abana baye bakaba bakomenya ase ense ya Misiri, ensemo ya Goseni, bakayeira ekaba eyabo, bakamenteka na kobucha mono. 28Yakobo akamenya ase ense ya Misiri emiaka ikomi, na etano na ebere. Ase igo agakoora emiaka rigana erimo, na emerongo ene, na etano na ebere (147) ase obogima bwaye.
29Ekero engaki y’ogokwa gwa Israeli yabete ang’e, ere akarangeria Yusufu, omwana oye, akamotebia, “Onye nkonyora ogwancherwa ase obosio bwao, beka okoboko kwao inse y’ekebono kiane, na ondiere eira, ng’a nonkorere amabera na obwanchani. Tontindeka aa ase ense ya Misiri, 30korende ekero ndakwe, tiga ndare ne chisokoro chiane. Ombogorie korwa aa Misiri, ontindeke aase barabwo batindegetwe.”
Yusufu akamoiraneria, “Ninkore buna gwantebirie.”
31Korende Israeli akamotebia, “Tiana ng’a nonkorere bo.” Ere agatiana. Erio Israeli agetureka ase ogotoorera omotwe borere bwaye.
Currently Selected:
OMOCHANKO 47: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
