OMOCHANKO 45
45
Yusufu okwemanyekania ase abamwabo; barabwo bakairana inka sobo
1Agwo Yusufu agasinywa gotanga okweigwa kwaye, ase obosio bw’abanto bonsi abateneine ang’e nere, agaaka eriogi, akabora, “Barusie aa bonsi ase obosio bwane!” Ase igo monto onde tarengeo ase obosio bwa Yusufu ekero emanyekanetie ase abamwabo, 2korende ekero aagete eriogi ase okorera, Abamisiri amo nabanto b’enka ya Farao bakamoigwa. 3Yusufu agatebia bamura bamwabo, “Ninche Yusufu. Tata moyo are?” Korende bamura bamwabo tibanyara komoiraneria, ekiagera basoetwe nobwoba obonene.
4Erio Yusufu agatebia bamura bamwabo, “Inchuo asende ang’e!” Barabwo bakamoika ang’e. Naende akabatebia, “Ninche Yusufu omino, oyo mwaoonetie gocha aa Misiri. 5Korende timoichana, gose timwechanda ase emioyo yaino, ekiagera mwang’oonetie gocha aa. Naki Nyasae nere ontomete mbatang’anere gocha aa, erinde ntoorie obogima bw’abanto. 6Omwaka oyo noyo o kabere enchara ere ase ense, naende netigarete emiaka etano abanto batareme gose kogesa. 7Nyasae nigo antomete mbatang’anere inwe, erinde motigare ase ense, na koba moyo ase ogotooreka kw’abange. 8Ase igo, tari inwe mwantomete gocha aa, korende Nyasae omonyene. Nere ombegete imbe ise Farao, na omonene ase enka yaye yonsi, na omogambi ase ense yonsi ya Misiri.
9“Ayerera bwango, moirane gochia ase tata, momotebie iga: Aya naro omwana oo Yusufu agoteba: Nyasae ombekire koba omonene ase ense yonsi ya Misiri; tirimboka gocha asende, totebana. 10Aye nigo oramenye ase ensemo ya Goseni, nigo oramenye ang’e nainche, aye amo nabana bao, na abachokoro bao. 11Agwo inche ninkoragerie, erinde tobaisa gocha gosoa ase okoremerwa, aye amo nabanto bao, na bionsi ebi ore nabio, ekiagera emiaka etano y’enchara netigarete.
12“Na bono imoroche namaiso aino, na Benjamin boigo naroche namaiso aye, ng’a ninche omonyene ngokwana nainwe. 13Motebie tata obonene bwonsi mbwate aiga Misiri, na binde bionsi mwarorire. Mokore bwango, momorente gocha aa.”
14Erio akaboania Benjamin rigoti, akarera; Benjamin nere akarera kamoboanetie rigoti riaye. 15Yusufu akanyunyunta abamwabo bonsi, akarera asebare. Na nyuma y’ayio abamwabo bakagosoria nere.
16Ekero chinkuma chiaigwetwe ase enka ya Farao ng’a abamwabo Yusufu bachire, amang’ana ayio akagwenera Farao amo nabasomba baye bonsi. 17Farao agatebia Yusufu, “Batebie abamino iga: Berekia ching’iti chiaino chigurube, moimoke mogende ase ense yaino ya Kanani, 18Morente iso na abanto b’enka yaye bache asende. Inche nimbae ebire ebiya bi’ense ya Misiri, na inwe namorie obonoru bw’ense eye. 19Naende goika obatebie iga, Ira chigari korwa aa Misiri, ase okobogoreria abana baino abake, na abakungu baino, mobogorerie na iso, moche nabarabwo. 20Timochandekera ebinto biaino, ebi moratige nyuma, ekiagera bionsi ebire ebiya mono ase ense ya Misiri nebiaino.”
21Erio basinto ba Israeli bagakora buna batebetigwe, na Yusufu akabaa chigari buna Farao achigete, amo nendagera bagochia koria inchera. 22Akaa kera oyomo eanga agochia koonchoreria, korende Benjamin ere akamoa chisekeli chie chifeta amagana atato amo ne chianga isano, echi agochia koonchoreria. 23Agatomera na ise chitigere ikomi chiabogoretie ebinto ebiya mono bia Misiri, ne chitigere chinkungu chiabogoretie endagera, na emegati, na endagera ende agochia koria inchera. 24Erio agatigana nabamwabo bagende sobo, akabatebia, “Timobaisa kwomana inchera!”
25Barabwo bakarua Misiri, bagaika ense ya Kanani ase Yakobo ise. 26Agwo bakamanyia ise amang’ana ng’a Yusufu moyo are, naende nere omogambi ase ense yonsi ya Misiri. Yakobo agachia koyaigwa, akagoyaana ase omoyo oye, tanyara kwegena amang’ana abo.
27Korende bakamotebia amang’ana onsi Yusufu abatebetie. Ere agachia korora chigari chiria Yusufu amotomerete chigocha komoimokia, omoyo oye okaba nobogima oboyia. 28Israeli akabora, “Ayio aisanire. Yusufu, omwana one, moyo are. Nigo ndagende komorora ritang’ani ntarakwa.”
Currently Selected:
OMOCHANKO 45: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
