OMOCHANKO 26
26
Isaka okomenya Gerari na Beeri‐Seba
1Bono enchara yachete ase ense eria, enchara ende eng’ao, tari eria yachete ritang’ani ase engaki ya Ibrahimu. Erio Isaka agachiera Abimeleki, omoruoti bw’Abafilisti, aria Gerari. 2Na Omonene akaorokera Isaka, akamotebia, “Totirimboka gochia Misiri, korende omenye ase ense eye ndagotebie. 3Obe buna omomenyi ase ense eye, na inche nimbe amo naye, ningosesenie; naki ninkoe aye na ororeria rwao chinse echi chionsi, na ning’ikeranie eira yane eyio natianete ase Ibrahimu iso. 4Nimente ororeria rwao robe oronge buna ching’enang’eni chia igoro; ne chinse echi chionsi ninchiee ororeria rwao; na ase ororeria rwao ebisaku bionsi bi’ense inabisesenigwe, 5ekiagera Ibrahimu naigwerete amang’ana aane, akabwata aya nachigete, na amachiko aane, na aya narigete, amo nogotebereria kwane.”
6Ase igo Isaka akamenya Gerari. 7Ekero abanto b’aase aria bamoboretie amang’ana igoro ya mokaye, akabatebia, “Oyo mosubati ominto.” Naki nigo oboete goteba ng’a ere mokaye, akarengeria ng’a abanto b’aase aria mbabaise komoita ase engencho ya Rebeka, ekiagera ere arenge omonyakieni. 8Ekero konya bamenyire aria engaki entambe, Abimeleki, omoruoti bw’Abafilisti, akarigereria korwa ase ekebao, akarora Isaka bakogosoria na Rebeka mokaye. 9Erio Abimeleki akarangeria Isaka, akamoboria, “Amaene, oyo mokao? Naki gwakora ogateba ng’a oyo mosubati omino?”
Isaka akamoiraneria, “Nigo narengereretie ng’a, aande nimbaise goitwa ase engencho yaye.”
10Abimeleki akamoboria, “Inki eke gwatokoreire iga? Aande monto onde oito arenge gochia arare na mokao, na aye anga nigo gwatobeka ase okomocha.” 11Ase ayio Abimeleki agatianera abanto bonsi, akabatebia, “Monto onde bwensi aise gokuna omonto oyo ore aa, gose mokaye, goika aitwe.”
12Isaka agasimeka endagera ase ense eria, akagesa ase omwaka oyio ara rigana, na Omonene akamosesenia. 13Omonto oyio akaba ne chinguru, akagenderera komenteka gokina, goika akaba nokobua okonene. 14Nigo abete nenibo y’amaicho e ching’ondi ne chiombe, na abasomba abange. Ase igo Abafilisti bakamororera ribero. 15(Ne chinsoko chiria chionsi abasomba ba Ibrahimu ise Isaka baremete, Abafilisti konya bachitichire namaroba.)
16Erio Abimeleki agatebia Isaka, “Karue asetore, ekiagera aye kwabeire ne chinguru chinyinge gotobua.”
17Ase igo Isaka akang’anya korwa aroro, agatoora ase ense eraire ya Gerari, akamenya aroro. 18Isaka akarubora chinsoko chiria naende, echio chiaremetwe ase engaki ya Ibrahimu ise, ekiagera Abafilisti konya bachitichire nyuma Ibrahimu gakure. Isaka agachiroka buna ise achirogete ritang’ani.
19Abasomba ba Isaka bakarema agwo ase ense eraire, bakanyora entuboka y’amache. 20Abarisia b’ensemo ya Gerari bakaba bakwomana nabarisia ba Isaka, bagoteba, “Amache aya nayaito.” Ase igo Isaka akaroka entuboka eria Eseki, ekiagera bamwomaneretie aroro.
21Naende bakarema, bakanyora entuboka ende, nero bakayiomanera. Ase igo akayeroka Sitina#26:21 Sitina, engencho yaye: eriomana. 22Akaimoka korwa agwo, akagenda akarema akanyora entuboka ende; eyio ero tibayiomanera. Ase ayio akayeroka Reoboti#26:22 Rehoboti, engencho yaye: aase aagare, akabora, “Naki bono Omonene otoeire ense engare, na toragenderere komenteka ase ense eye.”
23Isaka akarua aroro, agatiira gochia Beeri‐Seba. 24Ase obotuko obwo obwo Omonene akamoorokera, akamotebia, “Inche ninche Nyasae o Ibrahimu iso, tibwoboa, ekiagera nigo inde amo naye, ningosesenie aye amo nororeria rwao, ase engencho y’omosomba one Ibrahimu.” 25Na Isaka akaagacha egesasimero aroro, akarangeria erieta ri’Omonene, agatenenia chiema chiaye aroro. Na agwo abasomba baye bakarema, bakanyora entuboka.
Isaka na Abimeleki bagokora okobwatana
26Erio Abimeleki akarua Gerari, amo n’Ahusati, omosemia oye ase obogambi, na Pikoli, oria omochiki omonene bw’abarwani baye, bagachiera Isaka. 27Na Isaka akababoria, “Inki mwacha korigia aa bwone? Nainwe nigo mongechete, naende mwanseretie korwa seino.”
28Bakamoiraneria, “Amaene, twarorire maiso marore ng’a Omonene nigo are amo naye. Na nigo torengereretie ng’a totiananie na tokore okobwatana naye ng’a, 29bono togotokorera bobe bonde, buna intwe totagokunete, gose totagokorerete bobe, otatiga amaya oka; tokagotiga okagenda bwoo nomorembe. Naye bono nomosesenigwa bw’Omonene.” 30Erio Isaka akabakorera omoyega, bakaria na bakanywa. 31Bakaimoka mambia chuni, bagatianania barabwo ase barabwo; na Isaka akabakooba, na barabwo bakarua asare, bakagenda nomorembe.
32Ase rituko riria riria abasomba ba Isaka bagacha, bakamorentera amang’ana igoro y’entuboka eria banyorete, bakamotebia, “Twanyorire amache.” 33Ere akayeroka Seba; na ase engencho eyio omochie oyio nigo okorokwa Beeri‐Seba goika rero iga.
Esau okonyuoma abakungu babere
34Ekero Esau abeire nemiaka emerongo ene akanyuoma Yuditi, omoiseke o Beeri, Omohiti, na Basemati, omoiseke o Eloni, nere n’Omohiti. 35Barabwo babere bagakora obogima bwa Isaka na Rebeka koba nobororo obonge.
Currently Selected:
OMOCHANKO 26: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
