OMOCHANKO 25
25
Ororeria ronde rwa Ibrahimu
1Ibrahimu akanyuoma omokungu onde, ore korokwa Ketura. 2Nere akamoiborera Simurani, na Yokisani, na Medani, na Midiani, na Isibaki, na Sua. 3Yokisani akaibora Seba na Dedani. Na basinto ba Dedani nabwo aba: Ashuri, na Letusi, na Leumi. 4Basinto ba Midiani nabwo aba: Efa, na Eferi, na Hanoki, na Abida, na Elidaa. Abwo bonsi nabwo barenge abana ba Ketura.
5Ibrahimu akaa Isaka ebinto bionsi ebi abwate. 6Korende abana b’abakungu baria ba sere‐sere Ibrahimu akabaa ebiegwa. Ekero are moyo, konya atarakwa, akabatebia barue ase omwana oye Isaka, bagende gochia moocha, ase ense ya Moocha.
Ogokwa kwa Ibrahimu
7Ibrahimu nigo akoorete emiaka rigana erimo, na emerongo etano na ebere, na etano (175), ase obogima bwaye. 8Nigo akwete ase obogotu obuya, ore omogaaka, oisanekire nemiaka emenge; agasangerekana amo nabanto baye. 9Isaka na Isumaeli bakamotindeka ase rikuruma agwo Makipela ase oboremo bwa Efuroni, omwana o Sohari, Omohiti, moocha ya Mamure, 10ase oboremo boria Ibrahimu agorete korwa ase Abahiti. Agwo nao Ibrahimu atindegetwe ase Sara mokaye nere atindegetwe. 11Nyuma y’ogokwa kwa Ibrahimu, Nyasae agasesenia Isaka, omwana oye. Na Isaka akamenya ang’e nensoko yare korokwa Beeri‐Lahai‐Roi.
Ororeria rwa Isumaeli
12Oro narwo ororeria rwa Isumaeli, omwana o Ibrahimu, oyo Hagari, omosomba o Sara, amoiborerete. 13Aya naro amarieta ’abana ba Isumaeli, ase omoroberio bw’okoiborwa kwabo: Nebayoti, nere omwana oye omotangi, na Kedari, na Adibeeli, na Mibusamu, 14na Misima, na Duma, na Masa, 15na Hadadi, na Tema, na Yeturi, na Nafisi, na Kedema. 16Aba nabwo abana ba Isumaeli, na aya naro amarieta abo ase emechie yabo na ebitwori biabo, na barabwo nigo barenge abagambi ikomi na babere, ase ebisaku biabo. 17Isumaeli nigo akoorete emiaka rigana erimo, na emerongo etato, na etano na ebere (137), erio agakwa; agasangererekana amo nabanto baye. 18Abana ba Isumaeli nigo bamenyete bagachakera Havila, bagaika Suri moocha ya Misiri, ase enchera ekogenda Asuri; bakamenya bosio bw’abamwabo bonsi.
Okoiborwa gwa Esau na Yakobo
19Oro narwo ororeria rwa Isaka, mosinto o Ibrahimu. Ibrahimu nere oiborete Isaka. 20Isaka nigo arenge nemiaka emerongo ene ekero anyuomete Rebeka, omoiseke o Betueli, Omoaramu o Padan‐Aramu, omoiseke omwabo Labani, Omoaramu. 21Isaka agasabera mokaye ase Omonene, ekiagera nigo arenge omogomba. Omonene akaigwa ogosaba kwaye, na Rebeka mokaye akaba morito. 22Abana bakaba bakomigana enda yaye ime. Ere akabora, “Onye nabo iga, okoba moyo kwane ninki korangwenere?” Akagenda koboria Omonene.
23Omonene akamoiraneria,
“Ebisaku bibere mbire enda yao ime,
abanto babere orache koibora,
na barabwo mbaatananekane korwa okoiborwa kwabo;
oyomo nabe ne chinguru kobua oria onde,
oria omonene nakorere oria omoke.”
24Ekero amatuko aye ay’okoibora achia goikerana, bakanyora ne chibarongo chiare enda yaye ime. 25Oyo bwe ritang’ani agasoka, ere nigo arenge omobariri, omobere bwonsi nigo orenge namarionya; bakamoroka Esau.#25:25 Esau, engencho yaye: ore namarionya. Erieta riaye rinde Edomu. Engencho yaye: omobariri (ekebungu 30) 26Nyuma yaye oyomwabo agasoka, okoboko kwaye kobwatete egetingiro gia Esau na ere bakamoroka Yakobo.#25:26 Yakobo, engencho yaye: okobwata egetingiro, gose: omong’ainereria Isaka nigo arenge nemiaka emerongo etano nomo, ekero mokaye abaiborete.
Esau okoonia omwando oye bw’okoiborwa kw’obotangi
27Ekero abana abwo bakinire, Esau akaba omotwari bwe ching’iti, korende Yakobo nigo arenge omonto omotoereru, ore kobeera ase chiema. 28Isaka nigo amwanchete Esau, ekiagera arenge komorentera chinyama chi’obotwari bwaye; korende Rebeka nigo amwanchete Yakobo.
29Rituko erimo Yakobo naiyegete omosori gete. Esau agacha korwa orosana, konya orosire mono, ogoyire ase engencho y’enchara. 30Na Esau agasaba Yakobo, “Koranche, ong’e endagera eyio embariri indie, ekiagera nanyarekire.” Ase ayio bakamoroka Edomu (engencho yaye, omobariri).
31Yakobo akamoiraneria, “Ritang’ani ng’ooneria omwando oo bw’okoiborwa kw’obotangi.”
32Esau agateba, “Rora, inche nigo inde ang’e gokwa, omwando oyo bw’okoiborwa kw’obotangi inki orankonye?”
33Yakobo akamotebia, “Karatiana ritang’ani asende,”
Esau agatiana, erio akaooneria Yakobo omwando oye bw’okoiborwa kw’obotangi. 34Erio Yakobo akaa Esau omogati na omosori bwe ching’ende, na ere akaria na konywa; erio akaimoka akagenda. Naboigo Esau achayete omwando oye bw’okoiborwa kw’obotangi.
Currently Selected:
OMOCHANKO 25: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
