OMOCHANKO 21
21
Okoiborwa gwa Isaka
1Erio Omonene akarigereria Sara, akamokorera buya buna konya amoriereire eira. 2Sara akaba morito, akaiborera Ibrahimu omwana omoisia ase obogotu bwaye, ase engaki eria Nyasae amotebetie. 3Omwana oyio Sara aiborerete Ibrahimu, Ibrahimu akamoroka Isaka. 4Ekero Isaka akoorire amatuko atano na atato, Ibrahimu akamosara, buna Nyasae konya amochikire. 5Ibrahimu nigo arenge nemiaka rigana erimo ekero Isaka, omwana oye, aiboretwe. 6Sara akabora, “Nyasae onkoreire amaseko, na onde bwensi orayaigwe nansegisie.” 7Naende agateba, “Ning’o nanga ore komotebia Ibrahimu ng’a Sara nagonkie abana? Na bono namoiboreire omwana ase obogotu bwaye.”
8Omwana oria agakina, agatiga okogonka. Ase rituko riria Isaka atigete kogonka, Ibrahimu agakora omoyega omonene.
Ogoserigwa gwa Isumaeli na Hagari
9Korende Sara akarora omwana oria bwa Hagari Omomisiri, oyio aiborerete Ibrahimu, ogosekereria Isaka, omwana oye. 10Ase ayio agatebia Ibrahimu. “Moserie omokungu oyo omosomba amo nomwana oye, ekiagera omwana bw’omokungu oyo omosomba takoria omwando amo nomwana one Isaka.” 11Ring’ana erio tiriamogwenera Ibrahimu nonya ng’ake, ase engencho y’omwana oye. 12Korende Nyasae agatebia Ibrahimu, “Ring’ana eri tiriba riibe asore, ase engencho y’omwana oyo, na ase engencho y’omokungu oyo, omosomba oo. Rinde roinsi Sara akogotebia riigwere, ekiagera korwa ase Isaka ororeria rwao narwatorwe. 13Nere omwana bw’omokungu oyo omosomba nimokore abe egesaku ekenene, ekiagera nere oyio nomwana oo.”
14Erio Ibrahimu akaimoka mambia chuni, akaimokia omogati na ebirandi bikorire korwa ase amasankwa, bire namache, akabia Hagari, akamobibekera mareko. Akamorentera na omwana, akamotebia agende nere. Akagenda, akana‐koong’anya ase erooro ya Beeri‐Seba.
15Ekero amache aria arenge ebirandi ime aerire, akaareria omwana inse y’egetutu. 16Erio akagenda, agaikaransa are ake, ase oboare bw’okoruta omogwe, ekiagera nigo atebete, “Tinkorora omwana one kagokwa.” Ekero aikaransete amorigereretie, agaaka eriogi riaye, akarera.
17Nyasae akaigwa okorera kw’omwana, na omomalaika o Nyasae akarangeria Hagari korwa igoro, akamotebia, “Hagari, inki okorera? Tibwoboa, ekiagera Nyasae oigure okorera kw’omwana agwo ase araire. 18Imoka, oimokie omwana, omobwate koboko kwao; naki nimokore abe egesaku ekenene.” 19Erio Nyasae akaramokia Hagari amaiso, na ere akarora ensoko y’amache, akagenda, akabuucha, agaichoria ekerandi amache, akaa omwana akanywa. 20Nyasae akaba amo nomwana oria. Ere akamenya ase erooro, akaba omomanyi bw’okorasa nemegwe. 21Akamenya ase erooro ya Parani, na ng’ina akamonyuomeria omokungu korwa ase ense ya Misiri.
Ibrahimu na Abimeleki bagokora okobwatana
22Ase engaki eyio Abimeleki na Pikoli, omochiki omonene bw’abarwani baye, bagatebia Ibrahimu, “Nyasae nigo are amo naye ase ande onsi ogokora. 23Ase ayio, bono ndiere eira na gotiana ase Nyasae ng’a togonkorera obong’ainereria inche, na abana baane, na abachokoro baane, korende koreng’ana buna inche nagokorerete aye, obuya obo obo naye onkorere inche, amo nense eye ore omomenyi ime yaye.”
24Ibrahimu agateba, “Ee, ninkoriere eira.”
25Ibrahimu akamororera Abimeleki bobe ase engencho y’ensoko eria abasomba b’Abimeleki bamourete. 26Abimeleki akamotebia, “Inche timanyeti ning’o okorete ring’ana erio, gose tikwana gontebia; nonya nokoigwa, tinana koyaigwa otatiga rero rioka.” 27Erio Ibrahimu akaimokia ching’ondi ne chiombe, akaa Abimeleki, na barabwo babere bagakora okobwatana. 28Ibrahimu agaatanana chimanwa chisigiti isano na ibere, agachibeka ensemo. 29Abimeleki akaboria Ibrahimu, “Chimanwa echi chisigiti isano na ibere gwatanana, engencho yaye inki?”
30Ibrahimu akamoiraneria, “Chimanwa echi chisigiti isano na ibere nigo nagochieire korwa ase okoboko kwane, erinde chibe kirori asende, ng’a ensoko eye ninche nayeremete.” 31Ase ayio bakaroka aaee agwo Beeri‐Seba#21:31 Beeri‐Seba, engencho yaye: chinsoko isano na ibere, gose: ensoko y’emuma, ekiagera barabwo babere bariereranete emuma aroro.
32Ekero bakorire okobwatana aria Beeri‐Seba, Abimeleki na Pikoli, oria omochiki omonene bw’abarwani baye, bakaimoka korwa agwo, bakairana ase ense y’Abafilisti. 33Ibrahimu agasimeka omote onga buna ekerachuoki aria Beeri‐Seba, na agwo akarangeria erieta ri’Omonene Nyasae o kare na kare ase okomosasima. 34Ibrahimu akamenya buna omomenyi ase ense y’Abafilisti amatuko amange.
Currently Selected:
OMOCHANKO 21: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
