OMOCHANKO 18
18
Ibrahimu okorierwa eira naende konyora omwana
1Omonene akaorokera Ibrahimu ase emete enga buna emetontera agwo Mamure, ekero ere aikaransete gesieri ki’eema yaye, engaki y’omobaso omororo. 2Agwo akaimokia amaiso aye, akarora abanto batato bateneine bosio bwaye. Ekero abarora, akaminyoka korwa gesieri ki’eema, agachia kobarotota, agatung’ama inse, 3akabora, “Omonene one, onye nanyorire ogwancherwa ase obosio bwao, tong’etania inche, omosomba oo. 4Tiga morenterwe amache make, mwesibie amagoro, na motimokere aa ase ekiriri ki’omote oyo. 5Inche imbarentere endagera inke morie, erio monyore chinguru; nyuma yaye mogenderere ase mware kogenda, naki aase aiga mwaeta naase aane inche omosomba oino.”
Bakamotebia, “Gaki, kora buna gwateba.”
6Ase igo Ibrahimu akaayerera, agasoa eema ime ase Sara, akamotebia, “Renta bwango obosie, ebirengo bitato, obokonye, okore emegati.” 7Erio Ibrahimu akaminyoka getii ase riicho riaye, akarenta emori engiya enoru, enterere, akayea omosomba oye, akamotebia, “Yeroisie bwango, oyerente.” 8Akabogoria amaguta, na amabeere, ne chinyama chi’emori eria aroisetie, agaterekera abageni baria. Ere agatenena asebare ensemo ase ekiriri ki’omote, ekero baare koragera.
9Barabwo bakamoboria, “Ng’ai Sara mokao are?”
Ere akabairaneria, “Neema ime are.”
10Omonene akamotebia, “Amaene, inche ning’irane asore omwaka ogocha engaki enga buna eye, na ninyore ng’a Sara mokao onyorire omwana omoisia.”
Sara nigo ategererete gesieri ki’eema yarenge magega Omonene. 11Bono Ibrahimu na Sara konya bagotire mono, baetanirie emiaka y’oboke, na Sara konya oeteire emiaka y’okonyora abana. 12Ase ayio, Sara agaseka ase omoyo oye ime, ogoteba, “Buna inde omogotu iga, na omosacha one nere ogotire, naki ndakore inyore omogoko oyio?”
13Omonene akaboria Ibrahimu, “Ninki Sara agosekera, ogoteba: Inche amaene ninyibore omwana buna nagotire iga? 14Ing’ana ki rire rikong’u riramosinye Omonene? Engaki ndairane asore ase omwaka ogocha, engaki enga buna eye, ninyore ng’a Sara onyorire omwana omoisia.”
15Sara agakana, agateba, “Inche tinsegeti,” naki nigo oboete.
Omonene akamotebia, “Taibo; korende aye ngwaseka.”
Ibrahimu ogosabera abanto ba Sodomu
16Erio abanto abwo bakaimoka korwa agwo, bakagenda, bakaba barigereretie gochia Sodomu, na Ibrahimu akagenda amo nabarabwo, akabakooba. 17Omonene agateba, “Inee! Imobise Ibrahimu ring’ana ngochia gokora, 18ekero ndoche ng’a ngochia are koba egesaku ekenene gie chinguru, na ebisaku bionsi bi’ense inabisesenigwe goetera asare? 19Naki nimomanyete, ng’a nachike abana baye na abwo b’enka yaye, abarache koiborwa korwa nyuma yaye, babwatie enchera y’Omonene, bakore oboronge na ekeene, erinde Omonene aikeranerie Ibrahimu aya amorierete eira.”
20Naende Omonene agateba, “Ekiagera ekerero gia Sodomu na Gomora nekenene, na ebibe biabo biamentekire mono, 21nigo ndaike gochia inse, indore onye bakorire amabe amange buna ekerero eke kiang’ikeire kegoteba; onye taibo, nimanye ayio.”
22Erio abanto baria bakarua agwo, bakagenda gochia Sodomu, korende Ibrahimu agatigara oteneine agwo ase obosio bw’Omonene. 23Ibrahimu agasuka gochia ase Omonene, akamoboboria, “Inee! Amaene, nigo orasirie abanyene oboronge amo nabakori amabe? 24Aande ase omochie oria abanyene oboronge emerongo etano mbakareo, nigo orayosirie, gose noyororere amabera ase engencho y’abwo abanyene oboronge emerongo etano? 25Yaya, tokora bo, tosiria omonyene oboronge amo nabakori amabe; omonyene oboronge takorwa buna omokori amabe! Ayio takoba bo. Inee! Omogambi bw’ense engima tagokora oboronge?”
26Omonene akamotebia, “Inse konyora abanyene oboronge emerongo etano ase omochie oria o Sodomu, rirorio nigo ndatige aase aria ase engencho y’abwo, tinkoyosaria.”
27Ibrahimu akairaneria, “Rigereria, ningendererete gokwana n’Omonene, nonya inche inde orotu rw’amaroba, na eribu bosa. 28Aande ase baria emerongo etano baise koba batano tibaiyo, abanyene oboronge, Inee, nosarie omochie ekiagera batano tibaiyo?”
Akairaneria, “Tingosaria omochie, kondarore agwo emerongo ene, na batano.”
29Akagenderera naende gokwana nere, “Aande baraisa kororekana rende emerongo ene?”
Ere akairaneria, “Ase engencho y’abwo emerongo ene, tingosaria omochie.”
30Ibrahimu akabora, “Omonene, koranche, tobaisa kombea ningendererete gokwana naye. Aande barabaisa konyorekana rende emerongo etato?”
Omonene akairaneria, “Tingosaria omochie inse konyora bare emerongo etato aroro.”
31Ibrahimu akabora, “Rora, ningendererete gokwana n’Omonene. Baise konyorekana rende emerongo ebere?”
Omonene akairaneria, “Ase engencho y’abwo emerongo ebere, tingosaria omochie.”
32Ibrahimu akamoboria naende, “Omonene, tobaisa kombea, bono ndimo rioka ngokoboria, barachia konyorekana rende ikomi boka?”
Akairaneria, “Tingosaria omochie, inse konyora agwo ikomi boka.” 33Ekero Omonene akoorete gokwana na Ibrahimu, akagenda; na Ibrahimu akairana bwoye.
Currently Selected:
OMOCHANKO 18: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
