OKONG’ANYA 23
23
Ayare oboronge na amaya
1“Tobaisa gosiarera oborimo. Tobaisa gokengera omokori amabe ase okomobera kirori bw’oborimo. 2Tobaisa koba ensemo y’abare abange kobarigetie gokora amabe, gose tobaisa kobakorera abwo bare abange ogwanchereria na gotanga oboronge ase okoba kirori bw’okoonchorana oboronge. 3Tobaisa gwanchereria omonto omotaka ase ekina kiaye.
4“Oise korora eng’ombe y’omobisa oo gose etigere yaye egosira goika omoyeiranerie. 5Korarore etigere y’oyo okogechete yagure negurube ebogoretie, tobaisa koyeetania, korende oyekonye.
6“Tobaisa korina omonto omotaka oboronge bwaye, ekero ekina kiaye gekogambwa. 7Bwetange kegima korwa ase oborimo. Tobaisa kogera omonto omoronge aitwe, ekiagera inche Omonene tingotiga koa omomochi egesusuro. 8Tobaisa gwancha oegwe riaaki, ekiagera riaaki nigo rikoukoria omonto erinde takorora ayare boronge; naende nigo rigosaria ekina ki’abanyene oboronge.
9“Tobaisa gokorera omomenyi bobe, naki inwe momanyete buna omomenyi akoigwa ase enkoro yaye, ekiagera nainwe abanyene mwarenge abamenyi ase ense ya Misiri.”
Omwaka o gatano na kabere, ne rituko ria gatano na kabere
10“Ase emiaka etano nomo osimeke na kobusura endagera, na ogese ebiamire, 11korende omwaka o gatano na kabere otige omogondo otimoke, toremwa. Ebirakine na kwama ase omogondo obitigere abataka, na ebi baratigarie bibe endagera ye ching’iti chi’orosana. Okore boigo nomogondo oo bw’emesabibu na oyo bw’emezeituni.
12“Ase amatuko atano na rimo okore emeremo yao, korende ase rituko ria gatano na kabere otimoke, na eng’ombe yao na etigere yao nachirochio chitimoke; naboigo nomosomba oo omomura oiboreire bwoo, na omomenyi oo, nabarabwo batimoke.”
13“Motegerere mono onsi aya nabatebirie na moyabwate. Timwatora amarieta e chinyasae chinde; ayio taigugwa korwa ase emenwa yaino.”
Amatuko Amanene
(Okong’ 34:18–26; Okoir 16:1–17)
14“Kera omwaka nobe kogontwarera Amatuko Amanene ara gatato. 15Goika orende Rituko Rinene ri’Emegati etabekiri memera. Na buna nagochigete orie emegati etabekiri memera ase amatuko atano na abere, ase engaki eria yabegetwe ase omotienyi bw’Abibu, ekiagera omotienyi oyio noro kwaruete Misiri. Na monto onde tabaisa gocha ase obosio bwane namaboko amasa.
16“Naende goika orende Rituko Rinene rie Rigesa ekero okogesa ogotongora gw’okwama kw’omogondo oo gwasimegete na ogakora emeremo.
“Orende boigo Rituko Rinene ri’Ogosangereria Rigesa ri’omoerio bw’omwaka ekero ogosangereria okwama kw’emeremo yao emekong’u gwakorete. 17Ara gatato kera omwaka abanto bao abasacha babe bagocha ase obosio bwane, inche Omonene Nyasae.
18“Tobaisa kondetera amanyinga ’ekeng’wanso amo nomogati obekire ememera. Ebitinya bie chinyama echi nkoruerwa ekeng’wanso ase rituko riane rinene, tibitigara goika mambia.
19“Goika orente ogotongora okore okuya korwa ase omogondo oo, ase enyomba yane inche Omonene Nyasae oo.
“Tobaisa koiyekera emanwa y’embori ime y’amabeere ’eng’ina.”
Chiira na amatebererio
20“Nintome omomalaika agotang’ane na gokorenda ase enchera, agoikie aase aria nakoroiseirie. 21Mwerende ase obosio bwaye, oigwere aya aragotebie. Tobaisa kwanga komoigwera, ekiagera erieta riane nigo rire ime yaye, ere takomororera amabera oyoramoche koigwera. 22Korende koramoigwere ere, na gokora ayio onsi nakwanire inche, rirorio nindwanie ababisa bao, ninchande abwo bakogochanda. 23Naki omomalaika one nagotang’ane akoire na kogoikia ase ense y’Abaamori, na Abahiti, na Abaperisi, na Abakanani, na Abahivi, na Abayebusi, na inche nimbasirie. 24Tosasima chinyasae chiabo, gose gochikorera; na tokora buna abanto abwo bagokora, korende osirie kegima emegwekano yabo y’ogosasimwa na moyaiyerie inse amagena abo onsi are aase bagosasimera. 25Momokorere Omonene Nyasae oino, na inche ninsesenie endagera yaino na amache aino, nindusie amarwaire asemore. 26Ase ense yaino mokungu onde tari oborito bwaye boragwe, gose onde takoba omogomba; nimbae obogima obotambe.
27“Nintang’anie okwoboyia kwane bosio bwao goichanie na gotantania abanto bonsi abwo morabe mokoumerana nabarabwo; ninkore ababisa bao bonsi baonchoke batame korwa asore. 28Nintome ebiaramba birase na goseria Abahivi, na Abakanani, na Abahiti, korwa ase Kanani bosio bwao. 29Tinkobaseria ase omwaka oyomo, ense ebaise koba bosa, ne ching’iti chi’orosana chimenteke chigochande. 30Nigo ndabaserie ng’ora ng’ora goika momenteke moisane komenya ense eyio. 31Inche ninkobekere orobebe rwao gochakera Enyancha Embariri goikera Enyancha y’Abafilisti, naende korwa ase erooro goika orooche rwa Eufarati, ekiagera nimbeke ababiare b’ense eyio ase amaboko aino, na inwe mobaserie, batame korwa asemore. 32Tobaisa gokora okobwatana konde gwonsi nabarabwo, gose ne chinyasae chiabo. 33Barabwo tibamenya ase ense yao, babaise kogera onkorere ebibe. Onye kogokorera chinyasae chiabo, chirochio nachinyare kogotega.”
Currently Selected:
OKONG’ANYA 23: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
