OKONG’ANYA 22
22
Amachiko igoro ase ogoakana
1“Omonto karaibe eng’ombe gose eng’ondi na koyenyenya, gose ayeoonie, nigo araakane chiombe isano ribaga ri’eng’ombe eyemo, ne ching’ondi inye ribaga ri’eng’ondi eyemo. 2-4Igo emogwenerete aakane chionsi. Onye tabwati gento, ere omonyene goika aoonigwe ase engencho y’oboibi bwaye. Onye etugo eyio aiba ekonyorekana ase amaboko aye ere moyo, aakane ara kabere, onye neng’ombe, gose etigere, gose eng’ondi.
“Omoibi karanyorekane ogotagora enyomba ase okoiba, nere aitwe akwe: omonto oria omoita takobarerwa oboiti obwo. Korende onye nigo amoita kobwakiire, rirorio nigo arabarerwe oboiti obwo.
5“Omonto kararisie etugo yaye ase omogondo bw’endagera, gose oyo bw’emesabibu, na gotiga riicho riaye ririe endagera y’omonto onde, nere goika aakane endagera enoru korwa ase omogondo oye, gose eyere engiya korwa ase emesabibu yaye.
6“Onye omonto ogosamba omorero, na omorero oyio bwesiarere gochia ase amagwa, na emesaima y’endagera ere ase omogondo eyie, omonto oria goika aakane yonsi pi.
7“Omonto karae omoiri oye chibesa, gose ebinto binde biaye amogachere, na birobio biibwe korwa nyomba mwaye, omoibi karanyorekane goika aakane ara kabere. 8Korende atanyorekaneti, erio oria omonyene enyomba arentwe ase obosio bwa Nyasae, erinde amanywe gose nere obiibete.
9“Eriomana rinde rionsi riise gotuboka, onye igoro y’eng’ombe, gose etigere, gose eng’ondi, gose eanga, gose gento kende gionsi kerasire, na omonto oyomo aamererie ng’a nekiaye, ekina ekio ki’abanto abwo babere nigo kerarentwe ase obosio bwa Nyasae. Ere oyo Nyasae araorokie ng’a nomomochi, goika aakane oria onde ara kabere.
10“Omonto karae omoiri oye etigere, gose eng’ombe, gose eng’ondi, gose etugo ende yonsi ebe sagare, na etugo eria eitwe gose eakwe, gose eirwe monto tarora, 11omoiri oria goika atiane ase Omonene ng’a takuneti enibo aetwe sagare. Omonyene etugo eria goika anche ng’a ayio atianwa namaene, na tagoakanwa. 12Korende onye nigo yaibwa korwa asare ere goika aakane omonyene oria. 13Onye yariegwa nenyang’au, arente chinyama chintigari chibe kirori, taakana ase eye enyang’au yaitete.
14“Omonto karasabe na koegwa etugo sagare korwa ase omoiri oye, na etugo eyio keraakwe gose ekwe, na omonyene tayerochi, omonto oria goika ayeakane. 15Onye omonyene oria ore aroro ekero egoakwa gose egokwa, rirorio tagoakanwa. Onye etugo eyio egochia goakanerwa, ogoakanerwa okwo kobe kogoisanera ogosirerwa okwo.”
Amachiko ’ogotanga obonyaka na obobe bonde
16“Omonto karamogenke na gosaria omoiseke omwekungi otararierwa boko, goika aakane enibo eraisane amonyuome. 17Korende onye ise omoiseke okwanga, tamomoa, omonto oyio goika aakane chibesa chireng’aine rigori ri’omoiseke omwekungi.
18“Totiga omokungu omorogi abe moyo.
19“Omonto orarare neng’iti goika aitwe akwe.
20“Omonto oraruere enyasae ende yonsi ekeng’wanso, otatiga Omonene bweka, goika asirigwe kegima.
21“Tobaisa gokorera omomenyi bobe, gose komochegia, ekiagera nainwe abanyene mwarenge abamenyi ase ense ya Misiri. 22Tochanda omoboraka onde bwensi, gose omwana entakana oyo abaibori baye bakure. 23Oise kobachanda abwo, na barabwo kobararere asende, amaene, inche ninyigwe ekerero kiabo. 24Endamwamu yane inayoke, na inche mbaite nomoro, na abakungu baino nababe ababoraka, na abana baino babe chintakana batari nabaise.
25“Oise komoa singo omonto onde one omotaka ore ase egati yaino, tobaisa gokora buna abwo bakoa abanto singo na koboria ebitoki ebinge; tobaisa komoboria ebitoki.
26“Onye kogosaba omonto onde egetambaa kiaye akwambara kebe intenenera, goika omokeiranerie erioba ritaragwa, 27ekiagera nakio gioka abwate akwebisia. Eke nakio abwate gekomobekera riberera ase omobere oye. Inee! Otakemoeti, inki rende araraarere? Ere kararere asende, ekeene, nimoigwe, ekiagera inche nomonyamabera.
28“Tobaisa korama Nyasae, gose koragereria omogambi bw’abanto bao.”
Ogotongora, na omwana omotangi, ne ching’iti chintangi
29“Totebana kondetera ogotongora kwao kwe rigesa ri’endagera na eri’emesabibu. Ong’e omwana oo omomura omotangi ase abana bao, abe oyone. 30Ong’e boigo chimori chintangi chie chiombe, ne chimanwa chintangi chie ching’ondi. Ochitige chikoore amatuko atano na abere, ko rituko ria gatano na gatato ochindetere.
31“Mobe abanto baane abachenu; timobaisa koria eng’iti ende yonsi eyaitirwe nenyang’au ase orosana, motugutere chisese chinyama echio.”
Currently Selected:
OKONG’ANYA 22: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
