OKONG’ANYA 21
21
Amachiko ase abwo babwate abasomba
(Okoir 15:12–18)
1“Aya naro amachiko orae Abaisraeli: 2Koragore omosomba bw’Abaibirania, ere agokorere ase engaki y’emiaka etano nomo, korende omwaka o gatano na kabere nigo ararue bwoo ore omosibore, tagoakana kende. 3Onye ochete bwoo tarenge na mokungu, rirorio nabo aragende bweka, korende onye orenge nomokungu, omokungu oye nigo aragende amo nere. 4Onye omonene oye omonyuomeretie omokungu, na ere omoiboreire abana, abamura gose abaiseke, omokungu oria na abana baye nigo barabe enibo y’omonene oye; omosacha oria nigo ararueo ere bweka, 5Korende omosomba oria karatebe: Nimwanchete omonene one amo na mokane, na abana baane, tinganeti korua ase obosomba bwane, 6erio omonene oye amorente ase obosio bwa Nyasae, amoikie ase egesieri gose ase emetobwa ya gesieri na amotuue ogoto kwaye nesindake. Erio omonto oria abe omosomba oye ase obogima bwaye bwonsi.
7“Omonto karaoonie omwana oye omoiseke koba omosomba, omoiseke oyio tagosiborwa buna abasomba abamura barasiborwe. 8Onye omoiseke oyio tagwenereti omonene oye, oyorengereretie komokora abe mokaye, rirorio nigo araboorigwe airane. Omonene oye takoba ne ribaga komoonia ase egesaku ekegeni, ekiagera among’ainereretie. 9Onye okomoa omomura oye abe mokaye, rirorio amwanche buna omwana oye omoiseke. 10Onye omonto oyio okonyuoma omokungu o kabere, takorina oria omotang’ani endagera yaye, ne chianga chiaye na kende gionsi aganetie buna mokaye. 11Atamokorereti amang’ana aya atato, goika aegwe ribaga arue bwoye ataakaneiri embooria.”
Amachiko ase abaiti
12“Monto onde bwensi oraake omonto na amoite akwe, nere goika aitwe akwe. 13Korende onye tamong’erete otatiga Nyasae omobegete ase amaboko aye, erio ninkworokie aase omoiti oria aratamere. 14Korende omonto ogoita oyomwabo mweno ase obong’ainereria, nere goika arusigwe nonya nase egesasimero kiane, aitwe akwe.
15“Onde bwensi oraake ise gose ng’ina, nere goika aitwe akwe.
16“Onde bwensi oraibe omonto goika aitwe akwe, karabe omoonirie gose omobwate ase amaboko aye.
17“Onde bwensi oraragererie ise gose ng’ina, nere goika aitwe akwe.”
Amachiko ase abwo bagoaka abande
18“Abanto kobarabe bakorwana, na oyomo aake oyonde rigena, gose enkundi, oyio oakwa go takwa, korende abe okorwara borere, 19karabe otimokire, naende asoke isiko gotaara ogwesiirera enyimbo, rirorio oria omoagete nigo aratigwe, otatiga amoakane ase engencho y’eng’eria eria asiririe, na amorende goika agwene kegima.
20“Omonto karaake omosomba oye, omomura gose omoiseke, nenyimbo, erinde akwere ase amaboko aye, goika aegwe egesusuro. 21Korende omosomba oyio karagenderere koba moyo rituko erimo gose abere, omonto oyio takoegwa egesusuro, ekiagera omosomba oyio nenibo yaye.
22“Abanto abasacha kobarabe bakorwana, na kogwera omokungu ore morito, na oborito bwaye bogwe, korende atabeti na bobe bonde, omonto oria omogwerete goika aakane buna omosacha bw’omokungu oria araborie nyuma abagambi kobanachire ekina. 23Korende omokungu oria karakwe, rirorio egesusuro kebe obogima ase obogima, 24eriso ase eriso, na erino ase erino, okoboko ase okoboko, na okogoro ase okogoro, 25ogosambwa ase ogosambwa, na eriote ase eriote, naende ogosionorwa ase ogosionorwa.
26“Omonto karaake omosomba oye, omomura gose omoiseke, na komwata eriso, rirorio goika amotige abe omosibore ase engencho y’eriso riaye. 27Karamoake amogookore erino, goika amotige abe omosibore ase engencho y’erino riaye.”
Amachiko ase abanyene chitugo
28“Eng’ombe eise goita omonto, omosacha gose omokungu, ne chingunchara chiaye, goika eakwe amagena ekwe, ne chinyama chiaye tichiriegwa; korende omonyene eng’ombe eyio taegwa egesusuro. 29Korende eng’ombe eyio, onye enarete goita abanto, na omonyene eng’ombe okureirwe, na ere tayesibeti, ero keraite omonto, omosacha gose omokungu, nigo eraakwe amagena ekwe, na omonyene nere aitwe akwe. 30Onye embooria ekoborigwa korwa asare, goika arue chionsi echi chiraganigwe, chibe embooria ase obogima bwaye. 31Onye eng’ombe egoita omomura gose omoiseke ne chingunchara chiaye, ogochika nakwo okwo okomo. 32Onye eng’ombe egoita omosomba, omomura gose omoiseke, omonyene eng’ombe nigo araakane omonyene omosomba oria chisekeli chie chifeta emerongo etato, na eng’ombe eria eitwe ase ogoakwa amagena.
33“Omonto karatige engoro yasie, gose onye okunyire engoro na tayekuneka, na eng’ombe gose etigere egwe imeo, 34rirorio omonyene engoro goika aakane omonyene etugo chibesa. Erio eng’iti eria yakure ebe eyaye. 35Eng’ombe y’omonto keraite ey’omonto onde ekwe, erio barabwo baoonie eng’ombe eyio ere moyo, baatanane chibesa echio, baatanane ne chinyama chi’eng’ombe eria yakure boigo. 36Korende onye emanyekanete ng’a eng’ombe eria nigo enarete goita abanto, na omonyene tayesibeti, goika aakane omonyene eng’ombe eria yakure ase okomoa eng’ombe eria ere moyo; na eria yakure ebe eyaye.”
Currently Selected:
OKONG’ANYA 21: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
