OKONG’ANYA 2
2
Okoiborwa kwa Musa na ogotoorigwa kwaye
1Omonto oyomo bw’enyomba ya Lawi akanyuoma omoiseke o Lawi. 2Omokungu oria akaba morito, akaibora omwana omoisia, na ekero aroche ng’a omwana oria nomuya mono, akamobisa ase engaki y’emetienyi etato. 3Ekero aroche ng’a takonyara komobisa goetania agwo, akaimokia ekebaari ki’amauncho, agakeooma esike, erio agaaka eramu korwa isiko. Erio akaareria omwana oria ase ekebaari ime, agakebeka ase amauncho ime y’orooche rwa Naili. 4Omoiseke omwabo omwana oria agatenena aare ake amanye egekonyora omwana.
5Erio omoiseke o Farao agatirimboka gochia rooche gwesibia, na abasomba baye abaiseke bakaba bakonagotaara ase engegu. Ekero aroche ekebaari keria ase amauncho, agatoma omoiseke oyomo akerente; 6agakemumora, akanyora omwana omoke ore imeo. Omwana oria akarera, na omoiseke o Farao akamororera amabeebe, agakwana, “Oyoiga noyomo bw’abana b’Abaibirania.”
7Omoiseke omwabo omwana oria akaboria omoiseke o Farao, “Inee! Norigetie ngende nkorangererie omokungu oyomo bw’Abaibirania ache gokomogonkeria?”
8Omoiseke o Farao akamoiraneria, “Ee, genda!” Erio akagenda, akarangeria ng’ina omwana oria. 9Omoiseke o Farao agatebia omokungu oria, “Moire omwana oyo, omongonkerie, na inche ninkoe eng’eria yao.” Erio omokungu oria akaira omwana, akamorera. 10Ekero omwana oria akinire, omokungu oria akamoirania ase omoiseke o Farao koba omwana oye na ere akamoroka Musa,#2:10 Musa, engencho yaye: omong’usi ogoteba, “Ndooche namorusetie.”
Musa ogotama gochia Midiani
11Egachia koba ekero Musa abeire omonto omonene, rituko erimo akagenda gokwania Abaibirania bamwabo, akarora buna baare gokorigwa emeremo emekong’u. Agwo akarora Omomisiri ogoaka oyomo bw’Abaibirania bamwabo. 12Erio akamaga‐maga chinsemo chionsi, na ekero arora ng’a monto onde tari aande, agaita Omomisiri oria, akabisa omobere oye ase omokenye ime. 13Naende akagenda rituko ria kabere, akarora Abaibirania babere bakorwana; akamoboria oria ochegetie oyomwabo, “Nase ki ogoaka oyomino?”
14Omonto oria akamoiraneria, “Ning’o okobegete koba omoteneneri na omogayani igoro yaito? Inee! Nigo origetie kong’ita buna gwaita Omomisiri oria?” Aya akagera Musa akoboa. Ere agateba ase omoyo oye ime, “Ndoche ng’a amang’ana aya amanyekanire.” 15Ekero Farao achia koigwa amang’ana ayio akarigia goita Musa, korende Musa agatama korwa o Farao gochia komenya Midiani, agaika ase ensoko yare, agaikaransa aroro.
16Narengeo omokuani o Midiani obwate abaiseke batano na babere. Barabwo bagacha kobuucha amache; bagaichoria chintuba amache banyoisie riicho ria ise. 17Erio abarisia b’aroro bagacha bakabaseria, korende Musa agatenena agakonya abaiseke baria na kobanyoiseria riicho riabo. 18Ekero abaiseke baria bairanete ase Reueli ise, ere akababoria, “Nakimwakora rero mwairana bwango iga?”
19Bakamoiraneria, “Omomisiri oyomo otokonya korwa ase abarisia baria; amo nayio otobuuchera amache na gotonyoiseria riicho riaito.”
20Erio ise akababoria, “Ng’ai are? Naki mwakora mwatiga omonto oyio? Gachie momorangerie ache koragera amo naintwe.”
21Musa agancha komenya bw’omonto oria na ere akaa Musa Sipora, omoiseke oye, akaba mokaye. 22Omokungu oyio akamoiborera omwana omoisia, na Musa akamoroka Gerisomu,#2:22 Gerisomu, engencho yaye: omomenyi ogoteba, “Nabeire omomenyi ase ense engeni.”
23Nyuma y’engaki entambe koyaetire omoruoti o Misiri agakwa. Abaisraeli bakaba bakwerera inse y’obosomba obwo, bakarera bakonywe, na ekerero kiabo kegaika igoro, ase Nyasae. 24Nyasae akaigwa ekerero kiabo, akaba okoinyora okobwatana kwaye kw’ogotianania, okwo akorete na Ibrahimu, na Isaka, na Yakobo; 25akarorera Abaisraeli amabeebe na kobechandera.
Currently Selected:
OKONG’ANYA 2: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
