OKONG’ANYA 19
19
Abaisraeli ase egetunwa gia Sinai
1Rituko rie ritang’ani ri’omotienyi o gatato nyuma Abaisraeli kobarure ase ense ya Misiri, bagaika ase erooro ya Sinai. 2Bakamanora korwa Refidimu, bagaika ase erooro ya Sinai, bagatoora kororia egetunwa gia Sinai. 3Musa agatiira gochia egetunwa igoro koumerana na Nyasae.
Omonene akamorangeria agwo ase egetunwa, akamotebia, “Amang’ana aya naro oratebie abanto b’egesaku kia Yakobo, baria Abaisraeli: 4Inwe mwarorire aya nakoreire Abamisiri, na buna nababogoretie inwe buna ensoti ekobogoria amage aye ase chimbaba chiaye, nabarentire aiga asende. 5Bono komoranyigwere na kobwata okobwatana kwane kw’ogotianania, rirorio inamobe abanto baane. Naki ense yonsi neyane, korende inwe inamobe abanto baane abachore kobua abanto b’ebisaku binde. 6Inwe inamobe oboruoti bwane, abanto bagonkorera buna abakuani, egesaku kiane egechenu. Amang’ana aya naro oratebie Abaisraeli.” 7Erio Musa akagenda akarangeria abagaaka b’Abaisraeli amo, akabatebia amang’ana ayio onsi Omonene amochigete. 8Na abanto bonsi amo bakairaneria, bakabora, “Ayio onsi Omonene atebire, inatoyakore.” Musa nere akairera Omonene amang’ana abanto bairaneretie.
9Omonene agatebia Musa, “Ninchiche asore inde ase riire ririto ime, erio abanto aba baigwe kongokwana naye, na barabwo bakwegene botambe.”
Erio Musa agatebia Omonene amang’ana abanto bairaneretie.
10Omonene agatebia Musa, “Genda ase abanto aba, obachene rero na ankio. Obatebie basibie chianga chiabo, 11bebeke ang’e goika rituko ria gatato, ekiagera ase rituko eri inche Omonene ning’ike ase egetunwa gia Sinai, agwo ase abanto bonsi barandore. 12Aye goika obekere abanto aba orobebe roetanane egetunwa eke, obatebie: Mwerende, timotiira ase egetunwa igoro, gose timokuna chinsinyo chiaye. Onde bwensi oragekune nigo araitwe akwe. 13Okoboko kw’omonto onde tigokuna omonto orakore ayio, korende nigo araakwe amagena gose araswe nemegwe. Aya achikirwe ase mwanyabanto na ase ching’iti, korende ekero egetureri kerabugigwe eriogi ri’ekerondereria, erio nario abanto baratiire gocha ase egetunwa.”
14Musa agatirimboka korwa ase egetunwa gochia ase abanto, akabachena, na barabwo bagasibia chianga chiabo. 15Musa akabatebia, “Mwebeke ang’e goika rituko ria gatato: timobaisa goika abakungu baino ang’e.”
16Ase rituko ria gatato ekero kia mambia bikaba enkoba na okomesa, ne riire ririto rigaika ase egetunwa, na eriogi ri’egetureri rikooga mono. Abanto bonsi ase egetwori bakaondoka na koiguswa.
17Erio Musa agatang’ana abanto korwa ase egetwori bachie koumerana na Nyasae. Barabwo bagatenena ase egetunwa mbarabare. 18Egetunwa gionsi gia Sinai kegatubwa nerioki, ekiagera Omonene aigete aroro ore ase omorero ime; na erioki rigachongororoka gochia igoro buna eri’eriko rinene ri’oboturi, na egetunwa ekegima gekanyegerigwa mono. 19Eriogi ri’egetureri rikagenderera kwoga mono kobua. Musa agakwana, na Nyasae akamoiraneria nogoaka gw’enkoba. 20Omonene agaika ase egechuria ki’egetunwa gia Sinai, akarangeria Musa agende asare, na Musa agatiira gochiao. 21Erio Omonene agatebia Musa, “Tirimboka gochia inse ase abanto, obakurere tibatamboka orobebe bache kondora. Baise gokora igo, abange babo mbakwe. 22Na abakuani barabwo kobagocha asende, inche Omonene, goika bechene, timbaisa kobaa egesusuro.”
23Musa agatebia Omonene, “Abanto aba tibakonyara gotiira gocha aa ase egetunwa gia Sinai, ekiagera aye omonyene ngwatokania, ogatotebia: Beka orobebe roetanane egetunwa, na ogiatanane kebe egechenu.”
24Omonene akamotebia, “Tirimboka gochia inse, orente Haroni, motiire nere gocha aa. Korende abakuani na abanto tibabaisa gotamboka orobebe gocha aa asende, mbaise kobaa egesusuro.” 25Erio Musa agatirimboka gochia ase abanto, akabatebia amang’ana ayio.
Currently Selected:
OKONG’ANYA 19: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
