OKONG’ANYA 13
13
Ogwatanana abana abatangi ne ching’iti chintangi ase Omonene
1Omonene agatebia Musa, 2“Nyatananere kera omwana omotangi bw’Abaisraeli, oyo okoigora enda ya ng’ina, ne ching’iti chintangi boigo. Abwo nabaane, na chirochio nechiane.”
Rituko rinene ri’Emegati etabekiri memera
3Erio Musa agatebia abanto, “Mobe mokoinyora rituko eri mwang’anyete korwa ase ense ya Misiri, ense eyio mwarenge abasomba, ekiagera Omonene abang’anyetie korwa agwo nokoboko kwaye gwe chinguru. Omogati obekire ememera toriegwa. 4Rituko ria rero ase omotienyi bw’Abibu noro mokong’anya korwa aa. 5Omonene nabarierete chisokoro chiaino eira ng’a nabae ense y’Abakanani, na Abahiti, na Abaamori, na Abahivi, na Abayebusi. Eyio nense entenenku ere namabeere na amooke. Ekero arabaikie agwo goika mobe mokomoruera ekeng’wanso eke ase omotienyi oyio. 6Ase engaki y’amatuko atano na abere mobe mokoria emegati etabekiri memera; ase rituko ria gatano na kabere ribe Rituko Rinene ri’Omonene. 7Ase amatuko atano na abere emegati etabekiri memera eriegwe. Emegati ebekire ememera, gose ememera emenyene, tibirorekana ase ense yaino engima. 8Aye ase rituko erio otebie omwana oo: Aya nigo nkoyakora ase okoinyora aya Omonene ankorerete ekero ang’anyetie korwa Misiri. 9Amang’ana aya abe ekemanyererio ase okoboko kwao, na ase obosio bwao abe ekeinyorio kegokoinyoria, erinde ogenderere gokwana amachiko Omonene, ekiagera Omonene nakong’anyetie korwa Misiri nokoboko kwaye gwe chinguru. 10Ase ayio ogochika oko goika okorende omwaka ase omwaka ase engaki eyio echikire.”
Abana abatangi ne ching’iti chintangi
11“Ekero Omonene aragoikie ase ense ya Kanani, buna akorierete eira, aye amo ne chisokoro chiao, na akoyee, 12omwatananere kera omwana omoisia omotangi; na kera eng’iti entangi y’eeri, na emingichi, na egoree; echio nigo chirabe echi’Omonene. 13Korende kera emori entangi y’etigere goika oyeboorie ase okorua emanwa y’eng’ondi ebe ekeng’wanso. Onye tibwancheti koyebooria goika oyebune ebigoti. Kera omwana omoisia omotangi o mwanyabanto goika omoboorie. 14Engaki erache omwana oo karakoborie: Engencho y’amang’ana aya ninki? Goika omoiranerie: Ase okoboko kwaye gwe chinguru Omonene agatong’anyia korwa Misiri agwo ase twarenge abasomba. 15Naki ekero Farao akong’etie enkoro yaye akaanga gotoa ribaga kogenda, Omonene agaita kera omwana omotangi ase ense ya Misiri amo ne ching’iti chintangi chionsi. Nakio gekogera nkoruera Omonene kera eng’iti entangi y’eeri, na emingichi, na egoree, na omwana one omoisia omotangi nigo nkomobooria. 16Amang’ana aya goika abe ekemanyererio ase okoboko kwao na ase obosio bwao, ekiagera Omonene natorusetie korwa Misiri nokoboko kwaye gwe chinguru.”
Riire na omorero
17Ekero Farao aete abanto ribaga bagende, Nyasae tabaraa baetere ense y’Abafilisti, nonya enchera eyio yarenge omobutokanio. Nyasae nigo arengereretie ng’a aande onye abanto aba bagochia koumera esegi mbabaisa koirana Misiri. 18Ase ayio Nyasae akabaraa goetanana ase erooro gochia Enyancha Embariri. Na Abaisraeli bakarua ase ense ya Misiri bare nebirwanero bi’esegi.
19Musa akairana amauga a Yusufu, ekiagera Yusufu konya otianirie Abaisraeli, agateba, “Ekero Nyasae arabachere abakonye, goika moire amauga aane, mogende naro.”
20Barabwo bakaimoka bakarua Sukoti, bagatoora agwo Etamu aase erooro echakerete. 21Omonene akaba okobatang’ana, omobaso ase riire riare buna esiiro aborokie enchera, na botuko ase omorero orenge buna esiiro abae oborabu, erio barore ase bakogenda, omobaso na obotuko. 22Riire riria riare kobaraa mobaso, na omorero botuko, tibiare korua ase amasio abo.
Currently Selected:
OKONG’ANYA 13: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
