OGOKORA KW’ABATOMWA 20

Paulo ase Makedonia, na Bogiriki, na Teroa

1Eburu‐buru eria egachia koera, Paulo akarangeria aborokigwa, akabaremia, agatigana nabarabwo, akaimoka akagenda Makedonia. 2Erio gaetire chinsemo chiria na gokwana amang’ana amange ase okobaremia, agaika Bogiriki. 3Akamenya aroro emetienyi etato. Ekiagera Abayahudi bamoboerete, konya omanoire kogenda ase enyancha gochia Siiria, agachora koiranera goetera Makedonia. 4Abanto aba bakagenda nere: Sopater Omoberoya, mosinto o Piro, Aristarko na Sekundo, abanto ba Tesaloniki, na Gayo, omonto o Deribe, na Timotheo, na abanto b’Asia, Tukiko na Torofimo. 5Abanto aba bagatang’ana, bagatoganyera Teroa. 6Intwe tokarua Filipi nemeeri nyuma y’amatuko Emegati etabekiri memera, tokagenda orogendo rw’amatuko atano, tokabaikeera Teroa. Tokabeera aroro amatuko atano na abere.

Eutiko

7Ase rituko rie ritang’ani ri’echuma, ekero twasangererekanete ase ogosamunyora omogati, Paulo agakwana nabarabwo, agachiererera namang’ana aye goika botuko gati, ekiagera arengereretie komanora rituko ria kabere. 8Nchiarengeo chitaya chinyinge ase enyomba ya irongo aase twasangererekanete. 9Omomura oyomo, erieta riaye Eutiko, oikaransete ase ekebao, akabwatwa ne chitoro chindito ekero Paulo agendererete gokwana; akabugwa ne chitoro chinyinge akagwa korwa rirongo ria gatato, akabogorigwa konya okure. 10Korende Paulo agaika, akamoumamera, akamoagata, akabora, “Timoichana, ekiagera obogima bwaye nao bore ime yaye.” 11Paulo akariina igoro naende, agasamunyora omogati akaria, agakwana nabarabwo goika bogakia mambia. Erio akaimoka, akagenda. 12Bakarenta omomura oria, ore moyo, bakaba nokoremigwa okonene.

Orogendo gochia Mileto

13Korende intwe togatang’ana kogenda nemeeri, tokagenda goika Asosi. Tokarengereria ng’a ntonyore Paulo aria, ekiagera ere nabo achigete. Ere omonyene nigo arengereretie kogenda namagoro. 14Ekero achia gotoikeera aaria Asosi, tokamosoyia ase emeeri, togaika Metilene. 15Tokamanora korwa agwo, ne rituko ria kabere togaika kororia Kio. Rituko ria gatato togaika Samo, tokabeera Torogilo, ne rituko ria kane togaika Mileto. 16Naki Paulo nigo arengereretie goeta Efeso mbarabare, tabaisa gotebana ase Asia, ekiagera nigo are koayerera kogenda Yerusalemu rituko ria Pentekosti, keranyarekane.

Paulo ogoakera abagaaka ba Efeso ng’a batigare buya

17Korwa Mileto Paulo agatoma abanto kogenda Efeso barangerie abagaaka b’ekanisa. 18Bagachia goika asare, akabatebia,

“Inwe abanyene mwamanyire buna narenge egati yaino ekero gionsi korwa rituko rie ritang’ani nachagete gotacha aiga Asia, 19buna nakorerete Omonene ase obokanyeku bwonsi, na ase amariga, na ase amateemwa nanyorete ase ogotega kw’Abayahudi. 20Inche tinabisete ring’ana rinde rionsi eriranyare kobakonya, korende inaborogetie inwe maiso marore enyomba ase enyomba, 21na ngakurera Abayahudi na Abagiriki baonchokere Nyasae, na komwegena Omonene oito Yeso Kristo. 22Gaki bono rora, nkogenda nde Yerusalemu, nasibirwe n’Omoika. Timanyeti ayarachie koonyora aaria, 23otatiga ng’a Omoika Omochenu nigo okoorokia omochie ase omochie ng’a ogosibwa na emechando mbinganyete. 24Korende obogima bwane timbobareti ng’a negento kie rigori rinene asende, erinde nkoore orogendo rwane, na obosomba boria nanyorete ase Omonene Yeso koorokia enchili y’amabera a Nyasae. 25Bono rora, namanyire ng’a timokondora obosio bwane naende, inwe mwensi aba nabeire ngotaara ase egati yaino na kobaranderia amang’ana ’oboruoti bwa Nyasae. 26Ase ayio nabaorokeirie bonsi ase rituko ria rero, ng’a inche tindi na komocha ase amanyinga a monto onde bwensi, 27ekiagera tinangete kobaranderia amang’ana ’okworokereria gwonsi kwa Nyasae. 28Mwerende inwe abanyene amo ne riicho riria Omoika Omochenu obabegete mobe abarendi korisia ekanisa y’Omonene, eye enyorerete namanyinga aye omonyene. 29Namanyire inche ng’a nyuma ase okoimoka kwane chisese chi’orosana chintindi nachiche asemore, tichirorera riicho amabera, 30naende korwa ase egati yaino abanto mbaimoke bagokwana amang’ana ’obong’ainereria, bang’use aborokigwa babatunyane. 31Ase ayio renda, moinyore ng’a ase emiaka etato, obotuko na omobaso, tinatigete gokurera kera omonto ase amariga. 32Gaki bono nababekire ase amaboko a Nyasae, na ase ring’ana ri’obuya bwaye, asare ere oyoranyare kobaagacha na kobaa omwando amo nabwo bonsi abachenirwe. 33Tinaganetie efeta, nonya netahabu gose chianga. 34Inwe abanyene mwamanyire ng’a amaboko aya aane ankoreire okorigia kwane, na okw’abwo barenge amo nainche. 35Ase amang’ana aya onsi nabaorokeirie ng’a ase ogokora emeremo iga, nebagwenerete mokonye abatari ne chinguru, na koinyora amang’ana ’Omonene Yeso, buna akwanete omonyene: Nasesenirie oyokorua kobua oyokonyora.”

36Gakoorire gokwana aya agatung’ama inse, agasaba amo nabarabwo bonsi. 37Na bonsi bakaiyeria amariga, bakaboania Paulo rigoti riaye, bakamonyunyunta. 38Bagaichana kobua ase engencho ye ring’ana riaye, atebete ng’a, “Timokondora obosio bwane naende.” Bakamokooba goika ase emeeri.

Currently Selected:

OGOKORA KW’ABATOMWA 20: EKEGUSIIBBLE

Highlight

Copy