Sus 1
1
Ûthaka wa Susana nîwagucîrîrie atucanîri ciira aîrî
1Kûu Babuloni kwarî na mûndû watûûraga kuo wetagwa Joakimu. 2Nîwavikirie Susana mwarî wa Hilikia. Mwîrîtu warî mûthaka mûno na wetigîrîte Mwathani. 3Aciari ake maarî athingu na nîmaathomithîtie mwîrîtu wao kûrûmîrîra watho wa Musa. 4Joakimu aarî mûtongu mûno na aarî na mûgûnda mwaro mûno wathiûrûrûkîrîtie nyomba yake. Nao Ayahudi nîmaathiîcaga kûrî ke maita meengî nîûndû nîke warî mûtîîe gûkîra acio engî onthe. 5Mwaka ûcio athuuri aîrî nîmaathuurirwe gatagatîrî ka andû maarî atucanîri ciira. Ûvoro wao Mwathani nîwaugîte atîrî: “Babuloni kûrî na mevia, atucanîri ciira matiratongoria andû kûringana na ûrîa magîrîrîte.” 6Andû aya nîmaathiîcaga mûciî kwa Joakimu maita meengî na andû onthe arîa maarî na maciira nîmaathiîcaga kûrî o.
7Wa mûthenya thaa thita rîrîa andû maumagara Susana nîwathiîcaga mûgûndarî wa mûthuuriwe na agaceranga kuo. 8Athuuri acio aîrî nîmaamwonaga wa mûthenya agîtonya na akiuma na makîambîrîria kûmwîrirîria. 9Meciria mao nîmaagucîrîrue na magîtiga kûvoya na kûruta wîra wao waro ta atucanîri ciira. 10Wa mûndû nîwendaga Susana, nwatî gûtirî mûndû weraga ûrîa wîngî ûrîa eegucaga, 11nîûndû wa mûndû nîwegucaga nthoni kumbûra atî nîweriragîria kûmenyana nake kîîmwîrî. 12Kwoguo nîmeekaraga mûthenya wa mûthenya makîendaga kwona Susana.
13Mûthenya ûmwe nîmeranire atîrî, “Nî vîndî ya kûrîa irio, twînûkeni.” 14Rîrîa maumire, nîmaatiganire na wa mûndû akîthiî njîra yake. Nwatî rîrîa maacokaga, nîmaacemanirie rîngî. Wa mûndû nîwageririe gûtaarîria ûrîa ekaga kuo, nwatî mûthiiarî, wa oîrî nîmaaumbûrire atî nîmeriragîria Susana. Nîmaavangire macarie kavinda karîa mangîmwona arî wenga. 15Kwoguo nîmekarire metererete mûthenya ûrîa mwagîrîru ûkinye.
Atucanîri ciira nîmaageririe kûveenereria Susana
Mûthenya ûmwe Susana nîwathiîre mûgûndarî arî na ndungata igîrî cia erîtu wata ûrîa aamenyerete, na akîenda kwîthambîria kûu mûgûndarî nîûndû kwarî na ûrugarî mûno. 16Gûtirî mûndû warî kuo tiga atucanîri ciira arîa aîrî meethithîte kuo mamûroretie. 17Nîwerire ndungata ciake atîrî, “Ndetereni maguta ma kwîvaka na mûvinge mîrango nîguo nîthambie.” 18Ndungata nîciavingire ivingo irîa nene na makiuma na mûrango wa mwena nîguo makagîrîre Susana kîrîa eetîtie. Mationa atucanîri ciira acio aîrî nîûndû nîmeethithîte.
19Rîrîa ndungata ciathiîre, atucanîri ciira acio aîrî nîmaaumire kûrîa meethithîte na makîvinyûra kûrî Susana 20na makîmwîra atîrî, “Taroria, mîrango nî mîvinge na gûtirî mûndû ûngîtwona. Tûrenda kûmenyana nawe kîîmwîrî, kwoguo îtîkîra na ûmame natue. 21Wona warega, nîtûthiî îgootirî na twîvîte atî nîtwonire ûkîngata ndungata ciaku nîguo mûtigwe mûrî muenga na mwanake.”
22Susana nîwavevire na vinya, na akiuga atîrî, “Nîrîmûgucanîrie mîena yonthe, nîngîgwîtîkîria nwa mbûragwe nîûndû wa ûtharia. Wona narega, mûkaanyitithia. 23Nwatî nî kava ndege namue mûnyitithie, gûkîra kwîvia mbere ya Mwathani.” 24Susana nîwacokire akiugîrîria na mûgambo mûnene, nao atucanîri ciira acio aîrî makîmugîrîria makîmwigagîrîra maûndû. 25Ûmwe wao nîwavinyûrire na akîvingûra ivingo.
26Rîrîa ndungata irîa ciarî nyomba ciegwire înegene na kûu mûgûndarî, nîciavinyûrire igîtonyerera mûrangorî wa mwena nîguo ikone ûrîa gwekîkîte kûrî Susana. 27Rîrîa atucanîri ciira maavecanire rûgano, ndungata nîciamakire mûno na igîconoka, nîûndû Susana ndaanagwetanua na ûndû ta ûcio rîngî.
Atucanîri ciira nîmaarutire ûira makîregana na Susana
28Mûthenya ûcio wîngî, rîrîa andû maacemanirie mûciî kwa mûthuuriwe Joakimu, atucanîri ciira acio aîrî nîmaakinyire matuîte nama atî nîmakûvingia mûvango mûcûku wa kûûragithia Susana. 29Nîmaaugire andû onthe makîgucaga atîrî, “Tûmanîra Susana, mûka wa Joakimu mwarî wa Hilikia aûke.” 30Kwoguo nîmaamûtûmanîre. Nake aaûkire na aciari ake, ciana na andû ao onthe. 31Susana aarî mwaro na mûndû mûka mûthaka akîoneka. 32Arûme acio aîrî aganu nîmaathanire Susana arutwe gîtambaa kîrîa eekunîkîrîte nakîo nîguo makenage makîmwona. 33Nwatî andû a mûciî wake, arata na andû onthe arîa maamwonire nîmaarîrire.
34Nao atucanîri ciira nîmaarûngamire mbere ya andû na makigîrîra njara ciao kîongorî gîa Susana. 35Susana akîrîraga nîwaroririe na îgûrû nîûndû nîwetîkîtie Mwathani. 36Arûme acio aîrî nîmaaugire atîrî, “Twathiîcaga na kûu mûgûndarî vîndî îrîa mûndûmûka ûyû aatonyire na ndungata igîrî cia erîtu. Nîwavingire ivingo irîa nene na akîîra ndungata ithiî. 37Mwanake mwîthî ûrîa wethithîte kûu mûgûndarî, nîwathiîre kûrî ke na akîmama nake. 38Twarî mûthiia wa mûgûnda, na rîrîa twonire waganu ûyû nîtwavinyûrire 39na tûkîmanyita magîka waganu. Nîtwageririe kûnyita mûndûmûrûme, nwatî aarî na vinya mûno kûrî tue. Nîwavinyûrire, akîvingûra mîrango na akîûra, 40nwatî nîtwavotire kûnyita mûndûmûka. Kwoguo nîtwamûririe mûndûmûrûme ûcio nû, nwatî nîwaregire gûtwîra. Nîtûkwîvîta atî ûguo twauga nî ûûma.” 41Andû nîmeetîkirie andû acio, nîûndû maarî athuuri akûrû na maarî atucanîri ciira, kwoguo nîmaatuire Susana aûragwe.
Danieli nîwavonokirie Susana
42Susana nîwacokire akîrîra na mûgambo mûnene atîrî, “We Ngai wa tene na tene, we nîwîcî maûndû monthe marîa mekagîrwa nthithorî na nîûmenyaga maûndû monthe mbere ya mekîka. 43Nîwîcî atî arûme aya nîmarutîte ûira wa maveeni ûmbîgiî. Na rîu nthiîte kûûragwa! Kûnarî ûguo gûtirî ûndû wanarî ûmwe wa mau marambigîrîra mbîkîte.”
44Nake Mwathani nîweguire kîrîro gîake. 45Rîrîa Susana aumagarîtue athiîte kûûragwa, Mwathani nîwatûmire mwanake ûmwe wîtagwa Danieli aaria arî na roho mûtheru. 46Nake Danieli nîwaririe na mûgambo mûnene akiuga atîrî, “Ndirenda kûgwatanîra namue kûûragithia mûndûmûka ûyû!”
47Nao andû onthe nîmevûgûrire na kûrî Danieli na makîmûria atîrî, “Nî atîa ûguo wauga?”
48Danieli nîwarûngamire mbere ya andû acio na akiuga atîrî, “Mue andû a Isiraeli mûrî aritu. Nîndûî gîatûma mûtuîra mûndû mûka Mûisiraeli atarî mwîyarîrîriu na mûtatuîrîtie maûndû waro mûmenya ûûma? 49Ciira nîûcokerwe. Nîûndû ûira ûrîa warutwa nî arûme aya aîrî nîwa maveeni.”
50Kwoguo andû onthe nîmaacokire na îvenya varîa vaaciragîrwa. Nao athuuri nîmerire Danieli atîrî, “Îkara nthî ûtwîre maûndû mau nîûndû Ngai nîakûvete ûûgî ta wa athuuri.”
51Nake Danieli nîwamerire atîrî, “Thathûraniani atucanîri ciira aya, mwige wa mûndû varaca na ûrîa wîngî, nanie nîngûmatuîria.” 52Rîrîa atucanîri acio maigirwe wa mûndû mwanya, Danieli nîwathanire ûmwe wao etwe na akîmwîra atîrî, “We mûcirithania mûcûku, nîûgûcokererwa nî maûndû marîa waneka. 53Ûtûûraga ûtucaga ciira ûrîa gûtagîrîrîte, ûkaûragithia andû matarî na mavîtia nwatî ûkarekereria arîa marî na mavîtia, wana ethîrwa Mwathani augîte atî, ‘Ndûkaûrage mûndû ûtarî na mevia na mûthingu.’ 54Rîu ta mbîîra atîrî, Ethîrwa na ma nîûronire andû aya makîmenyana kîîmwîrî, maramamîte rungu rwa mûtî ûrîkû?” Nake nîwacokirie atîrî, “Nî rungu rwa mûgumo.”
55Danieli nîwaugire atîrî, “Nama ûguo wauga nî ûthani na ûndû ûcio nîûgûtûma ûûragwe, nîûndû Ngai nîavete mûraika wake rûtha agwatûranie maita maîrî.”
56Nake Danieli nîwacokire akiuga mûndû ûcio arutwe vau nake ûcio wîngî aretwe. Danieli nîwerire mûndû ûcio atîrî, “We wîkariî ta mûndû wa kuuma Kanaani, ndwîkariî ta mûndû wa kuuma Juda. Ûthaka nîûrakûveenia, merirîria maku macûku magatûma wîcirie maûndû macûku. 57Maûndû mau nîmo mûtwîre mwîkaga aka a Isiraeli nîûndû nîmamwîtigagîra, nwatî mwîrîtu wa Juda ndangîtîkîra waganu wenyu. 58Rîu mbîra: nî rungu rwa mûtî ûrîkû wonire marî vamwe?” Nake nîwamûcokerie atîrî, “Nî rungu rwa mûvuru.”
59Nake Danieli nîwamwîrire atîrî, “Nama mau nî maveeni! Ûndû ûcio nîûgûtûma ûûragwe. Nîûndû mûraika wa Ngai arûngamîte na rûviû nîguo agwatûranie maita maîrî na muoîrî mûthire viû.”
60Nakîo kîrîndî nîgîakumirie Ngai na vinya wonthe, ûrîa ûvonokagia arîa mamwîrîgagîrîra. 61Nîmaaûkîrîre acirithania acio aîrî, nîûndû Danieli nîwonanirie cararûkû atî ûira wao warî wa maveeni. 62Nakîo kîrîndî nîkîamaûragire wa ta ûrîa watho wa Musa ugîte. Maûndû macûku marîa maavangîte gwîka mûndû ûtarî na mavîtia nîo mekirwe mo. Mûthenya ûcio mûndû ûtarî na mavîtia nîwavonokirue. 63Hilikia na mûka, Joakimu mûthuuri wa Susana vamwe na andû ao onthe nîmaakumirie Ngai nîûndû Susana nîwonirwe atarî na mavîtia. 64Kuuma mûthenya ûcio Danieli nîwagîre ngumo nene gatagatîrî ka andû.
Currently Selected:
Sus 1: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019