Îvoya 1

Îvoya rîa Azaria

1 # Dan 3.23 Anake athatû na nîo Hanania, Mishaeli, na Azaria (Andû aya nwa o metagwa Shadiraka Mîsheki na Abedinego) nîmaambîrîrie kûvîtûkîrîra nînîmbîrî cia mwaki, makinagîra Ngai nyîmbo magîkumagia mwathani. 2Azaria nîwarûngamire na arî mwakirî nîwavoire îvoya rîrî augîrîrîtie:

3“Ûrorathimwa we Mwathani Ngai wa methe metû na nîwe wagîrîrwe nî kûgoocwa;

rîîtwa rîaku nîrîkumagua vîndî cionthe.

4Nîûtwîkîte ûrîa twagîrîrîte.

Maûndû monthe marîa ûtwîkîte wîthagîrwa ûrî mwîvokeku,

namo matuîro maku ma ciira nîma ma.

5We nîûtuîte îtua rîa ma maûndûrî monthe marîa ûtwîkîte,

na ûgeka Jerusalemu, îtûûra rînene rîa methe metû,

nîûndû na njîra ya ûûma na kîvooto ûtûreterete maûndû mama monthe nîûndû wa mevia metû.

6Nîûndû nîtûkwîvîrîtie na tûkarega gûkwathîkîra,

maûndûrî monthe nîtwîvîtie na tûkarega kwathîkîra maathani maku;

7nîtûregete kûmarûmîrîra kana kûmeka,

wata ûrîa we ûtwathîte nîguo wanatue tûkona maûndû maro.

8Kwoguo maûndû monthe marîa ûtûreterete,

na maûndû monthe marîa ûtwîkîte,

wîkîte na îtuîro rîa ma.

9Nîûtûnenganîrîte kûrî nthû itarûmagîrîra watho,

kûrî aregi arîa mamenetwe mûno,

na kûrî mûthamaki ûtarî wa ma na mwaganu mûno nthî.

10Na rîu tue tûtingîvingûra tûnyua twetû;

ndungata ciaku na arîa makûgoocaga nîinyitîtwe nî gîconoko na kûnyararwa.

11“Nîûndû wa rîîtwa rîaku ndûgatûtiganîrie,

na ndûkaune kîrîkanîro gîaku natue.

12Ndûkathengutie ntha ciaku kûrî tue,

nîûndû wa Iburahimu ûrîa wendete,

nîûndû wa Isaka ndungata yaku,

na Isiraeli ûrîa waku mûtheru,

13ûrîa werîre nîûkaamûva njiarwa nyîngî ta njata cia îgûrû,

kana ta mûthanga wa rûtere rwa îria.

14Nwatî rîu we Mwathani tûrî anini gûkîra andû a vûrûri wa wonthe,

na tûrî anyarare nthî yonthe nîûndû wa mevia metû.

15Rîu tûtirî na mûthamaki, mûrathi kana mûtongoria,

gûtirî îtega rîa kûvîvua, îgongoona, iveo kana ûbani,

gûtirî vandû tûngîkûrutîra matega nîguo tûone ntha ciaku.

16Nwatî tûvevenjekete ngoro na twînyivîtie twakûthaitha ûtwamûkîre,

ta tûkîte na matega ma kûvîvua ma ndûrûme na ndegwa,

na tûtûrûme tûnoru ngiri nyîngî.

17Îtîkîra ituîke ta îgongoona mbere yaku ûmûnthî,

natue tûrokûrûmîrîra na ma,

nîûndû gûtirî gîconoko kûrî arîa magwîtîkîtie.

18Na rîu nîtûgûkûrûmîrîra na ngoro cietû cionthe,

nîtûgwîtigîrîte na nîtûgûcaria ûthiû waku.

19Ndûgatûconorithie,

nwatî tûkirîrîrie nîûndû wa ntha ciaku.

20Tûvonokie na njîra ya ciîko ciaku cia magegania,

na ûve rîîtwa rîaku riiri we Mwathani!

Arîa onthe maverithagia ndungata ciaku maroconorithua.

21“Tiga maconorithue na macunwe ûvoti na ûnene wonthe,

na vinya wao ûthirue.

22Tiga mamenye atî we Mwathani nîwe Ngai wenga tu,

riiri na vinya waku ciîcûrîte nthî yonthe.”

23Ndungata cia mûthamaki irîa ciamaikîtie mwakirî itiatiga kûongerera mwaki maguta, rami, mûvûra na ngû. 24Naruo rûrîrîmbî nîrwanenevire rûkîambata na îgûrû ta mita mîrongo îîrî, 25na nîrwanenevire na rûkîvîvia andû a Babuloni arîa maarî vakuvî na mwaki ûcio. 26#Tob 5.4 Nwatî mûraika wa Mwathani nîwanyûrûrûkire agîtonya mwakirî ûcio varîa Azaria na andû acio engî maarî na akîthengutia nînîmbî cia mwaki vakuvî nao. 27Nîwatûmire vau gatagatî ka mwaki vekare takwa vaarî na rûkûngi rûrî na mvevo rwavurutanaga vo. Kwoguo mwaki ndwamavutia kana ûmavîvia wana kana ûmathînia.

Rwîmbo rwa anake acio athatû

28Nao anake acio athatû marî kûu îcuarî rîa mwaki nîmaainîre Ngai, makîmûgooca na makîmûkumia marî vamwe makiugaga atîrî:

29“Ûrokumua we Mwathani Ngai wa methe metû,

ûrogoocwa na ûtûûgîrue tene na tene.

30Rîîtwa rîaku rîtheru na rîrî riiri rîrogoocwa;

nîrîkumue na rîtûgîrue tene na tene.

31Ûrokumua ûrî hekarûrî yaku ntheru,

ûgoocagwe na ûgatûgîrua tene na tene.

32We wîkarîrîte gîtî Kîam ûnene kûu îgûrû rîa Akerubi,

na ûroragia kûrîa kûriku mûno,

ûrokumua na ûvewe gîtîîo tene na tene.

33Ûrokumua we wîkarîte gîtî gîaku Kîam ûthamaki.

Winagîrwe na ûtûgagîrue tene na tene.

34Ûrokumua ûrî kûu îgûrû maturî,

winagîrwe na ûkavewa riiri tene na tene.

35“Mue ciûmbe cionthe cia nthî, goocani Mwathani;