Mat 5

Jesû nîwathomithirie andû arî kîrîmarî

1Na rîrîa Jesû oonire andû eengî, nîwaunûkirie kîrîmarî na agîkara nthî. Nao arutwa ake nîmaathiîre kûrî ke, 2na akîambîrîria kûthomithia akiugaga atîrî:

Kîrathimo kîa ma

(Luka 6.20-23)

3“Kûrathimwa nî arîa mecî nîmavatarîte ûtethio wa Kîîroho,

nîûndû Ûthamaki wa Îgûrû nî wao!

4 # Isa 61.2 Kûrathimwa nî arîa marî na kîeva;

nîûndû nîmakaaûmîrîrua!

5 # Tha 37.11 Kûrathimwa nî arîa avoreri;

nîûndû nîmakagaa nthî!

6 # Isa 55.1-2 Kûrathimwa nî arîa mavûtagîra na makanyondera maûndû ma ûthingu;

nîûndû nîmakaavaithua!

7Kûrathimwa nî arîa megucanagîra ntha,

nîûndû nîmakeguîrwa ntha!

8 # Tha 24.3-4 Kûrathimwa nî arîa atheru ngoro,

nîûndû nîmakoona Ngai!

9Kûrathimwa nî arîa matethagîrîria arîa engî gwîkara na thayû,

nîûndû nîmagetagwa ciana cia Ngai!

10 # 1Pet 3.14 Kûrathimwa nî arîa manyariragwa nîûndû wa maûndû ma ûthingu,

nîûndû Ûthamaki wa îgûrû nî wao!

11 # 1Pet 4.14 “Kûrathimwa nî mue vîndî îrîa andû mamûruma, mamûnyarira, na mamwigîrîra ing'enyo cia mîthemba na mîthemba nîûndû mûrî arûmîrîri akwa. 12#2Maû 36.16; Ciîko 7.52 Kenani na mûcanjamûke, nîûndû îgai rîrîa mwigîrîtwe kûu îgûrû nî rînene. Ûguo nîguo arathi arîa maarî kuo mbere yenyu maanyaririrwe.

Cumbî na ûtheri

(Mar 9.50; Luka 14.34-35)

13 # Mar 9.50; Luka 14.34-35 “Mue mwîkariî ta cumbî kûrî andû onthe a nthî. Nwatî cumbî îngîtiga gûcama ta cumbî, nîndûî kîngîtûma îcame cumbî rîngî? Cumbî îo ndîrî vata, nîkwa îtecagwa na îgakinyangwa nî andû.

14 # Joh 8.12; 9.5 “Mue mwîkariî ta ûtheri kûrî andû onthe a nthî. Îtûûra rîrîa rîtumîtwe kîrîmarî îgûrû rîtingîthithîka. 15#Mar 4.21; Luka 8.16; 11.33 Gûtirî mûndû ûgwatagia taa na akamîkunîkîra na ndeve. Nwatî mûndû agwatagia taa, na akamigîrîra vandû îgûrû nîguo ûtheri wayo ûtherere andû onthe arîa marî kûu nyomba. 16#1Pet 2.12 Na njîra wata îno tigani ûtheri wenyu ûmûrîkagîre andû onthe, nîguo moone ciîko cienyu mbaro, na makumie Îthe wenyu ûrîa wî Îgûrû.

Jesû nîwathomithanirie ûvoro wîgiî Watho

17“Mûtigecirie atî mbûkîte nthî kûthiria Watho wa Musa na maûndû marîa mathomithanîtue nî arathi. Nie ndiûkîte kûmathiria, nwatî mbûkîte kûmavingia. 18#Luka 16.17 Nîramwîra na ma atî, îgûrû na nthî itarî nthiru gûtirî gacunjî wana kamwe ka Watho gakaathengutua. Gûtirî gacunjî wana kanini atîa gakaathengutua maûndû monthe marîa marî wathorî matarî mavingu. 19Kwoguo mûndû wa wonthe ûtathîkagîra wana ethîrwa nî rîathani rîmwe rîa marîa manini na agacoka akathomithia andû arîa engî guo, mûndû ûcio akethagîrwa arî mûnini mûno Ûthamakirî wa îgûrû. Nwatî mûndû wa wonthe wathîkagîra Watho na akathomithia arîa engî gwîka guo, nîakethîrwa arî mûnene Ûthamakirî wa îgûrû. 20Nie nîramwîra atî, mue mûtigaatonya Ûthamakirî wa îgûrû tiga nwanga mwîthîrwe mûrî athingu gûkîra arimû a Watho na Afarisai.

Jesû nîwathomithanirie ûvoro wîgiî marakara

(Luka 12.57-59)

21 # Ntha 20.13; Gûco 5.17 “Mue nîmwîguîte atî andû a tene meerîtwe atîrî, ‘Mûtikanaûragane, na mûndû wa wonthe ûkaaûragana nîagaatuîrwa.’ 22Nwatî rîu nîramwîra atî, mûndû wa wonthe ûrakaraga nî ûndû wa mûrwang'ina#5.22 mûndû wa wonthe ûrakaraga nî ûndû wa mûrwang'ina: Mandîko mamwe nîmongagîrîra vatarî gîtûmi. nîagaatuîrwa, na mûndû wa wonthe ûrumaga mûrwang'ina nîagaacirithua nî Kîamma, na mûndû wa wonthe wîtaga ûrîa wîngî, ‘Kîrimû gîkî!’ nîagaaikua mwakirî wa îcua. 23Kwoguo ethîrwa ûthiîte kûrutîra Ngai mûvothi metharî ya kîgongoona, na kavinda wa kau ûririkane atî kûrî na ûndû mûrwanyûkwe aragûcuka naguo, 24tiga mûvothi waku vau mbere ya metha ya kîgongoona na ûthiî wambe wîgucane na mûrwanyûkwe, na mwegucana, ûcoke ûrutîre Ngai mûvothi.

25“Ethîrwa nî kûrî mûndû ûrakûthitanga nî ûndû atî nîûmwîkîte ûndû mûcûku, geria mwîgucane nake mbere ya mûkinya îgootirî, nîûndû wona mwakinya kuo nîagûkûnenganîra kûrî mûcirithania nake akûnenganîre kûrî athigari na wikue njeera. 26Nîrakwîra na ma atî, ndûkaauma kûu njeera îo ûtarîvîte nginya gatururu ka mûthiia ka mbeca irîa ûtuîrîrîtwe.

Jesû nîwathomithanirie maûndû megiî ûtharia

27 # Ntha 20.14; Gûco 5.18 “Mue nîmwîguîte atî nîkwerîtwe atîrî, ‘Ndûkanatharanie.’ 28Nwatî rîu nîramwîra atî: mûndû wa wonthe ûroragia mûndûmûka na akerirîria kûmenyana kîîmwîrî nake, nîarîkîtie kûtharia na mûndûmûka ûcio ngororî yake. 29#Mat 18.9; Mar 9.47 Kwoguo, riitho rîaku rîa ûrîo rîngîtûma wîvie, rîkûûre na ûrîte! Nî kava wîkare ûtarî na kîîga kîmwe Kîam mwîrî, gûkîra mwîrî waku wonthe wikue îcuarî. 30#Mat 18.8; Mar 9.43 Nayo njara yaku ya ûrîo îngîtûma wîvie, mîtinie na ûmîte! Nî kava wîkare ûtarî na kîîga kîmwe Kîam mwîrî waku, gûkîra mwîrî waku wonthe wikue îcuarî.

Jesû nîwathomithanirie ûvoro wîgiî gûtecana kwa mûthuuri na mûka

(Mat 19.9; Mar 10.11-12; Luka 16.18)

31 # Gûco 24.1-4; Mat 19.7; Mar 10.4 “Wana rîngî nîkwerîtwe atîrî, ‘Mûthuuri wa wonthe ûtecaga mûka, nwa nginya amûnengere maarûa ya kûmwonia atî nîwamûta.’ 32#Mat 19.9; Mar 10.11-12; Luka 16.18; 1Akor 7.10-11 Nwatî rîu nie nîramwîra atî: mûthuuri wa wonthe ûtecaga mûka, tiga nwanga mûndûmûka ûcio ethîrîtwe atarî mwîvokeku kûrî mûthuuriwe, mûthuuri ûcio nîatûmaga mûndûmûka ûcio atuîke mûtharia ethîrwa nîakûvika rîngî. Nake mûndû wa wonthe ûvikagia mûndûmûka ûcio mûte, nîethagîrwa atharîtie.

Jesû nîwathomithanirie ûvoro wîgiî mevîta

33 # Ala 19.12; Nda 30.2; Gûco 23.21 “Wana rîngî nîmwîguîte atî andû a tene meerîtwe atîrî, ‘Ndûkanevîte na rîîtwa rîa Mwathani atî nîûgwîka ûndû, na ûrege kûwîka.’ 34#Jak 5.12; Isa 66.1; Mat 23.22 Nwatî nie nîramwîra atî: ndûkanevîte vîndî îrîa ûreranîra ûndû. Ndûkanevîte na îgûrû nîûndû kûu nîkuo Ngai ekaraga akîathana; 35#Isa 66.1; Tha 48.2 kana wîvîte na nthî, nîûndû îo nîyo njûng'wa îrîa aigagîrîra magûrû make. Ndûkanevîte na Jerusalemu nîûndû rîu nîrîo îtûûra rîa Mûthamaki mûnene. 36Wana ndûkanevîte na kîongo gîaku, nîûndû ndûngîvota gûtûma rûcuîrî wana rûmwe ruire kana rûcerûve. 37Mwauga ‘Îî’ nîîtuîkage ‘Îî’, na mwauga ‘Naarî’ nîtuîkage ‘Naarî.’ Ûndû wîngî wa wonthe ûrîa mûngiuga makîria ya ûguo uumaga kûrî Ûrîa Mûcûku.

Jesû nîwathomithanirie ûvoro wîgiî kwîrîvîrîria

(Luka 6.29-30)

38 # Ntha 21.24; Ala 24.20; Gûco 19.21 “Mue nîmwîguîte atî kwîrîtwe atîrî, ‘Mûndû angîgûtûra riitho rîaku wa nawe mûtûre rîake, na mûndû angîgûkûûra îgego rîaku wa nawe mûkûûre rîake.’ 39Nwatî nie nîramwîra atî: mûndû angîkûvîtîria ndûkanerîvîrîrie. Mûndû angîgûcamûra rûvî rûthîa rwaku rwa ûrîo mûvûgûrîre rûthîa rûu rwîngî wana ruo arûcamûre. 40Na mûndû angîkûthitanga nîguo oce cati yaku, tiga oce îgoti rîaku wanarîo. 41Na mûndû angîkûringîrîria ûmûkuîre mûrigo kilomita îmwe, mûkuîre kilomita igîrî. 42Ethîrwa mûndû nwa akûvoe kîndû mûve, na ethîrwa nwa agûkove kîndû mûkovithie.

Endagani nthû cienyu

(Luka 6.27-28,32-36)

43 # Ala 19.18 “Mue nîmwîguîte atî kwerîtwe atîrî, ‘Endagani arata enyu na mûmenage nthû cienyu.’ 44Nwatî rîu nie nîramwîra atîrî: endagani nthû cienyu na mûvoyagîre arîa mamûnyariraga, 45nîguo mwonanagie atî mwî ciana cia Îthe wenyu ûrîa ûrî îgûrû. Nîûndû ke nîke ûtûmaga riûa rîake rîarîre andû arîa aro na arîa acûku, na akauria mbura kûrî andû arîa mekaga waro, na arîa mekaga naaî. 46Ethîrwa mwendaga tu wa andû arîa mamwendaga, Ngai angîmûva kîveo nîkî? Wana etia mbeca cia îgooti nîmekaga wa guo! 47Na ethîrwa mwaragîria tu wa arata enyu, anga kûrî na ûndû mweka ûtekagwa nî andû arîa engî? Wana andû arîa matetîkîtie Ngai nîmekaga wa guo. 48#Ala 19.2; Gûco 18.13 Kwoguo, nwa nginya mwîthagîrwe mûrî akinyanîru wata ûrîa Îthe wenyu wa Îgûrû ethagîrwa arî mûkinyanîru!

Currently Selected:

Mat 5: KKB

Highlight

Copy