Mal 2
2
1Ngai-Mûnene, Mwene vinya wonthe arera athînjîri-Ngai atîrî, “Mue athînjîri-Ngai, nîramwatha ûû: 2ethîrwa tîmûnthikîrîria na mwonanie na ciîko cienyu atî nîmûmveete gîtîîo, nîngûmûretera kîrumi, na ndûme irathimo cienyu cionthe ituîke kîrumi. Nama nînîirumîte nîûndû ûvoro wa kûndîîa ndûrî ngororî cienyu. 3Taroria, nîngaaverithia ciana cienyu, na nîûndû wa waganu wenyu, nîmûvake mothiû menyu mai ma nyamû irîa mûrutîte irî îtega kûrî nie. Nîngaacoka nîmwîngate ndige kûmwona. 4#Nda 3.11-13 Kwoguo nîmûkaamenya atî nîmûvete watho ûyû nîguo kîrîkanîro gîakwa na nyomba ya Alawi gîtûûre.
5 #
Nda 25.12
“Kîrîkanîrorî kîu gîakwa nao, nînamerîre ûvoro wa gûtûûra mwoyo na thayû, na atî nwa nginya mandîîe; nao nîmandîire, na magîtigîra rîîtwa rîakwa. 6Maathomithagia ûvoro wa ma na matianathomithia maûndû ma maveeni. Nie nao twatûûrire tûrî na thayû na marî na mîthiîre mîaro, na makîthomithia andû engî ûvoro wa gûtigana na mevia. 7Wîra wa athînjîri-Ngai, nî kûthomithia andû kîrîra Kîam ma Kîam Ngai, na kûthomithia andû maûndû marîa mendaga meke; nîûndû o nîo anjaama a Ngai-Mûnene mwene vinya wonthe.
8“Nwatî mue athînjîri-Ngai nîmûtiganîrîtie njîra ya ma. Maûndû marîa mûthomithanagia nîmatûmîte andû eengî mavîngwe. Nîmunîte kîrîkanîro kîrîa narîkanîre na Lawi. 9Kwoguo nîndûmîte mûnyararwe na mwagithue kîene mbere ya andû onthe a Isiraeli nîûndû mûtiarûmîrîra njîra ciakwa, nwatî mwîthîrîtwe mûkîthomithia watho na njîra ya kîmenyano.”
Andû nîmaaregire kwîvoka Ngai
10Na kinthî tuonthe tûtirî a îthe ûmwe? Na kinthî tuonthe tûtiaûmbirwe nî Ngai wa ûmwe? Nîndûî vi kîgiragia twîthîrwa tûrî evokeku mûndû na ûrîa wîngî, na tûgatûma kîrîkanîro Kîam Ngai na methe metû kîgîa na kîrumi. 11Andû a Juda nîmaregete kwîvoka Ngai na nîmekîte maûndû marî na mûgiro Isiraeli na îtûûra rîa Jerusalemu. Nîmatûmîte hekarû ya Ngai-Mûnene îrîa endete îgwatwa nî mûgiro. Wana nîmavikîtie aka arîa magoocaga ngai ng'eni. 12Ngai-Mûnene aroruta andû arîa mekaga maûndû mau rûciarorî rwa Jakovu, na matikarute ûira kana magongoona mbere ya Ngai-Mûnene, mwene vinya wonthe.
13Îgûrû rîa maûndû mau monthe, nîmûconjoretie metha ya kîgongoona ya Ngai-Mûnene na methori, mûkîrîra mûgîcaaga nîûndû ndatindanagîra na magongoona menyu, kana amamûkîra. 14Mue mûragia atîrî, “Aregaga kûmamûkîra nîkî?” Gîtûmi nî atî Ngai-Mûnene nî mûira wa atî we wîthîrîtwe ûtarî mwîvokeku kûrî mûka waku ûrîa wavikirie ûrî mwîthî, na nîunîte mwîvîtwa ûrîa weranîre mbere ya Ngai atî nîûgûtûûra ûrî mwîvokeku kûrî ke. 15Na kinthî tî Ngai-Mûnene watûmire we na mûka waku mûtuîke mwîrî ûmwe na mûgîe na ngoro îmwe? Endaga kwonania atîa? Ngai endaga tûgîcage na ciana imwîtigîrîte na imûkumagia. Kwoguo, menyererani atî gûtikethîrwe kûrî na mûndû gatagatîrî kenyu ûtarî mwîvokeku kûrî mûka ûrîa aavikirie arî mwîthî. 16Ngai-Mûnene, Ngai wa Isiraeli augîte atîrî, “Nînthûrîte gûtecana kwa arîa mavikanîtie. Nînthûrîte mûndûmûrûme ûrîa wîkaga mûka gîko ta kîu gîcûku ûguo. Îîmenyerereni atî vîndî cionthe mûtûûre mûrî evokeku kûrî aka enyu.”
Mûthenya wa cira ûrî vakuvî
17Nîmûnogetie Ngai-Mûnene na ndeto itarî na mûkinyo. Nwatî mûragia atîrî, “Tûmûnogetie atîa?” Mûmûnogetie na njîra ya kuga atî, “Ngai-Mûnene nîakenagua nî arîa mekaga maûndû macûku, na nîamendete.” Kana mûkaûria atîrî, “Ngai ûrîa wîkaga maûndû na njîra ya kîvooto arî kû?”
Currently Selected:
Mal 2: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
