Luka 22

Mûvango wa kûûraga Jesû

(Mat 26.1-5; Mar 14.1-2; Joh 11.45-53)

1Mûthenya wa kîrugo Kîam mîgate îrîa îtethagîrwa îkîrîtwe ndawa ya kwimbia nîwakuvîvîrie. Kîrugo kîu gîtagwa pasaka. 2Nao anene a athînjîri-Ngai, arimû a Watho, nîmaatuîragia ûrîa mangîûragithia Jesû na nthitho, nîûndû nîmeetigagîra andû.

Judasi nîwetîkîre gûcukanîrîra Jesû

(Mat 26.14-16; Mar 14.10-11)

3Caitani nîwatonyire Judasi ûrîa wetagwa Mûsikariota na ûrîa warî ûmwe wa arutwa arîa îkûmi na aîrî a Jesû. 4Kwoguo Judasi nîwathiîre kûrî anene a athînjîri-Ngai, wa vamwe na anene a athigari arîa marangagîra hekarû nîguo marîkanîre ûrîa agûcukanîrîra Jesû kûrî o. 5Nao nîmaakenire na makîrîkanîra atî nîmakûmûrîva mbeca. 6Judasi nîwetîkanirie nao na akîambîrîria gûcaria kamweke ga gûcukanîrîra Jesû kûrî o andû matakûmenya.

Jesû nîwevarîrie kûrîa irio cia pasaka

(Mat 26.17-25; Mar 14.12-21; Joh 13.21-30)

7Mûthenya nîwakinyire vîndî ya kîrugo Kîam mîgate îrîa îtethagîrwa îkîrîtwe ndawa ya kwimbia. Mûthenya ûcio nîguo tûtûrûme twa kûrîwa vîndî ya pasaka twathînjagwa. 8Nake Jesû nîwatûmire Petero na Johana akîmeera atîrî, “Thiîni mûkavarîrie irio cia pasaka nîguo tûke tûrîe.”

9Nao nîmaamûririe atîrî, “Nîkû ûrenda tûthiî tûkavarîrie irio cia pasaka?”

10Nake Jesû nîwamacokerie atîrî, “Mûgîtonya îtûûrarî nîmûgûtûngana na mûndûmûrûme akuuîte mûtûngi wa manjî. Mumeni vuva na mûtonye nyomba îrîa ke agaatonya. 11Na mwamîtonya mwîre mwene yo atîrî, ‘Mwarimû atwîra tûke tûkwîre ûtwonie nyomba ya ageni, îrîa ke na arutwa ake makûrîra irio cia pasaka!’ 12Nake mûndû ûcio nîakûmwonia nyomba nene ngorovarî îgûrû na îrî na indo cionthe. Kûu nîkuo mûkûvarîria.”

13Nao nîmaathiîre na makîthîrîria gwîkariî wata ûrîa Jesû aameerîte na makîvarîria irio cia pasaka.

Irio cia Kîvwaî cia Mwathani

(Mat 26.26-30; Mar 14.22-26; 1Akor 11.23-25)

14Rîrîa îvinda rîakinyire, Jesû na atûmwa ake nîmeekarire metharî kûrîa. 15Nake Jesû nîwamerire atîrî, “Nie nîrendete mûno tûrîcanîre namue irio ino cia pasaka mbere ya nthînue. 16Nîûndû nîramwîra na ma atî nie ndikaamîrîa rîngî nginya rîrîa îkaavingua Ûthamakirî wa Ngai.”

17Jesû nîwacokire agîoca gîkombe, agîcokia ngatho na akiuga atîrî, “Keni gîkombe gîkî na mûkînyunyanîre. 18Nîramwîra na ma atî, kuuma rîu nginya rîrîa Ûthamaki wa Ngai ûgaaûka, nie ndikaanyua ndivei îno.”

19Nîwacokire agîoca mûgate na arîkia gûcokeria Ngai ngatho, akîwenyûranga na akînengera arutwa ake akiugaga atîrî, [“Ûyû nîguo mwîrî wakwa ûrîa ûvecanîtwe nîûndû wenyu. Îkagani ûguo nîguo mûndirikanage.” 20Na marîkia kûrîa, nîwamanengere gîkombe akiugaga atîrî, “Gîkombe gîkî nî Kîam nthakame yakwa ya kîrîkanîro gîcerû îrîa yetûrûrirwe nîûndû wenyu.]#22.20 Mandîko mamwe matirî 22.19b-20.

21“Nwatî menyani atî mûndû ûrîa ûkûnjukanîrîra arî vamwe nanie ava metharî îno! 22Mûrû wa Mûndû nîagûkua wata ûrîa Ngai atuîte, nwatî kaî mûndû ûrîa ûkamûcukanîrîra arî na thîna-î!”

23Nao arutwa nîmaambîrîrie kûrania, nî ûrîkû gatagatîrî kao wavangîte gûcukanîrîra Jesû.

Ngarari cia kwenda kûmenya nî ûrîkû mûnene

24 # Mat 18.1; Mar 9.34; Luka 9.46 Nîgwacokire gûkîgîa na ngarari cia kwenda kûmenya nî ûrîkû mûnene viû gatagatîrî ka arutwa. 25#Mat 20.25-27; 10.42 Nake Jesû nîwamerire atîrî, “Athamaki a andû arîa matetîkîtie nîmakinyagîrîria andû arîa maathaga, na athani acio nîmendaga gwîtwa, ‘Arata a andû.’ 26#Mat 23.11; Mar 9.35 Nwatî ûguo tîguo mwîkariî. Tigani ûrîa mûnene viû gatagatîrî kenyu atuîke mûnini viû, na mûtongoria atuîke ta ndungata. 27#Joh 13.12-15 Nî mûndû ûrîkû wîthagîrwa arî mûnene viû; nî ûrîa wîkaraga metharî nîguo avirîrwe irio kana nî ûrîa ûviranagîra irio metharî? Na kinthî tî mûndû ûrîa wîkaraga metharî nîguo avirîrwe irio? Nwatî nie nîrî gatagatîrî kenyu mbîkariî ta ndungata yenyu.

28“Mue mwîthîrîtwe mûrî vamwe nanie mûno ngîgerua. 29Kwoguo wata ûrîa Ngai Vava aamveere ûvoti wa kwathana, ûguo nwa ta guo wa nanie ngûmûva ûvoti. 30#Mat 19.28 Nîmûkaarîra na mûnyuîre metharî yakwa Ûthamakirî wakwa, na mûcoke mwîkarîre itî cia Ûthamaki na mwathe mîvîrîga îrîa îkûmi na îrî ya Isiraeli.”

Jesû nîwerire Petero atî nîakûmûkaana

(Mat 26.31-35; Mar 14.27-31; Joh 13.36-38)

31Jesû nîwacokire akiuga atîrî, “Simoni, Simoni! Tathikîrîria! Caitani nîmûve rûtha rwa kûmûgeria muonthe na acagûranie andû arîa aro kuuma kûrî arîa acûku, wata ûrîa mûrîmi acagûranagia ngano kuuma kûrî macaki. 32Nwatî we Simoni, nie nîrîmûkûvoeru nîguo wîtîkio waku ndûkenyenyue. Na wanjokerera ûgeekagîra aa mûrwanyûkwe vinya.”

33Nake Petero nîwamûcokerie atîrî, “Mwathani, nie nîrî mwîvarîriu kûvingîrwa njeera wana kûûragwa vamwe nawe!”

34Nake Jesû nîwamwîrire atîrî, “Nîrakwîra na ma atî, ngûkû tî îgamba ûtukû wa ûmûnthî ûtakaanîte maita mathatû atî we ndûmbîcî.”

Kîveeti, mbooro na rûviû

35 # Mat 10.9-10; Mar 6.8-9; Luka 9.3; 10.4 Jesû nîwacokire akîûria arutwa ake atîrî, “Vîndî îrîa namûtûmîte mûtarî na kîveeti, mbooro wana kana iratû, kûrî kîndû wana kîmwe mwaturire?”

Nao nîmaamûcokerie atîrî, “Gûtirî kîndû twaturire.”

36Jesû nîwacokire akîmeera atîrî, “Nwatî rîu, mûndû wa wonthe ûrî na kîveeti kana mbooro nîakuue, na mûndû wa wonthe ûtarî na rûviû nwa nginya endie îgooti rîake arûgûre. 37#Isa 53.12 Nîûndû nîramwîra atî Mandîko Matheru marîa maugîte atîrî, ‘Nîwatuîrîrwe ûndû ûmwe na imaramari,’ nwa nginya mavingue; nîûndû maûndû marîa mandîkîtwe îgûrû rîakwa nî vîndî maravinga.”

38Nao arutwa nîmaamwîrire atîrî, “Mwathani! Taroria! Ava varî na mviû igîrî.”

Nake nîwamacokerie atîrî, “Nî ûguo rîu! Icio nîmbîganu!”

Jesû nîwavoire arî kîrîmarî kîa mîtî ya Mîtamaiyû

(Mat 26.36-46; Mar 14.32-42)

39Jesû nîwaumire îtûûrarî rîu na wata ûrîa aamenyerete, akîthiî kîrîmarî Kîam mîtî ya Mîtamaiyû. Nao arutwa ake nîmaamumire vuva. 40Rîrîa aakinyire kuo, nîwamerire atîrî, “Voyani nîguo mûtikagwe mageriorî.”

41Jesû nîwacokire akîmatiga, akîthiî vandû wata varîa mûndû angîvota gwikia îthiga, na aaturia maru nîwavoire atîrî, 42“Vava, ûngîenda nthengutîria gîkombe gîkî Kîam mathîna, nwatî îka ûrîa we ûkwenda, tî ûrîa nie ngwenda.” [ 43Na vîndî wa îo mûraika kuuma îgûrû nîwamumîrîre na akîmwîkîra vinya. 44Jesû arî na ûrûrû mwîngî ngororî yake, nîwavoire na kîo kîîngî mûno. Nayo nthithina yake nîyagwîcaga nthî îkariî ta matata manene ma nthakame.]#22.44 Mandîko mamwe matirî 22.43-44.

45Rîrîa Jesû aarîkirie kûvoya, nîwacokire varîa aatigîte arutwa ake na akîmethîrîria mamamîte na maûrîtwe nî vinya nîûndû wa kîeva. 46Nake nîwamaûririe atîrî, “Nîndûî gîtûmîte mûmame? Ûkîrani mûvoe nîguo mûtikagwe mageriorî.”

Jesû nîwanyitirwe

(Mat 26.47-56; Mar 14.43-50; Joh 18.3-11)

47Rîrîa Jesû aaragia andû eengî nîmaakinyire matongoreretue nî mûndû wetagwa Judasi ûrîa warî ûmwe wa arutwa arîa îkûmi na aîrî. Judasi nîwakuvîvîrie Jesû nîguo amûmumunye. 48Nwatî Jesû nîwamûririe atîrî, “Judasi, ûracukanîrîra Mûrû wa Mûndû na njîra ya kûmûmumunya?”

49Rîrîa arutwa arîa maarî na Jesû moonire ûrîa kwathiîte gwîkîka, nîmaamûririe atîrî, “Mwathani, tûmatemange na mviû cietû?” 50Na ûmwe gatagatîrî kao nîwarengire gûtû kwa ûrîo kwa ngombo ya Mûthînjîri-Ngai ûrîa mûnene.

51Nwatî Jesû nîwaugire atîrî, “Tigani gwîka ûguo!” Nake nîwacokire akîvutia gûtû kwa ngombo îo na akîmîvonia.

52Jesû nîwacokire akîîra anene a athînjîri-Ngai, arangîri a hekarû na atongoria a mavoero arîa maathiîte kûmûnyita atîrî, “Nîkwa nîrî mûtoi nîguo mûke kûnyita mûkuuîte mviû na njokoma? 53#Luka 19.47; 21.37 Mûthenya wa mûthenya nîrethagîrwa nîrî namue hekarûrî na mûtiranyitaga. Nwatî gaka nîko kavinda kenyu ga gwîka ûrîa mwîcirîtie gwîka mûtongoretue nî vinya wa nduma.”

Petero nîwakaanire Jesû

(Mat 26.57-58,69-75; Mar 14.53-54,66-72; Joh 18.12-18,25-27)

54Nao nîmaanyitire Jesû na makîmûvira mûciî kwa Mûthînjîri-Ngai ûrîa mûnene. Nake Petero nîwamaumire vuva arî varaca. 55Nao athigari marîkia gwakia mwaki nja gatagatî, Petero nîwekarire nthî vamwe nao. 56Rîrîa ndungata îmwe ya mwîrîtu yonire Petero amûrîkîtwe nî ûtheri wa mwaki, nîyamûroririe mûno na akiuga atîrî, “Mûndû ûyû wa nake arethagîrwa arî vamwe na Jesû.”

57Nwatî Petero nîwakaanire akiugaga atîrî, “We mûndûmûka ûyû, tenya kûndeterere, nie wana ndiîcî mûndû ûyû!”

58Vuva wa kavinda kanini, mûndû wîngî nîwonire Petero na akîmwîra atîrî, “Wa nawe ûrî ûmwe wa o!”

Nwatî Petero nîwamûcokerie atîrî, “We mûndû ûyû, tenya kûndeterere, nie ndîrî ûmwe wa o!”

59Vuva wa îthaa ta rîmwe ûguo, mûndû wîngî nîwakinyîrîrie ûvoro ûcio akiuga atîrî, “Na ma mûndû ûyû mararî na Jesû, nîûndû wa nake nî Mûgalili!”

60Nwatî Petero nîwamûcokerie atîrî, “Mûndû ûyû, tenya kûndeterere, nie wana ndiramenya ûrîa ûrauga!”

Kavinda wa kau aaragia, ngûkû nîyagambire. 61Nake Mwathani nîwavûgûkire na akîroria Petero. Petero nîwacokire akîririkana ciugo irîa Mwathani aamwîrîte atî: “Mbere ya ngûkû îgambe ûtukû wa ûmûnthî, nîûkwîthîrwa ugîte maita mathatû atî we ndûmbîcî.” 62Nake Petero nîwacokire akiuma nja na akîrîra arî na ûrûrû mwîngî ngororî yake.

Jesû nîwanyûrûrirue na akîrivwa

(Mat 26.67-68; Mar 14.65)

63Andû arîa maarangîrîte Jesû nîmaamûnyûrûririe na makîmûriva. 64Nîmaacokire makîmûmika metho na makîmûria atîrî, “Mûrathi ûyû, ta îcirîrie nû wakûringa!” 65Nao nîmaacokire makîmwîra maûndû meengî ma kûmûruma.

Jesû nîwacirithirue nî kîama

(Mat 26.59-66; Mar 14.55-64; Joh 18.19-24)

66Kîraûko gwakîa atongoria a mavoero, anene a athînjîri-Ngai na arimû a Watho, nîmaatûnganire vamwe. Nake Jesû nîwarûngamirue mbere ya athuuri acio a Kîamma 67na makîmûûria atîrî, “Ta twîre atîrî, we nîwe Mesaya?”

Nake Jesû nîwamacokerie atîrî, “Nie wana nîngîmwîra mûtingîmbîtîkia. 68Na nîngîmûria kîûria, mûtingînjokeria. 69Nwatî kuuma rîu Mûrû wa Mûndû akethagîrwa ekarîte mwenarî wa ûrîo wa Ngai mwene vinya wonthe.”

70Nao athuuri acio onthe a Kîamma nîmaamûririe atîrî, “We vi nîwe Mûriû wa Ngai?”

Nake Jesû nîwamacokerie atîrî, “Mue nîmwauga atî nie nînie ke.”

71Nao athuuri acio a Kîamma nîmeeranire atîrî, “Nî ûira wîngî ûrîkû tûravatara? Tue nîtweîguîra ûrîa auga.”

Currently Selected:

Luka 22: KKB

Highlight

Copy