Luka 19

Jesû na Zakayo

1Jesû nîwavîtûkîrîre îtûûrarî rîa Jeriko. 2Kwarî na mûnene ûmwe wa etia a mbeca cia gooti wetagwa Zakayo. Nake Zakayo aarî mûtongu mûno. 3Zakayo nîwageragia ûrîa angîona Jesû nîguo amûmenye, nwatî ke ndaavota nîûndû aarî mûkuvî na andû maarî eengî. 4Kwoguo Zakayo nîwavinyûrire mbere ya andû na agîtwa mûkûyû îgûrû nîguo avote kwona Jesû ûrîa wavîtûkîrîre njîrarî îo. 5Na vîndî îrîa Jesû aakinyire rungu rwa mûtî ûcio, nîwaroririe îgûrû na akîîra Zakayo atîrî, “Zakayo, varûrûka narua ume mûtî îgûrû, nîûndû ûmûnthî nîngûtuîka mûgeni waku.”

6Nake Zakayo nîwaumire mûtîrî îgûrû narua na akîgwata Jesû ûgeni akenete mûno. 7Nao andû onthe arîa moonire ûguo, nîmaanugunire makiuga atîrî, “Mûndû ûyû athiî mûciî kwa mwîvia gûtuîka mûgeni.” 8Nake Zakayo nîwaumîrire vau mbere yao onthe na akîîra Mwathani atîrî, “Tathikîrîria Mwathani! Nie nîngûva athîni nuthu ya indo ciakwa. Na angîthîrwa kûrî mûndû nanacuuna kîndû gîake, nîngûmûrîva maita mana ma kîo.”

9Nake Jesû nîwamwîrire atîrî, “Ûmûnthî ûyû ûvonokio nîwaûka mûciî ûyû nîûndû mûndû ûyû wa nake nî wa mbarî ya Iburahimu. 10#Mat 18.11 Nîûndû Mûrû wa Mûndû aaûkire gûcaria na kûvonokia andû arîa maûrîte.”

Ngerekano ya mbeca cia thaavu

(Mat 25.14-30)

11 # Mat 25.14-30 Rîrîa andû maathikîrîrîtie mîario îo, Jesû nîwamavere ngerekano. Vîndî îo aarî vakuvî na Jerusalemu na andû meciragia atî Ûthamaki wa Ngai warî vakuvî gûkinya. 12Kwoguo Jesû nîwaugire atîrî, “Mûndû ûmwe warî mûnene nîwathiîre vûrûrirî wa kûraca gûtuuwa mûthamaki, na arîkia gûtuuwa mûthamaki nîwavangire acoke mûciî. 13Mbere ya athiî mûndû ûcio nîwetire ndungata ciake îkûmi na akîva wa îmwe yacio mbeca ya thaavu#19.13 mbeca ya thaavu: Yarî mbeca ya mûcara wa mîeri îthatû wa mûruti wîra. na agîciîra atîrî, ‘Onjorithiani mbeca ino nginya rîrîa ngaacoka.’ 14Nwatî andû a vûrûri wake nîmaamûmenete mûno, kwoguo nîmaatûmire anjaama mamuume vuva, na maakinya mauge atîrî, ‘Tue tûtikwenda mûndû ûyû atuîke mûthamaki wetû.’

15“Nake mûndû ûcio nîwacokire mûciî arîkia gûtuuwa mûthamaki. Nîwacokire agîtûmana etîrwe ndungata icio aatigîrîte mbeca, nîguo avote kûmenya wa ndungata yonjorithîtie mbeca ciîgana atîa. 16Nayo ndungata ya mbere nîyakinyire na îkîmwîra atîrî, ‘Mûnene, monjorithîtie mbeca îkûmi cia thaavu, kuumana na mbeca îmwe îrîa wamvere.’ 17Nake mûnene ûcio nîwamwîrire atîrî, ‘Nîwaro ndungata yakwa mbaro! We ûrî mwîvokeku na kaûndû kanini, rîu ûkaathanaga matûûrarî îkûmi.’ 18Nayo ndungata ya kaîrî nîyakinyire na îkîîra mûnene wayo atîrî, ‘Mûnene, monjorithîtie mbeca ithano cia thaavu kuumana na mbeca îmwe îrîa wamvere.’ 19Nake mûnene ûcio nîwamîrire atîrî, ‘Rîu ûkaathanaga matûûrarî matano.’

20“Nayo ndungata îngî nîyakinyire na îkîmwîra atîrî, ‘Mûnene, îcukia mbeca îno yaku ya thaavu. Nie namîovire na gatambaa ngîmîthitha. 21Nînaagwîtigîre nîûndû ûrî mûndû wa ngoro nyûmû. We wocaga kîndû kîrîa ûtathithinîrîte na ûgaketha kîrîa ûtavandîte.’ 22Nake mûnene ûcio nîwamîrire atîrî, ‘We ndungata îno mbaganu! Mîario îo waria na kanyua kau gaku, nwayo ngûgûtuîra nayo! Kwoguo nîwecî atî nie nîrî mûndû wa ngoro nyûmû, mûndû wocaga kîrîa atathithinîrîte na agaketha kîrîa atavandîte! 23Waregire kwiga mbeca yakwa mbangi nîkî nîguo naûka nîmîgîre îna maciaro?’

24“Nake mûnene ûcio nîwerire andû arîa maarûngamîte vau atîrî, ‘Mûcuneni mbeca îo ya thaavu na mûve mûndû ûrîa ûrî na mbeca îkûmi.’ 25Nwatî andû acio nîmeerire mûnene ûcio atîrî, ‘Mûnene! Ke arî na mbeca îkûmi!’ 26#Mat 13.12; Mar 4.25; Luka 8.18 Nake mûnene ûcio nîwamacokerie atîrî, ‘Nîramwîra na ma atî mûndû wa wonthe ûrî na kîndû nîakoongererwa ciîngî nyîngî, nwatî mûndû ûrîa ûtarî na kîndû, wana kîrîa kînini arî nakîo nîagaacunwa. 27Nacio nthû ciakwa irîa iteendaga nduîke mûthamaki wacio, ireteni ava mbere yakwa na mûciûrage ngîonaga!’ ”

Jesû nîwatonyire îtûûrarî rîa Jerusalemu arî na ûvootani

(Mat 21.1-11; Mar 11.1-11; Joh 12.12-19)

28Rîrîa Jesû aarîkirie kuga ûguo, nîwathiîre na mbere kunûkia erekerete Jerusalemu. 29Na vîndî îrîa aakinyire kîrîmarî Kîam Mîtî ya Mîtamaiyû vakuvî na matûûra ma Bethifage na Bethania, nîwatûmire arutwa ake aîrî na akîmeera atîrî, 30“Thiîni gîcagirî kîîrîa kîrî mwena ûûrîa wîngî na mwatonya kuo, nîmûkwîthîrîria njaû ya mvunda îtaanakuua mûndû îthaîkîtwe. Mîthaûreni na mûmîrete ava. 31Na mûndû angîmûria mûramîthaûra nîkî, mwîreni atîrî, ‘Mwathani nîamîvatarîte.#19.31 Mwathani nîamîvatarîte: kana ‘Mwene arî na vata nayo.’’ ”

32Nao arutwa acio nîmaathiîre na makîthîrîria maûndû mekariî wata ûrîa Jesû aameerîte. 33Na vîndî îrîa maathaûraga njaû îo, ene yo nîmaamaûririe atîrî, “Mûrathaûra njaû îo nîkî?”

34Nao arutwa acio nîmaamacokerie atîrî, “Mwathani nîamîvatarîte.” 35Kwoguo arutwa acio nîmaavirîre Jesû njaû îo. Nîmaacokire magîtandîka nguo ciao îgûrû rîa njaû îo na magîtethereria Jesû gwîkarîra îgûrû rîayo. 36Na vîndî îrîa athiîte akuuîtwe nî njaû îo andû nîmaatandîkire nguo ciao njîrarî.

37Rîrîa Jesû aarî mwîkûrûkorî wa kîrîma Kîam Mîtî ya Mîtamaiyû vakuvî na îtûûra rîa Jerusalemu, arutwa onthe ake nîmaambîrîrie kwina makenete na kûgooca Ngai maugîrîrîtie nîûndû wa maûndû manene marîa maarîkîtie kwona. 38#Tha 118.26 Nao nîmaagoocaga Ngai makiugaga atîrî, “Kûrathimwa nî mûthamaki ûrîa ûkîte na rîîtwa rîa Mwathani! Thayû ûrogîa îgûrû nake Ngai akumue!”

39Nao Afarisai amwe arîa maarî kîrîndîrî nîmeerire Jesû atîrî, “Mwarimû, îra arutwa aya aku makire.”

40Nake Jesû nîwamacokerie atîrî, “Nîramwîra atî arutwa aya mangîkira, namo mathiga nîkwa makwambîrîria kwina.”

Jesû nîwarîrire nîûndû wa îtûûra rîa Jerusalemu

41Rîrîa Jesû aakuvîrîrie îtûûra rîa Jerusalemu na akîrîona, nîwarîrire nîûndû warîo 42akiugaga atîrî, “Naarî kethîrwa mwamenya maûndû marîa marendekana ûmûnthî nîûndû wa thayû! Nwatî rîu mûtiravota kûmona! 43Kavinda nîgagûkinya karîa nthû cienyu ikaamûrigicîria na mbumbu ya mûthetu na ciînje mîtaro imûvingîrîrie mîena yonthe. 44Nîikaamûcûkangia wa vamwe na ciana cienyu na gûtirî îthiga wana rîmwe magaatiga rîrî îgûrû rîa rîngî, nîûndû mûtiamenya kavinda karîa Nga aaûkîte kûmûvonokia!”

Jesû nîwatonyire hekarûrî

(Mat 21.12-17; Mar 11.15-19; Joh 2.13-22)

45Jesû nîwacokire agîtonya hekarûrî na akîambîrîria kûrutûrûra andû arîa meendagîria kuo, 46#Isa 56.7; Jer 7.11 akîmeeraga atîrî, “Ngai augîte Mandîkorî matheru atî, ‘hekarû yakwa nî nyomba ya kûvoyagîrwa,’ nwatî mue mûmîtuîte ngurunga ya acunani!”

47 # Luka 21.37 Wa mûthenya Jesû nîwathomithanagîria hekarûrî. Nao anene a athînjîri-Ngai, arimû a Watho wa vamwe na atongoria a andû nîmeendaga kûmûraga. 48Nwatî matingîavotire gwîka guo nîûndû andû onthe mekaraga mamûthikîrîrîtie matakwenda kûvîtûkwa nî kiugo gîake wana kîmwe.

Currently Selected:

Luka 19: KKB

Highlight

Copy