Maarûa 1
1
1 #
Jer 29.1
Îno nî maarûa îrîa yatûmirwe nî Jeremia kûrî andû a Jerusalemu mbere ya matavwa nî mûthamaki wa Babulonia na mavirwa îthamîriorî Babuloni. Maarûa îno îrî na ndûmîrîri îrîa Ngai aathîte Jeremia ameere.
Andû nîmekarire îthamîriorî kavinda karaca.
2Nîmwîvîtie mbere ya Ngai, kwoguo nîmûgûtavwa mûvirwe îthamîriorî mûrî ngombo nî Nebukadinezarû mûthamaki wa Babuloni. 3Nî mwîkara kûu îthamîriorî mîaka mîngî, îvinda ta rîa njiarwa mûgwanja. Ngai nîagaacoka amûrute kuo amûcokie kwenyu mûrî na thayû.
4Mûrî kûu Babuloni nîmûkoona ngai irûthîtwe na mîtî, sîlûva na thaavu. Ino nî ngai ikuuagwa nî andû na ciande na itûmaga andû a ndûrîrî magîe na guoya. 5Nwanginya mwîmenyerere mûtikegerekanie na andû acio a ndûrîrî. Mûtigetîkîre ngai ciao imwîguithia guoya mwona andû marûmanîrîrîte maikuuîte na makîigooca. 6Vandû va ûguo îîrageni na ngoro atîrî: “Nîwe wenga Mwathani twagîrîrwe nî kûgooca.” 7Mûraika wa Ngai akethagîrwa arî kûu vamwe namue na akaamûmenyagîrîra.
Mîvuanano ndîrî ûndû îngîvota
8Mîvuanano ya ngai ciao îvakîtwe sîlûva na thaavu, na îrî na tûrîmî twacîtwe nî andû arîa maumagia indo cia mîtî. Nwatî icio tî ngai cia ma na itingîvota kwaria. 9Andû marûthaga ngovia cia thaavu magaciîkîra ciongorî cia ngai icio takwa mîvuanano îo îrî erîtu arîa mendete mathaga. 10Mavinda mamwe athînjîri-Ngai mocaga sîlûva na thaavu kuuma kûrî ngai ciao na nthitho na magaitûmîra maûndûrî mao, 11wana makava imwe ciacio maraa ma hekarû. Nîmekagîra ngai icio cia mîtî, sîlûva na cia thaavu nguo takwa irî andû. 12Nwatî wana ethîrwa ngai icio nî ng'emie na nguo cia rangi wa njambarawe ta cia athamaki, itingîvota kwîgitîra kuuma kûrî mûthûa na igiria irota. 13Rîrîa ciagîa na rûkûngû rwîngî ûthiû kuuma hekarûrî, nwa nginya ikagirua nî mûndû. 14Nîinyitaga mûragi wa wathani na njara ta atucanîri ciira a gûkû nthî nwatî itiîthagîrwa na ûvoti wa kûverithia mûndû ûrîa ûivîtîrîtie. 15Ciîthagîrwa inyitîte mviû na mathanwa na njara nwatî itingîvota kwîgitîra mbaararî kana kûrî acunani. 16Ûndû ûyû nîwagûtwonia atî icio tî ngai, kwoguo mûtigaciîtigîre.
17Wata ûrîa mbakûri ya mûndû îrakua îthagîrwa îrî ya mana, nwa ta guo ngai ciao ciîkariî rîrîa cigîtwe hekarûrî. Ciîthagîrwa ciûmbîtwe nî rûkûngû metho rûrîa rûmbûragwa nî andû magîtonya kûu hekarûrî. 18Wata ûrîa mîrango îvingagwa mbarî cionthe nîguo andû arîa marakarîtie mûthamaki matigaatonye ta andû matuîrîtwe kûragwa nwa ta guo athînjîri-Ngai mavingaga mîrango ya hekarû na vungûro na mîkîgo nîguo ndîkaîwe nî acunani. 19Nîmagwatagîria ngai icio taa nyîngî gûkîra ûrîa magwatagia nîûndû wa matûmîri mao, nwatî ngai icio itingîona taa wana îmwe. 20Ndaarî yacio nîirîcagwa nî mûthûa wata mîkîgo ya mîtî ya hekarû, na nguo ciacio nîicûkangagua nwatî itimenyaga. 21Mothiû ma cio nîmairagua nî ndogo ya hekarû. 22Mvuvu, nthûngûrûrû na iconi ciîngî nîigûcaga îgûrû rîa cio, wana nginya tûnyau nîtûciîkaragîra. 23Ûndû ûcio nîwagûtwonia atî icio tî ngai kwoguo mûtikaigooce.
24Mîvuanano îo îthîrîtwe îgemetue na thaavu nîguo îtuîke mîthaka, nwatî ndîngîvenavenia nginya rîrîa îkavuurwa rûkûngû nî mûndû. Vîndî îrîa yaûmbagwa ndîegucaga ûndû. 25Wana angîthîrwa îgûrîtwe na thogora mûnene atîa, ndîngîvotaga kûveva. 26Ndîrî magûrû, îkuuagwa na ituro cia andû kwonania ûrîa îrî ya mana. 27Andû arîa mamîmenyagîrîra nîmaconokaga nî yo nîûndû rîrîa îmwe yacio yagwa nthî nîo mamîocaga makamîrûngamia. Rîrîa yarûngamua vandû nî mûndû, ndîngîvota kûthiî na ethîrwa nwa igwe îkîgamîte, ndîngîvota kwîrûngamia waro. Iveo cigagwa mbere yacio wata ûrîa cigagwa mbere ya ciimba. 28Athînjîri-Ngai mendagia magongoona marîa marutagîrwa ngai icio na magatûmîra mbeca icio o ene. Na njîra wa ta îno aka ao nîmaigaga nyama imwe na magaciîkîra cumbî itigacûke, nwatî mativecaga athîni kana ngîa kîndû. 29Magongoona marîa irutagîrwa nwa manyitwe nî aka marî mavindarî mao ma mweri kana marîkia gûciara. Maûndû mama monthe nîmonanagia atî icio tî ngai, mûtikaigooce.
30Mîvuanano îo îngîtwa ngai atîa rîrîa aka metîkîrîtue kûrutîra ngai icio irûthîtwe na sîlûva, thaavu na mîtî matega? 31Hekarûrî cia ngai icio, athînjîri-Ngai nîmekaraga kuo mekîrîte nguo ino ndembûkangu, menjetwe ciongo na nderu na ciongo itarî ngunîkîre. 32Athînjîri-Ngai marî mbere ya ngai icio nîmarurumaga na makaugîrîria ta andû marî magongoonarî ma mathiko. 33Athînjîri-Ngai nîmarutaga ngai icio nguo makaivirîra aka na ciana ciao ciîkîre. 34Wana mûndû angîciîka ûndû mûcûku kana mwaro, itingîvota kûmûcokeria ngatho. Itingîvota gûtua mûndû mûthamaki kana kûmûruta ûthamakirî. 35Ndîngîvota gûtongia mûndû kana kûmûva mbeca. Mûndû angîrûtha kîrîkanîro nacio na njîra ya mwîvîtwa na arege kûvingia, ngai icio itikaamûria. 36Itingîvonokia mûndû kuuma kûrî gîkuû kana ivonokia mûndû ûtarî vinya kuuma kûrî ûrîa ûrî na vinya. 37Itingîtûma arîa atumumu moone kana ivonokia arîa marî na thîna. 38Itingîguîra aka a ndigwa ntha kana ciîka ciana cia ngoria maûndû maro. 39Indo ino irûthîtwe na mîtî na ikavakwa thaavu na sîlûva ciîkariî ta mathiga kuuma kîrîmarî na andû arîa maigoocaga nîmagaaconorithua. 40Nîndûî kîngîtûma mûndû ecirie atî mîvuanano îo nî ngai kana amîte ngai?
Ûrimû wa kûgooca mîvuanano
Andû a Babuloni nîmanyararîte ngai ciao. 41#Isa 46.1 Rîrîa mûndû aremwa nî kwaria, nîmamûviraga hekarûrî na makaûria Beli amûve vinya wa kwaria wa takwa Beli îtaûkagîrwa nî ûndû. 42Nwatî wana rîrîa andû maamenyire atî ngai ciao itingîmatethia, o nî irimû nîûndû maathiîre na mbere kûigooca. 43Nao aka meyovete mîcivi mekaraga mûkîra wa njîra makîvîvagia ûbani na makîvûraga ûmaraa. Rîrîa ûmwe wao ocwa akamenyanwe nake kîîmwîrî nî mûndû mûrûme, acokaga kûnyûrûragia mûndûmûka ûrîa mariganîtie nake, nîûndû ndararî mûthaka wa kwîrirîrua na kûthuurwa. 44Ûndû wa wonthe wîkagwa nîûndû wa mîvuanano îno nî wa maveeni. Nîndûî kîratûma mûndû ecirie atî icio nî ngai kana aciîta ngai? 45Arûthi indo cia thaavu na indo cia mbaû marûthaga mîvuanano îo îgatuîka kîrîa marenda ituîke. 46Andû arîa marûthaga mîvuanano îo nama matiîkaraga kavinda karaca; kwoguo mangîvota atîa gûtua indo irîa marûthîte ngai? 47Andû aya methagîrwa mecûrîtwe nî maveeni na nîmanyararagithia wana arîa magaûka vuva wao. 48Rîrîa kwagîîre na mbaara na înegene, athînjîri-Ngai nîmaagomanire vamwe nîguo mamenye kûrîa mangîîthitha vamwe na ngai ciao. 49Andû mararega kwona atî ino tî ngai cia ma nîkî, nîûndû itingîîvonokia kuuma mbaararî kana mûthiro? 50Nîûndû ngai ino irûthîtwe na mîtî na ikavakwa thaavu na sîlûva nî andû, mûthenya ûmwe nîikaamenyekana atî itiarî ngai cia ma. 51Athamaki onthe na mavûrûri monthe nîmakaamenya atî icio tî ngai nwatî nî wîra wa mûndû, na itiîthagîrwa na vinya wa Ngai. 52Nîûrîkû ûtangîmenya atî icio tî ngai?
53Mîvuanano îno ndîngîtua mûndû mûthamaki kana itûma mbura yure. 54Ndîngîtua ciira wîgiî maûndû ma cio, kana îtua ciira wa andû mavîtanîtie, nîûndû ndîthagîrwa na vinya. Nî ya mana ta ciîgî îrîa igûrûkaga rîerarî. 55Rîrîa mwaki watuthûka hekarûrî cia ngai irîa irûthîtwe na mîtî igacoka ikavakwa thaavu na sîlûva, athînjîri-Ngai nîmaûraga makathiî, nwatî ngai ciao ikavîa ta mbaû cia mîtî. 56Vamwe na ûguo, itingîtirîria mûthamaki kana nthû. Nî ûrîkû vi ûngîtîkia nama atî icio nî ngai? 57Ngai irûthîtwe na mîtî na ikavakwa sîlûva na thaavu, itingîvota kwîvonokia kûrî aîi na acunani, 58arîa marutaga ngai icio sîlûva na thaavu, wana nguo irîa ciîkîrîte na makathiî nacio cionthe na itingîvota kûmagiria. 59Kwoguo nî kava gûtuîka mûthamaki ûrîa wonanagia ûcamba, kana thaani cia nyomba irîa itûmagîrwa nî mwene nyomba aivatara, gûkîra ngai ino cia maveeni. Nîkava mûrango wa nyomba ûrîa ûgitagîra kîrîa kîrî kûu nyomba gûkîra ngai icio cia maveeni. Wana nginya gîtugî Kîam mûtî kîrî mûciî kwa mûthamaki nî Kîamro gûkîra ngai icio cia maveeni.
60Ngai aavecanire riûa, mweri na njata nîguo ivecanage ûtheri, na nîimwathîkagîra. 61Nwa guo rûveni na rûvuvo rwîkariî. Rûveni rwavenia rwonagwa kûndû kûraca, naruo rûvuvo rûvurutanaga kûndû kuonthe. 62Rîrîa Ngai atha matu matambûrûke nthî yonthe, nîmamwathîkagîra. 63Rîrîa Ngai atûma mwaki gûkû nthî kuuma îgûrû nîguo ûvîvie irîma na mîtitû, nîwîkaga guo. Ngai cia mîvuanano itingîringithanua na kîndû nî cia mana. 64Kwoguo mîvuanano îo ndîagîrîrwe nî gwîtwa ngai, nîûndû ndîngîtua ciira kana îguna mûndû. 65We nîwicî atî mîvuanano îo tî ngai kwoguo ndûkamîgooce.
66Ngai icio itirî vinya kûrî athamaki; itingîmaruma kana imarathima. 67Itingîonia marûûri kûu îgûrû kana gûkû nthî, na itingîara ta riûa kana iruta ûtheri ta mweri. 68Wana nyamû cia kîthaka nî mbaro gûkîra ngai icio cia mîvuanano. Nyamû cia kîthaka nwa ivinyûre kwagîa na ûgwati nîguo ciîgitîre. 69Kwoguo nîkûroneka waro viû atî nama icio tî ngai, kwoguo mûtikaigooce.
70Ta kînyamû kîrîa gîtumagwa gîa kûvavûkia iconi kana nyamû mûgûndarî nwatî gîtigitagîra kîndû, nwa ta guo ngai ciao ciîkariî irîa irûthîtwe na mîtî na ikavakwa thaavu na sîlûva. 71Ciîkariî ta kîthîgî Kîam mîgua mûgûndarî kîrîa vandû va kwîngata iconi, igûcaga îgûrû rîakîo. Ngai icio ciîkariî ta kimba gikîtue nja ndumarî. 72Nguo cia njambarawe irîa ciîkîrîte nîcioraga na kwoguo tûkamenya atî icio tî ngai. Mûthiiarî nîikaarîwa nî mûthûa, na gûtirî mûndû ûkaagîa vata wa cio.
73Nî kava mûndû mûthingu ûtethagîrwa arî na ngai cia mûvuanano. Mûndû ûcio ndangînyararwa.
Currently Selected:
Maarûa 1: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019