Joh 7

Jesû na arîa maaciaranîrîtue nake

1Vuva wa ûguo, Jesû nîwathiîre Galili. Ke ndeendaga kûthiî Judea nîûndû Ayahudi arîa maarî kuo nîmeendaga kûmûraga. 2#Ala 23.34; Gûco 16.13 Na kîrugo Kîam Ayahudi gîa gwîkara tûnyombarî vîndî ya maketha nîgîakinyire. 3Kwoguo arîa maaciaranîrîtue na Jesû nîmaamwîrire atîrî, “Uma gûkû na ûthiî Judea nîguo arûmîrîri aku makoone maûndû marîa ûreka. 4Mûndû wa wonthe wendaga kûmenyekana ndathithaga andû maûndû marîa ke areka. Ethîrwa we nîûreka maûndû mama, tiga andû onthe makûmenye!” 5(Wana nginya arîa maaciaranîrîtue nake matiamwîtîkia.)#7.5 Arîa maaciaranîrîtue nake: ava îronania, ‘arûme.’

6Nake Jesû nîwamerire atîrî, “Îvinda rîakwa rîrîa rîagîrîrîte tî rîkinyu, nwatî kûrî mue îvinda wa rîonthe nîrîagîrîru. 7Andû a nthî matingîmûmena, nwatî nie nîmamenete nîûndû nînîmeraga atî nîmekaga maûndû macûku. 8Mue thiîni kîrugorî. Nie ndikûthiî kuo nîûndû îvinda rîakwa rîrîa rîagîrîru tî rîkinyu.” 9Nake arîkia kûmeera ûguo nîwekarire kûu Galili.

Jesû nîwathiîre kîrugorî gîa gwîkara tûnyombarî

10Vuva wa arîa maaciaranîrîtue na Jesû kûthiî kîrugorî kîu, Jesû wa nake nîwathiîre nwatî ndathiî akîonagwa aathiîre na nthitho. 11Nao atongoria a Ayahudi nîmaamûcaririe mûno kûu kîrugorî na makîûria atîrî, “Ke arî kû?”

12Nao andû eengî nîmaambîrîrie kwaria na kîvwe ûvoro ûmwîgiî. Andû amwe maaugaga atîrî, “Ke nî mûndû mwaro,” na engî makauga atîrî, “Naarî nîaravîtithia andû.” 13Nwatî gûtirî mûndû wana ûmwe waririe ûvoro ûmwîgiî andû makîgucaga, nîûndû nîmeetigagîra atongoria a Ayahudi.

14Rîrîa kîrugo Kîamgeerie gûkinya gatagatî, Jesû nîwatonyire hekarûrî na akîambîrîria kûthomithania. 15Nao atongoria a Ayahudi nîmaamakire mûno na makîûria atîrî, “Mûndû ûyû aramenya maûndû mama monthe atîa na ke ndaanathomithua?”

16Nake Jesû nîwamacokerie atîrî, “Maûndû marîa nthomithanagia matiumîte kûrî nie, nwatî maumîte kûrî Ngai ûrîa wandûmire. 17Mûndû wa wonthe wendaga kûvingia wendi wa Ngai nîamenyaga kana maûndû marîa nthomithanagia maumîte kûrî Ngai, kana mbaaragia na wathani wakwa. 18Mûndû ûrîa waragia na wathani wake ke mwene, nîgwîkumia ekumagia. Nwatî mûndû ûrîa wendaga ûrîa wamûtûmire akumue nîwîthagîrwa arî mwîvokeku na ndaveenanagia. 19Na kinthî Musa tîke wamûveere watho? Nwatî gûtirî mûndû wana ûmwe gatagatîrî kenyu wathîkagîra watho. Mûrenda kûmbûraga nîkî?”

20Nao andû nîmaamûcokerie atîrî, “We wîna ngoma! Nû ûrenda gûkûûraga?”

21Jesû nîwamacokerie atîrî, “Naamûringîre Kîamma kîmwe, na muonthe mûkîmakua nîkîo. 22#Kîam 17.10; Ala 12.3 Musa aamwathire mûruithagie tûvîcî twenyu (wana gûtuîka mûtugo ûcio ndwambîrîrue nî Musa, nwatî wambîrîrue nî methe menyu ma tene) na kwoguo rîu nîmûruithagia tûvîcî mûthenya wa thavatû. 23#Joh 5.9 Ethîrwa mûruithagia kavîcî mûthenya wa thavatû nîguo mûtikaune watho wa Musa, mûrandakarîra nîkî navonia mûndû ûyû mwîrî wonthe mûthenya wa thavatû? 24Tigani gûtucanagîra ciira kûringana na ûrîa maûndû monekaga mekariî, nwatî tucanagîrani ciira kûringana na ivooto.”

Andû nîmaaûririe kana Jesû nîke Mesaya

25Nao andû amwe a Jerusalemu nîmaaugire atîrî, “Na kinthî ûyû tîke mûndû ûrîa atongoria marenda kûûraga? 26Taroriani araria andû onthe makîgucaga na gûtirî ûndû atongoria maramwîra! Nwa kûvoteke Ayahudi methîrwe nîmamenyete na ma atî Jesû nîke Mesaya? 27Nwatî rîrîa Mesaya agaaûka, gûtirî mûndû wana ûmwe ûkaamenya kûrîa ke aumîte. Tuonthe nîtwîcî kûrîa mûndû ûyû aumîte.”

28Rîrîa Jesû aathomithanagia hekarûrî, nîwanîrîre akiuga atîrî, “Mue nama nîmûmbîcî na mûkamenya kûrîa nyumîte? Nwatî nie tînie nîîtûmîte. Ûrîa wandûmire nî wa ma na mue mûtimwîcî, 29nwatî nînîmwîcî, nîûndû nie naaumire kûrî ke na nîke wandûmire.”

30Andû amwe arîa maarî vo nîmaageririe kûmûnyita, nwatî gûtirî mûndû wana ûmwe wamûvûrûririe nîûndû îvinda rîake rîtiarî rîkinyu. 31Nao andû eengî nîmaamwîtîkirie na makiuga atîrî, “Rîrîa Mesaya agaaûka, nîakaaringa ciama nyîngî gûkîra irîa cianaringwa nî mûndû ûyû?”

Arangîri nîmaatûmirwe makanyite Jesû

32Afarisai nîmegwire andû makîaria na kîvwe ûvoro wîgiî Jesû. Kwoguo Afarisai acio marî vamwe na anene a athînjîri-Ngai, nîmaatûmire arangîri mathiî makanyite Jesû. 33Nake Jesû nîwamerire atîrî, “Nîmbîthîrwa nîrî vamwe namue kavinda gakuvî, na vuvarî njoke nthiî kûrî ûrîa wandûmire. 34Mue nîmûkaanjaria na mûtikaamona nîûndû mûtikaavota kûthiî kûrîa nie ngeethîrwa nîrî.”

35Nao atongoria a Ayahudi nîmeeranire atîrî, “Ke arenda kûthiî kû kûu tue tûtakaamwona? Arenda kûthiî matûûrarî ma Angiriki kûrîa andû etû matûûraga nîguo akathomithie Angiriki? 36Ke arauga nîtûkaamûcaria na tûtikaamwona na atî tûtingîvota kûthiî kûrîa ke akeethîrwa arî. Akiuga ûguo-rî, arenda gûtwîra atîa?”

Tûrûnjî twa manjî marîa mavecanaga mwoyo

37 # Ala 23.36 Mûthenya ûrîa warî wa mûthiia na wa vata mûno wa kîrugo, Jesû nîwarûngamire na akîanîrîra akiuga atîrî, “Mûndû wa wonthe mûnyondu nîaûke kûrî nie, na anyue, 38#Ezek 47.1; Zak 14.8 na wata ûrîa mandîko matheru maugîte, ‘Ngororî ya mûndû wa wonthe ûmbîtîkîtie gûkaaumaga tûrûnjî twa manjî marîa mavecanaga mwoyo.’ ” 39Nake Jesû akiuga ûguo aaragia ûvoro wîgiî Roho Mûtheru, ûrîa warî avewe arîa maamwîtîkirie. Vîndî îo Roho ndaarî mûvecane nîûndû Jesû ndaarî mûve riiri wake.

Andû nîmaamûkanire

40Andû amwe arîa maarî vo nîmegwire akiuga ûguo na makiuga atîrî, “Na ma mûndû ûyû nî Mûrathi!”

41Nao andû amwe nîmaaugire atîrî, “Ke nîke Mesaya!”

Nwatî andû engî nîmaaugire atîrî, “Anga Mesaya akaauma îtûûrarî rîa Galili? 42#2Sam 7.12; Mika 5.2 Na kinthî mandîko matheru matiugîte atî Mesaya akeethîrwa arî wa mbarî ya Mûthamaki Daudi, na atî ke agaaciarîrwa îtûûrarî rîa Bethilehemu kûrîa Daudi aatûûraga?” 43Kwoguo andû arîa maarî vo nîmaamûkanire nîûndû wa Jesû. 44Andû amwe nîmeendaga kûmûnyita, nwatî gûtirî wana ûmwe wamûvûrûririe.

Anene a Ayahudi nîmaaregire gwîtîkia

45Rîrîa arangîri maacokire, anene a athînjîri-Ngai na Afarisai nîmaamaûririe atîrî, “Mûregire kûrete Jesû nîkî!”

46Nao arangîri nîmaamacokirie atîrî, “Gûtirî mûndû wanaaria maûndû marîa mûndû ûyû araria!”

47Nao Afarisai nîmaaûririe arangîri acio atîrî, “Anga wa namue mûrî aritie nîke? 48Mwanegua mûtongoria wana ûmwe wana kana Mûfarisai wîtîkîtie Jesû? 49Andû acio matiîcî Watho wa Musa, na kwoguo nîarume!”

50 # Joh 3.1-2 Mûfarisai ûmwe wa arîa maarî vo aarî Nikodemu, ûrîa na vau mbererî wathiîte kûrî Jesû. Nake nîwerire acio engî atîrî, 51“Kûringana na Watho wetû tûtingîvota gûtuîra mûndû ciira, tûtambîte kwîgua ûrîa akuga na kûmenya ûrîa ke ekîte.”

52Nao nîmaamûcokerie atîrî, “Anga wa nawe wî wa kuuma îtûûrarî rîa Galili? Tuîria waro Mandîkorî Matheru wone atî gûtirî mûrathi ûkaauma îtûûrarî rîa Galili.” 53Nao onthe nîmeenûkire wa mûndû gwake mûciî.

Currently Selected:

Joh 7: KKB

Highlight

Copy