Joh 14

Jesû nîke njîra ya kûthiî kûrî Îthe

1Jesû nîwamerire atîrî, “Tigani gûtangîka ngororî cienyu. Îtîkiani Ngai na wa nanie mûmbîtîkie. 2Mûciî kwa Vava kûrî na ciîkaro nyîngî, na nîngûthiî kûmûvarîrîria vandû. Nie ndingîamwîra ûguo angîthîrwa ûguo tîguo kûrî. 3Na narîkia kûthiî kûmûvarîrîria vandû, nîngûcoka nîmwîcîre nîguo mue mwîthagîrwe mûrî varîa nie nîrî. 4Mue nîmwîcî njîra îrîa yerekagîria mûndû kûrîa nîrathiî.”

5Nake Toma nîwaûririe Jesû atîrî, “Mwathani, tûngîvota atîa kûmenya njîra îrîa yerekagîria mûndû kûrîa we ûrathiî, na tue wana tûtiîcî kûrîa ûrathiî?”

6Nake Jesû nîwamûcokerie atîrî, “Nie nînie njîra, nînie ûvoro wa ma, na nînie mwoyo. Gûtirî mûndû ûthiîcaga kûrî Vava atavîtûkîrîrîte kûrî nie.” 7Nake Jesû nîwerire arutwa ake atîrî, “Angîthîrwa na ma nîmûmbîcî, nîmûngîramenya wana nginya Vava. Nwatî kuuma rîu nîmwamûmenya na nîmwamwona.”

8Nake Filipu nîwerire Jesû atîrî, “Mwathani, twonie Vava, na nîtûkwîgua tweganîra.”

9Jesû nîwamûcokerie atîrî, “Filipu, ndûûranîtie namue muonthe kavinda karaca ûguo na atî we ndûrî mûûmenyu? Mûndû wa wonthe ûmonete, nîmwonu Vava. Nîndûî kîratûma ûmbîre, ‘Twonie Vava?’ 10Filipu, ndûretîkia atî nie nîrî ndaarî ya Vava na Vava arî ndaarî yakwa? Nie, tînie nîîrîte ciugo irîa namwîra. Vava ûrîa wîkaraga ndaarî yakwa nîke wîkaga maûndû mama. 11Namwîra atî nie nîrî ndaarî ya Vava na Vava arî ndaarî yakwa, mbîtîkiani. Ethîrwa tîmwîtîkia nîûndû wa ûguo, îtîkiani nîûndû wa maûndû marîa mbîkîte. 12Nie nîramwîra na ma atî: mûndû wa wonthe ûmbîtîkagia ageekaga maûndû ta marîa mbîkaga, na ageekaga maûndû wana manene gûkîra mama nîûndû nînîrathiî kûrî Vava. 13Ûndû wa wonthe ûrîa mûkavoyaga na rîîtwa rîakwa ngawîkaga, nîguo Vava akumague na njîra ya Mûriû. 14Mûngîkaavoya ûndû wana ûrîkû na rîîtwa rîakwa, ngaamûvingagîria.

Kwîrîrwa Roho Mûtheru

15“Ethîrwa nîmûmendete, mûkaathîkagîra maathani makwa. 16Nie nîngûvoya Vava, nake nîakûmûva Mûtethia wîngî nîguo atûûranagie namue tene na tene. 17Ke nîke Roho ûrîa wonagia andû ûvoro wa ma. Andû a gûkû nthî matingîmwamûkîra, nîûndû matimwonaga wana kana mamûmenye. Nwatî mue nîmûmwîcî nîûndû atûûranagia namue na arî ndaarî yenyu.

18“Nie ndikûmûtiga ta ciana cia ndigwa; ngaamûcokerera. 19Vuva wa kavinda kanini andû a nthî tî macoka kûmona rîngî, nwatî mue mûkaamona; na nîûndû nîndûûraga mwoyo, wa namue nîmûgaatûûra mwoyo. 20Na rîrîa mûthenya ûcio ûgaaûka, nîmûkaamenya atî nie nîrî ndaarî ya Vava na atî mue mûrî ndaarî yakwa, wata ûrîa nie nîrî ndaarî yenyu.

21“Mûndû wa wonthe wamûkagîra maathani makwa na akamathîkîra nîke ûmendete. Vava akendaga mûndû ûrîa ûmendete, wa nanie ngaamwendaga na ngeyonithanagia kûrî ke.”

22Nake Judasi (nwatî tî Judasi Mûsikariota) nîwaûririe Jesû atîrî, “Mwathani, kûngîvoteka atîa ûkeyonithanagia kûrî tue na tî kûrî andû a gûkû nthî?”

23Nake Jesû nîwamûcokerie atîrî, “Mûndû wa wonthe ûmendete nîwathîkagîra ciugo ciakwa. Vava nîamwendete, na nie tûrî na Vava nîtûkaga kûrî ke na tûgatûûrania nake. 24Mûndû wa wonthe ûtamendete ndathîkagîra ciugo ciakwa. Na ciugo irîa mwegua tî ciakwa, nwatî ciumîte kûrî Vava ûrîa wandûmire.

25“Nie namwîra maûndû mama nîrî wa vamwe namue. 26Nwatî Mûtethia, na nîke Roho Mûtheru, ûrîa Vava agaatûma na rîîtwa rîakwa, nîakaamûthomithia maûndû monthe na amûvotithie kûririkana ûrîa wonthe namwîra.

27“Thayû nîguo nie nîramûtigîra; nî thayû wakwa nîramûva. Nie ndiramûva thayû wîkariî ta ûrîa ûvecanagwa nî nthî. Tigani gûtangîka ngororî cienyu kana mûgîe na guoya. 28Mue nîmwîguîte ngîmwîra atî, ‘Nînîrathiî, nwatî ngaamûcokerera.’ Ethîrwa na ma nîmûmendete, nîmûngîrakena nîûndû nîrathiî kûrî Vava, nîûndû ke nî mûnene kûngîra. 29Nie namwîra maûndû mama rîu mbere ya mekîke, nîguo rîrîa mageekîka mûgeetîkia. 30Ndikwaria namue mûno rîngî îvinda îraca, nîûndû mûnene wa gûkû nthî nîaûkîte. Ke ndangîvota kûmbatha, 31nwatî nîmbîkaga maûndû monthe marîa Vava ambathaga mbîke, nîguo andû a gûkû nthî mamenye atî nîmendete Vava.

“Ûkîrani rîu tûthiî tuume ava.

Currently Selected:

Joh 14: KKB

Highlight

Copy