Kîam 37

Josefu na aa mûrwang'ina

1Jakovu nîwatûûrire Kanaani vûrûrirî ûrîa îthe aatûûraga mbere arî mûgeni. 2Rûrû nîruo rûgano rwa andû a Jakovu.

Rîrîa Josefu aarî na ûkûrû wa mîaka îkûmi na mûgwanja (17), nîwarîthagia mbûri na ng'ondu marî na aa mûrwang'ina. Aamûrûang'ina acio maarî avîcî a Biliha na Zilipa, aka arîa maarî a kwigwa a Jakovu. Josefu nîweraga îthe maûndû macûku marîa mekagwa nî aa mûrwang'ina acio.

3Isiraeli nîwendete mûvîcî Josefu gûkîra anake acio engî onthe ake. Endeete Josefu nîûndû nîko kaana karîa aagîte arî mûkûrû na nîwamûtumîre nguo ndaca yarî na njara ndaca. 4Rîrîa aa mûrwang'ina moonire atî Josefu nîwendetwe nî îthe kûmakîra, nîmaamûmenire na magîtiga kûmwonia wendo.

5Vîndî îmwe Josefu nîwarotire, na rîrîa eerire aa mûrwang'ina ûvoro wa kîroto kîu, nîmaamûmenire mûno makîria. 6Nîwamerire atîrî, “Tathikîrîriani ûrîa nîrarotire. 7Tûrakundîkaga imanja cia ngano tûrî mûgûndarî. Kîmanja gîakwa kîrarûgamire kîevanda, nacio imanja cienyu ciakîthiûrûrûkîria cienamîrîra mbere ya kîmanja gîakwa.”

8Nao aa mûrwang'ina nîmaamûririe atîrî, “Ûreciria nama atî nîûgûtuîka mûnene wetû ûtwathage?” Nao nîmaamûmenire mûno makîria, nîûndû wa iroto ciake na nîûndû wa maûndû marîa aaugaga mamegiî.

9Josefu nîwarotire rîngî na akîra aa mûrwang'ina atîrî, “Nînîrarotire kîroto kîngî, na nona riûa, mweri na njata îkûmi na îmwe ciînamîrîrîte mbere yakwa.”

10Nîwacokire akîra îthe ûvoro wa kîroto kîu. Nwatî îthe nîwamûgûkirie na akîmûria atîrî, “Kîu nî kîroto Kîam mûthemba ûrîkû? Ûreciria nie na nyûkwe wana aa mûrwanyûkwe nwa tûke tûturie maru mbere yaku?” 11#Ciîko 7.9 Aa mûrwang'ina na Josefu nîmaamwîguîrîre wîru, nwatî îthe nîwaigire maûndû mau ngororî yake.

Josefu nîwendirwe na akîvirwa Misiri

12Vîndî îmwe aa mûrwang'ina na Josefu nîmaathiîre kûrîthia mbûri na ng'ondu cia îthe gûkuvî na Shekemu. 13Nake Isiraeli nîwerire Josefu atîrî, “Nîrenda gûgûtûma Shekemu kûrîa aa mûrwanyûkwe mararîthia.”

Nake Josefu nîwacokirie atîrî, “Ndûma vava.”

14Îthe nîwamwîrire atîrî, “Thiî ûkone kana aa mûrwanyûkwe nî aro wa vamwe na mbûri na ng'ondu, ûcoke ûke ûmbîre.” Jakovu nîwatûmire Josefu kuuma Kîamndarî Kîam Heburoni.

Nake Josefu nîwakinyire Shekemu. 15Na rîrîa aaûrûraga kûu kîthakarî, mûndû ûmwe nîwamwonire na akîmûria atîrî, “Nî ndûî ûracaria?”

16Josefu nîwamûcokerie atîrî, “Nîracaria aa mûrwaiya arîa mararîthia mbûri na ng'ondu gûkû; nakûthaitha, mbîra kûrîa mararîthia.”

17Mûndû ûcio nîwamûcokerie atîrî, “Nîmaraumire gûkû mathiî. Nîreguire makiuga atî mathiîte Dothani.” Kwoguo Josefu nîwarûmîrîrie aa mûrwang'ina na akîmethîra Dothani.

18Nao nîmaamwonire arî varaca, na mbere ya akinye varî o, nîmaavangire ûrîa makûmûraga. 19Nîmeranîre atîrî, “Mûroti ûrîa nîûkîte. 20Ûkani tûmûrage na twikie mwîrî wake îrimarî rîmwe rîa mama. Tûgaacoka tuge atî nîarîrwe nî nyamû ya kîthaka, nîtûkoona ûrîa iroto ciake igaatuîka.”

21Rîrîa Reubeni eegwire ûguo, nîwageririe kûmûvonokia kuuma njararî ciao na akîmeera atîrî, “Nîtûtige kûmûraga. 22Mwikieni îrimarî gûkû werûrî na mûtikamûtivie.” Reubeni aaugire ûguo nîûndû nîwendaga kûvonokia Josefu kuuma kûrî aa mûrwang'ina, na amûcokie kûrî îthe. 23Na rîrîa Josefu aakinyire kûrî aa mûrwang'ina, nîmaamûrutire nguo yake îrîa ndaca, ya njara ndaca îrîa eekîrîte. 24Nîmaacokire makîmwoca makîmwikia îrimarî rîtarî na manjî.

25Rîrîa mekarire nthî kûrîa irio, nîmoonire gîkundi Kîam Aishumaeli marî rûgendorî maumîte Gileadi mathiîte Misiri. Ngamîîra ciao ciakuuîte ûbani, indo irîa ciîkagîra irio mûcamo, na mînyamû mînungi waro kuuma mûtîrî wa mare. 26Juda nîwaûririe aa mûrwang'ina atîrî, “Nî umithio ûrîkû tûkûgîa twaûraga mûrwaiya tûkînarega kumbûra? 27Tigani tûmwendie kûrî Aishumaeli aya. Tûtikamûrage nîûndû nî mûrwaiya na tûrî a nthakame îmwe.” Nao aa mûrwang'ina nîmetîkanirie nake. 28#Ciîko 7.9 Rîrîa andû arîa marutaga wîra wa kûgûra na kwendia indo kuuma Midiani maavîtûkîrîre vau, nîmaagucirie Josefu kuuma îrimarî na makîmwendia kûrî Aishumaeli acio sîlûva mîrongo îîrî. Aishumaeli acio nîmaakuuire Josefu makîmûvira Misiri.

29Rîrîa Reubeni aacokire îrimarî na akîthîra Josefu atarî kuo, nîwegwire kîeva na agîtembûranga nguo ciake. 30Nîwacokire kûrî aa mûrwang'ina na akîmeera atîrî, “Nînthiî kû, na Josefu ndarî îrimarî?”

31Nîmaaûragire mbûri na magîoca nguo ya Josefu makîmîrinda nthakamerî. 32Nîmaavirîre îthe nguo îo ndaca ya Josefu îrî na nthakame, na makîmûûria atîrî, “Nguo îno ndaca tûronire, nwa îthîrwe îrî ya mûvîcîguo?”

33Jakovu nîwaroririe nguo îo na akîmîmenya. Nîwaugîrîrie atîrî, “Nguo îno nî îrîa ya mûvîcîwa! Nîararîrwe nî nyamû ya kîthaka. Mûvîcîwa Josefu nîmûtembûrange nî nyamû viû!” 34Jakovu nîwatembûrangire nguo ciake na agîkîra nguo ya macakaya kîûnûrî. Nîwacakaîre mûvîcî mîthenya mîngî. 35Anake ake onthe vamwe na erîtu nîmaageririe kûmûmîrîria; nwatî Jakovu nîwaregire kûmîrîrua, na akiuga atîrî, “Nî kava ngue na nthiî kûrîa akuû mathiîcaga wa ngîcakaagîra mûvîcîwa.” Kwoguo Jakovu nîwathiîre na mbere gûcakaîra mûvîcî Josefu.

36Vîndî wa îo, Amidiani nîmeendetie Josefu Misiri kûrî mûnene ûmwe wa Mûthamaki wa Misiri wetagwa Potifa. Potifa nîke warûngamagîrîra athigari arîa meekaraga kwa mûnene.

Currently Selected:

Kîam 37: KKB

Highlight

Copy