Kîam 27

Isaka nîwarathimire Jakovu

1Rîrîa Isaka aakûrire na akîûra metho, nîwetire Esaû, mûvîcî ûrîa mûkûrû na akîmwîra atîrî, “Mûvîcîwa!”

Nake Esaû nîwacokirie atîrî, “Îî nîrî ava.” 2Isaka nîwamwîrire atîrî, “Rîu nîngûrire, na nwa ngue vîndî wa yonthe. 3Kwoguo oca ûta waku na mîguî, ûthiî kîthakarî na ûmbûragîre nyamû îmwe. 4Ûcoke ûke ûndugîre irio mbaro irîa mendete, ûndetere ndîe, nîguo ngûrathime mbere ya ngua.”

5Rebeka nîwathikîrîrîtie ndeto irîa Isaka eeraga mûvîcî Esaû. Kwoguo rîrîa Esaû aaumagarûkire akîthiî kûguîma, 6Rebeka nîwerire Jakovu atîrî, “Nie negua aguo akîra mûrwanyûkwe Esaû atîrî, 7‘Ndetere nyamû na ûndugîre irio mbaro ndîe. Narîkia kûrîa nîngûkûrathima nîrî mbere ya Ngai-Mûnene mbere ya ngua.’ 8Rîu mwana wakwa, thikîrîria ûrîa ngûkwîra na wîke guo. 9Thiî ndîthiarî ûnyite twori twîrî tûtû tûnoru, ûndetere nîguo nthondekere aguo irio mbaro irîa endete mûno. 10Ûcoke ûmûvirîre arîe nîguo akûrathime mbere ya akua.”

11Nwatî Jakovu nîwerire ng'ina atîrî, “Mûrwaiya ethagîrwa ecûrîte njuîrî mwîrî, nwatî nie mbîthagîrwa nîrî mûtenderû mwîrî. 12Vava avota kûvutia mwîrî wakwa na amenye atî nîkwa nîramûveenia. Na njîra îno, nie nîngwîgîrîra kîrumi vandû va kîrathimo.”

13Nake ng'ina nîwamûcokerie atîrî, “Mûvîcîwa, we îka ûrîa nîrakwîra. Thiî ûndetere twori; kîrumi kîrîa kîngîkûnyita nîkînyite nie.” 14Kwoguo Jakovu nîwathiîre kûgîra twori na akîretera ng'ina. Nîwarugire irio mbaro irîa îthe endete. 15Rebeka nîwacokire agîoca nguo irîa mbaro cia Esaû irîa aaigîte nyomba, na agîkîra Jakovu. 16Rebeka nîwacokire agîoca tûrûûo twa twori na agîkîra Jakovu njara wana ngingo kûrîa gûtaarî na njuîrî. 17Rebeka nîwanengere Jakovu irio irîa ciarî mbaro mûno vamwe na mûgate ûrîa aarugîte.

18Jakovu nîwathiîre kûrî îthe na akîmwîra atîrî, “Vava!” Nake îthe nîwamûcokerie atîrî, “Îî; we nîwe û mûvîcîwa?”

19Nake Jakovu nîwacokerie îthe atîrî, “Nînie Esaû, mûvîcîguo ûrîa mûkûrû; nîmbîkire ûrîa ûmbîrire. Nakûthaitha ûkîra wîkare nthî ûrîe nyama ino nakûretera nîguo ûndathime.”

20Nake Isaka nîwamûririe atîrî, “Mûvîcîwa, nîkwa wona nyamû ya kûraga na îvenya atîa?”

Jakovu nîwacokerie Isaka atîrî, “Ngai-Mûnene, Ngai waku nîke ûndethirie namîona.”

21Isaka nîwerire Jakovu atîrî, “Nakûthaitha ûkaûke vakuvî nîguo ngûvutie menye nama kana nîwe mûvîcîwa Esaû.” 22Jakovu nîwathiîre vakuvî na îthe nake îthe akîmûvutia na akiuga atîrî, “Mûgambo waku ûreguîka ta wa Jakovu, nwatî njara nî cia Esaû viû.” 23Isaka ndaamenya Jakovu nîûndû njara ciake ciarî na njuîrî ta cia Esaû. Na arî vakuvî kûrathima Jakovu, 24nîwamûririe wa rîngî atîrî, “Nîma atî we nîwe mûvîcîwa Esaû?”

Nake Jakovu nîwamûcokerie atîrî, “Îî nî nie.”

25Nake Isaka nîwaugire atîrî, “Ndetere nyama ndîe nîguo narîkia kûrîa ngûrathime.” Jakovu nîwamûvirîre nyama, na agîcoka akîmûvirîra ndivei nîguo anyue.

26Nake îthe Isaka nîwamwîrire atîrî, “Ûka vakuvî mûvîcîwa nîguo ûmumunye.” 27#Ahib 11.20 Rîrîa Jakovu aathiîre vakuvî na îthe nîguo amûmumunywe, Isaka nîwanungîre nguo ciake, akîmûrathima na akîmwîra atîrî, “Mûnungo mwaro wa mûvîcîwa nwa ta mûnungo wa mûgûnda ûrîa Ngai-Mûnene arathimîte. 28Ngai arokuurîria îme kuuma îgûrû na anorie mîgûnda yaku! Arokûva irio nyîngî na ndivei! 29#Kîam 12.3 Andû a ndûrîrî marotuîka ndungata ciaku na makwînamagîrîre. Ûrotuîka wa kwathaga aa mûrwanyûkwe, nao onthe marokwînamagîrîra. Arîa onthe magaakûrumaga maronyitwa nî kîrumi na arîa magaakûrathimaga marorathimagwa!”

Esaû nîwathaithire Isaka amûrathime

30Warîo Isaka arîkia kûrathima Jakovu, mwarwang'ina Esaû nîwaumire kûguîma na agîtonya. 31Esaû wanake nîwarugire irio mbaro mûno akîvirîra îthe, na akîmwîra atîrî, “Vava nakûthaitha ûkîre ûrîe irio ino nakûrugîra nîguo ûndathime.”

32Isaka nîwaûririe atîrî, “Nî we û?”

Nake nîwamûcokerie atîrî, “Nî nie Esaû mûvîcîguo ûrîa mûkûrû.”

33Isaka nîwambîrîrie gûtetema mwîrî wonthe na akîûria atîrî, “Nîûrîkû ûragire nyamû na andetere? Nînarîa nyamû îo wa rîu ûtarî ûrakinya na nînamûrathima, na nîatûûra arî mûrathime tene na tene.”

34Rîrîra Esaû eegwire ûguo nîwarîrire augîrîrîtie na marakara akiugaga “Ûûi Vava, wa nanie ndathima!” 35Nwatî Isaka nîwamwîrire atîrî, “Mûrwanyûkwe aûkire amveenia na oca kîrathimo gîaku.”

36 # Kîam 25.29-34 Esaû nîwaugire atîrî, “Rîrî nî rita rîa kaîrî rîake rîa kûmveenia. Nîkîo etagwa Jakovu#27.36 Jakovu: Rîîtwa rîrî rîguîkaga ta rîa Kîhibirania rîrîa riugaga, “Kûvenania.”. Nîwocire ûrikithathi wakwa, na rîu nîwoca kîrathimo gîakwa. Vava, ndûnandigarîria kîrathimo?”

37Isaka nîwacokerie Esaû atîrî, “Nînamûtua mwathi waku, nawe vamwe na andû onthe enyu mûkamûtungatagîra. Nînamûva irio na ndivei. Rîu gûtirî ûndû nîngîgwîka, mûvîcîwa!”

38 # Ahib 12.17 Esaû nîwathiîre na mbere kûthaitha îthe akîmwîraga atîrî, “Nîkwa ûrî na kîrathimo kîmwe tu, Vava? Wa nanie ndathima!” Esaû nîwatumûkire na kîrîro kînene.

39 # Ahib 11.20 Nake îthe Isaka nîwamwîrire atîrî,

“Ûgaatûûraga kûraca na ûnoru wa gûkû nthî,

kûndû kûraca na kûrîa kuuraga mbura.

40 # Kîam 36.8; 2Atha 8.20 Nîûtûûra ûrûaga na ûrî ndungata ya mûrwanyûkwe,

nwatî rîrîa ûkaaregana nake nîûkaagîa na wîyathi,

na ndagaakwatha rîngî.”

41Esaû nîwamenire Jakovu nîûndû wa kûrathimwa nî îthe. Esaû nîweîrire atîrî, “Îvinda rîa gûcakaya nîûndû wa vava rîrî vakuvî. Vîndî îo nîrîo ngaaûraga mûrwaiya Jakovu.” 42Nwatî rîrîa Rebeka aamenyire mûvango wa Esaû, nîwatûmanîre Jakovu na akîmwîra atîrî, “Mûrwanyûkwe Esaû nîaravanga gûkûûraga nîguo ethirie marakara. 43Kwoguo mûvîcîwa, thikîrîria ûrîa ngûkwîra. Ûkîra wa rîu ûthiî Harani kwa mûrwaiya Labani, 44mwîkarange nake kuo nginya rîrîa marakara ma mûrwanyûkwe makaathira, 45na ariganîrwe nî ûrîa we wamwîkire. Nîngaacoka ngûtûmanîre ume kûu. Ndingîvota kûrwa nî mue muoîrî mûthenya ûmwe.”

Isaka nîwatûmire Jakovu kûrî Labani

46Rebeka nîwerire Isaka atîrî, “Nîrîmûnogu nî gûtûûrania na aka aya a Esaû. O nî a mûvîrîga wa Ahiti, na Jakovu wanake angîvikia mûndûmûka Mûhiti ta aya, nwa ngue.”

Currently Selected:

Kîam 27: KKB

Highlight

Copy