Beli 1
1
Danieli na Mûthînjîri-Ngai wa Beli
1Vuva wa gîkuû Kîam Mûthamaki Asitîyagesi, Cairasi wa Perisia nîwatuîkire mûthamaki vuva wake. 2Danieli aarî mûnyanya wa mûthamaki ûrîa aatîîte mûno gûkîra arata ake.
3 #
Isa 46.1; Jer 51.44 #Dan 6.16-24 Andû a Babuloni maarî na mûvuanano wetagwa Beli. Na wa mûthenya andû nîmaavecaga Beli maruta ma lita magana mana cia mûtu mûvinyu, ng'ondu mîrongo îna, na lita magana maîrî cia ndivei. 4Mûthamaki Cairasi nîwetîkîtie atî Beli aarî ngai, na wa mûthenya nîwathiîcaga kûmîgooca. Nwatî Danieli aagoocaga Ngai wake.
5Mûthenya ûmwe mûthamaki nîwaûririe Danieli atîrî, “Ûregaga kûgooca Beli nîkî?”
Nake Danieli nîwacokirie atîrî, “Ndigoocaga mîvuanano îrûthîtwe na njara cia mûndû. Ngoocaga Ngai ûrîa ûtûûraga mwoyo, ûrîa waûmbire îgûrû na nthî na nîke Mwathani wa andû onthe.”
6Nake mûthamaki nîwaugire atîrî, “Nîkwa mûtetîkîtie atî ngai wetû Beli arî mwoyo? Nîkwa mûtonaga irio irîa arîcaga na akanyua wa mûthenya?”
7Danieli nîwathekire na akiuga atîrî, “Ndûkaveenue we mûthamaki; ngai îno îtagwa Beli nî yûmba rîkunîkîtwe nî gîcango. Ndîrîcaga kana înyua kîndû.”
8Mûthamaki nîwarakarire, na agîîta athînjîri-Ngai ake na akîmeera atîrî, “Mwarega kûmbîra nîûrîkû ûrarîa matega mama, we nîûgaakua. 9Nwatî ûngîonania atî Beli nîke ûramarîa, Danieli nîagaakua nîûndû nîwaugire atî Beli tî ngai.” Nake Danieli nîwerire mûthamaki atîrî, “Kûroekîka wata ûguo wauga.”
10Kwarî na athînjîri-Ngai mîrongo mûgwanja a Beli, ûtagûtara aka ao na ciana. Nake mûthamaki nîwathiîre na Danieli hekarûrî ya Beli.
11Nao athînjîri-Ngai a Beli nîmaaugire atîrî, “Taroria, tue nîtûthiîte na nja, we mûthamaki we mwene, nîûkaavarîrîria irio na ûtukanie na wîkîre ndivei, ûvinge mûrango na ûûvûre mûvûri waku. 12Kîraûko wacoka, wona atî Beli tîmûrîu cionthe, tue nîtûgaakua; ethîrwa nîakaarîa Danieli nîagaakua nîûndû wa kwaria maveeni îgûrû rîtwîgiî.”
13Nwatî athînjîri-Ngai matiamaka nîûndû nîmaathondekete vandû vethithu va gûtonyerera rungu rwa metha hekarûrî, varîa maathiîcagîrîra wa vîndî wa vîndî na makarîa matega.
14Rîrîa athînjîri-Ngai maathiîre, mûthamaki nîwavarîrîrie irio cia Beli. Vuvarî Danieli nîwathire ndungata ciake irete mûu na iûnyagie kûu nthî ya hekarû. Gûtirî mûndû wamonire tiga mûthamaki. Vuva wa ûguo, onthe nîmaaumire nja, makîvinga mûrango, na makîûvûra mûvûri wa mûthamaki magîcoka makînathiî.
15Ûtukû ûcio athînjîri-Ngai nîmaaûkire na aka ao na ciana, wata ûrîa maamenyerete, makîrîa na makînyua ndivei yonthe.
16Kîraûko Kîam mûthenya ûcio wîngî, mûthamaki marî na Danieli nîmaathiîre hekarûrî. 17Mûthamaki nîwaûririe atîrî, “Nîkwa mîvûri îrî miune, Danieli?”
Nake nîwacokirie atîrî, “Naarî tî miune, we mûthamaki.”
18Vîndî îrîa mûrango wavingûrirwe, mûthamaki nîwonire metha na akiugîrîria atîrî, “Kaî wî mûnene we Beli-î! Nama we wî ngai.”
19Nwatî Danieli nîwambîrîre kûtheka na akîîra mûthamaki atîrî, “Mbere ya ûtonya hekarûrî, taroria kûu nthî na ûmbîre nî makinyo ma û ûrona kuo.”
20Nake mûthamaki nîwacokirie atîrî, “Nînîrona makinyo ma arûme, aka na ciana.” 21Mûthamaki nîwarakarire mûno nginya akînyitithia athînjîri-Ngai na andû ao na makîvirwa kûrî ke. Nîmaamwonirie mîrango ya nthitho îrîa maatonyagîrîra wa ûtukû makîthiî kûrîa irio irîa ciaigîtwe metharî. 22Kwoguo mûthamaki nîwaûragithirie athînjîri-Ngai na akîvecana Beli kûrî Danieli, ûrîa wacûkangirie mûvuanano wa ngai îo na akîomomora hekarû yayo.
Danieli Nîwaûragire Njûnamatu
23Kwarî na njûnamatu nene mûno îrîa andû a Babuloni maagoocaga. 24Mûthenya ûmwe mûthamaki nîwerire Danieli atîrî, “Ndûngiuga atî îno tî ngai îrî mwoyo; kwoguo mîgooce!”
25Nake Danieli nîwaugire atîrî, “Ngoocaga Mwathani Ngai wakwa, nîûndû nîke Ngai mûtûûra mwoyo. 26Nwatî ethîrwa we mûthamaki nîûkûmva rûtha, nie nîngûraga njûnamatu ndagûtûmîra rûviû kana njokoma.”
Nake mûthamaki nîwacokirie atîrî, “Nînakûva rûtha.”
27Danieli nîwacokire agîoca rami, maguta ma kûrîa na njuîrî na akîitherûkia cionthe vamwe. Nîwarûthire geki na akîva njûnamatu. Njûnamatu nîyarîre geki icio, îkimba îvu na îgîtumûka. Danieli nîwacokire akiuga atîrî, “Taroria kîrîa mwîthîrîtwe mûkîgooca!”
28Rîrîa andû a Babuloni megwire ûrîa gwekîkîte, nîmaarakarire mûno na magîîciria maregane na mûthamaki na makiuga atîrî, “Mûthamaki nîmûtuîku Mûyahudi. Mbere nîwacûkangirie Beli na akîûraga athînjîri-Ngai, na rîu nîmûragu njûnamatu.” 29Nîmaathiîre kûrî mûthamaki na makîmwîra atîrî, “Tûnengere Danieli, kana tûkûrage na andû a nyomba yaku.”
30Rîrîa mûthamaki oonire mamûringîrîria mûno, nîwanenganîre Danieli kûrî o. 31Nîmaaikirie Danieli îrimarî rîa mînyambû na agîkara kuo îvinda rîa mîthenya îtandatû. 32Kwarî na mînyambû mûgwanja îrimarî rîu, na yavecagwa mîîrî îîrî ya andû na ng'ondu igîrî wa mûthenya. Nwatî itiavewa kîndû ingîrîa mîthenya îo îtandatû nîguo irîe Danieli.
Danieli nîwavonokirue kuuma îrimarî rîa mînyambû
33Vîndî îo mûrathi Habakuku aarî Judea. Nîwarugîte thuvu na agatinangîria mûgate kuo. Nîwakuuire thuvu ûcio na mbakûri aûvirîre andû arîa maakethaga ngano. 34Nwatî mûraika wa Mwathani nîwerire Habakuku atîrî, “Oca irio icio ûkuîte ûivirîre Danieli ûrîa ûrî Babuloni îrimarî rîa mînyambû.”
35Habakuku nîwacokirie atîrî, “Mwathi wakwa, nie ndianathiî Babuloni na ndiîcî kûrîa îrima rîa mînyambû rîrî.” 36#Ezek 8.3 Nake mûraika nîwamûnyitire njuîrî cia kîongo na akîmûvira Babuloni na îvenya ta rûvuvo na akîmwiga vakuvî na îrima rîa mînyambû. 37Habakuku nîwetanire atîrî, “Danieli, Danieli! Oca irio ino Ngai agûtûmîra.” 38Danieli nîwaugire atîrî, “We Ngai, nîwandirikana na ndûtiganagîria arîa makwendete.” 39Kwoguo Danieli nîwaûkîrire na akîrîa. Na wa rîmwe mûraika wa Ngai nîwocire Habakuku na akîmûvira mûciî.
40Mûthenya wa mûgwanja kuuma Danieli aikua îrimarî rîa mînyambû, mûthamaki nîwathiîre îrimarî kûmûcakaîra. Rîrîa aaroririe îrima ndaarî nîwonire Danieli ekarîte nthî kuo. 41Nake mûthamaki nîwaugîrîrie atîrî, “We Mwathani, Ngai wa Danieli kaî ûrî mûnene-î! Gûtirî wîngî tawe.” 42Kwoguo nîwarutire Danieli îrimarî rîa mînyambû, nao andû arîa meendaga kûraga Danieli nîmaaikirue kuo. Nayo mînyambû nîyamarîre wa rîmwe mûthamaki akîonaga.
Currently Selected:
Beli 1: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019