1Mak 7
7
Mûthînjîri-Ngai mûnene Alikimu na mbaara cia Nikanori
(2Mak 14.1-36; 15.1-36)
1Mwaka wa 151, Demetirio na mûvîcî wa Seleukusi nîmaaumire Roma na makîthiî îtûûrarî rîrîa rîarî rûtererî rwa îria rîa Mediterania marî andû anini, na maakinya kuo nîwetuire mûthamaki. 2Rîrîa evaragîrîria gwîkarîra gîtî Kîam ûthamaki wa methe make, athigari nîmaanyitire Anitioku wa Gatano na Lîsia nîguo mamavire kwa Demetirio. 3Nwatî rîrîa Demetirio eeguire mûvango ûcio, nîwaugire atîrî, “Nie ndirenda kûmona.” 4Kwoguo athigari nîmaûragire Anitioku wa Gatano na Lîsia, nake Demetirio agîkarîra gîtî gîake Kîam ûthamaki. 5Kwoguo Ayahudi onthe arîa mataarûmagîrîra watho na mataicî Ngai, nîmaatongorirue nî Alikimu ûrîa wendaga gûtuîka Mûthînjîri-Ngai mûnene, makîthiî kûrî Demetirio. 6Nîmaathitangire Ayahudi arîa engî na makiuga atîrî, “Mûthamaki wetû Judasi na aa mûrwang'ina nîmaûragire arata aku onthe na matwîngata twauma vûrûrirî wetû. 7Na rîu twakûthaitha ûtûme mûndû ûmwe ûrîa wîvokete, nîguo agatuîrie one ûrîa indo cietû icûkangîtue na one ûrîa vûrûri wa mûthamaki ûcûkangîtue, acoke averithie Judasi na aa mûrwang'ina vamwe na arîa onthe mamûtethagia.” 8Kwoguo mûthamaki nîwathuurire mûndû wîtagwa Bakide, ûmwe wa arîa mamûtaaraga, na nwake warî mûnene wa Sîria îrîa nene. Mûndû ûcio aarî mûndû warî na îgweta ûthamakirî ûcio na watîîte mûthamaki ûcio mûno. 9Mûthamaki nîwatûmire Alikimu ûrîa ûtetîkîtie Ngai na wathuurîtwe nî mûthamaki atuîke Mûthînjîri-Ngai ûrîa mûnene na akîmwatha akerîvîrîrie kûrî Ayahudi. 10Kwoguo nîmaumire Antiokia marî na gîkundi kînene Kîam athigari a mbaara na magîkinya Judea. Nake Bakide nîwatûmire anjaama ake kûrî Judasi na aa mûrwang'ina makamaveenererie atî maûka na thayû.
11Nwatî rîrîa Judasi na aa mûrwang'ina moonire athigari acio onthe maûkîte na Bakide matietîkania na ndûmîrîri ya anjaama acio matûmîtwe.
12Nao andû amwe a gîkundi Kîam arimû a watho nîmaathiîre kûrî Alikimu na Bakide na makîmûthaitha atî kûgîe na thayû. 13Hasidea nîo maarî Ayahudi a mbere kûthaitha Alikimu na Bakide metîkîre kûgîe na thayû. 14Meciragia atî Alikimu, ûrîa warî mûthînjîri-Ngai wa mûvîrîga wa Aroni na waûkîte na gîkundi kînene Kîam mbaara, ndangîmeka ûndû mûcûku. 15Alikimu nîwaririe nao ciugo cia thayû na akîrîkanîra nao na njîra ya mwîvîtwa atî gûtirî mûndû wanarî ûmwe wao kana wa arata ao ûkona ûndû mûcûku. 16Kwoguo Ayahudi acio nîmaamwîtîkirie nwatî nîwanyitire andû mîrongo îthatû kuuma gatagatîrî kao na akîmaûraga mûthenya ûmwe, wata ûrîa maandîko maugîte atî:
17 #
Tha 79.2-3
“Nthakame ya andû aku arîa athingu nîyetûrûrirwe,
ciimba ciao ciaraganîtue Jerusalemu;
na gûtirî mûndû ûtigarîte wa kûithika.”
18Andû onthe nîmeetigîrire na makîmaka nîûndû wa ûndû ûcio wekîtwe nî Alikimu na Bakide na makiuga atîrî, “Andû aya matirî na ûma kana kîvooto, nîûndû nîmaunîte kîrîkanîro kîrîa twarîkanîre nao na njîra ya mwîvîtwa.”
19Bakide nîwaumire Jerusalemu na akîthiî gûtûûra Bethizaithi. Nîwathanire Ayahudi arîa maarî etîkia na maagarûrûkîte makamûrûmîrîra manyitwe. Nîwacokire akîmaûraga na magikua îrimarî rîarî îrikîru mûno. 20Nîwacokire akîthuura Alikimu arûngamagîrîre vûrûri ûcio wonthe na agîcoka akîmûtigîra athigari a kûmûtethagîrîria na agîcoka kûrî mûthamaki.
21Nake Alikimu nîwambîrîrie kûrûîrîra gîtî gîake Kîam Mûthînjîri-Ngai ûrîa mûnene. 22Andû onthe arîa maarutaga thîna nîmaanyitanîre nake. Nîmaanyitire vûrûri wa Judea na magîcûkangia vûrûri wa Isiraeli mûno. 23Nake Judasi nîwonire maûndû monthe macûku marîa Alikimu vamwe na andû ake meekîte kûrî andû a Isiraeli maarî macûku gûkîra marîa andû a ndûrîrî meekîte. 24Kwoguo Judasi nîwathiûrûrûkire matûûra monthe ma Judea na icagi irîa ciamathiûrûkîrîtie akîûragaga arîa onthe maamûgarûrûkîte makarûmîrîra Alikimu. Nîwarigîrîrie arîa maarî matûûrarî matikaume kuo macoka na mîgûndarî. 25Rîrîa Alikimu onire atî Judasi na andû ake nîmaragîa na vinya kûmûkîra, na akîmenya atî mavota kûmavoota, nîwacokire kûrî mûthamaki na akigîrîra andû a Judasi kîng'enyo kînene.
26Mûthamaki nîwacokire agîtûma Nikanoru, ûmwe wa atongoria a mbaara arîa maarî îgweta, na wamenete vûrûri wa Isiraeli, akîmwatha agacûkangie Ayahudi na amathirie viû. 27Kwoguo Nikanoru nîwathiîre Jerusalemu na gîkundi kînene mûno Kîam mbaara. Nîwageririe kûveenereria Judasi na aa mûrwang'ina na ndûmîrîri ya thayû na akiuga atîrî, 28“Gûtiagîrîrwe nî kwîthîrwa kûrî na mbaara gatagatîrî getû namue. Nîngûka kwenyu na gakundi kanini ka andû, nîguo twaranîrie tûrî vamwe na njîra ya thayû.” 29Kwoguo Nikanoru nîwathiîre kûrî Judasi na magîkethania na ngethi cia thayû. Nwatî nthû cia Judasi nwa cievarîrîtie kûmûnyita na vinya. 30Rîrîa Judasi aamenyire atî Nikanoru aathiîte kûrî ke na wara, Judasi nîwetigîrire na akîrega gûcemania nake rîngî. 31Nikanoru nîwamenyire atî mûvango wake nîwamenywa. Kwoguo nîwaumire Jerusalemu na akîthiî kûrûa na Judasi vakuvî na Kafarisalama. 32Nao athigari ta magana matano (500) a Nikanoru nîmaaûragirwe, na arîa maatigarire makîthiî kwîthitha îtûûrarî rîa Daudi. 33Vuva wa maûndû mau, Nikanoru nîwathiîre kîrîmarî Kîam Zayuni. Nao athînjîri-Ngai amwe, marî vamwe na atongoria a andû nîmaathiîre kûmûtûnga marî na ciugo cia thayû na kûmûonia matega ma kûvîvua marîa maarutagwa nîûndû wa mûthamaki. 34Nwatî Nikanoru nîwanyûrûririe athînjîri-Ngai acio, akîmagwatia mûgiro na akîmarîria na mwîtîîo, 35na arî na marakara nîwevîtire akiuga atîrî, “Judasi na athigari ake mangîrega kûnenganîrwa kûrî nie na îvenya, na nacoka narîkia kûvootana nîngavîvia hekarû îno.” Nake nîwaumire kuo ecûrîtwe nî marakara meengî mûno. 36Nao athînjîri-Ngai nîmaathiîre na magîtonya ndaarî na makîrûngama mbere ya hekarû na mbere ya metha ya kîgongoona na makîrîra makiuga atîrî, 37“Mwathani, nîwe wathuurire hekarû îno nîguo îtanue na rîîtwa rîaku, na îtuîke vandû va mavoya na va kûthaithanagîrîra andû aku. 38Rîu twakûthaitha ûrîvîrîrie andû aku kûrî mûndû ûyû na athigari ake. Marekererie onthe maûragîrwe mbaararî. Ngai-Mûnene, taririkana irumi irîa makûrumîte na ndûkareke wana ûmwe wao atigare.” 39Nikanoru nîwaumire Jerusalemu na akîthiî akîamba magema make Bethi-horoni, na arî kûu athigari a Sîria nîmaathiîre na makîgwatanîra nake. 40Nake Judasi na athigari ake ngiri îthatû nîmaathiîre na makîamba magema mao Adasa. Nake Judasi nîwavoire atîrî, 41#2Atha 19.35 “Mwathani, rîrîa anjaama arîa maatûmîtwe nî mûthamaki maakûrumire, mûraika nîwathiîre na akîûraga athigari a Asîria ngiri îgana rîa mîrongo înana na ithano (185,000). 42Kwoguo rîu, wata ûguo wekire, twakûthaitha ûtûvootere athigari aya marî mbere yetû na ûreke wa mûndû amenye atî we nîûverithîtie Nikanoru ûrîa kwagîrîrîte nîûndû wa kûgwatia hekarû yaku ntheru mûgiro.” 43Kwoguo athigari a Nikanoru na a Judasi nîmaacemanirie mûthenya wa îkûmi na îthatû wa mweri wa Adari. Nake Nikanoru nîke warî wa mbere kûragwa mbaararî îo. 44Rîrîa athigari ake moonire atî Nikanoru nîwaûragwa, nîmarekanirie indo ciao cia mbaara makînaûra. 45Nao Ayahudi nîmaavinyûranirie na athigari acio îvinda rîa mûthenya mûgima, kuuma Adasa nginya Gazara na wa mathiîte nîmaavuvaga tûrumbeta twa mbaara. 46Nao andû onthe arîa maarî matûûrarî marîa maarî vakuvî na Judea, nîmaathiîre na makîtharîkîra andû acio mavinyûrîtue na mbarî cionthe. Nao athigari acio nthû nîmaacokire na vuva na magîcemania na athigari a Ayahudi arîa maamavinyûrîtie. Nao nîmaûragirwe onthe nî Ayahudi. 47Ayahudi nîmaacokire magîtava indo nyîngî mûno na makîthiî nacio. Nîmaatinirie kîongo Kîam Nikanoru vamwe na njara îrîa aamorotete nayo ang'athîtie, na makîivira Jerusalemu na magîicuria nja ya îtûûra. 48Nao andû nîmaakenire mûno na magîtua mûthenya ûcio wa gûkûngûagîrwa na gîkeno kînene. 49Nîmaatuire atî mûthenya ûcio ûgakûngûagîrwa wa mwaka, mûthenya wa ûcio wa îkûmi na îthatû na mweri wa Adari. 50Nakuo kûu vûrûrirî wa Judea nîkwagîre na thayû gwa kavinda kanini.
Currently Selected:
1Mak 7: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019