1Mak 5
5
Mbaara na ndûrîrî irîa maariganîtie nacio
(2Mak 10.14-33; 12.10-45)
1Rîrîa andû a ndûrîrî meeguire atî metha ya kîgongoona yarî ndume rîngî na hekarû îkamûrwa, nîmaarakarire mûno. 2Nao nîmevotorire nîguo mathirie Aisiraeli arîa matûûranagia nao. Nîmaambîrîrie kûmaûraga na kûmathiria. 3Nake Judasi nîwatharîkîre rûciaro rwa Esaû rûrîa rwatûûraga Idumea mûringo wa Akirabatene. Nîwaûragire andû eengî mûno arîa meethithîrîte Aisiraeli. Nîmaacokire magîkuua indo ciao nyîngî cia vata. 4Judasi nîwacokire akîririkana andû a Baeani arîa matûûrîte mategete andû a Isiraeli na makamovagîria varavararî îrîa nene nîguo mamatharîkîre. 5Judasi nîwavingîre andû acio nyombarî ciao cia kwîthitha, na akîranîra na mwîvîtwa atî nîakûmathiria. Nîwavîvirie nyomba ciao na mwaki, na arîa onthe maarî kûu ndaarî makîrûngûra. 6Judasi nîwacokire akîthithûkîra vûrûri wa Amoni na akîthîra gîkundi kînene athigari a mbaara maarî na vinya na maatongoragua nî Timotheo. 7Judasi nîwarûire nao mbaara nyîngî na akîmavoota onthe. 8Rîrîa aarîkirie kwîgwatîra îtûûra rîa Jazeri, na matûûra marîa maarîrigicîrîtie, nîwacokire agîcoka Judea.
9Nao andû a ndûrîrî arîa maatûûraga Gileadi nîmaagomanire vamwe nîguo matharîkîre na mathirie andû a Isiraeli arîa matûûranagia nao. Nwatî andû a Isiraeli nîmaathiîre nyombarî cia kwîthitha cia Dathema. 10Nîmaacokire magîtûmîra Judasi na aa mûrwang'ina maarûa yaugaga atîrî, “Andû a ndûrîrî arîa tûriganîtie nao nîmaûnganîte nîguo matûtharîkîre tûthire viû. 11Mevarîrîtie matongoretue nî Timotheo nîguo maûke matûtharîkîre tûrî gûkû nyombarî îno ya kwîthitha matûthirie viû. 12Kwoguo ûkani narua mûtûvonokie kuuma kûrî andû aya, nîûndû andû etû eengî mûno nîaûrage. 13Andû etû onthe arîa maarî vûrûrirî wa Tobu nîaûrage onthe, nao aka ao onthe wana ciana nîanyite mîgwate na indo ciao nîciakuuirwe cionthe. Arûme ta ngiri îmwe (1,000) nîmaaûragîrwe kuo.”
14Rîrîa maarûa yathomagwa, anjaama mekîrîte nguo njerû, nîmaakinyire maumîte Galili marî na ndûmîrîri kariî wata îo. 15Nao nîmaaugire atîrî, “Athigari a mbaara kuuma Putolemai, Turo, Sidoni na Galili kuonthe nîmaûnganîte vamwe matûûrage tûthire.”
16Rîrîa Judasi na andû meguire maûndû mama, nîmeetire andû gîkundi kînene nîguo mamenye ûrîa magwîka nîûndû wa gûtethia andû ao arîa maarî thînarî na maatharîkagîrwa nî nthû. 17Judasi nîwerire mûrwang'ina Simoni atîrî, “Thuura anake ethî mûthiî mûkavonokie aa mûrwanyûkwe arîa marî Galili, nwatî nie na Jonathani nîtûthiî Gileadi.” 18Nwatî nîwatigire Josefu, mûvîcî wa Zekaria, Azaria mûtongoria wa andû marûgamagîrîre athigari acio engî kûu Judea. 19Judasi nîwatigire amatha akîmera atîrî, “Namûtiga mûrûgamagîrîre andû gûkû nwatî mûtikarutîre andû a ndûrûrî mbaara nginya rîrîa tûgaacoka.” 20Simoni nîwathiîre Galili na arûme ngiri ithatû (3,000), nake Judasi akîthiî Gileadi na athigari ngiri inyanya (8,000). 21Simoni nîwathiîre Galili na akîrûa mbaara nyîngî na andû a ndûrîrî na akîmatoria onthe. 22Nîwamarûmîrîrie nginya îtûûrarî rîa Putolemai, akîûraga andû ta ngiri ithatû na agîtava indo ciao cionthe. 23Nîwacokire agîoca Ayahudi arîa matûûraga Galili na Aribata vamwe na aka na ciana ciao na indo ciao, agîcoka nao Judea makiugagîrîria macanjamûkîte na makenete mûno. 24Vîndî îo Judasi Makabii na mûrwang'ina Jonathani nîmaaringire rûnjî rwa Jorodani na makîthiî rûgendo rwa mîthenya îthatû matuîkanîrîrîtie werûrî. 25Nîmaatûnganire na Anabatea arîa mamaamûkîre waro mûno na makîmeera maûndû monthe marîa mekîkîte kûrî Ayahudi arîa engî matûûraga Gileadi. 26Anabatea acio nîmaamerire atî Ayahudi eengî ao nîmaavingîrîtwe matûûrarî mairigîre na nthingo cia vinya ma Bozira, Bosoru, Alema, Kasifo, Makedi na Karinaimu 27na engî maavingîrîtwe matûûrarî manini ma Gileadi, na atî nthû nîciîvarîrîtie kûmatharîkîra na maûrage andû onthe na îvinda rîa mûthenya ûmwe. 28Judasi na athigari ake nîmaacokire wa rîmwe na makîthiî na njîra ya werûrî. Nîmaathiîre Bozira makîtharîkîra îtûûra rîu, makîrînyita na magîkuua indo ciao cionthe na makîrîgwatia mwaki. 29Ûtukû ûcio, Judasi na athigari ake nîmaaumire Bozira na makîthiî nginya Dathema kûrîa kwarî na nyomba cia kwîthitha. 30Kîraûko tene Judasi na andû ake nîmoonire gîkundi kînene mûno Kîam andû matangîtarîka makuîte ngathî na indo cia mbaara nîguo matonye îtûûrarî rîu îgitîre na matharîkîre Ayahudi. 31Rîrîa Judasi eeguire înegene na andû makiugîrîria na tûrumbeta tûkîvuvwa kuuma îtûûrarî, nîwamenyire atî mbaara nîyambîrîria. 32Kwoguo nîwerire athigari ake atîrî, “Îîvotoreni ûmûnthî mûrûîrîre ariû a îthe wenyu.” 33Judasi nîwagaanirie andû ikundi ithatû makîtharîkîra nthû ciao kuuma mwena wa vuva makîvuvaga tûrumbeta magîkaagîra Mwathani na njîra ya mavoya. 34Na athigari arîa matongoretue nî Timotheo mamenya atî nîmacemania na Judasi Makabii, nîmaacokire makîûra. Nake Judasi nîwamatharîkîre na îvenya na akîûraga arûme ta ngiri inyanya (8,000) mûthenya ûcio. 35Judasi nîwacokire akîgarûrûkîra îtûûra rîa Alema akîrîtharîkîra na akîûraga arûme akuo onthe, agîtava indo ciao na akîrîvîvia na mwaki. 36Kuuma vau nîwathiîre na mbere na akînyita îtûûra rîa Kasifo, Makedi, Bosoru na matûûra mengî ma Gileadi. 37Vuva wa maûndû mau, Timotheo nîwacokire akîthondeka gîkundi kîngî Kîam mbaara na makîamba magema maroranîtie na Rafoni mûkîra ûcio wîngî wa rûnjî. 38Nake Judasi nîwatûmire andû magatuîrie kûu kwambîtwe magema. Nao nîmaacokirie ûvoro makîmwîra atîrî, “Andû onthe a ndûrîrî arîa marî gîcunjîrî kîu nîmetukanîrîte na Timotheo na makathondeka gîkundi kînene mûno Kîam athigari a mbaara. 39Timotheo nîwakomborire athigari a Arabu nîguo mamûtethererie, nao maambîte magema mao mûringo ûrîa wîngî wa rûnjî mevarîrîtie kûrûa.” Kwoguo Judasi nîwathiîre makarûe nao.
40Rîrîa aakinyire vakuvî na rûnjî, Timotheo nîwerire athigari ake atîrî, “Mûtikamwîtîkîrie aringe rûnjî, nîûndû aringa tîtûvota kûmwîngata na nîagûtûvoota. 41Nwatî angîtigîra na ekare mwena ûcio wîngî wa rûnjî, nîtûringa na tûthiî tûkarûe nake na nwanginya tûmûvoote.” 42Juda arîkia gûkinya rûtererî rwa rûnjî, nîwathire atongoria a athigari nîguo vatikagîe na mûndû wana ûrîkû ûgûtigwa; onthe matonye mbaararî. 43Judasi nîke warî wa mbere kûringa rûnjî erekerete na kûrî nthû ciao, na a athigari ake nîmaamumire vuva. Nao andû acio a ndûrîrî nîmaavootirwe, magîtiganîria indo ciao cia mbaara makîûra na makîthiî kwîthitha hekarûrî îrîa yarî Karinaimu. 44Nwatî Judasi na athigari ake nîmaanyitire îtûûra rîu na makîvîvia hekarû îo vamwe na arîa onthe methithîte kuo. Kwoguo îtûûra rîu rîa Karinaimu nîrîavootirwe, na andû a ndûrîrî matiavota gûtirîria Judasi rîngî. 45Judasi nîwacokire akîûngania Ayahudi onthe arîa maarî Gileadi ciana na athuuri, aka vamwe na ciana ciao vamwe na indo ciao cionthe, nîguo amatongorie amakinyie Judea. 46Nao nîmaaumagarire magîkinya Efironi îtûûra rîarî înene na rîairigîrîtwe na nthingo cia vinya. Mationa vandû va kûvîtûkîra na mîena ya rîo yonthe tiga nwa mavîtûkîrîrîte gatagatî ka rîo. 47Nwatî andû a îtûûra rîu rîa Efironi nîmaavingire ivingo ciarîo na mathiga nîguo Ayahudi matigatonye kuo. 48Nake Judasi nîwamatûmîre ndûmîrîri ya thayû akîmera atîrî, “Twîtîkîrie tûvîtûkîre îtûûrarî rîenyu nîguo tûcoke gwetû mûciî. Tue tûtirî na mbaara; nîkwa twîvîtûkîrîte.” Nao nîmaaregire kûmavingûrîra ivingo ciao. 49Kwoguo Judasi nîwathire andû ake mambe magema vau tiga athigari a mbaara, 50nao nîmaatharîkîre Efironi mevotorete ûtukû na mûthenya na makîmavoota na makînyita îtûûra rîu. 51Nao nîmaûragire arûme onthe a Efironi na magîoca indo ciao cionthe irîa ciarî kuo makîomomoranga nthingo ciarîo magîcoka magîtuîkanîria kûu makîrangaga ciimba. 52Nîmacokire makîringa rûnjî rwa Jorodani magîkinya kûndû kwaraganu na kûnene kûrîa kwaroranîtie na Bethi Shani. 53Rûgendorî rûu ruonthe, Judasi nîwacokanagîrîria arîa onthe meegucagia na akamaûmîrîria onthe nginya magîkinya Judea. 54Kwoguo nîmaatwîre kîrîma gîa Zayuni macanjamûkîte na marî na gîkeno na makîruta matega ma kûvîvua nîûndû wa gûcoka marî na thayû na gûtarî wanarî ûmwe wao waûragîtwe. 55Rîrîa Judasi na mûrwang'ina Simoni methîrîtwe makîtharîkîra Putolemai îtûûra rîa Galili, 56Josefu mûvîcî wa Zekaria na anene a athigari a mbaara arîa maatigîtwe Judea, nîmeguire ûrîa mekîte ciîko cia ûcamba na makavootana mbaararî. 57Nao nîmeeranire atîrî: “Tigani twambîrîrie mbaara na andû a mavûrûri marîa matûrigicîrîtie, nîguo twîcarîrie ngumo.” 58Kwoguo nîmaathire athigari ao, na marî vamwe nîmaathiîre na makîtharîkîra îtûûra rîa Jamunia. 59Gorigia na andû ake nîmaaumire nja ya mûciî nîguo makarûe na Ayahudi acio. 60Nao Josefu na Azaria nîmaavootirwe, na makîrûmanîrîrua nao nginya mîvakarî ya Judea. Mûthenya ûcio nîmaaûragîrwe athigari matanyivîrîte ngiri igîrî (2,000). 61Andû acio maavootirwe na vinya ûguo nîûndû Josefu na Azaria mecaragîria îgweta vandû va kwathîkîra Juda na aa mûrwang'ina. 62Vamwe na ûguo, atongoria acio matiarî a nyomba ya Makabii, arîa mathuurîtwe nî Ngai nîguo makaruta andû a Isiraeli ûkomborî. 63Nwatî Judasi na aa mûrwang'ina nîmatîîtwe mûno nî andû a Isiraeli onthe na andû onthe a mavûrûri marîa mengî. Rîrîa andû meeguire ngumo yao, 64andû nîmaagomanire ikundi ikundi makîthiî kûmacokeria ngatho. 65Vuva wa ûguo, Judasi na aa mûrwang'ina, nîmaathiîre mwena wa îveti kûrûa na njiarwa cia Esaû na makîmavoota. Nîwatharîkîre Heburoni vamwe na matûûra marîa maarîthiûrûkîrîtie, akîomomora nthingo cia rîo cia vinya na akîvîvia nyomba ndaca na îgûrû cia kuo. 66Nîwacokire agîtonya îtûûrarî rîa Afilisiti kûvîtûkîra Marisa. 67Mûthenya ûcio athînjîri-Ngai amwe nîmaaûragirwe nîûndû maathiîre kûrûa mbaara na ûrimû nîguo magîe ngumo na monanie ûcamba wao. 68Judasi nîwagarûrûkîre îtûûra rîa Azotu vûrûrirî wa Filisiti. Nîwaunangire metha cionthe cia magongoona, akîvîvia mîvuanano na ngai ciakuo na mwaki na agîtava indo nyîngî mûno cia mûtûûra mau agîcoka Judea.
Currently Selected:
1Mak 5: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019