मरकुस 12

दुस्ट किसाना रा उदाहरण

(मत्ती 21:33-46; लूक. 20:9-19)

1फेरी यीसू उदाहरण मन्झ तिन्हा किन्हें गल्ला करदा लग्या कि: केसी माह्णुंऐ अंगूरा रा बगीचा ल्गाया, होर तेता रे चारो तरफ बाड़ ल्गाया, होर अंगूरा रा रस काढणे रे कठे एक गड्ढा खणेया, होर उचा टापरा बणाया; होर किसान जो तेता रा ठेका देई किन्हें परदेसा जो चली गया। 2फेरी अंगूर काढणे रा मौसम आया ता तिन्हें माल्के आपणा एक नौकर किसाना वाले भेज्या कि से जाई किन्हें अंगूरा रे बगीचे ले आपणा हिस्सा ल्याए। 3पर तिन्हें से पकड़ी किन्हें मारेया पिटेया होर खाली हाथ भेजी दितेया। 4फेरी माल्के एक होर नौकर तिन्हा वाले भेज्या, होर तिन्हें तेसरी बेज्जती किती होर तेसरा मूंड पुआड़ी दितेया। 5फेरी तिन्हें एक होर नौकर भेज्या, होर तिन्हें से मुकाई दितेया; तेबे तिन्हें होर भी बौह्त नौकर भेजे; तिन्हा मन्झा ले तिन्हें कितने पिटे, होर कितने मुकाई दिते।

6ऐबे माल्का वाले तेसरा प्यारा मह्ठा ही बचिरा था; जेस जो भेजी सके, सभी ले बादा मन्झ तिन्हें से भी तिन्हा वाले ये सोची किन्हें भेजी दितेया कि, तिन्हा मेरे बेटे री इज्जत ज्रूर करणी।

7पर तिन्हें किसाने आपु मन्झ बोल्या; येई ता वारीस आ; आऊआ, एस जो मुकाई देहां ऐं, तेबे ये जमीन-जायदाद आस्सा री हुई जाणी। 8होर तिन्हें से पकड़ी किन्हें मारी दितेया, होर अंगूरा रे बगीचे ले बाहर सट्टी दितेया।

9यीसूए पूछेया “एता कठे ऐबे अंगूरा रे बगीचे रे माल्का क्या करणा? तेस आई किन्हें स्यों किसान मुकाई देणे, होर अंगूरा रा बगीचा होरी किसाना जो ठेके पर देई देणा। 10तुस्से ये जाणहां ऐं कि पवित्र सास्त्रा मन्झ ये लिखिरा:

‘कि जेस पात्थरा जो मिस्त्रिये बेकार जाणेया,

सेई कुणे रा खास पात्थर बणी गया;

11ये परमेसर री तरफा ले हुआ,

होर ये देखी किन्हें आस्सा जो हरानी हुंहाँ ईं!’”#12:11 भज. 118:23

12तेबे सारे यहूदी अगुवे से पकड़ना चाहेया; क्यूंकि स्यों समझी गईरे थे कि, ये उदाहरण तिन्हें तिन्हारे बरखलाफ बोल्या: होर स्यों ई यीसू री काह्णी मन्झ दुस्ट किसान थे: पर स्यों लोका ले डरहा ऐं थे, होर स्यों तेस जो छाडी किन्हें चली गये।

महाराजे जो कर देणा

(मत्ती 22:15-22; लूक. 20:20-26)

13कुछ टैमा बाद यहूदी अगुवे, फरीसी लोक होर राजा हेरोदेसा रा साथ देणे वाल़े लोक भेजे जो यीसू जो तेसरी ई गल्ला मन्झ फसाए ताकि स्यों तेस जो पकड़ी सके। 14होर से आई किन्हें यीसू किन्हें बोल्या, “हे गुरू, आस्से जाण्हां ऐं कि, तू सच्चा आ, होर केसी री परवाह नी करदा। क्यूंकि तू माह्णुं रा मुंह देखी किन्हें गल्ला नी करदा, पर परमेसरा री गल्ला सच्चाई किन्हें स्खाहां। क्या महाराजे#12:14 कैसर जो कर देणा ठीक आ कि, नी? 15आस्से देईऐ कि नी?”

तिन्हें तिन्हारा पाखंड जाणी किन्हें तिन्हा किन्हें बोल्या, “मुंजो किधियो परखदे लगिरे? एक सिक्के जो मेरे वाले लई आऊआ कि, हांऊँ देखूं।” 16होर स्यों लई आये, होर तिन्हें तिन्हा किन्हें बोल्या, “ये सिक्के मन्झ रूप होर नांऊँ केसरा?” तिन्हें बोल्या, “ये रूप होर नांऊँ महाराजे रा।”

17यीसूए तिन्हा किन्हें बोल्या, “जो महाराजे रा आ, से महाराजे जो देआ, होर जो परमेसरा रा आ, से परमेसरा जो देआ।” तेबे यीसू री गला सुणी किन्हें स्यों हरान हुए गई।

मरिरे मन्झा ले जी ऊठणा होर ब्याह

18फेरी सदूकी लोक जो यहूदी थे स्यों एह्ड़ा बोल्हा ऐं थे कि, मरणे वाले रा जी उठणा नी हुंदा, होर स्यों यीसू वाले आई किन्हें पुछदे लगे। 19कि “हे गुरू,” “मूसा जेह्ड़ी आस्सा रे कठे व्यवस्था लिखीरी कि, अगर केसी रा भाई बगैर बच्चे ही मरी जाए, होर तेसरी लाड़ी पीछे रही जाए, ता तेसरा भाई तेसरी लाड़ी किन्हें ब्याह करी ले होर आपणे भाई रे कठे बच्चे पैदा करहे।#12:19 उत्प. 38:8, व्य. 25:5 20उदाहरणा कठे सात भाई थे, पैहला भाई ब्याह करी किन्हें बगैर बच्चे मरी गया। 21तेबे दूजे भाईऐ भी तेस्सा किन्हें ब्याह करी लितेया होर से भी बगैर बच्चे मरी गया; होर तिहां ईं त्रीजे भी। 22होर साता रे सात भाईया री कोई बच्चा नी हुई; बादा मन्झ से ज्नाने भी मरी गयी। 23मरिरे मन्झ ले जी उठणा ले बाद तिन्हा मन्झा ले से केसरी लाड़ी हूणीं? क्यूंकि से साता रे सात भाईया री लाड़ी हुई चुकीरी थी।”

24यीसूए तिन्हा किन्हें बोल्या, “तुस्सा री गलती येई कि तुस्से पवित्र सास्त्रा जो होर परमेसरा री सामर्था जो नी जाण्दे, 25क्यूंकि जेबे तिन्हा मरिरे मन्झा ले जी ऊठणा, ता तिन्हा मन्झ ब्याह नी हूणे, पर स्वर्गा मन्झ तिन्हा स्वर्गदूता साहीं हूंणां, जेह्ड़े ब्याह नी करदे। 26जेथी तक मरिरे मन्झा ले जी ऊठणे रा सुआल आ, क्या तुस्से मूसा नबी री कताबा मन्झ भखी रे झाकड़ा रे बारे मन्झ नी पढ़ेया कि, परमेसरे तेस किन्हें बोल्या, ‘हांऊँ अब्राहमा रा परमेसर, होर इसहाका रा परमेसर, होर याकूबा रा परमेसर आ’ (इन्हा जो मरिरे कई साल हुई गईरे फेरी भी परमेसर आपणे आपा जो इन्हारा परमेसर बोल्हा। क्यूंकि परमेसर इन्हा जो मरिरा नी पर जिउंदा समझा।) 27से मरिरे रा परमेसर नी आ, पर जिउंदे रा परमेसर आ, तुस्से विस्वास नी करी किन्हें बड़ी बडी गलती कितिरी।”

सभी ले बडा हुक्म

(मत्ती 22:34-40; लूक. 10:25-28)

28होर व्यवस्था स्खाणे वाल़े आ मन्झा ले एकिये आई किन्हें सदूकी लोका जो यीसू साउगी बैहस करदे सुणेया, होर ये जाणी किन्हें कि यीसूए तिन्हा जो बौह्त खरे तरीके किन्हें जवाब दितेया, तिन्हें यीसू ले पूछेया, “सभ हुक्मा ले खास हुक्म कुण जे आ?”

29यीसूए तेस जो जवाब दितेया, “सभ हुक्मा मन्झा ले खास हुक्म ये आ कि: ‘हे इस्राएल देसा रे लोको सुणा, सिर्फ आस्सा रा प्रभु परमेसर ई एकमात्र परमेसर आ। 30होर तू आपणे प्रभु परमेसरा किन्हें आपणे सारे मना ले, होर आपणे प्राणा ले, होर आपणी सारी बुद्धि ले, होर आपणी सारी सक्ति ले प्यार रख्या।’ 31होर दूजा हुक्म ये आ कि, ‘तू आपणे पड़ोसी किन्हें आपणे साहीं प्यार रख्या।’ एता ले बडा होर कोई हुक्म नी आ।”#12:31 लैव्य. 19:18

32व्यवस्था स्खाणे वाल़े ये तेस किन्हें बोल्या, “हे गुरू, बौह्त बढ़िया!” तैं ठीक बोल्या कि, परमेसर एक ई आ, होर तेसरे अलावा होर कोई परमेसर नी आ।#12:32 यसा. 45:18, व्य. 4:35 33होर तेस किन्हें सारे मन, होर सारी बुद्धि, होर सारे प्राण, होर सारी सक्ति किन्हें प्यार रखणा; होर तू आपणे पड़ोसी किन्हें आपणे साहीं प्यार रख्या, एह्ड़ा करना डांगरेया री बलि देणे होर दान चढ़ाणे ले बढ़ी किन्हें आ।#12:33 व्य. 6:4-5, लैव्य. 19:18, होसे 6:6

34जेबे यीसूए देख्या कि तिन्हें समझदारी किन्हें जवाब दितेया, इधी कठे यीसूए तेस किन्हें बोल्या, “तू परमेसरा रे राजा ले दूर नी आ।” होर फेरी केसी जो तेस ले कुछ होर पूछणे री हिम्मत नी हुई।

मसीह केसरा मह्ठा आ

(मत्ती 22:41-46; लूक. 20:41-44)

35फेरी यीसूए मन्दरा मन्झ उपदेस देंदे हुए बोल्या कि, व्यवस्था स्खाणे वाल़े रा मतलब क्या आ जेबे स्यों बोल्हा ऐं कि, मसीह राजा दाऊदा रा मह्ठा? 36क्यूंकि राजा दाऊदे आप्हुए पवित्र आत्मा री सामर्थ रे ज्रीए मसीह रे बारे मन्झ बोल्या कि:

परमेसरे मेरे प्रभु किन्हें बोल्या, मेरी सीधी तरफ बैठ,

जेबे तक कि हांऊँ तेरे सब दुस्मणा जो पूरी तरहा ले हराई नी देऊँ।

37राजा दाऊद ता आपु ई मसीह जो मेरा प्रभु बोल्हा आ, फेरी से तेसरा मह्ठा केथी ले हुआ? होर भीड़ा रे लोके तेसरी गल्ला खुसी किन्हें सुणी।

व्यवस्था स्खाणे वाल़े ले चतन्न

(मत्ती 23:1-36; लूक. 20:45-47)

38यीसूए आपणे उपदेसा मन्झ तिन्हा किन्हें बोल्या, “व्यवस्था स्खाणे वाल़े ले चतन्न रैहया, जो आपणे लम्बे चोगे पैन्ही किन्हें घुमणा होर बजारा मन्झ नमस्कार पाणा पसंद करहा ऐं। 39होर यहूदी सभा मन्झ खास जगहा पर बैठणा होर धामा मन्झ आदर देणे वाली जगहा पाणे री चाह रख्हा ऐं। 40स्यों विधवा जो ठगी किन्हें तिन्हारे घर-बार होर जायदाद आपणे कठे लई लैहां ऐं, होर दिखावे रे कठे बड़ी देरा तक प्रार्थना करदे रैंहयां ऐं, इन्हा लोका जो कड़ी सजा मिलणी।”

गरीब विधवा रा दान

(लूक. 21:1-4)

41होर यीसूए मन्दरा रे दान पात्रा रे साम्हणें बैठी किन्हें देख्या करहा था कि, लोक किहाँ दान पात्रा मन्झ दान पाहें, होर कई अमीर लोके बौह्त सारा धन पाया। 42इतने मन्झ एक गरीब विधवे आई किन्हें ताम्बे रे दो छोटे सिक्के पाये।

43तेबे तिन्हें आपणे चेले जो नेडे सादी किन्हें तिन्हा किन्हें बोल्या, “हांऊँ तुस्सा किन्हें सच्च बोल्हा कि, मन्दरा रे दान पात्रा मन्झ सभी ले ज्यादा दान देणे वाली ये विधवा ई। 44क्यूंकि सभिऐ आपणे धना री बढ़ती री वजहा ले दान दितेया, एस्से विधवे आपणे जीणे रे कठे जो कुछ तेस्सा वाले था से सभ तेस्से दान पात्रा मन्झ पाई दितेया।”

Currently Selected:

मरकुस 12: MJLNT

Highlight

Copy