मत्ती 9
9
अध्रन्गा रे ब्मारा जो ठीक करणा
(मरकु. 2:1-12; लूक. 5:17-26)
1फेरी यीसू होर तेसरे चेले वापस किस्ती पर बैठी किन्हें समुद्रा रे पारली वखा जो चली गये, से आपणे गांऊँ कफरनहूमा गांऊँआं जो आई गया। 2होर कुछ लोके एक अध्रन्गा रा मरीज सण बिस्त्रे यीसू वाले ल्यान्देया, यीसूए तिन्हारा विस्वास देखी किन्हें अध्रन्गा रे मरीजा किन्हें बोल्या, हे “मेरे मह्ठे, हिम्मत रख; मैं तेरे पाप माफ करी दिते।”
3होर कई व्यवस्था स्खाणे वाल़े ये सोच्या कि, “ये ता परमेसरा री निंदा करेया करहा।” 4यीसूए तिन्हारी मना री गल्ला जाणी किन्हें बोल्या कि, “तुस्से लोक आपणे-आपणे मना मन्झ बुरा विचार किधियो करेया करहा ऐं? 5असान क्या आ, ये बोलणा कि, ‘तेरे पाप माफ हुई गये’ या ये बोलणा कि, ‘उठ आपणा बिस्त्रा चक होर हांडदा लग।’ 6ताकि हांऊँ तुस्सा जो साबित करी सकूं कि हांऊँ माह्णुं रा मह्ठा धरती पर पाप माफ करणे रा हक रख्हा आ।” यीसूए तेस अध्रन्गा रे मरीजा किन्हें बोल्या, “उठ, आपणा बिस्त्रा चक होर हांडदा लग, होर आपणे घरा जो चली जा।” 7से माह्णुं उठी किन्हें आपणे घरा जो चली गया। 8लोक ये देखी किन्हें डरी गये होर परमेसरा री महिमा करदे लगे कि कुने माह्णुंऐ एस जो एह्ड़ा करणे रा हक दितिरा।
मत्ती रा सादेया जाणा
(मरकु. 2:13-17; लूक. 5:27-32)
9तेथी ले अगे बढ़ी किन्हें यीसूए मत्ती नांऊँआं रे एक माह्णुं जो, चुंगी री चौकी पर बैठिरे देख्या, होर तिन्हें तेस किन्हें बोल्या, “मेरा चेला बण।” होर से उठी किन्हें, यीसू रा चेला बणने रे कठे तेस साउगी चली गया।
10फेरी एह्ड़ा हुआ जेबे यीसू मती रे घरा मन्झ खाणा खांदे बैठिरा था, ता बौह्त चुंगी लैणे वाल़े होर जिन्हा जो लोक पापी बोल्हा ऐं आई किन्हें यीसू होर तेसरे चेले साउगी खाणा खांदे लगे। 11ये देखी किन्हें फरीसी लोके तेसरे चेले किन्हें बोल्या, “तुस्सा रा गुरू चुंगी लैणे वाल़े होर पापिया साउगी खांहां पीहां!”
12यीसूए ये सुणी किन्हें तिन्हा किन्हें बोल्या, “भले चंगे जो बैदा री ज्रूरत नी ई, पर ब्मारा जो बैदा री ज्रूरत ई। 13इधी कठे तुस्से जाई किन्हें एता रा मतलब सीखी लऊआ कि, हांऊँ बलिदान नी पर अनुग्रह चाहां; क्यूंकि जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं।”#9:13 होसे 6:6
यहून्ना बपतिस्मा देणे वाल़े रे चेले रा ब्रता पर सुआल
(मरकु. 2:18-22; लूक. 5:33-39)
14होर एक ध्याड़े यहून्ना बपतिस्मा देणे वाल़े रे चेले यीसू वाले आई किन्हें बोल्या, “क्या वजहा ई कि आस्से होर फरीसी लोक ब्रत करहा ऐं, पर तेरे चेले ब्रत नी करदे?”
15यीसूए तिन्हा किन्हें बोल्या, “जेबे तक नंऊँआं लाड़ा बरातिया साउगी आ स्यों दुःखी बिलकुल नी हुई सक्दे। पर एह्ड़े ध्याड़े आऊणें कि, नंऊँआं लाड़ा तिन्हा ले लग कितेया जाणा, तेस टैम तिन्हा ब्रत रखणा। 16नंऊँऐं कपड़े री टाल्ही पुराणे कपड़े पर कोई नी ल्गान्दा नी ता धोणे ले बाद नंऊँऐं कपड़े री टाल्हिया कठी हुई जाहीं, होर तेस कपड़े ज्यादा फटी जाणा। 17होर कोई नंऊँआं अंगूरा रा रस पुराणे चामड़े रे थैलूया मन्झ नी भरदा, क्यूंकि एह्ड़ा करणे ले चामड़े रे थैलू फटी जाहाँ, होर अंगूरा रा रस खिंडही जाहाँ होर चामड़े रे थैलू रा भी नास हुई जाहाँ, पर नंऊँआं अंगूरा रा रस नौंईं चामड़े रे थैलू मन्झ भरहा ऐं होर स्यों दुहें बची रहें।”
मरीरी मह्ठी जिउंदी हुई जाणा होर ब्मार ज्नाने
(मरकु. 5:21-43; लूक. 8:40-56)
18यीसू तिन्हा किन्हें यूँआं गल्ला करेया ई करहा था कि, एक यहूदी सभा रे मुखिये आई किन्हें तेसरे पैरा पर पई गया होर बोल्या, “मेरी मह्ठी ऐबे-ऐबे मरी; पर तुस्से चली किन्हें तेस्सा जो छुही ले, ता तेस्सा जिउंदी हुई जाणा।”
19यीसू उठी किन्हें आपणे चेले साउगी तेसरे पीछे चली गया। 20-21होर एक ज्नाने जेस्सा जो बारा साला ले खून बैहणे री ब्मारी थी, से आपणे मना मन्झ बोल्हा ई थी कि, “अगर हांऊँ तेसरे कपड़े छुही लैन्घी, ता मां ठीक हुई जाणा।” होर तेस्से तेसरे पीछे आई किन्हें तेसरे कपड़े छुही लये।
22यीसूए मुड़ी किन्हें से देखी होर बोल्या, मह्ठीऐ हिम्मत रख, तैं विस्वास कितेया कि हांऊँ तुजो ठीक करी सक्हा, इधी कठे तू ठीक हुई। होर से ज्नाने तेस ई टैम ठीक हुई गई।
23जेबे यीसू तेस यहूदी सभा रे मुखिये रे घरा पूज्या ता तिन्हें बंसरी बजाणे वाल़े होर हाला पाणे वाली भीड़ देखी। 24तेबे यीसूए तिन्हा किन्हें बोल्या, “हटी जाऊआ, मह्ठी नी मरीरी, पर सुत्तिरी।” ये सुणी किन्हें तेथी बैठिरे रे लोक हास्दे लगे। 25पर जेबे भीड़ बाहर निख्ली गई, ता यीसूए अंदर जाई किन्हें मह्ठी रा हाथ पकड़ेया, होर से जिउंदी हुई किन्हें बैठी गई। 26ये गल सारे ईलाके मन्झ फैल्ही गई।
दो काणे माह्णुंआं रा ठीक हूंणा
27जेबे यीसू तेस म्ह्ठी रे घरा ले निकल्या, ता दो काणे तेसरे पीछे ये बोल्दे हुए चले कि, “हे राजा दाऊद रे मह्ठे (यीसू दाऊदा रे बंसा रा था), आस्सा पर दया कर।” 28जेबे से घरा पूजी गया, ता स्यों काणे तेस वाले आये, होर यीसूए तिन्हा किन्हें बोल्या, “क्या तुस्सा जो विस्वास आ कि, हांऊँ तुस्सा जो ठीक करी सक्हा?” तिन्हें तेस किन्हें बोल्या, “हां प्रभु, आस्से विस्वास करहा ऐं कि तू आस्सा जो ठीक करी सक्हा।” 29तेबे यीसूए तिन्हारी हाखिया छुही किन्हें बोल्या, “क्यूंकि तुस्से विस्वास कितेया इधी कठे तुस्सा ठीक हुई जाणा।” 30होर स्यों झटपट देखदे लगे होर यीसूए तिन्हा जो खबरदार करी किन्हें बोल्या, “केसी के देख्या बोलदे कि मैं तुस्सा रे कठे क्या कितरा।” 31पर तिन्हें निकली किन्हें सारे ईलाके मन्झ तेसरा नांऊँ फैल्हाई दितेया।
एक टाटा रा बोलणा
32जेबे स्यों दो काणे घरा ले बाहर जाया करहा ऐं थे, ता लोके एक टाटा तेस वाले ल्यान्देया, जेस मन्झ जे दुस्टात्मा थी। 33होर जेबे यीसूए दुस्टात्मा काढी दिती ता टाटा बोल्दा लगया, होर भीड़ हरान हुई किन्हें बोल्दी लगी कि, “इस्राएल देसा मन्झ कधी एह्ड़ा नी देख्या गया।” 34पर फरीसी लोके बोल्या, “सैतान दुस्टात्मा रा मुखिया आ से तेसरे सहारे दुस्टात्मा काढा आ।”
मजदूरा जो भेजणे रे कठे अर्ज
35तेबे यीसू होर तेसरे चेले गलील जिल्ले रे कई गांऊँआं ले हुई किन्हें गये होर यीसू यहूदी सभा मन्झ उपदेस देंदा, होर परमेसरा रे राजा री खुसी री खबर प्रचार करदा, होर कई किस्मा री ब्मारी होर कमजोरी जो दूर करदा रैहया। 36जेबे तिन्हें भीड़ देखी ता तेबे तेस जो लोका पर तरस आया, क्यूंकि स्यों तिन्हा भेडा साहीं थे जिन्हारा जे कोई पुहाल नी हुंदा, स्यों दुःखी होर भटकीरे थे। 37तेबे यीसूए आपणे चेले किन्हें बोल्या, “पक्किरी फसल ता बौह्त ई पर काम करणे वाल़े मजदूर थोह्ड़े ऐं। 38इधी कठे फसला रे माल्का ले अर्ज करा कि स्यों फसल कटाई रे कठे मजदूर भेजी दे।”
Currently Selected:
मत्ती 9: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
