मत्ती 4

सैताना रे ज्रीए यीसू री परखणी

(मरकु. 1:12-13; लूक. 4:1-13)

1तेबे पवित्र आत्मा यीसू जो बियाबान जगहा मन्झ लई गया ताकि सैताना ले तेसरी परखणी हो। 2से चाली ध्याड़े, होर चाली रात, बगैर खाधे पिते रैहया, बादा मन्झ तेस जो भूख लगी।#4:2 निर्ग. 34:28 3तेबे परखणे वाल़े सैताने तेस वाले आई किन्हें बोल्या, “अगर तू परमेसरा रा मह्ठा आ, ता एतो साबित करणे रे कठे इन्हा पात्थरा जो रोटी बणने रा हुक्म दे ताकि तू खाई सके।” 4यीसूए जवाब दितेया, “पवित्र सास्त्र मन्झ लिखिरा कि:

‘माह्णुं सिर्फ रोटीया ले ई नी,

पर हर एक बचना ले जो परमेसरा रे मुंहा ले निकल्हा जिउंदा रैंह्णां।’”

5तेबे सैताने यीसू पवित्र सैहरा यरुस्लेम मन्झ लई जाई किन्हें मन्दरा री चोटी पर खड़ा करी दितेया। 6होर तिन्हें यीसू किन्हें बोल्या, “अगर तू परमेसरा रा मह्ठा आ, ता एतो साबित करणे रे कठे आपणे आपा जो एथी ले हेठा जो सट्टी दे होर तुजो चोट नी लगणी क्यूंकि, परमेसरे पवित्र सास्त्र मन्झ ये लिखिरा कि:

‘तेस तेरे बारे मन्झ आपणे स्वर्गदूता जो हुक्म देणा, होर तेस तुस्से हाथो-हाथ चकी लैणे;

केते एह्ड़ा नी हो कि तेरे पैरा जो पात्थरा किन्हें चोट लगे।’”#4:6 भज. 91:11-12

7यीसूए तेस किन्हें बोल्या, “पवित्र सास्त्र मन्झ ये भी लिखिरा आ कि, ‘तू प्रभु आपणे परमेसरा री परखणी मत कर।’”#4:7 व्य. 6:16 8फेरी सैतान तेस जो एक उचे प्हाड़ा पर लई गया होर तेस जो सारे संसारा रे सारे राज होर तिन्हारी सान दसी। 9तेबे सैताने यीसू किन्हें बोल्या, “कि अगर तू मुंहा रे भारे पई किन्हें मेरी अराधना करहे, ता मां ये सब कुछ तुजो देई देणा।” 10तेबे यीसूए तेस किन्हें बोल्या, “हे सैतान दूर हुई जा, क्यूंकि पवित्र सास्त्र मन्झ लिखिरा कि: ‘तू प्रभु आपणे परमेसरा री अराधना कर, होर सिर्फ तेसरी सेऊआ कर।’”#4:10 व्य. 6:13

11तेबे सैतान तेस वाले ले चली गया, होर स्वर्गदूत आई किन्हें तेसरी सेऊआ करदे लगे।

गलील जिल्ले मन्झ यीसू री सेऊआ

(मरकु. 1:14-15; लूक. 4:14,15,31)

12जेबे यीसूए ये सुणेया कि यहून्ना बपतिस्मा देणे वाल़ा गिरफ्तार करी लितिरा। ता से यहूदी जिल्ले जो छाडी किन्हें फेरी गलील जिल्ले जो चली गया। 13होर यीसू पैहले नासरत गांऊँआं जो गया होर तेथी ले कफरनहूम सैहरा मन्झ जाई किन्हें रैहंदा लग्या, जो गलील समुद्रा रे बाढे पर आ, जेथी जबूलून होर नप्ताली गोत्रा रे लोक रैंहयां ऐं थे। 14ताकि जेह्ड़ा जे यसायाह नबी रे ज्रीए बोल्या गईरा था, से पूरा हो।

15“जबूलून होर नप्ताली गोत्रा रे ईलाके मन्झ रैहणे वाले लोक,

जेह्ड़े गलील समुद्रा रे बाढे मन्झ, यरदन दराऊआ रे पारा,

यानि गलील जिल्ले मन्झ रैहणे वाले गैर-यहूदी लोक।

16जो लोक नह्यारे मन्झ रहें थे तिन्हें बडी ज्योति देखी;

होर जो लोक तेस जगहा मन्झ रहें थे, जेथी हमेसा मौता रा खतरा हुंहाँ था,

तिन्हा पर प्रयासा चमक्या।”

17तेस टैमा ले यीसूए प्रचार करणा होर ये बोलणा सुर्हू कितेया कि, “पाप करणा छाडी देआ क्यूंकि स्वर्गा रा राज नेडे आई गईरा।”

पैहले चेले रा सादेया जाणा

(मरकु. 1:16-20; लूक. 5:1-11; यहू. 1:35-42)

18तिन्हें गलील समुद्रा रे बाढे फिरदे हुए समौन जो, जेस्जो जे पतरस बी बोल्हा ऐं, होर तेसरे भाई अन्द्रियासा जो समुद्रा मन्झ जाल पांदे देख्या, क्यूंकि स्यों मछी पकड़ने वाल़े थे। 19होर यीसूए तिन्हा किन्हें बोल्या, “मेरे चेले बणा, होर आऊआ मां तुस्से स्खाणे कि चेले किहाँ बनाणे।” 20होर स्यों झटपट जाल छाडी किन्हें तेसरे चेले बणने रे कठे तेस साउगी चली पये।

21फेरी तिन्हें थोह्ड़ा अगे जाई किन्हें, जब्दी रे मह्ठे याकूब होर तेसरे भाई यहून्ना जो तेसरे बापू साउगी किस्तिया पर जाल ठीक करदे देख्या; होर तिन्हें स्यों भी सादे। 22स्यों झटपट आपणा बापू होर किस्ती जो छाडी किन्हें यीसू साउगी चली गये।

यीसू रे ज्रीए ब्मारा जो ठीक करणा

(लूक. 6:17-19)

23होर यीसू सारे गलील जिल्ले मन्झ फिरदा हुआ तिन्हारी यहूदी सभा मन्झ उपदेस देंदा होर परमेसरा रे राजा री खुसी री खबर प्रचार करदा, होर लोका जो हर किस्मा री ब्मारी होर कमजोरी जो दूर करदा रैहया। 24होर गलील जिल्ले रे उत्तरा रे सीरिया ईलाके तक तेसरा नांऊँ फैल्ही गया; होर लोक सभ ब्मार माह्णुंआं जो जेह्ड़े कई किस्मा री ब्मारिया होर दुःखा मन्झ जकड़ीरे थे, होर जिन्हा मन्झ दुस्टात्मा थी होर मिर्गी वाल़े होर अध्रन्गा रे ब्मार जो तेस वाले लई आये होर तिन्हें स्यों सभ ठीक करेया किते। 25होर गलील जिल्ले, दिकापुलिस (दस सैहर), यरुस्लेम सैहर, यहूदिया ईलाके, होर यरदन दराऊआ रे पारा वखा री एक बडी भीड़ तेसरे साउगी चली पई।

Currently Selected:

मत्ती 4: MJLNT

Highlight

Copy