मत्ती 22

ब्याह री धामा रा उदाहरण

(लूक. 14:15-24)

1एता पर यीसू दबारा तिन्हा किन्हें उदाहरणा मन्झ बोल्दा लग्या। 2“स्वर्गा रा राज एस उदाहरणा साहीं आं। एक राजे आपणे मह्ठे रा ब्याह कितेया। 3होर तिन्हें आपणे सेऊआदार भेजे, ताकि स्यों सादिरे लोका जो ब्याहा री धामा मन्झ सादे, पर तिन्हें आऊंणा नी चाहेया। 4फेरी तिन्हें होर कई सेऊआदार ये बोली किन्हें भेजे कि, सादिरे लोका किन्हें बोला, ‘हांऊँ धाम त्यार करी चुकिरा, होर मेरे बोल्ह्द होर पाली रे पसु धामा रे कठे काटी जाई चुकिरे, होर सभ कुछ त्यार आ, ब्याह री धामा मन्झ आऊआ।’ 5पर तिन्हें ब्याह मन्झ आऊंणा नी चाहेया। होर कोई आपणी डोहर्रिया जो चली गया, कोई आपणे व्यापारा जो चली गये। 6होर बाकि बचिरे लोके राजे रे सेऊआदार पकड़े होर तिन्हारी बेज्जती किती होर स्यों मारी दिते। 7तेबे राजे ये सुणेया ता राजे जो गुस्सा आया, होर तिन्हें आपणी सेना भेजी किन्हें तिन्हा हत्यारे रा नास करी दितेया, होर तिन्हारे गांऊँ फूकी दिते। 8तेबे राजे आपणे बाकि सेऊआदार किन्हें बोल्या, ‘ब्याहा रा धामा ता त्यार आ, पर सादिरे रे लोक लायक नी ठैहरे। 9इधी कठे चौराहे पर जाऊआ, होर जितने लोक तुस्सा जो मिले, सभी जो ब्याह री धामा मन्झ सादा।’ 10तेबे तिन्हें सेऊआदार सड़का पर जाई किन्हें बुरे लोक, खरे लोक, जितने लोक मिले, सभ कठ किते, होर ब्याहा रा घर प्रौह्णे किन्हें भर्ही गया।”

11“जेबे राजा प्रौह्णे जो देखणे रे कठे अंदर आया, ता तिन्हें तेथी एक माह्णुं देख्या, जिन्हें स्यों कपड़े नी पैहनीरे थे जेह्ड़े ब्याह मन्झ आईरे प्रौह्णेया जो पैन्ह्णे रे कठे दितरे थे। 12राजे तेस ले पूछेया, ‘हे दोस्त; तू ब्याहा रे कपड़े पैहने बगैर एथी किधियो आईरा?’ होर से चुप रेहा होर कुछ नी बोल्या। 13तेबे राजे आपणे सेऊआदारा किन्हें बोल्या, ‘एसरे हाथ पैर बान्ही किन्हें एस जो बाहर नह्यारे मन्झ सट्टी देआ, तेथी रोणा होर दांत पिसणा हुणा।’ 14क्यूंकि सादे गईरे ता बौह्त ऐं पर चुणिरे थोह्ड़े ऐं।”

महाराजे जो कर देणा

(मरकु. 12:13-17; लूक. 20:20-26)

15तेबे फरीसी लोके जाई किन्हें आपु मन्झ सलाह किती कि, तेस जो किहाँ गल्ला मन्झ फसाए। 16होर तिन्हें राजा हेरोदेसा रा साथ देणे वाल़े लोका साउगी आपणे कुछ चेले तेस वाले ये बोलणे रे कठे भेजे कि, “हे गुरु, आस्से जाणहां ऐं कि, तू सच्चा आ, होर परमेसरा री गल्ला सच्चाई किन्हें स्खाहां, होर केसी री परवाह नी करदा। क्यूंकि तू माह्णुं रा मुंह देखी किन्हें गल्ला नी करदा। 17इधी कठे तू आस्सा जो दस कि तू क्या समझ्हा, महाराजे जो कर देणा ठीक आ कि नी?”

18यीसूए तिन्हारी दुस्टता जाणी किन्हें बोल्या, “हे पाखंडियो, मुंजो किधियो परखदे लगिरे? 19चुंगी देणे रा रोम देसा रा सिक्का मुंजो दसा।” तेबे स्यों तेस वाले एक सिक्का लई आये, जेसरी कीमत एक ध्याड़े री मजदूरी रे बराबर ई। 20यीसूए तिन्हा किन्हें बोल्या, “ये सिक्के मन्झ रूप होर नांऊँ केसरा?” 21तिन्हें यीसू किन्हें बोल्या, “ये रूप होर नांऊँ महाराजे रा।” तेबे यीसूए तिन्हा किन्हें बोल्या, “जो महाराजे रा आ, से महाराजे जो देआ, होर जो परमेसरा रा आ, से परमेसरा जो देआ।” 22ये सुणी किन्हें स्यों हरान हुए, होर स्यों तेस जो छाडी किन्हें चली गये।

जी उठणा होर ब्याह

(मरकु. 12:18-27; लूक. 20:27-40)

23तेस ई ध्याड़े, कुछ सदूकी लोक बोल्हा ऐं कि मरणे वाल़े रा जी उठणा नी हुंदा, स्यों यीसू वाले आये, होर तिन्हें तेस ले पूछेया कि, 24“हे गुरु, मूसे नबिये बोलिरा था कि, अगर केसी रा भाई बगैर बच्चे मरी जाए, होर तेसरी लाड़ी पीछे रही जाए, ता तेसरा भाई तेसरी लाड़ी किन्हें ब्याह करी ले होर आपणे भाई रे कठे बच्चे पैदा करहे। 25उदाहरणा रे कठे, सात भाई थे, पैहला भाई ब्याह करी किन्हें मरी गया, होर बच्चे नी हूंणे री वजहा ले तेसरे भाईये तेसरी लाड़ी किन्हें ब्याह करी लेया। 26इंहां ईं दूजे होर त्रीजे भाईये भी कितेया, होर साता रे सात भाईया तक एह्ड़ा ई हुआ। 27सभी ले बादा मन्झ से ज्नाने भी मरी गई। 28मरिरे मन्झा ले जी उठणा ले बाद, से जन्नानी तिन्हा साता भाईया मन्झा ले केसरी लाड़ी हूणीं?”

29यीसूए तिन्हा जो जवाब दितेया कि, “तुस्से पवित्र सास्त्र होर परमेसरा री सामर्थ नी जाणदे, होर ये ही तुस्सा री गलती ई। 30क्यूंकि जिउंदे हूंणे पर ब्याह सादी नी हूणीं, पर तिन्हा स्वर्गा मन्झ परमेसरा रे स्वर्गदूता साहीं हूंणां। 31पर मरिरे मन्झा ले जिउंदे हूंणे रे बारे मन्झ क्या तुस्से ये बचन नी पढ़ेया जो परमेसरे तुस्सा किन्हें बोल्या। 32कि हांऊँ अब्राहमा रा परमेसर, होर इसहाका रा परमेसर, होर याकूबा रा परमेसर आ? से मरिरे या रा परमेसर नी आ, पर जिउंदेया रा परमेसर आ।” 33ये सुणी किन्हें लोक तेसरे उपदेसा ले हरान हुए।

सभी ले बडा हुक्म

(मरकु. 12:28-34; लूक. 10:25-28)

34जेबे फरीसी लोके सुणेया कि, यीसूए सदूकी लोका रा मुंह बन्द करी दितेया; ता स्यों कठे हुये। 35होर तिन्हा मन्झा ले एकी व्यवस्था स्खाणे वाल़े परखणे रे कठे, तेस ले पूछेया। 36“हे गुरु, मूसा री व्यवस्था मन्झ कुण जे हुक्म बडा आ?” 37यीसूए तेस किन्हें बोल्या, “तू परमेसर आपणे प्रभु साउगी आपणे सारे मन होर आपणे सारे प्राण होर आपणे सारी बुद्धि किन्हें प्यार रख। 38बडा होर खास हुक्म ता येई आ। 39होर तेस साहीं ये दूजा हुक्म भी हाया कि, तू आपणे पड़ोसी किन्हें आपणे साहीं प्यार रख। 40येई दो हुक्म सारी मूसा री व्यवस्था होर नबिया रा आधार आ।”

मसीह केसरा मह्ठा?

(मरकु. 12:35-37; लूक. 20:41-44)

41जेबे फरीसी लोक कठे थे, यीसूए तिन्हा ले पूछेया कि, 42“मसीह रे बारे मन्झ तुस्से क्या समझ्हा ऐं? से केसरा मह्ठा?” तिन्हें तेस किन्हें बोल्या, “राजा दाऊदा रा मह्ठा।” 43तिन्हें तिन्हा ले पूछेया, “ता राजा दाऊदे आत्मा मन्झ हुई किन्हें तेस जो प्रभु कि बोल्हा आ कि,

44‘प्रभुए, मेरे प्रभु किन्हें बोल्या,

मेरे सीधी तरफ बैठ,

जेबे तक कि हांऊँ तेरे सभ दुस्मणा जो हराई नी दूं।

तेबे तक तू मेरी सीधी तरफ बैठिरे रैह होर आदर पा।’

45जेबे राजा दाऊद तेस जो प्रभु बोल्हा, ता से तेसरा मह्ठा किहाँ बणेयां?” 46कोई भी तेसरे जवाबा मन्झ एक भी गल नी बोली सकेया, पर तेस ध्याड़े ले केसी जो तेस ले कुछ होर पूछणे री हिम्मत नी हुई।

Currently Selected:

मत्ती 22: MJLNT

Highlight

Copy