लूका 11
11
चेलेया जो प्रार्थना करणा सिखाणा
(मत्ती 6:9-13)
1फेरी यीसू एक जगहा प्रार्थना करेया करहा था: होर जेबे से प्रार्थना करी चुक्केया, ता तेसरे चेले मन्झा ले एकिये तेस किन्हें बोल्या, “हे प्रभु, जिहां यहून्ना बपतिस्मा देणे वाल़े आपणे चेले जो प्रार्थना करणा स्खाई तिहां ईं आस्सा जो भी तुस्से स्खाई दे।” 2यीसू तिन्हा किन्हें बोल्या, “जेबे तुस्से प्रार्थना करो, ता एह्ड़ा बोलणा;
‘हे आस्सा रे बापू, तुस्सा रा नांऊँ पवित्र मन्या जाए,
तुस्सा रा राज्य आये।
3आस्सा री हर ध्याड़े री रोटी आस्सा जो देआ कर।
4होर आस्सा रे पाप माफ करी दे, क्यूंकि आस्से भी आपणे हर एक गुन्हेगारा जो माफ करहा ऐं,
होर आस्सा जो परखणी मन्झ नी पऊणे दे।
पर आस्सा जो तेस दुस्ट सैताना ले बचा।’”
प्रार्थना रे बारे मन्झ यीसू रा उपदेस
(मत्ती 7:7-11)
5यीसूए तिन्हा किन्हें बोल्या, “मनी लेया कि तुस्सा मन्झ एक आधी राती आपणे केसी दोस्ता वाले जाई किन्हें बोले कि, हे दोस्त; मुंजो तीन रोटिया उधार देई दे, 6क्यूंकि मेरा एक दोस्त सफर करी किन्हें मेरे वाले पुजीरा, होर तेसरे अगे रखणे रे कठे मेरे वाले कुछ नी हाया। 7होर से अंदरा ले जवाब दे कि, मुंजो दुःख नी दे, ऐबे ता दुराजा बंद आ, होर मेरे बच्चे मेरे साउगी बिस्तरे मन्झ ऐं, इधी कठे हांऊँ उठी किन्हें तुजो कुछ देई नी सक्दा। 8हांऊँ जेहड़ा बोली करा तेता जो समझे हालांकि से माह्णुं तेसरा दोस्त हूंणे पर भी तेस जो उठी किन्हें कुछ नी देणा चाहन्दा, तेबे बी तेस दोस्त रे बौह्त मांगदे रैहणे री वजहा ले तेस तेस्जो कुछ चहिए उठी किन्हें देणां। 9होर हांऊँ तुस्सा किन्हें बोल्हा, मान्घगे, ता तुस्सा जो दितेया जाणा; टोल्घे ता तुस्सा जो मिलणा खटखटान्घे ता तुस्सा रे कठे खोलेया जाणा। 10क्यूंकि जो कोई मांघ्हा, तेस जो मिल्हा; होर जो तोप्हा ऐं, से पाहां; होर जो खटखटाहां, तेसरे कठे खोलेया जाणा। 11तुस्सा मन्झ एह्ड़ा कुण बापू हूंणां कि, जेबे तेसरा मह्ठा तेस ले रोटी मांगे, ता से तेस जो पात्थर दे, या मछि मांगे ता मछि रे बदले तेस जो कीड़ा दे? 12या आंडे मांगघे ता तेस जो बिछु दे? 13अगर तुस्से, बुरे हुई किन्हें आपणे बच्चेया जो खरी चीजा देणा जाणहां ऐं, ता तुस्सा रे स्वर्गीय बापू आपणे मांगणे वाल़े जो पवित्र आत्मा कि नी देणी।”
यीसू होर सैतान दुस्टात्मा रा मुखिया
(मत्ती 12:22-30; मरकु. 3:20-27)
14फेरी एक ध्याड़े यीसूए एक टाटी करणे वाली दुस्टात्मा काढी, होर जेबे से निकली गयी, ता टाटा बोल्दा लग्या; होर लोका जो हरानी हुई। 15पर तिन्हा मन्झा ले कई लोके ये बोल्या कि, “सैतान दुस्टात्मा रा मुखिया आ यीसू तेसरे सहारे दुस्टात्मा काढा आ।” 16होरिये यीसू री परखणी करणे रे कठे तेस ले आसमाना रा एक चिन्ह मान्गेया, ताकि तिन्हा जो पता लगे कि परमेसरे ई यीसू भेजिरा।
17पर यीसूए तिन्हारे मना री गल्ला जाणी किन्हें, तिन्हा किन्हें बोल्या, जेस-जेस राजा मन्झ फूट हुंहाँ ईं, से राज उजड़ी जाहाँ: होर जेस घरा मन्झ फूट हुंहाँ ईं से नास हुई जाहाँ। 18होर अगर सैतान आपणे ही बरखलाफ हुई जाए, ता तेसरा राज किहाँ बणी रही सक्हा? क्यूंकि तुस्से मेरे बारे मन्झ ता बोल्हा ऐं कि, हांऊँ सैताना री सहायता किन्हें दुस्टात्मा काढा। 19भला अगर हांऊँ सैताना री मददा किन्हें दुस्टात्मा जो काढा, ता तुस्सा रे चेले केसरी मददा किन्हें काढा ऐं? इधी कठे तिन्हा ई तुस्सा रा न्याय करणा। 20पर अगर हांऊँ परमेसरा री सामर्था किन्हें दुस्टात्मा जो काढा, ता परमेसरा रा राज नेडे आई गईरा।
21जेबे कोई पैहलवान माह्णुं हथियार बान्ही किन्हें आपणे घरा री रखवाली करहा, ता तेसरी जायदाद बची रहीं। 22पर जेबे तेस ले बढ़ी किन्हें कोई होर पैहलवान हमला करी किन्हें तेस जो जीती लैहां, ता तेसरे स्यों हथियार जिन्हा पर जे तेसरा भरोसा था, तेस ले लूटी लैहें होर लूटी री जायदाद जो स्यों आपु मन्झ बांडी लैहां ऐं। 23जो मेरे साउगी कठा नी करदा से खिंडहा।
दुस्टात्मा रा दबारा माह्णुं मन्झा वापस आऊंणा
(मत्ती 12:43-45)
24“जेबे दुस्टात्मा माह्णुं मन्झा ले निकली जाहीं, ता से सुक्की जगहा मन्झ अराम टोल्हा ई। होर जेबे अराम नी पांदी, तेबे से आपु किन्हें बोल्हा ई कि, ‘मां तेस माह्णुं मन्झ जेथी ले हांऊँ निकली री थी, तेथी मां वापस चली जाणा।’ 25होर से आई किन्हें तेस माह्णुं री जिन्दगी जो साफ-सुथरी होर सजरी-धजरी कमरे साहीं पाहीं। 26तेबे से दुस्टात्मा आई किन्हें आपणे ले भी ज्यादा बुरी सात दुस्टात्मा जो आपणे साउगी ल्याहूंआं ईं, होर स्यों तेस मन्झ जाई किन्हें तेथी रैंहयां ईं, होर तेस माह्णुं री पिछली हालत पैहले ले भी होर बुरी हुई जाहीं।”
धन्य कुणहां
27जेबे यीसू ये गल्ला बोल्या करहा था ता भीड़ा मन्झा ले केसी ज्नाने उची अवाजा किन्हें बोल्या, “धन्य ई से जन्नानी जेस्से तुजो जन्म दितिरा, होर तुजो दूध प्याईरा।” 28पर तिन्हें जबाब दितेया, “हां; पर धन्य ऐं स्यों, जो परमेसरा रा बचन सुणहां ऐं होर मन्हां ऐं।”
चिन्हा री मांग
(मत्ती 12:38-42)
29जेबे बडी भीड़ कठी हुई जाया करहा ई थी ता से बोल्दा लग्या कि, “एस जमाने रे लोक बुरे ऐं; स्यों चिन्ह तोप्हा ऐं; पर जेह्ड़ा योना नबी रे साउगी हुआ एस चिन्हा जो छाडी किन्हें होर कोई चिन्ह तिन्हा जो नी दितेया जाणा। 30जिहां योना नबी नीनवे रे लोका रे कठे चिन्ह बणेया, तिहां ईं हांऊँ माह्णुं रे मह्ठे भी एस जमाने रे लोका रे कठे एक चिन्ह बणना। 31इस्राएल देसा री दक्षिण दिसा ले सेबा नांऊँआं री राणिया न्याय रे ध्याड़े एस्सा पीढ़ी रे लोका साउगी उठी किन्हें स्यों दोसी ठैहराणे, क्यूंकि से सेबा राणी सुलेमाना राजे रा ज्ञान सुणने रे कठे बड़े दुरा ले आई। होर एथी एक एह्ड़ा आ जो सुलेमान राजे ले भी बडा आ, पर फेरी भी तुस्से पाप करणा नी छाडेया।#11:31 1 राजा. 10:1-10, 2 इति. 9:1 32नीनवे रे लोका न्याय रे ध्याड़े एस जमाने रे लोका किन्हें खड़े हुई किन्हें, स्यों दोसी ठैहराणे; क्यूंकि तिन्हें योना नबी रा प्रचार सुणी किन्हें पाप करणा छाडी दितेया। होर ऐथी से आ जो योना ले बडा आ, फेरी भी तुस्से पाप करणा नी छाडदे।”
सरीरा रा दिऊया
(मत्ती 5:15; 6:22,23)
33“कोई भी दिऊया भ्खाई किन्हें तेस जो ल्कोई किन्हें या टोकरी रे थाले नी रखदा, एता रे बजाय दिऊये जो दीवटा पर रख्हा ऐं कि घरा रे अंदर आऊणें वाल़े पर प्रयासा हो। 34तेरे सरीरा री हाखिया दिऊये साहीं ई, इधी कठे जेबे तेरी हाखिया साफ ई, ता तेरा सारा सरीर भी प्रयासे किन्हें भरीरा आ, पर जेबे तेरी हाखिया बुरी ई, ता सारा सरीर भी न्याहरे मन्झ पई जाणा। 35इधी कठे चतन्न रैंहयां कि, जो प्रयासा तुध मन्झ आ से अंधकारमय नी हुई जाओ। 36इधी कठे अगर तेरा सारा सरीर प्रयासे किन्हें भरीरा आ, होर तेसरा कोई हिस्सा नह्यारे मन्झ नी आ, ता तेस पूरी तरहा ले एह्ड़ा चमकणा जिहां कोई दिऊया तुस्सा पर आपणी किरणा चमकाया करहा।”
व्यवस्था स्खाणे वाल़े होर फरीसी लोका रे पाखंड
(मत्ती 23:1-36; मरकु. 12:38-40)
37जेबे यीसू गल्ला करेया करहा था, ता केसी फरीसी लोके तेस ले अर्ज किती कि, मेरे वाले एथी खाणा खाई ले; होर से अंदर जाई किन्हें खाणा खांदे बैठया। 38फरीसी लोक ये देखी किन्हें हरान हुआ कि तिन्हें बापदादेया रे रूआजा रे मताबक खाणा खाणे ले पैहले हाथ नी धोये। 39प्रभुए तेस किन्हें बोल्या, “हे फरीसी लोक, तुस्से तिन्हा भांडेया साहीं जो बाहरा ले साफ होर अंदरा ले गंदे, तुस्से लोका साम्हणें आपणे आपा जो ता धर्मी दस्हा ऐं पर तुस्सा रे मना मन्झ न्य्हारे किन्हें होर दुस्टता किन्हें भरीरा। 40हे नर्क्कले माहणुंओं, जिन्हें जे बाहर्ला हिस्सा बणाया, क्या तिन्हें अन्दरला हिस्सा नी बणाया? 41पर हां, अन्दरली चीजा जो दान करी देऊआ, ता देखा, सभ कुछ तुस्सा रे कठे सुद्ध हुई जाणा।”
42“पर हे फरीसी लोको, तुस्सा जो बौह्त सजा मिलणी! तुस्से पदीने होर सुदाब नांऊँआं री जड़ी बूटी रा, होर सभ तरहा रे सागा रा दस्वांस देहां ऐं। पर न्याय होर परमेसरा रा प्यार टाल्ली देहां ऐं, करणा ता एह्ड़ा चहिए था कि तुस्से होर न्याय होर परमेसरा किन्हें प्यार भी करदे रैहन्दे, होर तुस्सा जो दस्वांस ता देंदे रेहणा चहिए पर व्यवस्था री जरूरी गल्ला जो भी नजरअंदाज करी दे। 43हे फरीसी लोक, तुस्सा जो बौह्त सजा मिलणी! तुस्से यहूदी सभा मन्झ खास-खास जगहा होर बजारा मन्झ नमस्कार चाहें। 44तुस्सा जो बौह्त सजा मिलणी! क्यूंकि तुस्से तिन्हा ल्हुखी री कब्रा साहीं ऐं, जिन्हा पर लोक चल्हा ऐं, पर नी जाणदे।”
45तेबे एकी व्यवस्था स्खाणे वाल़े ये तेस जो जवाब दितेया कि, “हे गुरु, इन्हा गल्ला रे बोलणे ले तू आस्सा री बेज्जती करहा।” 46यीसूए बोल्या, “हे व्यवस्था स्खाणे वाल़ेओ, तुस्सा जो भी सजा मिलणी! तुस्से एह्ड़े बोझा थाले, जिन्हा जो चकणा बौह्त कठण आ, माह्णुंआं पर लाध्हा ऐं पर तुस्से आपु तिन्हा बोझा जो आपणी एक गुठी किन्हें भी नी छुंदे। 47तुस्सा बौह्त सजा मिलणी! तुस्से तिन्हा नबिया री कब्र बणाहें, जिन्हा जो तुस्सा रे बापदादे मारी दितरा था। 48एता कठे तुस्से मेरे गुआह ऐं, होर आपणे बापदादे रे कामा मन्झ सहमती जताएं। क्यूंकि तिन्हें ता स्यों मारी दिते, होर तुस्से तिन्हारी कब्रा बणाहें। 49इधी कठे परमेसरे आपणी बुद्धि रे ज्रीए ये भी बोल्या कि, मां तिन्हा वाले नबी होर चुणिरे चेले भेजणे, होर तिन्हा, तिन्हा मन्झा ले कितने मारी देणे, होर कितने स्ताणे। 50इधी कठे संसारा री सुर्हूआता ले जितने भी नबिया रा खून बहाया गईरा, तेता रा हिसाब कताब, एस जमाने रे लोका ले लया जाणा। 51हाबिला रे खूना ले लई किन्हें जकरयाह नबी रे खूना तक जो बेदी होर मन्दरा रे बीचा मन्झ मारी दितिरे, हांऊँ तुस्सा किन्हें सच्च बोल्हा, तेसरा हिसाब कताब एस जमाने रे लोका ले लया जाणा। 52तुस्से जे व्यवस्था स्खाणे वाल़े तुस्सा जो बौह्त सजा मिलणी! तुस्से ज्ञाना री चाबी ता लई ली, तुस्से ना ता आपु ई तेस मन्झ दाखल हुंहाँ ऐं, होर दाखल करणे वाल़े भी रोकी दिते।”
53जेबे यीसू तेथी ले निकल्या, ता व्यवस्था स्खाणे वाल़े होर फरीसी लोक बौह्त पीछे पई गये होर स्यों बौह्त गल्ला रे बारे मन्झ तेस ले सुआल पुछदे लगे। 54होर स्यों तेस जो फसाणे रे इंतजारा मन्झा लगी रहे ताकि स्यों तेसरे मुंहा री कोई गल पकड़ी सके।
Currently Selected:
लूका 11: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
