यहून्ना 18

यीसू रा पकड़वाया जाणा

(मत्ती 26:47-56; मरकु. 14:43-50; लूक. 22:47-53)

1जेबे यीसू ये प्रार्थना करी बैठेया ता आपणे चेले साउगी किद्रोना रे घाटी रे पार गया। तेथी एक बगीचा था, जेस मन्झ से होर तेसरे चेले गये। 2होर तेसरा पकड़वाणे वाल़ा यहूदा इस्करयोति भी तेस जगहा जो जाणहां था, क्यूंकि यीसू आपणे चेले साउगी तेथी जांदा रैंहयां था। 3तेबे यहूदा इस्करयोति मुख्य याजके होर फरीसी लोके रोम देसा रे स्पाही रा एक गुट होर कुछ मन्दरा रे स्पाहीया साउगी भेजे जो लालटेन, म्साल होर हथियार लई किन्हें तेथी आये। 4तेबे यीसू तिन्हा सब गल्ला जो जेह्ड़ी तेस पर हूंणे वाली थी, जाणी किन्हें अगे आया, होर तिन्हा ले पुछदा लग्या, “केस जो तोप्हा ऐं?”

5तिन्हें तेस जो जवाब दितेया, “नासरता रे यीसू जो तोप्दे लगीरे।” जो यीसूए तिन्हा किन्हें बोल्या, “हांऊँ से आं,” होर तेसरा पकड़वाणे वाल़ा यहूदा इस्करयोति भी स्पाहीया किन्हें साउगी खड़ीरा था। 6यीसू रे ये बोल्दे ई कि, “से हांऊँ आं,” स्यों पीछे हटी किन्हें जमीना पर पई गये। 7तेबे तिन्हें दबारा तिन्हा ले पूछेया, “तुस्से केस जो तोप्हा ऐं?” होर तिन्हें बोल्या, “आस्से नासरता रे यीसू जो तोप्हा करहा ऐ।” 8यीसूए जवाब दितेया, “मैं ता तुस्सा किन्हें बोली दितेया कि हांऊँ सेई आ। अगर तुस्से मुंजो तोप्हा ऐं ता बाकी सभिया जो जाणे देआ।” 9ऐं इधी कठे हुआ ताकि जो बचन यीसूए बोलिरा था से पूरा हो। क्यूंकि तिन्हें बोलिरा था कि, “जो तैं मुंजो दिते, तिन्हा मन्झा ले मैं एक भी नी गुआया।” 10समौन पतरसा वाले तलवार थी तिन्हें तलवार काढी होर बडे याजका रे नौकरा पर चलाई, होर तेसरा कान टुकी दितेया। तेस नौकरा रा नांऊँ मलखुस था। 11तेबे यीसूए पतरसा किन्हें बोल्या, “आपणी तलवार म्याना मन्झ रख। जो दुःखा रा डोंगा मुंजो बापूए दितिरा क्या हांऊँ तेस जो नी पीयूं?”

हन्ना बडा याजक रे साम्हणें यीसू

12तेबे स्पाहिये होर तिन्हारे सुबेदारे होर यहूदी मन्दरा रे स्पाहिये यीसू जो पकड़ी किन्हें बान्ह्या। 13होर पैहले स्यों तेस जो हन्ना बडा याजका वाले लई गये क्यूंकि से तेस साला रा बडा याजक कैफा रा सौहरा था। 14ये सेई बडा याजक कैफा था, जिन्हें जे यहूदी लोका जो सलाह दितिरी थी कि आस्सा रे लोका रे कठे एक आदमी रा मरणा खरा आ।

पतरसा री नाहं

(मत्ती 26:69,70; मरकु. 14:66-68; लूक. 22:55-57)

15समौन पतरसा साउगी एक होर दूजा चेला था जो यीसू रे पीछे चली पया, ये दूजा चेला बडे याजका रा जाणा पैहचाणा था होर से यीसू साउगी बडे याजका रे आंघणा तक गया। 16पर पतरस दुराजे वाले खड़ीरा था, तेबे से दूजा चेला जो बडे याजका रा जाणा पैहचाणा था, बाहर निकल्या, होर से तेस्सा दुराजे री पैहरेदारणिया जो बोली किन्हें, पतरसा जो अंदर लई गया। 17से जेह्ड़ी पैहरेदारणीया थी, तेस्से पतरसा किन्हें बोल्या, “क्या तू भी एस माह्णुं रे चेले मन्झा ले एक आ?” तिन्हें बोल्या, “नी हांऊँ तेसरा चेला नी आं।” 18नौकर होर मन्दरा रे स्पाही ठंडा री वजहा ले खड़ी किन्हें आग तफ्या करहा ऐं थे। होर पतरस भी तिन्हा साउगी खड़ी किन्हें आग तफ्या करहा था।

बडे याजका रे ज्रीए यीसू ले पूछ-ताछ

(मत्ती 26:59-66; मरकु. 14:55-64; लूक. 22:66-71)

19तेबे बडे याजके यीसू ले तेसरे चेले रे बारे होर तेसरे उपदेसा रे बारे मन्झ पूछेया। 20यीसूए तेस जो जवाब दितेया कि, “मैं सभ लोका किन्हें खुल्ही किन्हें गल्ला किती। मैं तिन्हा जो मन्दरा मन्झ, यहूदी सभा मन्झ होर मन्दरा रे आंघणा मन्झ, होर एह्ड़ी जगहा जेथी कई यहूदी लोक कठे हुंहाँ ऐं थे, हमेसा उपदेस देयां था होर मैं चुपके-चुपके कुछ नी बोल्या। 21तू मेरे किन्हें ये सवाल किधियो पूछ्हा? सुणने वाले ले ही पूछी लेया कि मैं तिन्हा किन्हें क्या बोल्या? क्यूंकि स्यों जाणहां ऐं कि, मैं क्या-क्या बोल्या?” 22जेबे तिन्हें ये बोल्या, ता मन्दरा रे स्पाहीया मन्झा ले एकिये जो तेसरे नेडे खड़ीरा था, यीसू जो थप्पड़ मारी किन्हें बोल्या, “क्या तू बडे याजका जो एह्ड़ा जवाब देहां?” 23यीसूए तेस जो जवाब दितेया, “अगर मैं गलत बोल्या, ता दसा कि क्या गलत बोल्या, पर अगर ठीक बोल्या, ता तू मुंजो किधियो मारहा?” 24हन्ना माहयाजके यीसू जो ऐबे भी बझिरा था, बडा याजका कैफा बडे याजका वाले भेजी दितेया।

पतरसा री दबारा नाहं

(मत्ती 26:71-75; मरकु. 14:69-72; लूक. 22:58-62)

25समौन पतरस खड़ा हुई किन्हें आग तफ्या करहा था; तेबे लोके तेस ले पुछेया, “क्या तू भी यीसू रे चेले मन्झा ले एक आ?” पतरस मुखरी गया होर बोल्या, “से हांऊँ नी आं।” 26बडे याजका रे नौकर मन्झा ले एकिये जो नौकरा रे टब्बरा मन्झा ले एक था, जेसरा जे कान पतरसे काटी दितिरा था, बोल्या, “मैं तू यीसू साउगी बगीचे मन्झ देखीरा था?” 27पतरस दबारा मुखरी गया होर तेस ई टैम कुकड़े बांग दिती।

पिलातुसा हाकमा रे साम्हणें यीसू

(मत्ती 17:1,2,11-14; मरकु. 15:1-5; लूक. 23:1-5)

28होर भ्यागा तड़के ही स्पाही यीसू जो बडे याजक कैफा वाले ले लई किन्हें रोम देसा रे हाकम पिलातुसा रे मैहला मन्झ लई आये। पर स्यों आपु पिलातुसा रे मैहला मन्झ नी गये। क्यूंकि तिन्हा मन्झा ले कोई अंदर जांदा ता तेस असुद्ध हुई जांदा होर फसहा रे साजे रा खाणा नी खाई सकदे थे। (क्यूंकि पिलातुस गैर-यहूदी था) 29तेबे पिलातुस हाकम तिन्हा वाले बाहर आया होर बोल्या, “तुस्से एस माह्णुं पर क्या दोस ल्गाहें?” 30तिन्हें तेस जो जवाब दितेया कि, “ये बुरा काम करणे वाल़ा आ इधी कठे आस्से ये तेरे वाले ल्यांदेआ ताकि तू एस जो सजा दे।” 31पिलातुस हाकमे तिन्हा किन्हें बोल्या, “तुस्से ई एस जो लई जाई किन्हें आपणी मूसा री व्यवस्था रे मताबक ऐसरा फैसला करा।” यहूदी अगुवे तेस किन्हें बोल्या, “आस्सा जो हक नी आ कि आस्से केसी री जान ले।” 32तिन्हें ये इधी कठे बोल्या, ताकि यीसू री से गल पूरी हो जो तिन्हें बोलिरी थी कि, तेस केह्ड़ी मौत मरणा। 33तेबे पिलातुस हाकमे दबारा मैहला रे अंदर गया होर यीसू जो सादी किन्हें, तेस ले पूछेया, “क्या तू यहूदी लोका रा राजा आ?”

34यीसूए जवाब दितेया, “क्या तू ये गल आपणी आपा ले बोल्हा या होरिये मेरे बारे मन्झ तेरे किन्हें बोलिरा?” 35पिलातुस हाकमे जवाब दितेया, “तू जाणा कि हांऊँ यहूदी नी आ?” तेरे लोके होर तेरे मुख्य याजके तुजो मेरे हाथा मन्झ दितिरा। तैं एह्ड़ा क्या कितिरा? 36यीसूए जवाब दितेया कि, “मेरा राज एस संसारा नी आ। अगर मेरा राज एस संसारा रा हुन्दा, ता मेरे साउगी चलने वाले लोक लड़दे, होर हांऊँ यहूदी अगुवे मुंजो नी पकड़दे, पर सच्चाई ता येई कि ऐबे मेरा राज एथी रा नी आ।” 37पिलातुस हाकमे तेस किन्हें बोल्या, “खरा ता तू राजा आ?” यीसूए जवाब दितेया, “तू बोल्हा कि, हांऊँ राजा आ। मैं इधी कठे जन्म लईरा, होर हांऊँ इधी कठे संसारा मन्झ आईरा कि हांऊँ सच्चाई रे बारे मन्झ सिखाई सकूं। होर जो कोई सच्चाई किन्हें प्यार करहा, स्यों मेरी गल्ला मनाएं।” 38पिलातुस हाकमे तेस किन्हें बोल्या, “सच्च क्या आ?” होर ये बोली किन्हें से दबारा यहूदी अगुवे वाले चली गया होर तिन्हें तिन्हा किन्हें बोल्या, “मैं ता तेस मन्झ कोई दोस नी पांदा।”

यीसू या बरअब्बा

39“पर तुस्सा रा ये रूआज आ कि हांऊँ फसहा रे साजा मन्झ तुस्सा रे कठे एक माह्णुं जो छाडी देऊँ, ता क्या तुस्से चाहें कि तुस्सा रे कठे हांऊँ यहूदी लोका रे राजे जो छाडी देऊँ?” 40तेबे तिन्हें दबारा चिंगी किन्हें बोल्या, “एस जो नी पर आस्सा रे कठे बरअब्बा जो छाडी दे!” होर बरअब्बा#18:40 बरअब्बा दंगा फसाद होर हत्या करणे रे कठे जेल्हा मन्झ पाईरा था एक डाकू था।

Currently Selected:

यहून्ना 18: MJLNT

Highlight

Copy