यहून्ना 10

पुहाल होर भेडा रा उदाहरण

1“हांऊँ तुस्सा किन्हें सच्च -सच्च बोल्हा कि, जो कोई दुराजे ले हुई किन्हें भेडा रे बाड़े मन्झ दाखल नी हुन्दा पर होर दूजे पैंडे ले हुई किन्हें दाखल हुंहाँ से माह्णुं चोर होर डाकू आ। 2पर भेडा रा पुहाल दुराजे ले हुई किन्हें दाखल हुंहाँ। 3तेसरे कठे दरबान दुराजा खोल्ही देहां। होर भेडा तेसरी अवाज पछयाणहां ईं, होर से आपणी भेडा जो नांऊँ लई किन्हें साद्हा होर बाहार लई जाहाँ। 4होर जेबे से आपणी सभ भेडा जो बाहर काढी देहां, ता से तिन्हारे अगे-अगे चल्हा, होर भेडा तेसरे पीछे-पीछे चल्हा ई; क्यूंकि स्यों तेसरी अवाज पछयाणहां ईं। 5पर तिन्हा पराये रे पीछे नी जाणा, पर तिन्हा तेस ले दूर भगणा, क्यूंकि स्यों पराये री अवाज नी पछयाणंदी।” 6यीसूए तिन्हा किन्हें ये उदाहरण बोली, पर स्यों नी समझे कि इन्हा गल्ला रा क्या मतलब आ, जो से आस्सा किन्हें बोल्हा।

यीसू बढ़िया पुहाल आ

7तेबे यीसूए तिन्हा किन्हें दबारा बोल्या, “हांऊँ तुस्सा किन्हें सच्च -सच्च बोल्हा कि, भेडा रे कठे दुराजा हांऊँ से आं। 8जितने मेरे ले पैहले आये स्यों सब चोर होर डाकू ऐं पर मेरी भेडे तिन्हारी नी सुणी। 9दुराजा हांऊँ आं, अगर कोई मेरे ज्रीए अंदर जाए ता तेस उद्धार पाणा। होर तेस अंदर बाहर आऊंणा जाणा करेया करणा होर चारा पाणा। 10चोर केसी होर कामा रे कठे नी आऊंदा पर सिर्फ चोरी करदे, मारणे रे कठे होर नास करणे रे कठे आहूँआं। हांऊँ एता कठे आया कि स्यों जिन्दगी पाए होर भरपूर जिन्दगी पाए।”

11“हांऊँ बधिया पुहाल आ; बधिया पुहाल भेडा रे कठे मरी जाहाँ। 12मजदूर जो न ता पुहाल आ, होर न ता भेडा रा माल्क आ, से भेड़िये जो आऊंदे देखी किन्हें, भेडा जो छाडी किन्हें भगी जाहाँ। होर भेड़िया भेडा जो पकड़ा आ होर ओरे परे भगाई देहां। 13से इधी कठे भगी जाहाँ क्यूंकि से मजदूर आ, होर तेस जो भेडा री फिकर नी ई।”

14“बधिया पुहाल हांऊँ आं; जिहां बापू मुंजो जाणहां, होर हांऊँ बापू जो जाणहां। 15इंहां ईं हांऊँ आपणी भेडा जो जाणहां, होर मेरी भेडा मुंजो जाणहां ईं, होर हांऊँ आपणी भेडा रे कठे मरणे जो तैयार आ। 16होर मेरी होर भी भेडा ई, जो एस भेड बाड़े री नी ई। मेरा तिन्हें जो भी ल्याऊणा जरूरी आ, तिन्हा मेरी अवाज पछयाणी; तेबे एक ई झुंड होर एक ई पुहाल हूंणां।”

17“बापू इधी कठे मेरे किन्हें प्यार करहा, क्यूंकि हांऊँ आपणी भेडा रे कठे मरणे जो तैयार आ, ताकि मेरे मरणे ले बाद हांऊँ दबारा जिउन्दा हुई जांऊँ। 18कोई मेरी जान जो मेरे ले नी लैंदा, पर हांऊँ आपणे आप तेता जो देहां। तेता जो देणे रा हक मेरे वाले आ, होर तेता जो दबारा वापस लेणे रा भी हक आ, ये हुक्म मेरे बापू ले मुंजो मिलिरा।”

19इन्हा गल्ला री वजहा ले यहूदी लोका मन्झ दबारा फूट पई। 20होर तिन्हा मन्झा ले बौह्त बोल्दे लगे कि, “तेस मन्झ दुस्टात्मा ई, होर से पागल आ, तेसरी मत सुणहां।” 21होरिये बोल्या, “ये गल एह्ड़े माह्णुं री नी ई जेस मन्झ दुस्टात्मा हो, दुस्टात्मा केसी री भी हाखिया ठीक नी करी सकदी।”

यहूदी लोका रा विस्वास नी करणा

22ठंडा रा मौसम था होर यरुस्लेम सैहरा मन्झ स्थापना रा साजा#10:22 एस साजे जो ये याद रखणे रे कठे मनाया जाहाँ था कि यहूदी लोके मन्दर दबारा अर्पण कितेया था क्यूंकि मन्दर सीरिया रे लोका रे ज्रीए असुध हुईरा था। एस जो दसम्बर (पौष) महीने मन्झ तम्बू रे साजे रे दो महीने बाद आठ ध्याड़े तक एस साजे जो बनाया जाहाँ था। एस साजे जो प्रयासे रा साजा भी बोल्या ऐं थे इब्रानी भासा मन्झ हनुक्काह भी बोल्या ऐं थे जेसरा मतलब आ चढ़ावा भी हुंहाँ। मनाया जाया करहा था। 23होर यीसू सुलेमाना रे बणाईरे मन्दरा रे आंघणा मन्झ घुमेया करहा था। 24तेबे यहूदी लोके से घेरी लया होर पूछेया, “तु कई ध्याड़े ले आस्सा रा मना जो सक करणे पर मजबूर करेया करहा। तू आस्सा जो साफ-साफ दसी दे। क्या तू मसीह आ?”

25यीसूए तिन्हा जो जवाब दितेया, “कि मैं तुस्सा किन्हें दसी दितिरा, होर तुस्से विस्वास नी करदे, जो काम हांऊँ आपणे बापू रे हका ले करहा स्यों काम ई मेरे गुआह ऐं। 26तुस्से इधी कठे विस्वास नी करदे, क्यूंकि तुस्से मेरी भेडा मन्झा ले नी ये। 27मेरी भेडा मेरी अवाज पछयाणा ईं, होर हांऊँ तिन्हा जो जाणहां, होर स्यों मेरे पीछे-पीछे चल्हा ई। 28होर हांऊँ तिन्हा जो अनंत जिन्दगी देहां, होर तिन्हा कधी नी मरणा, होर कोई तिन्हा जो मेरे हाथा ले नी छुड़ाई सक्दा। 29मेरा बापू, जिन्हें जे स्यों मुंजो दितिरे, सभी ले बडा आ, होर कोई तिन्हा जो मेरे बापू रे हाथा ले पकड़ी किन्हें दूर नी करी सक्दा। 30हांऊँ होर मेरा बापू एक ऐं।”

31यहूदी अगुवे एक होर बारी यीसू पर पथराव करणे रे कठे पात्थर चके। 32एता पर यीसूए तिन्हा जो जवाब दितेया, “मैं तुस्सा जो आपणे बापू री तरफा ले बौह्त भले काम दसे। तिन्हा कामा मन्झा ले केस कामा रे कठे तुस्से मेरे पर पथराव करहा ऐं?”

33यहूदी अगुवे तेस जो जवाब दितेया कि, “आस्से भले कामा रे कठे तुजो पथराव नी करदे, पर तू परमेसरा री निंदा करहा होर माह्णुं हुई किन्हें आपणे आपा जो परमेसर बोल्हा।”

34यीसूए तिन्हा जो जवाब दितेया, “पवित्र सास्त्रा मन्झ लिखिरा कि परमेसरे आपणे लोका रे अगुवे किन्हें बोल्या: कि स्यों इस्वर ऐं।” 35“होर तुस्से जाणहां ऐं कि पवित्र सास्त्रा जो तुस्से नी बदली सकदे होर अगर से लोका रे अगुवे जो परमेसरे ‘इस्वर बोल्हा,’ 36ता फेरी जेबे हांऊँ बोल्हा कि हांऊँ परमेसरा रा मह्ठा आ, फेरी तुस्से किधियो बोल्हा ऐं कि, ‘हांऊँ परमेसरा री निंदा करहा?’ क्यूंकि परमेसरे हांऊँ पवित्र ठैहराई किन्हें संसारा मन्झ भेज्या। 37अगर मैं आपणे बापू रे काम नी किते, ता मेरा विस्वास भी मत करदे। 38पर अगर हांऊँ आपणे बापू रे काम करहा, ता चाहे तुस्से मेरा विस्वास भी नी करा, पर तिन्हा कामा रा ता विस्वास करा। ताकि तुस्से जाणी होर समझी सको कि बापू मेरे मन्झ वास करहा, होर हांऊँ बापू मन्झ वास करहा।”

39तेबे तिन्हें दबारा यीसू जो पकड़ने री कोसिस किती पर से तिन्हारे हाथा ले निकली गया। 40फेरी यीसू यरदन दराऊआ ले पार तेस जगहा चली गया, जेथी यहून्ना बपतिस्मा देणे वाल़ा पैहले बपतिस्मा देहां था, होर से तेथी रैंहयां। 41होर बौह्त लोक तेस वाले आई किन्हें बोल्हा ऐं थे कि, “यहून्ना बपतिस्मा देणे वाल़े ता कोई चिन्ह नी दसेया, पर जो कुछ यहून्ना बपतिस्मा देणे वाल़े एस आदमी रे बारे मन्झ बोलिरा था से सच्च था।” 42होर तेथी कई लोके तेस पर विस्वास कितेया।

Currently Selected:

यहून्ना 10: MJLNT

Highlight

Copy