लूका 12
12
पखण्डा रे खलाफ चेतावनी
(मत्ती 10:26,27)
1इतणे च ताहली जे हजाराँ रे हसाबे लोक कट्ठे हुईगे, येत्थी तक भई लोक इक्की दुज्जे जो धक्का मुक्की करने लगे, तां यीशु सब्बींते पैहले अपणे चेलयां खा मुड़या कने बोलणे लगया, “फरीसियां रे मलेड़े ते यनि तिन्हांरे दिखावटी कम्मां ते अप्पूँजो बचाईने रक्खा। 2सै बगत आई कराँ तिस बगत जे सारी गल्लां जो सामणे परगट कित्या जाणा; कने सै किछ जे लकोईरा, सै लोकां रे सामणे ल्याया जाणा। 3इस खातर जितणियां गल्लां जे तुहें लुक्खी छुप्पीने किति रियां, सै लोकां रे सामणे परगट कित्तियां जाणियां; कने सै जे तुहें कमरा बन्द करीने कन्नां च गलाई रियां, तिन्हांरा प्रचार ऊच्चिया अवाज़ा च सब्बीं रे सामणे कित्या जाणा।
किस ते डरिये
(मत्ती 10:28-31)
4“प्यारे मित्रो, तिन्हाते मता डरदे सै जे तुहांजो जान्नी ते मारना चाँये, सै सिर्फ तुहांरे जिस्मा जोई मारी सक्कां ये; इसते जादा दुख नीं देई सकदे। 5पर हऊँ तुहांजो दस्सां, भई परमेशरा ते डरा तिसले जे लोकां जो मारने कने तिन्हाजो नरका च पाणे री बी समरथ्या इ। 6चिड़ियां पर ध्यान देआ; तिन्हांरी कीमत इतणी घट इ भई सै पैसे च पांज्ज मिलां इयां। फेरी बी तिन्हां चते इक्की जो बी परमेशर नीं भुलदा। 7परमेशर जाणाँ भई तुहांरे सिरा पर कितणे बाल़ ये, इस खातर तुहांरी हानि करने औल़यां माहणुआं ते नीं डरा; काँह्भई परमेशर तुहांजो कई चिड़ियां ते जादा मुल्यवान समझां।
यीशुये जो स्वीकार या अस्वीकार करना
(मत्ती 10:32,33; 12:32; 10:19,20)
8“हऊँ तुहांजो इसा गल्ला रा भरोसा देयां भई सै जे कोई मिन्जो माहणुआं रे सामणे मन्नी लेंगा, तां हऊँ माहणुये रा पुत्र, तिस माहणुये जो परमेशरा रे स्वर्गदूतां रे सामणे मन्नी लेंगा। 9पर जे कोई माहणु इसा धरतिया पर माहणुआं रे सामणे मिन्जो मनणे ते नां करो, तां माह बी तिस माहणुये जो परमेशरा रे स्वर्गदूतां रे सामणे मनणे ते नां करी देणी। 10सै जे कोई माहणुये रे पुत्रा री बुराई करो, तिस्सो माफ कित्या जाणा, पर सै जे कोई पवित्र आत्मा री निंध्या करो, तिस्सो कदीं बी माफ नीं कित्या जाणा।
11“ताहली जे लोक तुहांजो यहूदी सभा घराँ च, राजयां कने राजपालां रे सामणे तुहां पर मुकद्दमा चलाणे खातर लेई जो, तां इसा गल्ला री चिन्ता नीं करयों भई अपणे बचावा खातर क्या जवाब देईये। 12काँह्भई पवित्र आत्मे तिस इ बगत तुहांजो सखाई देणा, भई तुहांजो क्या जवाब देणा चाहिन्दा।”
इक अमीर मूर्खा रा उदाहरण
13फेरी भीड़ा चते किन्हिये माहणुयें यीशुये ने बोल्या, “गुरू जी, मेहरवानी करीने मेरे भाईये जो बोल्यों, भई अपणे पिता री जायदाता री बंड असूला मुतावक मेरे सौगी करी लै।”
14यीशुये जवाब दित्या, “भले माणसा, तुहांरे खातर न्याय करने रा ये काम्म मेरा नींआ।” 15फेरी तिन्हें गलाया, “चत्तन होआ! तुहांले सै जे निआं, तिसरा लालच नीं करा। काँह्भई जादा धन-दौलत किसी रिया जिन्दगिया जो नीं बचाई सकदी।”
16यीशुये ये उदाहरण सुणाया, “इक अमीर माहणुये री धरतिया पर बौहत भारी फसल पज्जी। 17तिने अपणे मना च सोच्चया, ‘हऊँ नीं जाणदा भई हऊँ क्या करूँ, काँह्भई इतणा अनाज रखणे खातर मेरे भण्डारा च काफी जगह नीं?’ 18तिने गलाया, हाँ, ‘मांह ये काम्म करना! मांह अनाजा रे इन्हां भण्डाराँ जो तोड़ीने बड्डे भण्डार बणांगा तांई मेरले सारा अनाज कने सारिया सम्पत्तिया जो रखणे खातर काफी जगह हूणी। 19तिसते बाद माह चैना ने बैठणा कने अप्पूँजो बोलणा, मेरे मन, औणे औल़े कईयां साल्लां तक तेरले काफी अनाज हुईग्या; हुण आराम कर, खा-पी, कने मौज कर!’ 20पर परमेशरे तिसजो गलाया, ‘अरे मूर्ख! तूं इसा इ राति मरी जाणा! फेरी ये सारा किछ किसरा हूणा, तिसजो जे तैं कट्ठा कित्तिरा?’ 21तिस माहणुये ने बी येढ़ा इ हूणा सै जे अपणे खातर दुनियां री धन-दौलत त कट्ठी कराँ, पर परमेशरा सौगी कीमती रिश्ता नीं रखदा।”
परमेशरा पर भरोसा रखा
(मत्ती 6:25-34)
22फेरी तिने अपणे चेलयां ने बोल्या, “इस खातर हऊँ तुहांजो बोलां, भई अपणे प्राणा रे खातर ये फिक्र नीं करयां भई अहें क्या खांगे, कने शरीरा रे खातर भई क्या पैहन्गे। 23काँह्भई रोटिया ते प्राण, कने कपड़यां ते शरीर बधी नेआ। 24कावां पर ध्यान देआ; सै न त बिजाई कराँ ये, न कटाई कराँ ये, न भण्डार भराँ ये; तां बी परमेशर तिन्हौं पाल़ां, तुहांरा मुल इन्हां पंछियां ते कई गुणा जादा! 25तुहां चते येढ़ा कुण आ, सै जे चिन्ता करने ते अपणिया जिन्दगिया च इक पल बी बधाई सक्कां? 26जे फिक्र येढ़ि इक छोट्टी जेई गल्ल बी नीं करी सकदी, तां बड्डियां गल्लां रा फिक्र करने ते क्या फैदा?
27“जंगली फुलां रे डाल़ां खौ ध्यान देआ भई सै कियां बधां यें; सै न मेहणत कराँ ये, न कपड़े बुणां ये; तां बी हऊँ तुहांजो बोलां, भई बादशाह सुलैमान बी अपणे सारे राज-पाठा च, तिन्हां चते किसी इक्की फूल्ला साई बाँके कपड़े पैहनी नीं सक्कया। 28इस खातर जे परमेशर जंगली पौध्यां जो, सै जे आज्ज ये, कने कल अग्गी च पाई दित्ते जाणे, इस तरिके ने सजां; तां ओ कमजोर विश्वासियो, सै तुहौं काँह नीं पैहनांगा। 29कने खाणे री फिक्र नीं करा भई क्या खांगे या क्या पींगे, कने न सन्देह करा। 30काँह्भई ये संसारा रे लोक इन्हां सारियां चिज़ां री लालसा च रैं, कने तुहांरा पिता जाणाँ, भई तुहांजो इन्हां चिज़ां री जरूरत इ। 31पर परमेशरा रे राज्जा री लालसा करा, तां ये सारा किछ तुहांजो मिली जाणा।
स्वर्गीय धन
(मत्ती 6:19-21)
32“इस खातर भेडां साई भोल़े-भाल़े, मेरे छोट्टे झुण्डा! मता घबरान्दे, काँह्भई तुहांजो स्वार्गा रा राज देणे च पिता परमेशरा जो बड़ा नन्द औआं। 33अपणी संपत्ति बेच्चीने गरीबां च बंडी दे; कने अपणे खातर येढ़े बटुये बणावा, सै जे पुराणे नीं हुन्दे, यनिके स्वर्गा च येढ़ा धन कट्ठा करा सै जे घटदा नींआ कने तिसरे नेड़े चोर नीं जान्दा, कने कीड़ा नीं बगाड़दा। 34तित्थी जे तुहांरा धन आ, ऊथी तुहांरा मन बी लगीरा रैहणा।
जागदे रौआ
35“परमेशरा री सेवा खातर सदा त्यार रौओ कने चौकन्ने रौओ। 36कने तिन्हां लोकां साई बणा सै जे ब्याह री धाम्मा ते वापस औंदे अपणे मालका रा इन्तजार करया दे ओ, भई सै ब्याह ते वापस आओ कने दरवाजा खड़काये, तां सै इकदम तिस खातर दरवाजा खोल्ली सक्को। 37आशीषित ये सै सेवक सै जे मालका रे औन्दे इ तिसजो जागदे कने त्यार हुईरे मिलां ये। हऊँ तुहांजो सच्च बोलां, भई सै बी तिन्हां रिया सेवा खातर अपणी कमर बन्हीने तिन्हाजो रोटी खाणे बठाल़गा, कने नेड़े आईने तिन्हारी सेवा करगा। 38सै मालक अधिया राति या सबेर हुणे ते पैहले बी आई सक्कां, पर जिस बगत बी सै आओ, तां तिन्हां सेबकां जो जे त्यार हुईने बैठिरा पांगा तां सै सेबक धन्या ये! 39पर तुहें येढ़ा जाणी लवा, भई जे घरा रे मालका जो येढ़ा पता होन्दा भई चोर किस बगत औणे औल़ा तां सै जागदा रेहन्दा कने तिस्सो अपणे घरा च बड़ने नीं देन्दा। 40इस खातर तुहें बी त्यार रौआ काँह्भई माहणुये रे पुत्रा येढ़िया घड़िया औणा तिसरे बारे च तुहें सोच्ची बी नीं सकदे।”
बिश्वासा रे लैक या अविश्वासा रे लैक दास
(मत्ती 24:45-51)
41फेरी पतरसे पुच्छया, “प्रभु जी, ये कहाणी तुहें अहांरे खातर बोल्ली राँये; या सारयां रे खातर इ?”
42प्रभुये गलाया; “सै विश्वास लायक कने समझदार भण्डारी कुण हूणा, तिसरा मालक जे तिस्सो नोकराँ-चाकराँ पर मुखिया बणाईने घरा री रखवाल़ी करने कने ठीक बगता पर तिन्हांजो रोटी देणे री जिम्मेवारी सम्भाल़े। 43आशीषित आ सै दास, ताहली जे तेरा स्वामी औआं तां तिज्जो काम्म करदे हुये देक्खां। 44हऊँ तुहांजो सच्च बोलां; भई तिस नोकरा जो अपणी सारी जायदाता पर निगरानी करने खातर भण्डारीये रा औहदा देणा। 45पर जे सै दास सोचणे लगो, भई ‘मेरा मालक त औणे च बौहत देर करी रां,’ कने सै दुज्यां दास-दासियां जो मारना-कुटणा शुरु करी दो कने धाम्मां करया दा ओ, कने शराब पी ने टुन रहणे लगो, 46तां तिस दास्सा रे मालका येढ़े दिन आई जाणा तिसरे बारे जे तिने सोचया बी नीं ओ। तिस अपणे दास्सा जो बुरे हाल्लें फटकारना, इस तरिके ने तिसरा अन्त बी तेढ़ा हूणा सै जे अविश्वासियां रा हुआं।
47“कने सै दास जे अपणे मालका री इच्छा जाणदा था कने तिस खातर त्यार नीं रेआ कने मालका रिया इच्छा रे मुतावक नीं चलया तां तिस्सो शख्त सजा दित्ति जाणी। 48पर तिस्सो जे अपणे मालका रिया इच्छा री समझ नीं कने येढ़ा कोई काम्म करी बैट्ठो सै जे मार खाणे लायक ओ तां तिस दास्सा जो हल्की मार पौणी। इस खातर तिसजो जे बौहत दित्तिरा मालका तिस्सो कड़ी सजा देणी। तिस माहणुये ते तिस्सो जे लोकें जादा दितिरा, तिसते जादा इ मंगणा।
यीशुये रे औणे रा परिणाम
(मत्ती 10:34-36)
49“हऊँ धरतिया पर आग्ग लगाणे आया, कने मेरी कितणी इच्छा इ भई सै येब्बां तेई भड़की जान्दी। 50पर औणे औल़े दिनां च मिन्जो कष्टां येढ़े डुबोई देणा तियां जे बपतिस्मे च पाणी माहणुये जो डुबोई देआं, कने तदुआं तक जे सै पूरा नीं हुई जान्दा, तदुआं तक मेरा मन बड़ा व्याकुल रैहणा। 51तुहें क्या समझां ये भई हऊँ इसा धरतिया रे लोकां जो शान्ति देणे आईरा? नां, हऊँ येत्थी लड़ाई झगड़े कराणे कने बंडवारा करने खातर आईरा! 52काँह्भई हूणा ते परिवारा रे पंज्जां माहणुआं रे बिच बरोध पैदा हुणे, तिन्न लोक मेरी ओर हुणे, कने दो मेरे बरोधा च हुणे। 53पिता कने पुत्रा रे बिच, मौआ कने धिया रे बिच, सस्सा कने बहुआ रे बिच इक्की दूये रे परति बरोधा च खढ़ना।”
समय रे लक्ष्ण
(मत्ती 16:2,3)
54कने यीशुये भीड़ा ने बी बोल्या, “ताहली जे तुहें पच्छमा च बद्दल़ां जो उठदयां देक्खां ये, तां इकदम बोलां ये, ‘बरखा हूणी,’ कने तेढ़ा इ हुआं। 55कने ताहली जे दखणा ते हवा चल्दिया जो देक्खां ये, तां बोलां ये, भई ‘लू चलणी,’ कने तेढ़ा इ हुआं। 56कपटियो, तुहें धरतिया कने अम्बरा रे रंग रुपा च फर्क देक्खी सक्कां ये, पर इस जुगा च परमेशर क्या करया रां इसरा बखान करना नीं जाणदे?
अपणे दुश्मणा ने समझौता
(मत्ती 5:25,26)
57“तुहें अप्पूँ इ इसा गल्ला रा फैसला काँह नीं करी लेंदे भई क्या करना ठीक आ? 58ताहली जे तू अपणे दुशमणा ने सौगी हाकिमा ले जायादा ओ तां रस्ते ची तिसने समझौता करने रा जतन करी लै येढ़ा नीं ओ, भई सै तिज्जो जज्जा रे सामणे खिंजी ने लेई जाओ कने जज तिज्जो जेलरा रे हत्था च सौंपी दो। कने जेलर तिज्जो जेल्ला च बंद करी दो। 59हऊँ तुहां बोलां भई तदुआं तक जे तू पाई-पाई चुकाई नीं देंगा तदुआं तक तित्थीते छुट्टी नीं पाणा।”
Currently Selected:
लूका 12: KFSNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
