यूहन्ना 3

यीशु कने नीकुदेमुस

1निकुदेमुस नौआं रा इक माहणु था, सै जे यहूदियां रा धार्मिक अगुवा था, सै इक फरीसी था। 2सै रात के बगत यीशुये ले आया कने बोल्या, गुरू जी, हऊँ जाणाँ भई तुहें परमेशरा रिया तरफा ते अहांजो सखाणे आईरे, काँह्भई सै चमत्कार जे तुहें दस्सां ए तिस्सो परमेशरा रिया सहायता ते बगैर कोई बी नीं दस्सी सकदा। 3यीशुये तिसजो जबाब दित्या, हऊँ तुहांजो सच्च बोलां, भई कोई बी परमेशरा रे राज्जा जो देक्खी नीं सकदा, तदुआं तक जे सै दोबारा जन्म नीं लौ। 4निकुदेमुसे तिसजो गलाया, “तां जे इक माहणु बुढा हुई जां, तां फेरी तिसरा जमणा कियां हुई सक्कां? क्या सै फेरी भीं अपणिया मौआ रे पेट्टा च जाईने दुज्जी बार जन्म लेई सक्कां?” 5यीशुये तिस्सो जबाब दित्या, “हऊँ तेरने सच्च बोलां, कोई बी परमेशरा रे राज्जा च दाखल नीं हुई सकदा तदुआं तक जे सै पाणिये ते कने आत्मा ते जन्म नीं लौ। 6माता-पिता अपणे बच्चयां जो जन्म दें, फेरी बी सिर्फ परमेशरा रा आत्मा तुहांजो परमेशरा रिया सन्तान्ना रे रूपा च बदली सक्कां। 7मेरिया बोल्ली रिया गल्ला पर चम्भा नीं कर भई ‘तिज्जो दोबारा जन्म लेणे पौणा।’ 8सै जे कोई पवित्र आत्मा ते जम्मीरा सै येढ़ा इ हाया, तियां जे हवा तितखा जे बैहणा चाईं तितखौ बैहणे लगां इ। तू तिसारी अवाज़ सुणां, पर ये नीं दस्सी सकदा भई सै कित्खा ते औआंईं कने कित्खौ जाईं?” 9निकुदेमुसे यीशुये जो जबाब दित्या, भई “येढ़ा कियां हुई सक्कां?” 10ये सुणीने यीशुये तिसजो जबाब दित्या, “तू इस्राएलियां रा गुरू हुईने बी इन्हां गल्लां जो नीं समझदा? 11हऊँ तुहांजो सच्च बोलां, भई अहें सै जे जाणाँ ए सैई बोलां ए, कने अहें सै जे देक्खीरा तिसरी ही गवाही दें, कने सै जे अहें बोलां ए तिस पर तुहें विश्वास नीं करदे। 12ताहली जे हऊँ तुहांने संसारा रे बारे च गल्लां करां, तां तुहें मेरा विश्वास नीं करदे, पर जे हऊँ तुहांने स्वर्गा रे बारे च गल्लां करूँ तां कियां विश्वास करगे? 13कोई स्वर्गा जो नीं गया, पर सिर्फ माहणुये रा पुत्र यनिके हऊँ, सै जे स्वार्गा ते उतरी ने आईरा। 14कने तियां जे मूसे सुनसान जगह च पितल़ी रे बणीरे सर्पा जो ऊच्चिया ठारी टंगाया, तियां इ मेरा यनि माहणुये रे पुत्रा रा ऊच्चिया ठारी टंगया जाणा बी जरूरी आ; 15ताकि सै जे कोई माह पर विश्वास करो, सै अनन्त जीवन पाओ।”

16“काँह्भई परमेशरे संसारा रे लोकां ने इतणा प्यार कित्या भई तिने अपणे इकलौते पुत्रा जो तिन्हांरे खातर बलिदान करित्या, ताकि हर इक माहणु सै जे तिस पर विश्वास करो, सै नाश नीं हो, पर अनन्त जीवन पाओ। 17काँह्भई परमेशरे अपणे पुत्रा जो संसारा च इस खातर नीं भेज्या भई सै संसारा रे लोकां जो सजा रा हुक्म देओ, पर इस खातर भेज्या भई संसारा रे लोक तिसरे जरिये छुटकारा पाओ। 18सै जे परमेशरा रे पुत्रा पर विश्वास कराँ, तिस पर सजा देणे रा हुक्म नीं हुन्दा, पर सै जे तिस पर विश्वास नीं करदा, सै दोषी हुई चुक्कीरा; काँह्भई तिने परमेशरा रे इकलौते पुत्रा पर विश्वास नीं कित्या। 19सजा रे हुक्मा री वजह येई भई जोति इसा दुनिया च आई कने लोकें अन्धेरे जो जोतिया ते जादा प्यारा समझया, काँह्भई तिन्हांरे काम्म बुरे थे। 20काँह्भई सै माहणु जे पाप कराँ सै जोतिया ते नफरत कराँ, कने सै जोतिया रे नेड़े तां नीं औन्दा भई किति तिन्हारे पाप सामणे नीं आई जो। 21पर सै माहणु जे सच्चाईया पर चलां सै जोतिया रे नेड़े औआं ताकि तिसरे काम्म दिखी जाओ भई ये परमेशरा रिया तरफा ते हुईरे।”

यीशु रे बारे च यूहन्ने री गवाही

22इसते बाद यीशु अपणे चेलयां सौगी यहूदिया प्रदेशा च आए; कने तित्थी सै तिन्हां सौगी रैईने लोकां जो बपतिस्मा देणे लगया। 23कने यूहन्ना बी एनोन नौआं रे गाँवां च सै जे सामरिया इलाके च सालोम नगरा ले था बपतिस्मा देआं था, काँह्भई तित्थी बौहत सारा पाणी था कने लोक तित्थी आईने बपतिस्मा लेआं थे। 24ये तिस वगता री गल्ल इ ताहली जे यूहन्ने जो बन्दी बणाईने जेल्ला च कैद नीं कित्तिरा था। 25ऊत्थी यूहन्ने रे चेलयां री किसी यहूदी धर्म गुरुये सौगी शुद्धीकरण रे बारे च बैहस बसाई हुईगी। 26इस खातर यूहन्ने रे चेले तिसले आये कने गलाया, “गुरू जी, सै माहणु जे यरदन नदिया रे पार तुहां सौगी था, कने तिसरे बारे च जे तुहें गल्ल कित्ती थी, सै माहणु बपतिस्मा देआं, कने हर इक माहणु तिसलौ बपतिस्मा लेणे जाया रां।” 27यूहन्ने जबाब दित्या, ताहलुआं तक जे किसी माहणुये जो स्वर्गा ते नीं दित्या जाओ, ताहलुआं तक सै किछ नीं पाई सकदा। 28तुहें सब मेरे गवाह ये भई मैं गलाया था, हऊँ मसीह निआं, पर मिन्जो तिसते पैहले भेजीरा। 29लाड़ा-लाड़ी ब्याह करी लें; पर लाड़े रा मित्र खड़ा हुआं कने तिसजो सुणां, कने सै लाड़े रिया अवाज़ा ते बड़ा खुश हुआं: मेरी खुशी येढ़ि ही हाई कने हुण सै पूरी हुई। 30ये जरूरी आ भई सै बौहत खास हुई जाणे चाहिन्दे, जबकि हऊँ खास नीं होऊं।

31“सै जे स्वर्गा ते औआं सै सब्बीं ते महान आ; कने सै जे धरतिया ते औआं, सै धरतिया रा, इस खातर सै धरतिया ने जुड़ी रियां ही गल्लां करां : कने सै जे स्वर्गा ते उतरी रा, सै सब्बीं ते महान आ। 32तिने सै जे किछ देख्या, कने सुणया, सै तिसरी गवाही देआं, पर बड़े घट लोक तिसरे सन्देशा जो ग्रहण करां ये। 33पर तिने माहणुये जे तिसरे सन्देशा पर विश्वास कित्या, सै इस पर सैहमत हुईग्या भई परमेशर सच्चा। 34काँह्भई तिस्सो जे परमेशरे भेज्जीरा, सै परमेशरा रियां इ गल्लां बोलां; काँह्भई ये सैई आ तिसजो जे परमेशरे पवित्र आत्मा पूरे तरिके ने देई दित्तिरा। 35या पिता परमेशर अपणे पुत्रा जो प्यार करां, कने तिने सारा किछ तिसरे अधिकारा च दित्तिरा। 36इस खातर सै जे कोई परमेशरा रे पुत्रा पर विश्वास करां, तिसजो इ अनन्त जीवन मिलणा; पर सै माहणु जे परमेशरा रे पुत्रा री गल्ल नीं मनदा, तिस्सो अनन्त जीवन नीं मिलणा, पर परमेशरा तिसजो अनन्त काल री सजा देणी।”

Currently Selected:

यूहन्ना 3: KFSNT

Highlight

Copy