यूहन्ना 19

1फेरी पिलातुसे सिपाईयां जो हुक्म दित्या भई यीशुये जो लेई जो कने तिस्सो कोड़े मरा। 2फेरी सिपाईयें कण्डेयां रा मुकट बणाईने तिसरे सिरा पर रख्या कने तिस्सो जामनी रंगा रा चोल़ा पैहनाया। 3फेरी सै तिसले आईने बोलणे लगे, “यहूदियां रे राजा प्रणाम!” तिन्हें यीशुये जो थप्पड़ मारे। 4पिलातुस इक बार भीं मैहला ते बाहर आया कने लोकां ने बोल्या, देक्खा, हऊँ तिस्सो तुहां लोकां रे सामणे बाहर ल्याया रां, तिसते जे तुहें ये जाणी लो भई मिन्जो तिसच कोई खोट नीं मिल्या। 5फेरी यीशु बाहर आया, तिने सिरा पर कण्डयां रा मुकट कने जामनी रंगा रा चोल़ा पैहनीरा था, पिलातुसे लोकां ने बोल्या, “देक्खा, येआ सै माहणु।” 6मुखियायाजकें कने मंदरा रे पैहरेदारें तिस्सो देखदे इ रौल़ा पाया, कने बोल्या, “इस्सो क्रूसा पर चढ़ाओ! इस्सो क्रूसा पर चढ़ाओ!” पिलातुसे तिन्हांने बोल्या, इस्सो तुहें इ लईजो कने क्रूसा पर चढ़ाओ, हऊँ इसच कोई खोट नीं पान्दा। 7यहूदी अगुवेयां तिस्सो जबाब दित्या, “अहांरी इक व्यवस्था इ कने तिसा व्यवस्था रे मुतावक मौती रिया सजा रे लायक आ, काँह्भई ये अप्पूँजो परमेशरा रा पुत्र हुणे रा दावा करां।” 8तां जे पिलातुसे तिन्हांजो ये बोलदे सुणेया, तां सै बौहत इ जादा डरीग्या। 9तिने फेरी मैहला रे अन्दर जाईने, यीशुये ते पुच्छया, “तू किति तेआ?” पर यीशुये तिस्सो कोई जबाब नीं दित्या। 10इस पर पिलातुसे तिस्सो बोल्या, क्या तू मेरने गलाणा नीं चाहन्दा? क्या तू नीं जाणदा भई मिन्जो तिज्जो छडणे रा बी अधिकार आ कने तिज्जो क्रूसा पर चढ़ाणे रा बी अधिकार आ। 11यीशुये तिस्सो जबाब दित्या, “जे परमेशरा रिया तरफा ते तिज्जो अधिकार नीं दित्या हुन्दा; तां तेरा मांह पर कोई अधिकार नीं हुंदा; इस खातर तिने माहणुये जे मिन्जो तेरे हवाले कित्तिरा, तिसरा पाप जादा।”

12ये सुणीने पिलातुस यीशुये जो छडणे री होर बी कोशिश करने लगया। यहूदी लोक चिखणे इ लगीगे, जे तैं इस्सो छडया तां तू बादशाह कैसरा रा मित्र निआं, सै जे अप्पूँजो राजा हुणे रा दावा करो, तां सै कैसरा रा बरोधी आ। 13तंजे पिलातुसे ये गल्लां सुणियां तां, यीशुये जो पत्थरा रे चबुतरे पर लईग्या तिस पर जे बैट्ठीने न्याय कित्या जां, तिस्सो जे इब्रानी भाषा च गब्बता या पत्थरा रा फर्श बोलां ये, कने सै न्याय करने आसणा पर बैठिग्या। 14ये फसह रे त्योहारा रे हफ्ते रिया त्यारिया रा दिन था। ये तकरीवन दोपैहरयां री गल्ल इ। पिलातुसे यहूदी लोकां ने बोल्या, देक्खा, ये रैया तुहांरा राजा। 15फेरी सै रड़ाये, इस्सो लेई जावा, इस्सो मारी देवा, कने इस्सो क्रूसा पर चढ़ाओ! पिलातुसे तिन्हांजो बोल्या, क्या तुहें चाँह ये भई हऊँ तुहांरे राजे जो क्रूसा पर चढ़ाऊं? इस पर मुखियायाजकें जबाब दित्या, कैसरा जो छड्डिने अहांरा कोई दुज्जा राजा निआं। 16फेरी पिलातुसे यीशुये जो क्रूसा पर चढ़ाणे खातर सपाईयां रे हवाले करित्या, कने सै तिस्सो बाहरौ लईगे;

क्रूसा पर चढ़ाया जाणा

(मत्ती 27:32-44; मरकुस 15:21-32; लूका 23:26-43)

17फेरी सिपाईयें यीशुये जो अपणे कब्जे च लेआ। तिन्हें तिसरा क्रूस तिसले खुद चकाया कने तिस्सो यरूशलेम नगरा ते बाहर खोपड़ी नौआं रिया जगह पर लेईगे, तिस्सो जे इब्रानी भाषा च गुलगुता बोल्या जां। 18तित्थी तिन्हें यीशुये जो दो होरी कैदियां ने सौगी क्रूस पर चढ़ाया। इक तिसरे सज्जे कने इक तिसरे खब्बे हत्था, यीशु तिन्हांरे बिच्चा औल़े क्रूसा पर चढ़ाया। 19कने पिलातुस राजपाले दोषपत्र लिखीने क्रूसा पर लगवाया। तिसच लिखिरा था, यीशु नासरी, यहूदियां रा राजा। 20बौहत सारे यहूदी लोकें तिस दोष पत्रा जो पढ़या, काँह्भई तित्थी जे यीशुये जो क्रूसा पर लटकाया था, सै जगह यरूशलेम नगरा ते नेड़े थी, कने ये पत्र यूनानी, लतीनी कने इब्रानी भाषा च लिखिरा था। 21तां यहूदियां रे मुखियेयाजकें पिलातुस ने बोल्या, यहूदियां रा राजा नीं लिख, पर ये लिख, भई तिने बोल्या, भई “हऊँ यहूदियां रा राजा।” 22पिलातुसे तिन्हांजो जबाब दित्या, मैं सै जे लिखित्या, सै लिखित्या।

23तंजे सिपाईयें यीशुये जो क्रूसा पर लटकाईत्या, तां चऊँ सिपाईयें तिसरे कपड़े अप्पूँ चियें चऊँ हिस्यां च बंडी ले। इक्की सपाईये खातर इक हिस्सा था, तिने तिसरा चोल़ा बी त्वारील्या काँह्भई सै उपरा ते थल्ले तकौ बिणा किसी सलाई देईने बुणीरा था। 24इस खातर सिपाईयें इक्की दूये ने बोल्या, भई अहां इस्सो फाड़ना निआं, पर इस पर पर्चियां पाईने तिसरा जे नौं निकलगा तिस जोई मिलणा। काँह्भई पवित्रशास्त्रा च सै जे लिख्या गईरा सै पूरा हुईजो, तिन्हें मेरे कपड़े बी अप्पूँ चियें बंडी ले, कने मेरे कुरते खातर पर्चियां पाईयां। सिपाईयें ठीक येढ़ा इ कित्या।

25पर यीशुये रे क्रूसा ले तिसरी माता, कने तिसरिया माता री बैहण, क्लोपास री जनाना मरियम, कने मगदल गाँवां री मरियम बी खढ़ी रियां थिआं। 26तंजे यीशुये अपणी माता कने अपणे प्यारे चेले जो तित्थी खढ़िरे देख्या, तां अपणिया माता ने बोल्या, “माता, ये तेरा पुत्र आ।” 27फेरी तिने अपणे चेले जो बोल्या, “ये तेरी माता इ।” तिस इ बगता ते सै चेला यीशुये रिया माता जो अपणे घरें लेईग्या कने अपणे पास रक्खया।

यीशुये री मौत

(मत्ती 27:45-56; मरकुस 15:33-41; लूका 23:44-49)

28इसते बाद तंजे यीशुये जो पता लगीग्या भई तिसरा सारा काम्म पूरा हुईग्या, इसी खातर बी भई पवित्रशास्त्रा री गल्ल पूरी हो तिने बोल्या, मिन्जो ध्याय लगीरी, 29तित्थी सिरके ने भरीरा इक बरतण रखीरा था। इस खातर तिन्हें सपंजा जो सिरके च डबोया, कने जूफा रे डाल़ा रा डन्डा लेईने तिस पर रक्खीने यीशुये रे मुँआं ने लाया। 30फेरी तंजे यीशुये तिसजो चखीने बोल्या भई “सब किछ पूरा हुआ।” तां तिने अपणा सिर थल्ले खौ कित्या कने प्राण छड्डीते।

भाले ने बिन्या जाणा

31हुण ये त्यारिया रा दिन था कने अगले दिन फसह रा कने विस्राम रा दिन दोन्नों इ थे। ये यहूदी लोकां रे खातर इक खास दिन था कने सै नीं चाहन्दे थे भई इस दिन किसी रा बी शरीर क्रूसा पर लटकीरा रौ। इस खातर यहूदियें पिलातुस ने विनती कित्ती भई तिन्हांरियां लत्तां तोड़ी दित्तियां जाओ ताकि तिन्हांरी मौत छोड़ हुईजो कने तिन्हांरे शब क्रूसा परा ते थल्ले उतारे जाई सक्को। 32इस खातर सिपाई आये कने तिन्हां चते तिन्हां दुईं कैदियां रियां, लत्तां तोड़ी तियां, सै जे यीशुये सौगी क्रूसा पर चढ़ाईरे थे। 33तंजे सै यीशुये लौ आये, तां तिन्हें देख्या, भई सै पैहले इ मरीगरा था। इस खातर तिन्हें तिसरियां लतां नीं तोड़ियां। 34पर तिन्हां चते इक्की सिपाईये यीशुये रिया बखिया च अपणा भाला मारया, तिसते जे ताहलूं इ खून कने पाणी निकल़या। 35तिने माहणुये जे ये गल्लां हुन्दे हुये देखियां, तिने इ इस बारे च गवाही दित्ति, ताकि तुहें बी यीशुये पर विश्वास करी सक्को। तिसरी ये गवाही सच्ची, कने सै जाणाँ भई तिने सच्च बोल्या। 36ये इस खातर हुआ भई, पवित्रशास्त्रा च लिखिरा वचन पूरा हुई जाओ, “तिसरी कोई बी हड्डी नीं टुटणी।” 37कने इक होर गल्ल पूई हुई सै जे पवित्रशास्त्रा च लिखिरी भई, “तिस्सो तिन्हें भाले ने बिन्हया, तिन्हां इ तिसखा देखणा।”

यीशुये रा कब्रा च रखया जाणा

(मत्ती 27:57-61; मरकुस 15:42-47; लूका 23:50-56)

38इसते बाद अरिमतियाह गाँवां रे यूसुफे सै जे यीशुये रा चेला था, (पर यहूदी अगुवेयां रे डरा ते इसा गल्ला जो लुकोई रक्खां था) तिने पिलातुसा ते विनती किति, भई यीशुये रिया लाशा जो तित्थी ते नेणे रा हुक्म देओ। पिलातुसे तिस्सो इजाजत दईती, कने सै तित्थी आईने तिसरिया लाशा जो लईग्या। 39निकुदेमुसे बी, तित्थी तकरीवन तेती किलो गन्धरस कने एलोवेरा मलाईने ल्या। ये सैई नीकुदेमुस था सै जे यीशुये लौ राति रे बगत आया था, 40फेरी तिन्हें यीशुये रिया लाशा जो लेआ कने यहूदियां रे दबणे रिया प्रथा रे मुतावक, तिस्सो खुशबुदार समान्ना सौगी कफ़णा च लपेटित्या। 41तिस जगह पर जे यीशुये जो क्रूसा पर चढ़ाईरा था, तिसरे नेड़े इक बाग बी था। कने तिस बागा च इक नौंईं कब्र थी, तिसच जे कदीं किसी रिया लाशा जो नीं रखीरा था। 42कने सै कब्र बौहत नेड़े थी, इस खातर तिन्हे यीशुये रिया लाशा जो तिसच रखीत्या। कने ये यहूदियां रा विस्रामा रिया त्यारिया रा दिन था,

Currently Selected:

यूहन्ना 19: KFSNT

Highlight

Copy