प्रेरितां 8

कलीसिया पर अत्याचार

1शाऊल स्तिफनुस रिया हत्या च सहमत था। तिस दिन यरूशलेम नगरा री कलीसिया पर बड़ा सताव शुरु हुआ कने प्रेरितां जो छड्डिने बौहत सारे लोक यहूदिया कने सामरिया प्रदेशां च नट्ठीने बिखरी गे। 2किछ धर्मी लोकें स्तिफनुसा जो कब्रा च रखया कने तिसरे खातर बौहत रोये कने दुख मनाया। 3शाऊल कलीसिया जो सताया राँ था; कने घरें-घरें बड़ीने विश्वासी जनाना कने मर्दां जो घसीटी-घसीटी ने जेलखान्ने च पां था।

सामरिया च फिलिप्पुसा रा प्रचार

4पर सै विश्वासी जे बिखरी गरे थे, कने तित्थी जे सै गये खुशखबरी सुणांदे रै; 5कने फिलिप्पुस सामरिया रे इक नगरा च जाईने लोकां जो मसीह रा प्रचार करने लगया। 6सै जे गल्लां फिलिप्पुसे बोलियां लोकें तिन्हांजो सुणीने कने सै जे चमत्कार सै दस्सां था तिन्हांजो देखी-देखीने, इक चित हुईने मन लगाया। 7काँह्भई ताहली जे फिलिप्पुस बुरीआत्मा जो हुक्म देआं था, तां बुरीआत्मा बौहतां चते बडिया अवाज़ा च रड़ांदियां निकल़ी गईयां, कने बौहत लकवे रे रोगी कने लंगड़े बी ठीक हुये; 8कने तिस नगरा रे बौहत लोक खुश हुईगे।

जादूगर शमौन

9तिस नगरा च शमौन नौआं रा इक माहणु था, सै जे जादू-टोणा करीने सामरिया रे लोकां जो हैरान कराँ कने अप्पूँजो इक खास माहणु समझां था। 10तित्थी सारे लोक, दोयो आम लोकें कने खास लोकें तिसरी गल्ल सुणी। सै बोलीराँ थे, “ये माहणु परमेशरा री महान सामर्थ इ।” 11तिने बौहतीं दिनां ते तिन्हांजो अपणे जादुये रे कम्मां ते हैरान कित्तिरा था, इस खातर सै तिस्सो बौहत मन्नां थे। 12पर ताहली जे लोकें परमेशरा रे राज्जा कने यीशु मसीह रे नौआं री खुशखबरिया च फिलिप्पुस रा सन्देश सुणीने विश्वास कित्या, जनाना कने मर्द दुईं ही बपतिस्मा लेआ। 13तां शमौने अपणे आप बी फिलिप्पुसा रे सन्देशा पर विश्वास कित्या कने बपतिस्मा लईने फिलिप्पुसा ने सौगी रैहणे लगया। सै चमत्कारी नशाण कने बड़े-बड़े सामर्था रे काम्म हुंदे देखीने हैरान हुआं था।

सामरिया च पतरस कने यूहन्ना

14ताहली यरूशलेम नगरा च प्रेरितें ये सुणया भई सामरी लोकें परमेशरा रा वचन मन्नी लईरा, तां पतरस कने यूहन्ना जो तिन्हांला जो भेज्या। 15तिन्हें तित्थी पुज्जीने तिन्हांरे खातर प्राथना कित्ती भई पवित्र आत्मा पाओ। 16काँह्भई पवित्र आत्मा हूणा तका तिन्हां चते किसी पर मनी आया था; तिन्हें त सिर्फ प्रभु यीशुये रे नौआं च बपतिस्मा लईरा था। 17फेरी पतरस कने यूहन्ने तिन्हांरे सिरा पर हात्थ रखे कने तिन्हें पवित्र आत्मा पाया। 18तां जे शमौने देख्या भई प्रेरितां रे हाथ रखणे ते पवित्र आत्मा मिलां, तां तिन्हांला जो पैसे ल्याईने आया कने गलाया, 19“ये सामर्थ मिन्जो बी देआ भई जिस किसी पर हाथ रखूं तिस्सो पवित्र आत्मा मिली जाओ।” 20पतरसे तिसजो गलाया, “तू कने तेरे पैसे नाश हुईजो, काँह्भई तैं परमेशरा रा दान पैसयां च खरीदणे रा बचार कित्या। 21इसा सेवा च तेरा किछ बी हिस्सा नींआ; काँह्भई तेरा मन परमेशरा रे सामणे सच्चा नींआ। 22इस खातर अपणिया इसा बुराईया ते मन फिराई ने प्रभुये ले प्राथना कर, हुई सक्कां भई तेरे मना रा बुरा बचार माफ कित्या जाओ। 23अपणयां बुरयां कम्मां ते दूर हुई जवा काँह्भई हऊँ समझां भई तू अहांने बौहत नफरत कराँ, कने पापां रे चुँगल़ा च फसीरा।” 24शमौने जवाब दित्या, “तुहें मेरे खातर प्रभुये ले प्राथना करा भई सै जे गल्लां तुहें बोलियां, तिन्हां चते कोई बी मेरे परा नीं पौ।”

25इस खातर सै गवाही देईने कने प्रभुये रा वचन सुणाईने यरूशलेम नगरा जो वापस हुन्दे वगत, तिन्हें सामरिया प्रदेशा रे कई गाँवां च खुशखबरी सुणाई।

फिलिप्पुस कने कूश देशा रा अधिकारी

26फेरी प्रभुये रे इक्की स्वर्गदूते फिलिप्पुसा ने गलाया, “उट्ठ कने दखणा खा रे तिस रस्ते परा जो जा, सै जे यरूशलेम ते गाजा नगरा जो जाँ।” 27सै उट्ठीने चलीप्या, कने फेरी, कूश देशा रा इक माहणु आयाराँ था सै जे खोज्जा (खुसरा) था कने कूशियां री राणी कन्दाके रा मन्त्री कने खजानची था। सै अराधना करने जो यरूशलेम च आया था। 28कने सै अपणे रथा पर बैठिरा था, कने यशायाह भविष्यवक्ता री कताब पढ़दा हुआ वापस अपणे देश जाया राँ था। 29तां पवित्र आत्मे फिलिप्पुसा ने गलाया, “नेड़े जाईने इस रथा ने सौगी-सौगी चल्ल।” 30फिलिप्पुस तिसखा दौड़ीने रथा ले पुज्या कने तिस्सो यशायाह भविष्यवक्ता री कताब पढ़दे सुणया, कने पुच्छया, “तू जो किछ पढ़या राँ क्या इस्सो समझां बी आ?” 31तिने गलाया, “तदुआं तका जे मिन्जो कोई नीं समझाओ तां माह कियां समझणा?” कने तिने फिलिप्पुसा ने विनती कित्ती भई सै रथा पर चढ़ीने तिसने सौगी बैट्ठो। 32पवित्रशास्त्रा रा सै पाठ जे सै पढ़या रां था, सै ये था :

“सै भेड्डां साई कटोणे जो पुजाया गया,

कने तियां जे भेड्डा रा बच्चा अपणी ऊन कड्डणे औल़यां रे सामणे चुप-चाप रैयां,

तियां इ तिने बी अपणा मुँह नीं खोल्या, ताहली जे लोक तिस्सो पीड़ा दें थे।

33तिसरे गरीब हुणे पर बी सै अपमानित हुया कने तिस्सो कोई न्याय नीं मिलया।

तिसरिया पीढ़िया रा कुण बखान करगा? काँह्भई धरतिया ते तिसरा जीवन त लेईल्या था।”

34इस पर खोज्जे फिलिप्पुसा ते पुच्छया, “हऊँ तेरले विनती करां ए दस भई भविष्यवक्ता येढ़ा किसरे बारे च गलाया रां, अपणे या किसी होरसी रे बारे च?” 35तां फिलिप्पुस बोलणे लगया कने इस शास्त्रा ते शुरु करीने तिस्सो यीशु मसीह री खुशखबरी सुणाई, फेरी तिन्हें यीशु मसीह पर विश्वास कित्या। 36रस्ते च चलदे-चलदे सै इक्की पाणिये रिया जगह पुज्जीगे। तां खोज्जे गलाया, “देख येत्थी पाणी आ, हुण मिन्जो बपतिस्मा लेणे च क्या रोक इ।” 37फिलिप्पुसे गलाया, “जे तू सारे मना ते विश्वास करो तां बपतिस्मा लई सक्कां।” तिने जवाब दित्या “हऊँ विश्वास करां भई यीशु मसीह ही परमेशरा रा पुत्र आ।” 38तां तिने रथ खड़ा करने रा हुक्म दित्या, कने फिलिप्पुस कने खोज्जा दोन्नो पाणिये च उतरीगे, कने फिलिप्पुसे खोजे जो बपतिस्मा दित्या। 39तां जे सै पाणिये चते निकल़ीने ऊपर आये, तां प्रभुये रा आत्मा फिलिप्पुसा जो चक्कीने लईग्या, कने खोजे तिस्सो फेरी नीं देख्या कने खुशी मनांदा अपणे रस्ते च चली गया। 40फिलिप्पुस अशदोदा नगरा च आई निकल़या, कने तदुआं तका जे कैसरिया नगरा च नीं पुज्जया, तदुआं तका नगर-नगर खुशखबरी सुणांदा गया।

Currently Selected:

प्रेरितां 8: KFSNT

Highlight

Copy