Yowannisi 19

1Arooba Phelaaxoosi Yesuusin daammiꞌi arengoona xooppiihe. 2Ginee naayinaꞌo taatee malletoon tuneti gubbichoon angixoochee gengiꞌi bi qellooch ukiiheete; damere tahoon biich tajjiyeete. 3Aroochee bi waan giddeebee, “Ayihudeenaꞌo taatoocho, ne taatittino manjibe!” ii cooqqiree diggiyoon diggiiheete; biinoo tappeheete.

4Phelaaxoosi wochinnoon maaxooch kechiꞌi boonoshich “Bi toommooch amee gondoonona danee ta qayon ittoshi ariyemmoyich, biin maach ittoshich kichemmo taane” iye. 5Arooba Yesuusi angichi gubbichoon bi uketonaa damere tahoon bi tahetona maaxooch kechiye; Phelaaxoosi boonoshich “Ebiyoche uro!” iye.

6Qeeshee ukkireenaꞌonaa yaafee kechi kellechinaꞌona beeggiꞌi, “Yoode! Yoode!” iibee cookeeheete.

Phelaaxoosiyoo “Ittoshi daamiree yoodote; bi toommooch ta nallemmi amee gondoonona daneyaano taane” iye.

7Ayihudeenaꞌo wochiꞌi, “Nooch sheeroo beetone; bi qelloon Yeerichi Bushoo bi tuniitoyich, no sheeroochaa qita beddiye” iyeete.

8Phelaaxoosi ishin waayeꞌi aafichoyee beshoon oogichii shattiye. 9Wottee bi kibbooch giyiꞌi Yesuusin “Amoocheeniye ne waato?” iꞌi echehe. Tunebaani Yesuusi minnakanna getaanoone. 10Phelaaxoosi “Amoyich taach getaachine? ‘Yooddebe’ woyee ‘Biichebe’ geto ta kishooch tunoon ariyaachine?” iye.

11Yesuusiyoo wochiꞌi, “Yeeri daaggaan gaata, ta toommooch amoonolla tuniyoon hakkaachesho neene; ebich neech taan beshiiꞌi immitochi axaaxoo beshoone” iye.

12Arooba Phelaaxoosi Yesuusin biicha qaawiye; tunebaani Ayihudeenaꞌo “Hinin ne biishigaata, Qesaari xiboo toono neene; bi qelloon taatiibeeto bulli Qesaarin biiꞌeya itone” iꞌi cookeeheete.

13Phelaaxoosi ishin waayeꞌi Yesuusin maaxooch kichiye; aroochee Xaqqee Godo getteebeeti, woyee Hibiree noonoona Gabeta getteebeeti xaaꞌooch beeti nallee gabberooch kotehe. 14Ebi aabo, Beshee Baaree Qanniyee aaboone; areddee shiritte saati bedoone.

Phelaaxoosi Ayihudeenaꞌon “Ebiyoche, ittoshi taatoo!” iye.

15Tunetaa boonoshi “Wokkiibe! Wokkiibe! Yoode!” iibee cookeeheete.

Phelaaxoosi “Ittoshi taatoon yoodote?” iye.

Qeeshee ukkireenaꞌo “Qesaariyee damba bare taatoo nooch aalloone” iꞌi wochiyeete.

16Ebich arooba Phelaaxoosi Yesuusin boonoshi yooddemmoyich beshiiꞌi immiye.

Yesuusi Yooddeyoo

(Maatiyoosi 27:32-44; Maariqoosi 15:21-32; Luqaasi 23:26-43)

17Aroochee Yesuusin yechiꞌi daammiyeete; bi yooddeyemmi masqaloon shaaggii katemoochee kechiꞌi Qellee Koofee Xaaꞌoo woyee Hibiree noonoona Golgooti gettee beetooch shaggiye. 18Aroochaa biin masqalee toommooch yooddiyeete; biinna tookkii bare gutteenaꞌon qanninaa yoochinooch, Yesuusin daggooch tuniiꞌi yooddiyeete.

19Phelaaxoosi wotta “Naazireetechi Yesuusi, Ayihudeenaꞌochi Taatoo” ii beeton kooriiꞌi masqalee toommooch xogiihe. 20Yesuusi yooddeti xaaꞌoo Yerusaalem katino bi tunetoyich, Ayihudeenaꞌo daggoochee meetinaꞌo hini are kooreeton shemmeheete; bi kooreetoo Hibiree noonoona, Roomee noonoonaa Giriikee noonoonane. 21Ebich qeeshee ukkireenaꞌo Phelaaxoosin “ ‘Hini aroo “Ayihudeenaꞌo taatoo taane” iꞌi itone’ getiree kooriballi, ‘Ayihudeenaꞌochi Taatoo’ getiree kooriyaahine” iyeete.

22Phelaaxoosiyoo “Ta kooriton koorito taane” iꞌi wochiye.

23Ginee naayinaꞌo Yesuusin boonoshi yoodditoyee gubb, bi taheenaꞌon daammii, boonoshi ikkikkoyich ikke qoodoo shaggemmoyich tuniiꞌi, awudde beera qoodiyeete. Kocheyaanoon baad shippeti genje bi tahoon wotta daammiyeete. Hini are genje taho ikke guude gawoani, guttoo xaaqqaa kocheto toonoone.

24Ebich ginee naayinaꞌo boonoshinaa boonoshina “Ixoo kuxaa konich bi kechemmo gaata, beegonalli keexxaayone” iyeete. Ebi bi tuneto,

“Ta taheenaꞌon boonoshinaa boonoshina qoodeeheete;

genje ta tahoochoo ixoon duppiyeete”#Shod. 22:18

ii beeti Yaafe Macaafee qaaro bi ceennemmoyichiye. Ginee naayinaꞌoo tuniito ebiniye.

25Yesuusi yooddeti masqalee gaꞌooch bi indee, bi indee manee, Qeliyoophi mechee Maariyaminaa Magidalechi Maariyamina neexee beeheete. 26Wotta bi indeenaa bi dabbeenaꞌo daggoochee bi shunniti ikkoona bi gaꞌooch neexee beetinaꞌon beeggiꞌi, bi indeen “Ta indeene, ebi ne bushoone” iye. 27Are bi dabboon “Meni ne indeene” iye. Aroochee tiyiꞌi are bi dabboo Yesuusichi indeen bi kexooch daammiye; are bi kexooch beehan.

Yesuusi Qitoo

(Maatiyoosi 27:45-56; Maariqoosi 15:33-41; Luqaasi 23:44-49)

28Ebiyee gubb, Yesuusi mooyo bulli ceenon ariiꞌi, Yaafe Macaafee qaaro ceennemmoyich “Shachewehoye” iye.#Shod. 69:21; 22:15 29Kiikkere woyinee uyoona ceenniti qiico arooch koteꞌi beehe; boonoshiyoo kiikkere uyee daggooch isponjoon hacciꞌi deebii hisoophee michi waamona bi noonooch giddiiheete. 30Yesuusiyoo kiikkeroon shuuciꞌi bi uchitoyee gubb, “Mooyo bulli ceennitone” iye; qelloochaa yittiye; bi kashoo abbetehe.

Yesuusichi Naaboo Kocheyoo

31Ebi aabo Qanniyee aaboone; Ayihudee ukkireenaꞌo yooddeti asheenaꞌo boonoshi doshoon tiishaa dubeno masqalee toommoochee bi kindemmoyich Phelaaxoosin qolleheete. Ebin boonoshi tuniito, shambetee aaboon dubeno masqalee toommooch bi tuneyachemmoyich, wotta are shambetoo bariti shambetoo bi tunetoyichiye. 32Ginee naayinaꞌo aafichochi doshoon, biinna tookkii yooddeti baroochi doshoonoo tiichiyeete. 33Tunetaa Yesuus waan boonoshi giddemmona, shiichiꞌi bi kasho abbetoon beeggiꞌi bi doshoon tiishaaneenaꞌone. 34Tunebaani ginee naayinaꞌo daggoochee ikkoo Yesuusichi naaboon ginoona kochiye; bekkech aroochee damoonaa aacona kechiye. 35Ebin beeggito miixetone; ittoshiyoo wotta Yeeri toommooch mulloon ittoshi tooꞌiyemmoyich miixetone. Bi miixeto iberoone; bi gettitoo iberoo bi tunoon arii beetone. 36Ebi bi tuneto, “Bi shaawushoochee ikkolla tiisheyaachemmone”#Key. 12:46; Had. 9:12; Shod. 34:20 getteeti Yaafe Macaafooch kooreeti qaaro ceennemmoyichiye. 37Wotta bare xaaꞌoochaa Yaafe Macaafooch kooreeti qaaro “Boonoshi kochiton beeggemminaꞌone” ii beetone.#Zaka. 12:10; Yaaꞌo. 1:7

Yesuusi Duukko

(Maatiyoosi 27:57-61; Maariqoosi 15:42-47; Luqaasi 23:50-56)

38Ebiyee gubb, Ayihudee ukkireenaꞌon bi shattitoyich aashoona Yesuusichi dabboo tuneti Arimaatechi Yooseefi Yesuusichi cahoon daamma Phelaaxoosin qollehe; Phelaaxoosiyoo Yooseefich daaggiye. Ebich Yesuusichi cahoon hammii kindiiꞌi daammiye. 39Wotta ebiyee aaf xumoona Yesuus waan waati Niqoodimoosi#Yowa. 3:1-2 shaashaa awudde kiilo giraam bede hareboonaa ereetoonon yechiꞌi waahe. 40Yesuusichi cahoon daammiꞌi Ayihudeenaꞌo duukkeebeeti doyoommona hini are hareboonaa cinnechi bare buddinoonon geddiꞌi andire kaafenoona kaappiyeete. 41Yesuusi yooddeti xaaꞌooch becheeti mixinaꞌo beetinaꞌone; are michi daggooch konichi dubenolla duukkeyaani andire oppo beehe. 42Ayihudeenaꞌochi Qanniyee aabo bi tunetoyich, wotta are oppo katino bi tunetoyich, Yesuusichi cahoon arooch duukkiyeete.

Currently Selected:

Yowannisi 19: KBRC

Highlight

Copy