Yowannisi 17

Bi Dabbeenaꞌoyich Yesuusi Corootoo

1Yesuusiyoo bi dabbeenaꞌoyich ebi bullin bi gettitoyee gubb, kaama shimaajj ciinniꞌi ishichiye: “Ta Nihoocho, saato shaggitone; ne Bushoo ta neen oogiyemmoyich taan oogiibe. 2Ne oogiyemmoo, taach ne immeti asheenaꞌo bullich bulli yemeenee kashoon ta immemmoyich, asho bulli toommooch taan doonjiiꞌa ne ukkiriitoyichiye. 3Ibere Nuggishoo ne baach tuneti neen boonoshi ariyoo, wotta ne deejjiti Yesuus Kiristoosin boonoshi ariyoo, ebi bulli yemeenee kashoone. 4Tuniibe iyaꞌa taach ne immeti shuunoon shuunaa ciichiꞌa, showee toommoochaa neen oogiito taane. 5Ta Nihoocho, alemo halleyaan beetaa, neenna tookkaa ta beehooba taan ne oogiyoommon andoo ne beetoochaa taan oogiibe.

6“Hini alemee daggoochee taach ne immeti asheenaꞌoyich ne shigoon arichiito taane. Boonoshi neechinaꞌone; newoo taach immehine; boonoshiyoo ne getteti qaaroon ceechitinaꞌone. 7Taach ne immeto bulli ne waanee bi tunoon and ariitinaꞌone. 8Ebiyoo taach ne getteto bullin boonoshich ta gettetoyichiye; boonoshiyoo waayetinaꞌone; ne waanee ta womon xiishoona ariitinaꞌone; taan wochaa ne deejjoonoo iberiitinaꞌone. 9Eboshich neen qollehoye; taach ne immeti asheenaꞌo neechinaꞌo boonoshi tunetoyich, boonoshich neen qollehoani, alemoyich qolleyaache. 10Taacho tuneto bulli neechone; neecho tunetoo taachone; tawoo boonoshina oogeto taane. 11Tawoo ne waan hammaabeeto taane; ebiyee gubb, alemooch beetaachemmo taane; tunebaani boonoshi alemooch beeyemminaꞌone. Yaafe ta Nihoocho, eboshi noochoommon boonoshi ikkottemmoyich, taach ne immeti ne shigoona boonoshin quyebe. 12Boonoshina tookkaa showee toommooch ta beehooba, taach ne immeti ne shigoona ta boonoshin quyeto taane, shiweto taane. Yaafe Macaafooch kooreeto ceennemmoyich, aalloyich kaacheti are uroyee damba koniyoona aalleyaanoone.#Shod. 41:9; Yowa. 13:18

13“Andoo ne waan hammaabeeto taane; ta emiroo ceenoona boonoshich bi beeyemmoyich, alemooch beebee ebin getteto taane. 14Ta ne qaaroon boonoshich immeto taane. Tawoo alemeexo ta tunee qayoommon, boonoshiyoo wotta tooneenaꞌone; ebich alemo boonoshin shixxitone. 15Gondoochi nihoo kishoochee boonoshin ne quyemmoyichalli, alemoochee boonoshin ne kichemmoyich neen qolleyaache. 16Tawoo alemeexo ta tunee qayoommon boonoshiyoo tooneenaꞌone. 17Ne iberoona boonoshin yaafibe; ne qaaro iberoone. 18Alemooch taan ne wochoommon, ebiyoommon tawoo alemooch boonoshin wocheto taane. 19Boonoshiyoo wotta iberittinoona yaafeetinaꞌo boonoshi tunemmoyich ta boonoshicha iyaꞌa ta qelloon neech yaafito taane.

20“Eboshi ikkeetinaꞌoyich baach tuneyaanoon, boonoshi gettiibeeti qaaroon waayoona ta toommooch mulloon tooꞌiyemminaꞌoyich wotta neen qollaabeeto taane. 21Ta qollaabeeto, boonoshi bulli ikkottemmoyichiye; taan ne deejjoon alemo iberiyemmoyich, ta Nihoocho, ne taanna ne beemoommon, tawoo neenna ta beemoommon, ebiyoommon wotta boonoshi noonna beebeete. 22Nowoo ikkoo no tunoommon boonoshi ikkottemmoyich, taach ne immeti oogee yiiroon tawoo boonoshich immeto taane. 23Hini oogee yiiroon ta immeto, ‘Tawoo boonoshina ta tunoona, newoo taanna ne tunoona bulli ikkoo tunebeete’ getoyichiye. Ebina taan wochaa ne deejjoon, taanoo ne shunnetoommon boonoshin ne shunon alemo ariyemmone.

24“Ta Nihoocho, alemo halleyaan beehooba, taan ne shunnetoyich, oogee yiiroon taach immehine; hini oogee yiiroon boonoshi beeggemmoyich, ebi taach ne immeti asheenaꞌo wotta taanna tookki ta beetooch boonoshi beeyemmoyich shunnoye.

25“Cadiqe ta Nihoocho, alemo neen ariyaanoone; tunetaa ta neen ariito taane; eboshiyoo taan ne deejjoon ariitinaꞌone. 26Taanoo ne shunneti shunoona bareenaꞌon boonoshi shunnemmoyich, tawoo boonoshina ta beeyemmoyich neechon boonoshich arichiito taane; battoo arichiyemmo taane” iye.

Currently Selected:

Yowannisi 17: KBRC

Highlight

Copy