Halloo 9
9
Yeeri Noohina Tookkii Wogoon Gimo
1Yeeri Noohinaa bi bushiishoonon ishichiꞌi diiriye: “Shiijje shiijjerebote; showoo bulliichoo ceenote.#Hal. 1:28 2Showeexi gijjeenaꞌonaa cooxinaꞌona, shimaayoona yoobbiibeeti yoobbereenaꞌo, yuummereenaꞌonaa bahareexi haasheenaꞌo bulloshina ittoshin shattii, keqqii beetinaꞌo tunebeete; boonoshinoo ittoshich immeto taane. 3Shuuriibeeti kashecho bulli ittoshich maayo tunebe. Ebiyee aaf showeexi collo bullin ittoshich ta imoommon, andoo wotta eboshi bullin ittoshich immeto taane.
4“Tunebaani damoo quupphiti meenon maayaahote. Ebiyoo damee daggooch kasho beetoyichiye. 5Iberoochaa ashi kashoon kichimmon echeyaanoon qayaachemmo taane. Gijjoo woyee cooxolla bi tunegaata, ashi kashoon bi kichigaata, biin echemmo taane. Ashi kashoon kichimmi asho koniyoona bi tunegaata, biin echemmo taane.
6“Asho, Yeeri ta malletoona halleetone;
ebich ashi damoon ukkimmochi damoon
bare asho ukkemmone.#Hal. 1:26-27
7“Tunebaani ittoshi shiijje shiijjerebote; shiijjereree showee toommo bulliich ceenote” iye.#Hal. 1:28
8Aroochee Yeeri Noohinaa bi bushiishoonoyich ishichiye: 9“Tawoo ittoshinaa ittoshiyee gubbi shiijjereenaꞌona tookki wogoon giyemmo taane. 10Ebi wogoon ta giyemmo, ittoshina tookkii markaboochee kechiti, kashechi halleenaꞌo bullina tookki, eboshiyoo yoobbereenaꞌo, gijjeenaꞌo, cooxinaꞌoo bulloshina tookki tunemmone. 11Wochinnoon meenon taheto bullin aalliyee aacona ta aalliyaachemmoyich, showee toommooch beeto bullinoo aalliyee aacona ta aalliyaachemmoyich, wogoon ittoshina tookki giyemmo taane” iye.
12Yeeriyoo daakkii ishichiye: “Taannaa ittoshina daggooch, wotta ittoshina tookkii beeti kashechi halleenaꞌo bulli daggooch, gubbi shiijjereenaꞌoyich ta giyemmi bulli yemeenee wogee malletoo ebine: 13Ta malletoo tuneti ximbittoon qubee daggooch geddemmo taane; ebiyoo taannaa showee toommo bulliich beetinaꞌonochi daggooch wogee malletoo tunemmone. 14Showee toommooch quboon ta tuniihooba, ta malletoo tuneti ximbittoo qubee daggooch bekkemmone. 15Ebiyooba taannaa ittoshina daggooch, wotta taannaa meenon taheti, kashechi halleenaꞌo bullina daggooch beeti ta wogoon gabemmo taane; aalliyee aaco meenon taheto bullin wochinnoon aalliyaachemmone. 16Ximbittoo qubee daggooch tunehooba, ciiniichi, taannaa showee toommooch beeti, meenon taheti kashechi halleenaꞌo bullina daggooch beeti, bulli yemeenee wogoon gabemmo taane” iye.
17Ebich Yeeri Noohich “Taannaa showee toommooch beeti, meenon taheti, kashechi halleenaꞌo bullina daggooch ta neechiti wogee malletoo ebine” iye.
Noohinaa Bi Bushiishoonochi Mooyo
18Markaboochee kechiti Noohi bushiishoo Sheemi, Kaaminaa Yafeetinane. Kaami Kanaanichi nihoone. 19Noohi bushiisheenaꞌo ebi keeminaꞌone; eboshichi yaroo shiijjee shiijjereꞌi, showoo bulliich ceenniye.
20 Noohiyoo goyee gochechone; shiichiꞌi woyinoon bechito, biine. 21Ikke areddoon ebi bi bechiti woyinoochee duucheti woyinee uyoon uchii mashehe; bi tahoon shoottiꞌi, duukkaanee daggooch shokkaachoon tokketehe. 22Kanaani nihoo Kaamiyoo shokkaachoo beeti bi nihoon beeggiye; maaxooch kechiꞌinoo, gutte bi maneenaꞌo Sheeminaa Yafeetinoyich gettiye. 23Boonoshiyoo bullikkoon boonoshi gogooch haxeꞌi, gubboona hammii boonoshi nihoo toommooch tajjiyeete; boonoshi nihoo achoon boonoshi beegaachemmoyich, boonoshi aafoon badd wochiichiiniye boonoshi tajjito.
24Noohiyoo ebi bi masho beshetaa tiyiꞌi, guuche bi bushoo tuniiton ariihe. 25Biyoo ishichiye:
“Kanaani uppeton tunebe!
Bi maneenaꞌoyichoo guuneexi guunon tunebe” iye.
26Daakkiinoo ishichiye:
“Sheemichi Nuggishoo, Doono Yeeri diireebe!
Kanaani Sheemich guuno tunebe!
27Yeeri Yafeetin gamichibe!
Sheemina tookki diggoona beebe;
Kanaani biichoo guuno tunebe” iye.
28Aalliyee aacoyee gubb, Noohi keejje ballaa aache naton beehe. 29Noohi yiixiye ballaa aacha nattiichii qitiye.
Currently Selected:
Halloo 9: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
