Halloo 38

Yihudinaa Tamaarinochi Mooyo

1Aroobee yemeenooba Yihudi bi maneenaꞌo waanee bariꞌi Adulaamee asho Hiraah waan kindiye; bi waanoo beemooch giyiye. 2Yihudi arooch beebee, Kanaanee asho Shuwichi busheen beeggiye; areenoo shaaggiꞌi biinna tookkii qeyiye. 3Biyoo xifaa anaami bushoon shiyahan. Yihudiyoo bi shigoon, Eeri ii shigiihe. 4Wochinnoon xifaa anaami bushoon shiyaꞌa, bi shigoon, Onaani iyaa shigiihan. 5Andoo daakkaa xifaa anaami bushoon shiyahan; bi shigoonoo, Seeli iyaa shigiihan. Ebi bushoon bi shiyeto, Yihudi Keziib bi beetenane.

6Yihudi bi gutenee bushoo Eerich Tamaari getteebeeti busheen shaakkiihe. 7Yihudi bushoo Eeri Doono Yeeri aafooch gonde ashoone. Doono Yeeriyoo biin naxetaa qitiye.

8Ebiyooba Yihudi bi bushoo Onaanin “No doyoommon, ne manoo mechee waan ne giyaa, ne manoo shigo biinna ceekkemmi bushoo shiijjebe” iye. 9Tunebaani Onaani, shiijjemmi bushoo biicho tunee qayon bi ariitoyich, bi manoo mecheen bi qeyimmi haddoona bi yaree aacon maach ukkii beehe. Ebina bi manoo shigoona bushoo shiijjeyaachemmoyich tuniihe. 10Ebi bi shuunoo Doono Yeeri aafoochaa gondo tuneꞌi bi bekketoyich, Doono Yeeri biin naxetaa qitiye.

11Yihudiyoo bi bushoo mechee Tamaarin “Ta bushoo Seeli diccii oogemmi wottoon, ne nihoo kexooch ne xuumittinoona kotebe” iye. Ebin bi gettito, bi bushoo Seeli bi maneenaꞌochoommon naxeeree qitemmone ii bi shattitoyichiye. Tamaariyoo Yihudi gettitoommon, hammaa bi nihoo kexooch kotahan.

12Meeti natoyee gubb Shuwichi bushee tuneti Yihudi mechee qitiyan. Yihudiyoo muushenee aaboon ciichiꞌi bi goggetoyee gubb, bi shunecho Adulaamee asho Hiraahina tookkii bi bageenaꞌochi eexon caggechinaꞌo tuneti bi shuunechinaꞌo waan, Timinaah hammiye.

13Asheenaꞌo Tamaarich “Ne abboo bi bageenaꞌo eexon cakkiyoyich Timinaah hammii beetone” iyeete. Ishin bi waayehooba, 14bi xuumittinee tahoon shoottahan; koni bi gaata bi aricheyaachemmoyich, bi aafoon qoreddoona kaappahan; Timinaah daammiibeeti gommooch beeti, Enayimi gime kaattooch kechaa kotahan. Ebin bi tuniito, Seeli diccii oogeechaa bi nihoo Yihudi, bushoo biin woraashemmoyich tuniyoo bi qajjitoyichiye.

15Bi aafoon qoreddoona kaappeti Tamaarin Yihudi beeggiꞌi, “Hini caare ureene” ii gabiye. 16Bi bushoo mechee bi tunoon ariyaanoon, ure beeti gommi gashooch, bi waan giddeꞌi, “Neenna tookki qebona” iye.

Ureyoo “Taanna tookki ne qeyemmoyich, amoon taach immenne?” iyaa echahan.

17Biyoo “Ta gijjeenaꞌo daggoochee ikke emmishee baaddoon neech deejjemmo taane” iye.

Ureyoo wochaꞌa, “Ebi emmishee baaddoon ne deejjimmi wottoon, amee yechiyoon taach immenne?” iyaa echahan.

18Biyoo “Amee yechiyoon neech imbote?” iye.

Ureyoo “Ne qettooch beeti qalibetee maatemoon bi tifoona tookki, wotta hini ne kishooch beeti gumboon taach imbe” iyan. Yihudiyoo ure echeton immiye. Ebina ureena tookkii qeyiye. Biyoo xifahan. 19Aroochee wottaa hammahan. Bi aafoon bi kaappeti qoreddoon shoottaachaa, aafi bi xuumittinee tahoon wochaa tahahan.

20Yihudi, yechiyoo bi immiti qiiceenaꞌon wochiyoyich, emmishee baaddoon bi shunechi, Adulaamee asho kishoona daachiihe. Tunebaani uro hammiꞌi ureen danoon hakkaanoone. 21Biyoo arooch beeti asheenaꞌoyich “Enayimi gime kaattooch beeti, caare ure aayane?” ii echehe.

Asheenaꞌo “Hiniich caare ure ciroona aalleene” iyeete.

22Uroo Yihud waan wottee hammiꞌi, “Ureen qaawaa mucceto taane. Areexi asheenaꞌo ‘Hiniich caare ure ciroona aalleene’ itinaꞌone” iye.

23Yihudiyoo “Emmishee baaddoon biich daachiihoye; tunebaani ureen danoon hakkaano neene. Asheenaꞌo noon cooneyaachemmoyich, illa are bi daammeti yechiyoo bi waan echebe” iye.

24Keejje agenoyee gubb asheenaꞌo, “Ne bushoo mechee Tamaari qocoo gondetine; caaraꞌa xifetine” ii Yihudich gettiyeete.

Yihudiyoo “Katemoyee maach ittoshi kichaa, qaaqqooch gokkebu” iye.

25Biyoo yeshaa hammaabee, bi abboyich “Ta xifeto, ebi qiiceenaꞌochi doono waaneeniye” iyaa wochaa daachiihan. “Wotta bi tifoona tookkiꞌi beeti qalibetee maatemoonaa ebi gumboona konicho gaata, eke beege” iyan.

26Yihudiyoo ebi qiiceenaꞌo biichinaꞌo boonoshi tunoon ariiꞌi, “Ta bushoo Seelich biin woraashiyoo ta qajjetoyich, aree tayee gaawiyane” iye. Aroyee gubb biinna tookkii wochinnoon qeyaanoone. 27Tamaariyoo shiyi bi beddemmona, bi xifeto qaappoo bi tuno arichehe. 28Shiya maaxoo manjaa bi beetaa, ikkoo bi kishoon shiichii kichiye. Yechaa shiijjechiyoo “Hini shiichite” iyaa ceelle woshiqoon bushoo kishooch tippahan. 29Tunebaani bi kishoon wochii bi giijjimmona, bi manoo shiichiꞌi shiijjehe. Yechaa shiijjechiyoo “Aabichaa beshaa kechenne” iyan. Ebich bi shigo, Feretsi#38:29 Feretsi geto, “Beshee kechi” getone. getteehe. 30Aroochee bi kishooch ceelle woshiqoo tippeti bi manoo shiijjehe; bi shigoo, Zaari#38:30 Zaari geto, “Ceello” woyee “Haree aabee kooyo” getone. getteehe.

Currently Selected:

Halloo 38: KBRC

Highlight

Copy