Halloo 32

Yaaqobi Bi Manoo Esayina Daneya Qannoo

1Yaaqobi gommon qaxirii bi beetaa Yeerichi maraakeenaꞌo biinna daneheete. 2Yaaqobi boonoshin beeggiꞌi, “Ebi Yeerichi ginee kaamboone” iye. Ebich ebi xaaꞌee shigoon, Mahanayimi#32:2 Mahanayimi geto, “Gutte ginee kaambo” getone. ii shigiihe.

3Yaaqobiyoo Edoomee showooch, Seyir beeti bi manoo Esay waan wocheyechinaꞌon shiichii daachiihe. 4Boonoshich ishichii gettiye: “Ta doono Esayich ishichibote; ‘Ne guuno Yaaqobi ishichitone: “Labaan waan kotaꞌa and beddaahaa arooch beehoye. 5Meeti miimon, kuroon, bagoonaa emmishoonon, gonneenaa guunonon danoye. And hini wochoon ta doono ne waan ta daachiibeeto, ne aafoochaa gidoon ta danemmoyichiye” itone’ getote” iye.

6Wocheyechinaꞌo hammii, wottee waaꞌi, Yaaqobich “Ne manoo Esay waan hammeto noone; biyoo neenna daneya waa beetone. Biinna tookkii awudde balle asheenaꞌo waa beetinaꞌone” iyeete.

7Yaaqobiyoo oogeton keqqii shattiye. Biinna tookkii beeti asheenaꞌon, miiminaꞌon, bageenaꞌonaa emmisheenaꞌonon, gaaleenaꞌonoo gutte beera qoodiye. 8Ebin bi tuniito, “Esayi waa ikke beereexon bi aalliigaata, ohi murici wodemmone” ii bi gabitoyichiye.

9Arooba Yaaqobi ishichii corootiye: “Ta nihinihoo Abrahamichi Nuggishoo Yeero, ta nihoo Yisaaqichi Nuggishoo Yeero, ‘Ne showoonaa ne xibeenaꞌona waan wotteree hambe. Tawoo neech gaawe mooyon tuniyemmo taane’ iti Doono Yeero, 10ne gibeneyoona ne guuno taach ne tuniiti deꞌittino bullich beddeti asho toono taane. Yoordaanoosin ta kimiyooba, ta kishooch ta yecheti gumbeyee besh amolla taach aalloone; tunebaani and gutte kuxi ashoonaa gijjoonon yecheto taane. 11Ta manoo Esayichi kishoochee taan ne wodiyemmoyich neen qollehoye. Biyoo waaree, ‘Taan, ebi indeenaꞌonoo boonoshi bushiishoona tookki wuxi aalliyemmone’ iyaa shatteto taane. 12Tunebaani ne taan ‘Neech gaawe mooyon tuniyemmo taane; ne shiijjereenaꞌon haddaa ciyaani baharee gasheexi qacoochoommon meechemmo taane’ ito neene” iye.#Hal. 22:17

13Aroobee xum Yaaqobi arooch qeyiye. Maaddoona tiyii bi manoo Esayich bi immemmi mattaayoon,#32:13 Mattaayoo, ikke asho iraashoo waanee woyee biyee damboo tuneti ashi waanee gidoon danoyich bi immiibeeti imoone. biich beeti gijjeenaꞌo daggoochee bariiꞌi kichiye. 14Ebiyoo gutte balle maache emmisheenaꞌo, hiye emmishee baaddeenaꞌo, gutte balle maache bageenaꞌo, hiye bagee baaddeenaꞌo, 15xaachiibeeti shaashe gaaleenaꞌo boonoshi bushiishoona tookkii, aabbe miinji indeenaꞌo, aashire gatteenaꞌo, hiye maache kureenaꞌonaa aashire anaami kureenaꞌonane. 16Ebi gijjeenaꞌon kuxi kuxona qoodii bi guunoyich bi immitoyee gubb, boonoshich ishichiye: “Ittoshi tayee shiichiree aaf hambote. Ebi gijjeenaꞌon kuxi kuxona wokkii wokkiiree gashebote” iye.

17Shiichiꞌi hammitoyich ishichiye: “Ta manoo Esayi neenna daneꞌi, ‘Konicho neene? Amoochiye ne hammaabeeto? Ebi gashaa ne daammaabeeti gijjoo, konichone?’ ii neen bi echegaata, 18‘Ne guuno Yaaqobichone. Ta doono Esayich bi deejjiti mattaayoone; biyoo no gubb waa beetone’ gete” iye.

19Ebiyoommon guttinnoyich, keejjinnoyich, gijjeenaꞌon gashee daammii beetinaꞌo bullichoo ishichii gettiye. “Esayina ittoshi danegaata, ebin getote. 20Wotta ‘Ne guuno Yaaqobi no gubb waa beetone’ geton batteyaahote” iye. Yaaqobi ebin bi tuniito, “Esayi taanna danoyee shiichii ta mattaayoo biich shagigaata, diqqich bi kaaro aqqetaa gaawe aafoona taan ciinnemmone” iꞌiniye. 21Ebich Yaaqobi mattaayoon biyee shiichii daachiihe; tunebaani aroo are bi beeti xaaꞌooch qeyiye.

Phiniꞌeelaa Yaaqobi Qiicco

22Arooba xumoona Yaaqobi tiyiꞌi, bi gutte mecheenaꞌonaa bi gutte gonneenaꞌonon, aaraa ikke bi anaami bushiishoonoo yechii Yaabooqi aacon kimmiye. 23Boonoshin bi kiichitoyee gubb, ebiyoommon biich beeto bullin kiichiye. 24Tunebaani Yaaqobi bi ikkeeto arooch echehe. Ikke uro showoo hariya beddimmi wottoon biinna qiiccee beehe. 25Are uro Yaaqobina qiicceꞌi wochoon hakkaachemmo bi tunoon ariiꞌi, Yaaqobichi gallee qumbaafoon yechiye. Qiiccoochaa Yaaqobichi gallo holliye. 26Arooba uro ishichiye: “Hariya gaargaaritone; ebich taan ne gawukkaa hambona” iye.

Yaaqobiyoo “Tuneyaache! Taan ne diiraanoon neen gawukkaache” iye.

27Uroo “Ne shigo konine?” iye.

Biyoo “Yaaqobine” iye.

28Uroo “Ebiyee bekk ne shigo Yaaqobi getteyaaye; Yeerinoo ashoonoo qiiccaꞌa ne wochitoyich, ne shigo Israꞌeeli#32:28 Israꞌeeli geto, “Yeerina tookkii qiicceebeeto” getone. getteebe” iye.

29Yaaqobi “Ne shigoon taach gete” ii qollehe.

Uroo “Ta shigoon ariyoyich aakkiya qaawinne?” iye. Are xaaꞌoochaa Yaaqobin diiriye.

30Ebich Yaaqobi “Yeerina tookkaa baroona ta danetaanona, ta kashe qitaanoon muriccetine” iꞌi, ebi xaaꞌoon Phiniꞌeeli#32:30 Phiniꞌeeli geto, “Yeerichi baroo” getone. iye. 31Phiniꞌeelin beshee bi hammaahaa, showoo harii aabe kechahan. Biyoo bi gallo hollitoyich, hekkelleebee hammiye. 32Ebich Israꞌeeleenaꞌo hanaach beddaahaa gallee qumbaafee toommooch beeti biddee meenon maataaneenaꞌone. Ebiyoo Yaaqobichi gallee qumbaafee maqqoon bi yechitoyichiye.

Currently Selected:

Halloo 32: KBRC

Highlight

Copy