Halloo 27

Yisaaqi Yaaqobin Diiroo

1Yisaaqi geenee baayeꞌi bi aafo yaamehooba, bi qaabbe bushoo Esayin ceeggiꞌi ishichiye: “Ta bushoocho!” iye.

Esayiyoo eekkehe.

2Yisaaqiyoo ishichiye: “Ebeege, geeneto taane. Aata ta qitemmo gaata ariyaano taane. 3Ebich and cooxon ne wuxaabeeti maꞌoonaa shangoonon yeshiree, kubbooch hambe. Cooxonoo wuxiree deebe. 4Qitaan beechi, neen ta diiremmoyich, ta shunnaa beetoommon tunii shaawujji shuuneree, taach giddiibe” iye.

5Arooba Yisaaqi bi bushoo Esayich ishin bi gettii beetaa, Ribiqi waayaa beehan. Ebich Esayi deꞌa iꞌi cooxon wuxi deeba kubbooch bi hammiichaa, 6Ribiqi bi bushoo Yaaqobich ishichiyan: “Ne aabbi ne manoo Esayich, 7‘Cooxon wuxi deebi, shaawujji shuuneree, taach ne giddiitaa maachi, qitaan beebee Doono Yeeri aafoochaa neen diiribona’ ii bi gettii beetaa waayeti taane. 8And ta bushoocho, neech ta gettaabeeti mooyon waayebe. 9And hamiree gutte gaawe emmishee bushiishoon taach deebe. Tawoo ne aabbi shunnii beetoommon tunii shaawujjiree shuunemmi taane. 10Aroochee qitaan beebee neen bi diiremmoyich, biich daami ne giddiitaa mame” iyan.

11Yaaqobi bi indee Ribiqich ishichiye: “Ta manoo Esayichi ashittino shokke eexone; tunebaani taacho naalloone. 12Taabbi taan shafeꞌi bi ariigaata, biin dawushito ta tunoon ariyemmone; ebi tunegaata, diiroon tuneyaanoon ufon ta toommooch deebemmo taane” iye.

13Bi indeyoo wochaꞌa, “Ta bushoocho, ebi ufo ta toommooch tunebe. Aaxxiyaahine; ta getteton baach waayebe. Hamiree taach deebe” iyan.

14Ebich hammii deebii bi indeech immiye. Biyoo Yisaaqi shunnii beetoommon tuniyaꞌa shaawujjaa kachiihan. 15Aroochee kexooch beeti, bi qaabbe bushoo Esayichi gaawe tahoon deebaa, bi guuche bushoo Yaaqobich tajjiyan. 16Emmishee gooqqoon deebaa, Yaaqobichi kishoonaa naalloo tuneti bi qettoonooch geddahan. 17Aroochee bi qanniiti shaawi maayoonaa koshonon Yaaqobich immahan.

18Yaaqobiyoo bi nihoo waan yechii hammiꞌi, “Taabbo!” iye.

Yisaaqiyoo eekkeꞌi, “Ta bushoocho, ne koni neene?” iye.

19Yaaqobiyoo bi nihoyich “Ta, ne gutenee bushoo Esayi taane. Ne gettetoommon tuniyaꞌa deebeto taane. Taan ne diiremmoyich, wuxaa qannaayaꞌa ta deebetoochee, eke kaama tiyi koteree mame” iye.

20Yisaaqiyoo bi bushoon “Ta bushoocho, ebi aati goora danaꞌa waanne?” iye.

Yaaqobiyoo “Ne Nuggishoo Doono Yeeri taach kaatee daniiteenane” iye.

21Yisaaqiyoo Yaaqobin “Ta bushoocho, ne, iberoon ta bushoo Esayi ne tunoon ta ariyemmoyich, eke hach ta waan ne giddetaa shafebona” iye.

22Yaaqobiyoo bi nihoo Yisaaq waan giddehe. Bi nihoo bi kishoona shafeebee, “Hini qaaro Yaaqobi qaaroone; tunebaani kishoo Esayi kishoone” iye. 23Bi kishoo bi manoo Esayi kishoommi eechecho bi tunetoyich, Yisaaqi Yaaqobin bariiꞌi ariyaanoone. Ebich Yaaqobin diiriye. 24Yisaaqiyoo “Iberoon ta bushoo Esayi neene?” ii echehe.

Yaaqobiyoo “Eeha taane” iye.

25Aroochee Yisaaqi “Eke illa ta bushoocho, neen ta diiremmoyich, wuxaꞌa qannaayaa ne deebetoochee taach ne giddiitaa mamona” iye.

Yaaqobiyoo maayoon bi nihoyich giddiihe; woyinee uyoonoo deebiye. Biyoo maa uchiye. 26Aroochee bi nihoo Yisaaqi Yaaqobin, “Ta bushoocho, eke hach gidderee taan shumbe” iye.

27Yaaqobiyoo giddeꞌi shummiye. Yisaaqiyoo Yaaqobichi tahee cinnoon shiiqqeꞌi tiyii ishichii diiriye:

“Ebiyoche, ta bushoo cinno

Doono Yeeri diiriti budochi cinnoommone.

28Yeeri shimaajji shuxoon, showee qeemon,

beshaa beshiti maayoonaa woyinee uyoonon neech imbe.

29Aageteenaꞌo neech hajjeebeete;

aagetee asheenaꞌo neech goyinnebeete.

Ne maneenaꞌo toommooch doonon tunebe.

Ne indee shiyetinaꞌo neech yiti goyinnebeete.

Neen uppimmo koniyoona uppeto tunebe;

neen diirimmo koniyoona diireeto tunebe”#Hal. 12:3 iye.

Esayi Yisaaqin Diiree Qollo

30Yisaaqi Yaaqobin diirii bi ciichitoyee gubb, Yaaqobi bi nihoo Yisaaq waanee kechii hammiye. Bekkech areegaata, Esayi kubboochee waa giyiye. 31Esayiyoo wotta shaawi maayoon qanniiꞌi bi nihoyich deebii, “Taabbo, tibe. Taan ne diiremmoyich, wuxaꞌa qanniyaa ta deebetoochee mame” iye.

32Yisaaqiyoo “Ne koni neene?” iye.

Biyoo “Ta, ne gutenee bushoo Esayi taane” iye.

33Yisaaqiyoo oogeton keqqiꞌi wotwotii qeweebee, “Ishigaata, shiichii wuxii bi deebiton taach maanjito konine? Ne womoyee shiichaa maaꞌa diirito taane; iberoon aroo diireeton tunemmone” iye.

34Esayi ishin bi nihoo getaa waayeꞌi, bi qaaroon oogichii tiittee eeppiye. Bi nihoonoo “Taabbo, taanoo wotta diiribe” iye.

35Yisaaqiyoo “Ne manoo maroona waaꞌi, ne diiroon deqqitone” iye.

36Esayiyoo “Yaaqobi bi getteeto tatoone. Ebina gutte wottoon taan dawushiye; shiichii ta qaabbittinoon deqqiye;#Hal. 25:29-34 and wotta taach icheshi diiroon boggiye” iye. Wotta Esayi bi nihoon “Taach ne echiiti diiroo amolla aalle?” ii echehe.

37Yisaaqiyoo wochii Esayich ishichiye: “Ebiyoche, ne toommooch biin doonjiito taane; bi maneenaꞌo bulli biich hajjeyemmoyich, maayoonaa woyinee uyoona biich abbetemmoyich diirito taane. Ta bushoocho, illa neech amoon hallibote?” iye.

38Esayiyoo bi nihoon “Taabbo, neech beeti diiree ikke baachiye? Taabbo, taanoo wotta diiribe” iye. Biyoo tiittee eeppiye.

39Yisaaqiyoo wochiꞌi ishichiye:

“Ne beeyemmo, qeemi showoochee,

shimaajji shuxoocheenoo wohireeshiye.

40Ginoona beeyemmo neene;

ne manoyichoo hajjeyemmo neene.

Tunebaani bi toommooch ne tiyihooba,

bi waanjoon ne qettoochee duppemmo neene” iye.#Hal. 36:8; 2 Taat. 8:20

Yaaqobi Labaan Waan Aasheya Hamo

41Bi nihoo Yaaqobin bi diiritoyich, Esayi Yaaqobin shixxiye. Esayi bi mulloona “Ta nihoo and qitiya bedditone. Eefoyee gubb ta manoo Yaaqobin wuxemmo taane” ii gabiye.

42Ribiqi bi qaabbe bushoo Esayi gabiti gaboon waayahan; guuche bi bushoo Yaaqobinoo ceekkiyaꞌa ishichiyan: “Ne manoo Esayi neen wuxiya bi gabitoyich and kashetone. 43Andoo ta bushoocho, neech ta gettaa beeton tuniibe. Karaan beeti ta manoo Labaan waan kaate maxxebe. 44Ne manoo ippo beshemmi wottoon, giisheche aaboon arooch beebe. 45Bi ippo beshetaa, bi toommooch ne tuniiti mooyon bi battehooba, wotteree ne woyemmoyich, wochiyemmi taane. Amoyichiye ittoshi guttoon ikke areddoon ta muccemmo?” iyan.

46Aroochee Ribiqi Yisaaqich “Esayi shaaggiti Hitee maacheenaꞌochi naboona beemo taach caammitone. Yaaqobiyoo wotta hini showeexi Hitee maache bushiishoo daggoochee mecheen shaaggemmo bi tunegaata, qitoo taach gaawiye” iyan.

Currently Selected:

Halloo 27: KBRC

Highlight

Copy