Halloo 12

Doono Yeeri Abraamin Ceego

1Ikke areddoon Doono Yeeri Abraamich ishichiye: “Ne showoochee, ne xibeenaꞌo waanee, ne nihoo kexoochee keyiree, neech ta bekkiyemmi showooch hambe.

2“Meeti shiijjereenaꞌon neech ta imaa,

boonoshiyoo aricheti aagetoon tunemminaꞌone.

Neen diiremmo taane;

ne shigoonoo aricheto tuniyemmo taane.

Ebich meeti asheenaꞌo neenna diireyemminaꞌone.

3Neen diirimmon diiremmo taane;

neen uppimmon uppemmo taane;

showee toommooch beeti ashi yareenaꞌo bulli

neenna diireyemminaꞌone” iye.

4Abraamiyoo Doono Yeeri biich bi gettitoommon, Karaanee tiyii hammiye; Looxiyoo biinna tookkii hammiye. Ebiyooba Abraami shabaa uuche nati ashoone. 5Abraamiyoo bi mechee Saarayin, bi manoochi bushoo Looxin, boonoshi gijjoonaa Karaanaa boonoshi daneti guuninaꞌo bulloshinon yechiꞌi tiyiye; boonoshiyoo Kanaanee showooch qaxiriyeete.

Kanaanee showooch shaggiꞌi, 6Abraami Shekeem beeti Mooreehi gorooch beddaahaa, besheꞌi hammiye. Ebiyooba Kanaaneenaꞌo ebi are showooch beeheete. 7Doono Yeeri Abraamich bekkeꞌi, “Hini showoon ne yaroyich immemmo taane” iye. Ebich Abraami biich bekketi Doono Yeerich goyinneya, are xaaꞌooch deejjee gudoon shuunehe.

8Aroochee tiyiꞌi, Beeteelaa aabi-keyo waan, guudinaꞌo beeti showooch hammiye. Aroocheenoo Beeteelin aabi-gimo waan, Aayin aabi-keyo waan tuniiꞌi, bi duukkaanoon xogiye. Aroochaanoo wotta deejjee gudoon shuuneꞌi, Doono Yeerich goyinnehe. 9Abraami aroochee tiyiꞌi qaxiriibee, Negeebi barahoo waan hammiye.

Abraami Gibits Hamo

10Arooba Kanaanee showooch shaacoo giyiye. Giidechi shaacoo giyitoyich, Abraami ebi shaacoo beshemmi wottoon koteya desh, Gibits hammiye. 11Gibitsee showooch giya katinniichii, bi mechee Saarayich ishichiye: “Ikke mooyon neech getone; mallet gaawe ne tunoon ariibeeto taane. 12Gibitsee asheenaꞌo neen beegiree, ‘Bi mecheene’ getiree taan wuxiichi kashoona ne beeyemmoyich neen tuniyemminaꞌone. 13Ebich ne naboona taach bi gaawemmonaa ta kasho wodemmonoyich, ‘Bi manee taane’ gete” iye.

14Abraami Gibits bi shaggiyooba, Gibitsee asheenaꞌo Saarayi oogeton mallet gaawe ure bi tunoon beeggiyeete. 15Faroonichi iraasheenaꞌo beeggiꞌi, ureen Farooni aafoochaa worganee naadiyeete; ebina ureen taatoochi mechee bi tunemmoyich, bi kexooch daammiyeete. 16Taatoo ureechi naboona Abraamich gaawe mooyon tuniihe; biichoo bageenaꞌon, miiminaꞌon, kureenaꞌon, gaaleenaꞌon, wotta gonneenaꞌonaa guuninaꞌonon immiye.

17Tunebaani Doono Yeeri Abraami mechee Saarayichi naboyich Farooninaa bi kexeexi asheenaꞌo bullinon ooge naxoona yexxiye. 18Ebich Farooni Abraamin ceekkiiꞌi ishichiye: “Ebi shaahe mooyon amoyich ta toommooch tuniinne? Ne mechee bi tunoon amoyich taach getaachine? 19‘Ta maneene’ iyaꞌa shaagga ta daammemmoyich amoyich tuniinne? And illa ebeege ne mechee; yeshi hambe” iye. 20Aroochee Farooni bi asheenaꞌo Abraamin boonoshi kichi daachiyemmoyich gettiye. Boonoshiyoo Abraamin, bi mecheenaa biich beeto bullinon Gibitsee kichii daachiiheete.

Currently Selected:

Halloo 12: KBRC

Highlight

Copy